Te Tali Ki ʼAkotou ʼu Fehuʼi
◼ Koteā te ʼu meʼa ʼe tonu ke manatuʼi mokā ʼe gāue he ʼu kokelekasio e lua peʼe laka atu ʼe lea kehekehe ʼi he telituale pe e tahi?
Ko Te Minisitelio ʼo Te Puleʼaga, (fakafalani) ʼo Sūnio 1984, ʼi te kupu tāfito ʼaē “Fakahā ʼo te logo lelei” neʼe ina ʼui fēnei: “Ko te kau fai faka mafola ʼo te ʼu kokelekasio fuli ʼe tonu ke nātou fakatuʼutuʼu tanatou ʼu faiga ki te hahaʼi ʼaē ʼe lea tahi mo nātou.” Ko tona tupuʼaga ʼaē ko te ʼu vaevae ʼo te telituale ʼi te ʼu koga meʼa ʼe lahi ai te hahaʼi ʼe lea kehekehe ʼe fai ʼo mulimuli ki te lea. Ko te ʼu kokelekasio ʼaē ʼe nātou gāue ʼi he telituale ʼe lahi te hahaʼi ʼe lea kehekehe ʼe lagi tonu anai ke nātou fai he lisi ʼo te ʼu ʼapi ʼaē ʼe mole tonu ke ʼaʼahi e tanatou kau fai faka mafola. Ko te maʼua ʼaia ʼo te ʼu tagata taupau ki te gāue ʼo te ʼu kokelekasio ʼo te ʼu lea ʼaia ke nātou faka felogoi ʼo fai he fakatuʼutuʼu ke gāueʼi fakalelei te telituale pea mo taki te hahaʼi ʼaē ʼe fia logo ki te moʼoni ke nātou fakatahi mo te kokelekasio ʼaē ʼe lea tahi mo nātou. ʼE tonu ke fai te meʼa ʼaia ke ʼaua naʼa fakalelu te hahaʼi e te kau fai faka mafola ʼo te ʼu kokelekasio ʼe lea kehekehe, lagi ʼi te uhu peʼe ʼi te hoʼatā pe e tahi. ʼE mole tou fia “fakatupu he fihi ki te logo lelei ʼo ʼuhiga mo Kilisito.”—1 Ko. 9:12.
Mokā ʼe ʼaoga ke fai he ʼu fakatonutonu ʼuhi ko te fetogi e te hahaʼi ʼo tonatou nofoʼaga, koutou foimo ʼave te ʼu higoa pea mo te ʼu tuʼasila ʼo te ʼu hahaʼi ʼaē neʼe fia logo, ki te kokelekasio ʼaē ʼe lea tahi mo nātou. Ko te faʼahi ʼaia ʼe tokoni anai ki te fakafoʼou ʼo te ʼu kate ʼo te telituale. Ko te ʼofa, te fetokagaʼaki, te mahino, te fakapotopoto, pea mo te faifaitahi ʼe ʼaoga tāfito.—Filp. 4:5.
Mokā fai te fagonogono faigamālie, ʼe feala ke ʼave e te kau fai faka mafola tanatou ʼu tohi ʼi te ʼu lea kehekehe. Kae, mokā tou fai faka mafola ʼi te ʼu ʼapi, ʼi te agamāhani ʼe mole tou fakahā anai he tohi ʼi he lea ʼa he tahi atu kokelekasio. Tou manatuʼi ko te ʼu telituale ʼi te ʼu koga meʼa ʼaia neʼe teuteuʼi ʼo ʼalutahi mo te lea, koia ko te kau fai faka mafola ʼaē ʼe nātou tuku he ʼu tohi ʼe feala hanatou fakaafe te hahaʼi ʼaē ʼe fia logo ki te moʼoni ki te ʼu fono ʼo te kokelekasio ʼaē ʼe fai ʼi te lea ʼaē ʼe mahino lelei kiai peʼe ko te lea ʼaē ʼe fia logo kiai.
ʼE mahino ia ʼi he temi ki muli mai ʼe ʼi ai anai niʼihi ʼe nātou toe fai te telituale. Kae ohage ko te tala e te alatike ʼaē ʼe tuʼu ʼi ʼoluga, “ ʼe lelei ke tou manatuʼi tuʼumaʼu mokā tou fai faka mafola, ko tatatou fakatuʼutuʼu ko te fai ʼo ni ʼu tisipulo—ko te akoʼi ʼo te moʼoni. (Mat. 28:19, 20) Ko te ako ʼe tonu anai ke fai ʼi te lea ʼaē ʼe mahino lelei kiai te hahaʼi. (1 Ko. 14:9)” ʼAki tatatou faiga ʼi totatou minisitelio ki te hahaʼi ʼaē ʼe mahino lelei peʼe nātou fia fai ki te lea ʼo te kokelekasio ʼaē ʼe tou kau kiai, ʼe feala ke tou fai he meʼa ʼe lahi ʼaupito moʼo tokoni ki te hahaʼi ke nātou maʼu te maʼuli.