Kā Ko He Tahi ʼe Palalau ʼi He Tahi Age Lea
1. He koʼē ʼe ʼaoga ke lelei age tatatou felagolagoʼaki mokā tou gāue ʼi te telituale?
1 Kua tuʼa lahi, ia te maʼu e te kau fai fakamafola ʼo te Puleʼaga ʼi te mālamanei kātoa, ia he ʼu hahaʼi ʼe natou fia mahino kae natou palalau ʼi he tahi age lea ʼi te lea ʼo tanatou kōkelekāsio. ʼI te fakatuʼutuʼu moʼo lagolago ki te gāue fai fakamafola ki te faʼahiga hahaʼi ʼaia, ʼe lahi te ʼu filiale neʼe natou tokagaʼi ʼe ʼaoga ke ʼi ai he ʼu kiʼi kūtuga peʼe ko he ʼu kōkelekāsio ʼi he tahi age lea. ʼUhi ko te lahi ʼo te ʼu lea ʼaē ʼe lagi fakaʼaogaʼi ʼi te ʼu telituale ʼaia, ʼe lahi te ʼu kōkelekāsio ʼi te lea kehekehe ʼe lagi natou fai fakamafola ʼi he telituale pē e tahi. ʼE feafeaʼi ki te ʼu kōkelekāsio hanatou felagolagoʼaki, ke feala ai ʼo he ʼiloʼi papau, ʼe fakahoko ia te gāue fai fakamafola ʼo mulimuli ki te fakatuʼutuʼu ʼaē kua fai?—1 Ko. 14:33.
2. Kā tou fai fakamafola ʼi te ʼu ʼapi, ʼe feafeaʼi hatatou felōgoi mo he kūtuga peʼe ko he kōkelekāsio ʼi totatou telituale ʼe palalau ʼi he tahi age lea?
2 He Felagolagoʼaki: Kā fai fakamafola ʼi te ala peʼe ʼi te fagonogono faigamālie, ʼe tonu kiā ia ʼaē ʼe fai fakamafola ke ʼaua naʼa tuʼania, kae ke faigafua tana felōgoi mo he tahi pē, ʼo kau kiai ia nātou ʼaē ʼe lagi mole tou lea tahi, pea mo ina foaki age ia te ʼu tohi ki te hahaʼi ʼi te lea ʼaē ʼe natou fia lau ai. Kae, kā ʼalu ʼo fai ia te ʼu ʼapi ʼi he telituale ʼe toe gāueʼi e he tahi kūtuga peʼe ko he tahi kōkelekāsio ʼi he tahi lea, ʼi te agamāhani, ʼe tonu kiā ia ʼaē ʼe fai fakamafola ai ke ina fai pē te ʼu ʼapi ʼo nātou ʼaē ʼe palalau ʼi te lea ʼo te kōkelekāsio ʼaē ʼe kau kiai. Kā fai fakamafola he ʼu kōkelekāsio kehekehe ʼi he telituale pē e tahi, ʼe natou tokagaʼi ai ia te maʼuhiga ʼaupitō ʼo te tohi fakalelei ʼo te gāue fai fakamafola. ʼE tonu anai ke felagolagoʼaki pea mo gāue tahi ia te ʼu taupau ki te gāue ke fua lelei kiā nātou fuli. (Taag. 11:14) Kae, kapau ʼe tou maʼu he tahi ʼe palalau ʼi he tahi age lea ʼi te temi ʼaē ʼe tou fai fakamafola ai ʼi te ʼu ʼapi kae ʼe mole ʼi ai he kōkelekāsio ʼo te lea ʼaia ʼe ovi mai, ʼe tonu anai ke tou faiga fakamālotoloto ke tou fai ki ai te gāue pea mo haga hoko atu tana fia logo.
3. ʼE tonu ke feafeaʼi tatatou aga, mokā tou felāveʼi mo he kau fai fakamafola ʼo he kiʼi kūtuga peʼe ko he tahi kōkelekāsio ʼe palalau ʼi he tahi age lea, ʼe gāue ʼi tatatou telituale?
3 Ko He Gāue ʼe Tatau: ʼE tonu anai ke feafeaʼi ia tatatou aga, mokā ʼomai he kau fai fakamafola ʼo he tahi ʼu kōkelekāsio, ʼo tou fai fakamafola fakatahi ʼi he telituale ʼi te ʼaho pē ʼaia? ʼE mahino ia, ʼe fakalaka age anai ia totatou ʼofa Fakakilisitiano, ʼi te kehekehe ʼo te ʼu lea pea ʼe tou tōkakaga tāfito anai ʼo ʼuhiga mo te ʼu meʼa ʼaē ʼe ʼaoga ki te hahaʼi ʼo te telituale. (Soa. 13:34, 35) Koia, ko nātou ʼaē ʼe natou takitaki ia te gāue, ʼe natou fakahā anai, ia te aga fakapotopoto pea mo te ʼofa ʼi te fakatuʼutuʼu ʼaē, peʼe ko te kūtuga fea ʼaē ʼe tonu ke hiki ʼo gāue fakatemi pē ʼi he tahi age telituale.—Sake 3:17, 18.
4. Koteā ia te lea fakapolofetā ʼe lolotoga hoko ʼi te temi nei?
4 Neʼe fakakikite ʼi te Tohi-Tapu, ʼe fia logo anai ia te hahaʼi ʼo te ʼu lea kehekehe ki te logo lelei. (Fakh. 14:6, 7) ʼAki hatatou felagolagoʼaki, ʼe mole ʼalunoa anai tatatou ʼu faiga pea ʼe tokolahi anai ia nātou kei foʼofoʼou, ʼe fakaaʼu anai ki ai ia te logo lelei, ʼo kau ai ia nātou ʼaē ʼe palalau ʼi he tahi age lea.—Efe. 4:16.