TE MAʼULI FAKAKILISITIANO
Ke Lelei Age Tatatou Faifakamafola—Ke Tou Felaveʼi Mo Te Hahaʼi Fuli ʼo Totatou Telituale
HE KOʼE ʼE MAʼUHIGA? Neʼe fakakikite e Sakalia ʼe tali anai te logo lelei e te hahaʼi ʼo te ʼu lea kehekehe ʼo te ʼu puleʼaga. (Skl 8:23) Kae ko ai ʼae ka ina akoʼi anai natou? (Lom 10:13-15) Ko he pilivilesio pea ʼe ko he fakamaʼua kia tatou ke fakamafola te logo lelei ki te hahaʼi fuli ʼo totatou telituale.—od-F p. 84 pal. 10-11.
TE ʼU MEʼA ʼAE ʼE TONU KE KE FAI:
Teuteuʼi lelei. ʼE ke felaveʼi koa mo he tahi ʼe palalau ʼi he tahi age lea? ʼE feala ke ke fakaʼaogaʼi te JW Language ke ke ako ai he ʼu ʼuluaki palalau ʼe faigafua. Peʼe ʼaki tau kiʼi masini toʼotoʼo, fakaha age ki ai pe ʼe feafeaʼi hana maʼu he tahi ʼu fakamahino ʼi tana lea ʼi te jw.org
Fakasiosioʼi lelei. Ka ke faifakamafola ʼi te ʼu ʼapi, faigaʼi ke ke fakaha ki te hahaʼi fuli te logo lelei. Ohage la, palalau kia natou ʼae ʼe fakalaka peʼe ko natou ʼae ʼe talitali ʼi te ʼu motoka. Toe feia pe moka ʼe ke faifakamafola ʼi te ʼu koga meʼa ʼae ʼe kaugā malie ai te hahaʼi
Faʼa fai. Faigaʼi ke ke maʼu ia natou ʼae neʼe pupuli ʼi tau ʼuluaki alu atu. Pea mo natou ʼae ʼe nonofo ʼi te ʼu fale fata, ke ke lagi toe liliu ʼi he tahi age hola peʼe ko he tahi age ʼaho ʼo te vahaʼa. Pea ʼe toe feala ke ke maʼu ni ʼihi hahaʼi ʼaki hau faitohi, faitelefoni peʼe ʼi te ala
Toe liliu ʼo ʼaʼahi. Alu fakavilivili ʼo ʼaʼahi ia ia ʼae neʼe fia logo ki te moʼoni. Kapau ʼe palalau ʼi he tahi age lea, faigaʼi ke ke maʼu he tahi ʼe palalau ʼi tana lea ke tokoni ki ai. ʼE tonu anai ke ke ʼaʼahi tuʼumaʼu ia ia ʼo kaku ki he temi kua ke tuku ai ki he kau faifakamafola ʼe palalau ʼi tana lea.—od-F p. 94 pal. 39-40
VAKAʼI TE ʼATA VITEO KOTOU FAIFAKAMAFOLA ʼI “TE ʼU POTU TAUPOTU ʼO TE KELE” PEA MO TALI KI TE ʼU FEHUʼI ʼAENI:
Neʼe teuteu feafeaʼi te ʼu tehina mo tuagaʼane ke feala hanatou felaveʼi mo te hahaʼi ʼae ʼe maʼuʼuli ʼi te ʼu koga meʼa mamaʼo? (1Ko 9:22, 23)
Kotea te ʼu fihifihia neʼe natou tauʼi?
Kotea te ʼu tapuakina neʼe natou maʼu?
Kotea he ʼu faiga ʼe feala ai ke ke felaveʼi mo he tokolahi ʼo tou telituale?