Tou Tufa Te ʼu Tohi ʼi Te ʼu Telituale ʼAē ʼe Lea Kehekehe
1. He koʼe ʼe lahi te ʼu kokelekasio ʼe ʼaoga kia nātou he ʼu tohi ʼi he tahi ʼu lea?
1 ʼE lahi te ʼu koga meʼa ʼe tou maʼu ai ʼi tatatou fai faka mafola he ʼu hahaʼi mai te tahi ʼu fenua. Tokolahi ʼi te hahaʼi ʼaia ʼe vave age tanatou ako pea mo loloto age tanatou mahino mokā akoʼi nātou ʼi tonatou lea. Koteā te ʼu fakatuʼutuʼu kua fai ke maʼu e te hahaʼi ʼaē ʼe fia logo he ʼu tohi ʼe fakatafito ki te Tohi-Tapu ʼi te lea ʼaē ʼe nātou mahino lelei age kiai?
2. Koteā ʼaē ʼe tonu ke fai fakatahi mokā ko he ʼu kokelekasio lea kehekehe e lua peʼe laka atu ʼe gāue ʼi he telituale pe e tahi?
2 Te Temi ʼAē ʼe Tonu Ai Ke Tou Foaki He Tohi: Kapau ʼe gāue he ʼu kokelekasio lea kehekehe e lua peʼe laka atu ʼi he telituale pe e tahi, pea ko te kolesi ʼo te kau tagata ʼāfea ʼe nātou gāue fakatahi anai mo te ʼu tagata taupau ki te gāue, moʼo fai he fakatuʼutuʼu ke tali e te ʼu kokelekasio fuli, ke nātou fai faka mafola ki te ʼu hahaʼi ʼaē ʼe nātou palalau he tahi lea. ʼI te agamāhani ʼi tanatou fai faka mafola ʼi te ʼu ʼapi, ʼe mole foaki anai e te kau fai faka mafola he tohi ʼi te lea ʼo te tahi kokelekasio. Kae ʼi te fagonogono faigamālie ʼa te kau fai faka mafola pea mo tanatou fai faka mafola ʼi te ʼu koga meʼa ʼaē ʼe kaugamālie ai te hahaʼi, ʼe feala tanatou tufa he ʼu tohi ʼi te lea ʼo te hahaʼi.—Vakaʼi Te Tali Ki ʼAkotou ʼu Fehuʼi ʼi Te Minisitelio ʼo Te Puleʼaga Fakafalani ʼo ʼOketopeli 1990.
3. Ko te temi fea ʼaē ʼe feala ai ki he kokelekasio ke ina maʼu he ʼu tohi ʼi te tahi age lea?
3 Ko Te Temi Fea ʼAē ʼe Tonu Ai Ke Maʼu He ʼu Tohi ʼi Te Kokelekasio: Koteā ʼaē ʼe feala ke fai mo kapau ʼe ʼi ai he koga meʼa ʼe tokolahi ai te hahaʼi ʼe nātou palalau he tahi lea kae mole he kokelekasio ʼe palalau te lea ʼaia? ʼI te ʼu ʼaluʼaga ʼaia, ʼe feala ke maʼu e te kokelekasio he ʼu tohi ʼe mole faʼa lahi ʼi te lea ʼaia, ohage ko te ʼu kiʼi pepa lotu, te ʼu kaupepa lalahi Fakamaʼua pea mo Kaumeʼa Mo Te ʼAtua, pea mo te tohi Te ʼAtamai Mālama. ʼE feala ke tufa e te kau fai faka mafola te ʼu tohi ʼaia mokā nātou felāveʼi mo te hahaʼi ʼe nātou poto lautohi ʼi te lea ʼaia.
4. ʼE lava maʼu feafeaʼi he tohi ʼi te lea ʼe mole maʼu ʼi te kokelekasio?
4 Te Fakaʼui ʼo He ʼu Tohi: Kapau ʼe mole maʼu e te kokelekasio he ʼu tohi ʼi he lea ʼe fia lau ai e he tahi, ʼe lava maʼu feafeaʼi te tohi ʼaia? ʼE feala ke vakaʼi e te kaugā fai faka mafola mo te tēhina ʼe tokaga ki te ʼu tohi ke ʼiloʼi peʼe maʼu he ʼu tohi ʼi te lea ʼaia, ke fakaʼui ʼi he tahi pepa fakaʼui tohi ʼo te kokelekasio.
5. Koteā ʼaē ʼe feala ke fai mo kapau ʼe ʼaoga ke maʼu te ʼu tohi ʼi muʼa ʼo te tau mai ʼo te ʼu tohi ʼaē ka fakaʼui?
5 Kapau ʼe ʼaoga fakavilivili he ʼu tohi, pea ʼe feala ke kole e te kaugā fai faka mafola ki he tahi ʼo te Komite ʼo Te Selevisi ʼo Te Kokelekasio peʼe feala ke ina fakaʼui he ʼu tohi ʼi muʼa ʼo te momoli ʼo te pepa fakaʼui tohi ʼo te kokelekasio. Kapau ʼe tali te kole ʼaia, pea ko ia ʼaē ʼe tokaga ki te ʼu tohi peʼe ko he tahi age neʼe ina hinoʼi, ʼe feala ke telefoni ki te filiale.
6. Koteā tatatou fakatuʼutuʼu ʼi tatatou faka fealagia ke maʼu te ʼu tohi faka Kilisitiano?
6 ʼOfa pe ke tou fakaʼaogaʼi lelei te ʼu tohi faka Kilisitiano moʼo tokoni ki “te tagata fuape” tatau aipe peʼe koteā tanatou lea, ke nātou ‘aʼu ki te ʼatamai mālama totonu ʼo te moʼoni pea ke hāofaki nātou.’—1 Tim. 2:3, 4.