Kotou Gaue Fakatahi ʼi Te ʼu Telituale ʼAe ʼe Palalauʼi Ai He Tahi Age ʼu Lea

ʼE tali e te hahaʼi te logo lelei ʼo te Puleʼaga moka ʼe natou logo ʼi tanatou lea totonu. Neʼe lagi ko te tupuʼaga la ʼaia ʼo te fai e Sehova ia he fakatuʼutuʼu ʼi te Penikosite ʼo te taʼu 33 H.T.S., maʼa “te kau tauhi lotu Sutea mai te ʼu fenua kehekehe ʼi te lalo lagi,” ke natou logo ki te logo lelei ʼi ‘tanatou lea totonu,’ logo la tanatou palalau ʼi te lea ʼae ʼe palalauʼi e te hahaʼi fuli, te Fakahepeleo mo te Fakakeleka. (Gau 2:5, 8) Ia ʼaho nei ʼi te ʼu telituale ʼae ʼe maʼu ai he hahaʼi ʼe lea kehe, ʼe ʼi ai te ʼu kokelekasio lea kehekehe ʼe faifakamafola fakatahi ai. ʼE feafeaʼi he gaue fakatahi ʼa te ʼu kokelekasio ʼaia ke ʼaua naʼa fakatupu itaita ki te hahaʼi?

• 

  Kotou fefelogoiʼaki (Taa 15:22): ʼE tonu ki te ʼu taupau ki te faifakamafola ke natou felogoi ʼo kumi he puleʼaki ʼe lelei ki te faifakamafola ʼa te ʼu kokelekasio ʼaia. Kapau ʼe mole lahi tanatou telituale, ʼe leleiʼia anai e te ʼu kokelekasio ʼae ʼe faifakamafola ʼi he tahi lea, ke ʼaua naʼa kotou fai te ʼu ʼapi matapule ʼae ʼe ʼi ai. Kae kapau leva ʼe mole feala hanatou fai tuʼumaʼu he telituale he ʼe tuʼu mamaʼo, ʼe natou lelei’ia anai hakotou fai fuli te ’u ’api ’o te telituale ’aia. Pea kotou fakaha age leva pe ʼe ʼi ai he tahi ʼe ina fia iloʼi te moʼoni. (od 93 ¶37) Peʼe ke natou kumi tokoni ki tokotou kokelekasio ke natou maʼu te ʼu hahaʼi ʼae ʼe palalau ʼi tanatou lea mo fakaha age ʼonatou tuʼasila. (km 7/12 5, ʼa takai) Kotou manatuʼi ʼe feala ʼi he ʼapi pe ʼe tahi ke maʼu ai he ʼu hahaʼi ʼe lea kehekehe. Ko te ʼu fakatuʼutuʼu ʼae ke fai fuli ia te telituale ʼe fakamaʼua mai ke tou mulimuli ki te lao ʼae ʼo ʼuhiga mo te fakaʼapaʼapa ki te maʼuli takitokotahi ʼo te hahaʼi.

• 

  Kotou gaue fakatahi (Efe 4:16): Kotou mulimuli lelei ki te ʼu fakatuʼutuʼu ʼa tokotou taupau ki te faifakamafola. ʼE kotou fai koa he ako ʼa he tahi ʼe ina leleiʼia te fai ʼo tana ako ʼi he lea ʼe mole ko ʼae ʼa tokotou kokelekasio? ʼE tuputupu vave anai te ako mo kapau ʼe tuku age ki he tahi kokelekasio peʼe ko he kutuga ʼe palalau ʼi tana lea.

• 

  Kotou teuteu’i (Taa 15:28; 16:1): Kapau ʼe kotou felaveʼi mo he tahi ʼi takotou telituale ʼe palalau ʼi he tahi age lea, faigaʼi pe ke kotou vaevae mo ia te logo lelei. Koia, ʼe lelei ke kotou teuteu ki te aluʼaga ʼaia ʼaki hakotou iloʼi fakatomuʼa te ʼu lea ʼa te hahaʼi ʼae ʼi tokotou telituale. Pea kotou toʼo ʼi te Neti te ʼu fakaliliu ʼo te Tohi-Tapu pea mo he ʼu kiʼi ʼata viteo ʼi tanatou lea. ʼE toe feala ke kotou fakaʼaogaʼi te JW Language ke kotou ako te ʼu faʼahiga fakamalo ʼo te ʼu lea ʼaia.