Tou Fakatuputupu Ia Te Gāue Fai Fakamafola ʼi He Tahi Lea
1. Koteā te faigamālie ʼe tou maʼu ʼi tatatou kau ki te gāue fai fakamafola ʼi totatou telituale?
1 Neʼe fakakikite e Sesu Kilisito ko te logo lelei ʼe fakamafola anai ʼi te kele kātoa “ko he meʼa fakamoʼoni ia ki te ʼu puleʼaga kātoa.” ʼE ʼiloʼi lelei te ʼu palalau ʼaia e te kau minisi fuli ʼaē ʼe kau ki te gāue fai fakamafola pea mo fai ʼo he ʼu tisipulo. (Mat. 24:14; 28:19, 20) Kā tou ʼolo ʼo fai fakamafola pea mo fai he ʼu tisipulo, ʼe feala ke tou felāveʼi mo ni ʼu hahaʼi mai te tahi atu ʼu fenua, ʼe natou palalau ʼi he tahi lea. ʼE toe tuha foki mo nātou ke natou logo ki te logo ʼo te Puleʼaga pea mo filifili ia te moʼoni, ʼi muʼa ʼo te hoko mai ʼo te ʼaho fakamanavahē ʼo Sehova. (Mala. 3:18) ʼE tou lava fakatuputupu feafeaʼi ʼi totatou telituale ia te gāue fai fakamafola ʼi he tahi lea?
2. ʼE tou lava faʼifaʼitakiʼi feafeaʼi ia Sehova mokā tou palalau mo te hahaʼi ʼaē ʼe mole lea tahi mo tātou?
2 Tou Maʼu Ia Te Manatu ʼa Sehova ʼo ʼUhiga Mo Nātou ʼAē ʼe Palalau ʼi He Tahi Lea: Ke tou fakahā ia te ʼofa ʼo Sehova ʼaē ʼe mole fakapalatahi ki te hahaʼi fuli ʼo totatou telituale, ʼe tonu ke tou lotomālohi ke tou tokoni ki te hahaʼi ke natou maʼu ia te ʼatamai mālama totonu ʼo ʼuhiga mo te ʼAtua moʼoni, ia Sehova, tatau aipē pe koteā tanatou lea. (Pes. 83:18; Gāue 10:34, 35) Logolā ʼe tou tōkakaga ʼuluaki muʼa ki te hahaʼi ʼaē ʼe palalau ʼi te lea ʼo te kōkelekāsio ʼaē ʼe tou kau kiai, kae ʼe tonu ke tou manatuʼi ia te ʼu faʼahi ʼaē ʼe ʼaoga ki te hahaʼi ʼaē ʼe natou palalau ʼi he tahi lea pea mo tou kumi he ʼu puleʼaki ke tou fakahā age kiā nātou ia te logo ʼo te Puleʼaga ʼo te ʼAtua. Kapau ʼe mole tou tōkakaga kiā nātou ʼaē ʼe mole palalau ʼi tatatou lea, pea ʼe mole ʼalutahi anai mo te fakatuʼutuʼu ʼa Sehova, ʼaē ke fai fakamafola ki te hahaʼi ʼo te ʼu puleʼaga fuli pē. ʼE tou lava tokoni feafeaʼi ki te hahaʼi ʼaē ʼe natou palalau ʼi he tahi lea?
3. Koteā te kiʼi kaupepa ʼaoga neʼe foaki mai kiā tātou, pea ʼe feafeaʼi hatatou teuteu ke tou fakaʼaogaʼi?
3 Tou Fakaʼaogaʼi Te Kiʼi Kaupepa Une bonne nouvelle pour des gens de toutes nations: Ko te kiʼi kaupepa ʼaia neʼe tā moʼo fakaʼaogaʼi mokā tou felāveʼi mo te hahaʼi ʼaē ʼe mole lea tahi mo tātou. Kotou ʼave ia te kiʼi kaupepa ʼaia ʼi te temi fuli pē, mo kotou ʼiloʼi lelei ia te ʼu meʼa ʼaē ʼe tohi ai, pea mo kotou teuteu ke kotou fakaʼaogaʼi. Ke feala hakotou fakaʼaogaʼi fakavilivili, kotou fakaʼiloga ia te ʼu lea kehekehe ʼaē ʼe palalau kiai te hahaʼi ʼo tokotou telituale. Kapau ʼe maʼu he ʼu tohi ʼi te ʼu lea ʼaia, ʼe lagi ʼaoga ke kotou ʼave mo koutou ni ʼu tohi ke kotou foaki ki he tahi ʼi takotou kua ʼosi fakaʼaogaʼi ia te ʼu ʼuluaki palalau ʼaē ʼe tuʼu ʼi te kiʼi kaupepa.
4. ʼE tou lava fakaʼaogaʼi feafeaʼi ia te kiʼi kaupepa Une bonne nouvelle pour des gens de toutes nations ʼi tatatou minisitelio?
4 Kapau ʼe kotou felāveʼi mo he tahi ʼi te minisitelio ʼe palalau ʼi he tahi lea pea ʼe mole kotou ʼiloʼi lelei pe ko te lea fea, kotou kamata fakahā age ia te takafi ʼo te kiʼi kaupepa. Kotou fuli age ki te pāsina ʼaē ʼe tuʼu ai te mape ʼo te kele, kotou fakahā age tokotou fenua, pea kotou kole age ki ai ke ina fakahā atu tona fenua pea mo tana lea. ʼI takotou kua ʼiloʼi ia tana lea, kotou vakaʼi ia te pāsina ʼaē ʼe tānaki ai te ʼatu ʼu lea fuli, pea kotou fuli age te pāsina ʼaē ʼe tuʼu ai tana lea, ʼo kotou fakahā age kiā ia ia te ʼu palalau ʼaē ʼe tohi mātolu ʼi ʼoluga ʼo te pāsina, pea kotou fakahā age leva ʼe kotou loto ke ina lau ia te logo ʼaē ʼe tuʼu ai. ʼI tana ʼosi lau, kotou foaki age ia he kiʼi pepa lotu ʼi tana lea peʼe kotou fakahā age ia te ʼu palalau ʼaē ʼe ʼui ai ʼe kotou fia liliu mai ki ai mo he tohi ʼi tana lea. Pea kotou fakahā age ia te faʼahi ʼaē ʼe tohi mātolu ai “toku higoa,” pea kotou fakahā age tokotou higoa. Kotou fakahā age te faʼahi ʼaē ʼe tohi mātolu ai “tou higoa,” pea kotou fakatalitali ke tali atu. Kotou fai he ʼu fakatuʼutuʼu ke kotou toe liliu ki ai.
5. Koteā ʼaē ʼe tonu ke tou fai ki muli age moʼo tokaga fakalelei kiā nātou ʼaē ʼe natou fia ʼiloʼi moʼoni ia tatatou logo kae natou palalau ʼi he tahi lea?
5 Te ʼu Fakatuʼutuʼu Ki Muli Age: ʼE tonu ke tou faiga mālohi ke tou ʼaʼahi ia nātou ʼaē neʼe natou fia ʼiloʼi ia te logo ʼo te Puleʼaga, tatau aipē pe koteā tanatou lea. ʼI tatatou kua tui papau ʼe fia ʼiloʼi e he tahi ʼo ʼuhiga mo te ʼAtua pea mo tana Folafola, te Tohi-Tapu, ʼe tonu ke tou tohi ia te pepa Veuillez suivre lʼintérêt (Ke ʼAʼahi) (S-43) pea mo foimo foaki ki te sīkalaipe ʼo te kōkelekāsio, ke ina momoli ki te filiale ke feala ke ʼaʼahi ia ia e he tahi ʼe palalau ʼi tana lea. Ko te filiale ʼe ina momoli leva ia te pepa ki te kūtuga ʼaē ʼe palalau ʼi te lea ʼaia. Kā kua maʼu e te kūtuga ʼo te lea ʼaia ia te pepa, pea ʼe tonu ke foimo felōgoi ia he tahi iā nātou mo ia ʼaia. ʼE feala ki te sīkalaipe ke ina foaki he pepa fēia ki te taupau ki te gāue ke ʼiloʼi e te tehina ʼaia ia te hahaʼi ʼo he tahi lea ʼaē ʼe natou fia logo ki te moʼoni. Ko te pepa ʼaia ʼe hoki fakaʼaogaʼi pē ʼi te temi ʼaē ʼe fia ʼiloʼi moʼoni ai e he tahi ia te logo ʼaē ʼe tou fakamafola.
6. Kapau ʼe tou felāveʼi mo he tahi ʼe palalau ʼi he tahi lea, koteā te faʼahi ʼaē ʼe fakamaʼua mai kiā tātou ke tou fai?
6 ʼE lagi fakalaka anai he temi, mai te temi ʼaē ʼe momoli ai ia te pepa S-43 ʼo aʼu ki te temi ʼaē ʼe ʼaʼahi ai ia ia e he kaugā fai fakamafola ʼe palalau ʼi tana lea. Koia, moʼo fakatuputupu ia te fia ʼiloʼi ʼo ia ʼaia, ko te kaugā fai fakamafola ʼaē neʼe ina momoli ia te pepa S-43, ʼe feala hana taupau ia te ʼu felōgoi ʼaia ʼo aʼu ki te temi ʼaē kā ʼaʼahi ai ia ia e he tahi ʼe palalau ʼi tana lea. ʼI ʼihi ʼaluʼaga, ʼe feala ke fai he ako Tohi-Tapu mo ia ʼaē ʼe fia logo. Kae lolotoga te temi ʼaia, ʼe lava maʼu feafeaʼi e he kaugā fai fakamafola ia he ʼu tohi ʼi te lea ʼa ia ʼaē ʼe ina fia ʼiloʼi ia te moʼoni?
7. Koteā te fakatuʼutuʼu ʼe feala ke tou maʼu ai he ʼu tohi ʼi te lea ʼa te hahaʼi ʼaē ʼe tou felāveʼi mo nātou?
7 Te ʼu Tohi ʼi Te Tahi ʼu Lea: ʼE mole tonu ke tānaki e te ʼu kōkelekāsio he ʼu tuʼuga tohi ʼi he tahi ʼu lea. Kae, kapau ʼe tokagaʼi e te taupau ki te gāue ʼe tuputupu ia te kaugamālie ʼo te hahaʼi ʼo he tahi lea pea ʼe natou fia ʼiloʼi ia te moʼoni, pea ʼe lagi ina fakafuafua anai ʼe lelei ke tānaki he ʼu tohi ʼi te lea ʼaia ke fakaʼaogaʼi e te kau fai fakamafola. Kapau ʼe mole maʼu he ʼu tohi ʼi te kōkelekāsio, ʼe feala ke fakaʼui. ʼE lagi hili anai he temi ʼi muʼa ʼo te tau mai ʼo te ʼu tohi ʼaia. Koia, ʼe feala ke maʼu te ʼu tohi ʼaia ʼi te neti, ʼi te tuʼasila ʼaenī: www.watchtower.org., pea ʼe feala hona tā mai ai. ʼE lahi ʼaupitō te ʼu tohi neʼe tā kiā lea e teau ʼe feala ke maʼu e te kaugā fai fakamafola peʼe ko ia ʼaē ʼe ina fia ʼiloʼi ia te moʼoni. ʼE mahino papau ia, ko te fakatuʼutuʼu ʼaia ʼe ʼaoga anai moʼo fakatuputupu ia te fia ʼiloʼi ʼo te hahaʼi ʼaē ʼe natou palalau ʼi he tahi lea.
8. Koteā te gāue ʼa te kōkelekāsio moʼo taupau ia te fia logo ʼa te hahaʼi ʼaē ʼe palalau ʼi he tahi lea?
8 Te Gāue ʼa Te Kōkelekāsio: ʼI ʼihi ʼaluʼaga ʼaē ʼe kaugamālie ai ia te hahaʼi ʼo he tahi lea, ʼe lagi mole ʼi ai he kōkelekāsio ʼe ovi mai ke natou ʼolo ʼo kau ki te ʼu fono ʼaē ʼe fai ʼi tanatou lea. Koia, ko te hahaʼi ʼaē ʼe fia logo kae natou palalau ʼi he tahi lea, ʼe tonu ke kotou fakaafe ke ʼomai ki takotou ʼu fono. Ko te tali kāiga agalelei pea mo te tokaga ʼaē ʼe fai kiā nātou ʼe lagi fakalotomālohiʼi anai nātou ke natou kau tuʼumaʼu ki te ʼu fono. ʼI te kamata, ʼe lagi faigataʼa anai ia te lea mo te agaʼi fenua; kae ko te ʼofa Fakakilisitiano moʼoni ʼaē ʼi te kautahi fakamālamanei ʼa te kau Fakamoʼoni ʼa Sehova, ʼe ina pulihi te ʼu faʼahi ʼaia. (Sofo. 3:9; Soa. 13:35) ʼE kotou palalau lelei koa ʼi he tahi lea? Kapau ʼe kotou ʼiloʼi lelei ia te lea pea ʼe kotou fia fai he ʼu ʼaʼahi ʼi te lea ʼaia, kotou fakahā ki te sīkalaipe ʼo tokotou kōkelekāsio, ke feala hana fakahā ki te filiale. ʼE ʼaoga anai ia te faʼahi ʼaia mokā kumi e te filiale he tahi moʼo hoko atu te ʼaʼahi ʼo he tahi ʼe ina fia ʼiloʼi ia te moʼoni.
9. Ko te temi fea ʼaē ʼe lagi ʼaoga ai ke fakatuʼu he kalasi moʼo ako he lea, pea ʼe fakahoko feafeaʼi ia te faʼahi ʼaia?
9 Te Ako ʼo He Lea: Kapau ʼe kotou lolotoga tokoni nei kiā nātou ʼaē ʼe palalau ʼi he tahi lea, ʼe lelei ke kotou fakalotomālohiʼi ke natou kamata kau ki te ʼu fono ʼi tanatou lea, mo kapau ʼe ko he meʼa ʼe feala kiā nātou. Kae kapau ʼe mole feala, ʼe fakatotonu e ʼihi kau fai fakamafola ke natou ako ia he tahi lea ke feala ai hanatou tokoni lelei ki te hahaʼi ʼaē ʼe fia logo. Kapau ʼe mole he kōkelekāsio ʼe tuʼu ovi mai, pea ʼe feala ke fakatotonu e te filiale ke fakatuʼu he kalasi moʼo ako te lea, ʼuhi ko te kaugamālie ʼo te hahaʼi ʼaē ʼe ʼomai mai he tahi fenua. Kapau ʼe tonu ke fai te faʼahi ʼaia, ʼe feala ke fakahā e te filiale ki te ʼu kōkelekāsio ʼaē ʼe tuʼu ovi mai ia te ʼaoga ʼaē ke ʼi ai he kau fai fakamafola pea ke tala ʼi te ʼu kōkelekāsio ʼaia ia te fakatuʼutuʼu ʼaē ʼo ʼuhiga mo te kalasi ʼaia. Ko nātou ʼaē kā kau ki te ako ʼaia, ʼe tonu ke natou fakatuʼutuʼu ke natou mavae mai te kūtuga peʼe ko te kōkelekāsio ʼaē ʼe natou kau ai, ke natou tokoni ki te fakatuputupu ʼo te gāue fai fakamafola ʼi te lea ʼaia.
10. Ko te temi fea ʼaē ʼe feala ai ke fakatuʼu he kūtuga ʼi he tahi lea, pea ʼe fakahoko feafeaʼi te faʼahi ʼaia?
10 Te Fakatuʼu ʼo He Kūtuga: Ke lava fakatuʼu he kūtuga ke akoʼi nātou ki he tahi lea, ʼe ʼi ai te ʼu fakamaʼua e fā ʼe tonu ke mulimuli kiai. (1) ʼE tonu ke lahi te hahaʼi ʼaē ʼe natou fia ʼiloʼi ia te moʼoni ʼi te lea ʼaia. (2) ʼE tonu ke ʼiloʼi ia te lea e he kiʼi kūtuga fai fakamafola peʼe natou ako ia te lea. (3) ʼE tonu ke ʼi ai he tagata ʼāfea peʼe ko he tagata faifekau fakaminisitelio ʼe ina lava takitaki ʼi te vāhaʼa fuli ia he fono ʼi te lea ʼaia. (4) ʼE tonu ki he ʼu tagata ʼāfea ke natou lotolelei ʼo lagolago ki te kūtuga. Kapau ʼe maʼu ia te ʼu ʼaluʼaga fuli ʼaenī, pea ko te kolesi ʼo te ʼu tagata ʼāfea ʼe faitohi anai ki te filiale ʼo ʼuhiga mo te ʼaluʼaga ʼo te kūtuga, pea mo kole anai ke fakamoʼoni e he kōkelekāsio ʼe lagolago ki te kūtuga ʼaia ʼi te tahi lea. (Vakaʼi ia te tohi Organisés, p. 106.) Ko te tagata ʼāfea peʼe ko te tagata faifekau fakaminisitelio ʼaē ʼe ina takitaki te kūtuga, ʼe liliu anai ko te “taupau ki te kūtuga” peʼe ko te “tagata faifekau ki te kūtuga” heʼe ko ia ʼaē kā tokaga ki te kūtuga.
11. He koʼē ʼe ko he pilivilēsio ke tou fakatuputupu ia te gāue fai fakamafola ʼi he tahi lea ʼi tatatou telituale?
11 Ko te fakatuputupu ʼo te gāue fai fakamafola ʼi he tahi lea ʼi tatatou telituale ʼe ko he koga maʼuhiga ʼo te gāue fai fakamafola fakamālamanei ʼaē neʼe fakahoko e totatou Faʼifaʼitakiʼaga, ia Sesu Kilisito. ʼOfa pē ke tou tokoni ʼaki he faʼafai pea mo sio ki te haga ʼaē ʼa Sehova ʼo luluʼi ia te ʼu puleʼaga pea mo taki mai nātou ʼaē ʼe ina leleiʼia kiā te ia. (Osea 2:7) ʼI meʼa fakafiafia kiā tātou hatatou kau kātoa ki te ʼu faiga ʼaia! ʼOfa pē ke tapuakina e Sehova tatatou logotahi ʼaē ʼi tatatou ʼu faiga moʼo fakatuputupu ia te gāue fai fakamafola ʼi he tahi lea ʼi tatatou ʼu telituale, ʼo tou manatuʼi tuʼumaʼu ko te ʼAtua ʼaē ʼe ina fakatuputupu ia te gāue ʼaia, logolā te kehekehe ʼo te ʼu lea!—1 Ko. 3:6-9.