Tou Fakaʼaogaʼi Fakalelei Tatatou ʼu Tohi Faka Tohi-Tapu

1, 2. Koteā te manatu ʼa te tokolahi ʼo ʼuhiga mo tatatou ʼu tohi, pea koteā te fehuʼi ʼe malaga ai?

¹ “ ʼE au lau takotou ʼu tohi talu mai te taʼu 1965. Pea ʼi taku lautohi ʼaia ʼe au vakaʼi te ʼu vaega ʼi te Tohi-Tapu, pea ʼe tuʼu pe ʼi te Tohi-Tapu ia te ʼu meʼa fuli ʼaē ʼe talanoa kiai takotou ʼu tohi. Talu mai fualoa, mo taku fia ʼiloʼi ia te moʼoni ʼo ʼuhiga mo te ʼAtua pea mo Sesu, pea ʼe au tala fakahagatonu atu ʼe au maʼu te ʼu tali ʼaē ʼe moʼoni ʼi takotou ʼu tohi pea mo te Tohi-Tapu.” Ko te ʼu palalau ʼaia neʼe fai e te tagata neʼe faitohi ki te filiale ʼa te kau Fakamoʼoni ʼa Sehova. Pea ʼi tana tohi, neʼe ina kole ke fai hana ako Tohi-Tapu.

² Ko te lauʼi miliona hahaʼi ʼi te malamanei ohage ko te tagata loto fakafetaʼi ʼaenī, ʼe nātou leleiʼia te ʼu tohi faka Tohi-Tapu ʼaē ʼe tufa e “te tagata kaugana agatonu mo poto.” (Mat. 24:​45, MN ) ʼI te taʼu fuli, ko te ʼu tuʼuga tohi ʼe tā moʼo tokoni ki te hahaʼi ʼaē ʼe nātou faiga fakamalotoloto ke nātou “aʼu ki te ʼatamai mālama totonu ʼo te moʼoni.” (1 Tim. 2:​4, MN ) E feafeaʼi hatatou fakaʼaogaʼi fakalelei tatatou ʼu tohi faka Tohi-Tapu?

3. Koteā te puleʼaki ʼe tou lava fai ke mole tou fakaʼaogaʼi maumau te ʼu tohi pea mo te ʼu nusipepa?

³ ʼAua Naʼa Tou Fakaʼaogaʼi Maumau Te ʼu Tohi: ʼAki te temi, ʼe feala pe ke lahi fau tatatou ʼu tohi kae mole tou fakaʼaogaʼi. Koteā te puleʼaki ʼe tou lava fai ke ʼaua naʼa tou fakaʼaogaʼi maumau tatatou ʼu tohi maʼuhiga ʼaia? ʼE tonu ke tou fakapotopoto mokā tou toʼo hatatou ʼu tohi ki te fai faka mafola. ʼAua naʼa tou toʼo he ʼu tuʼuga tohi ʼo te tufa, kae tou fakaʼutaʼuta pe ʼaki he tohi e tahi peʼe lua, pea ʼe tou liliu anai ʼo toe toʼo he tahi ʼu tohi mo kapau kua ʼosi tatatou ʼu tohi ʼi te toʼo. ʼAki tatatou fai ʼaia, ʼe mole tapuke anai he ʼu tohi ʼi fale kae mole tou fakaʼaogaʼi. ʼO toe feiā ki tatatou ʼu nusipepa, kapau ʼe lahi tatatou ʼu nusipepa ʼaē ʼe mole tou tufa, pea ʼe lagi lelei age ke tou fakahifo te ʼu nusipepa ʼaē ʼe tou fakaʼui.

4. Koteā te fakatuʼutuʼu ʼe lava fai e he kokelekasio mo kapau ʼe ina maʼu fakalaka hana ʼu tohi?

⁴ Te ʼu Tohi ʼAē ʼe Maʼu Fakalaka ʼi Te Kokelekasio: Kapau ʼe maʼu fakalaka he ʼu faʼahiga tohi ʼi te kokelekasio, pea ʼe feala anai ki te tēhina ʼaē ʼe tokaga ki te ʼu tohi, ke faka felogoi mo te ʼu kokelekasio ʼaē ʼe nātou fakaʼaogaʼi fakatahi ia te fale fono, peʼe nātou lava fakaʼaogaʼi anai ia te ʼu tohi ʼaia. ʼE lava tufa e te ʼu kaugā fagona te ʼu tohi ʼāfea ki tonatou ʼu famili ʼaē ʼe mole ʼi te moʼoni, mai tanatou kau ako, pea mo ʼihi hahaʼi. Ko te hahaʼi ʼaē ʼe foʼofoʼou mai ki te kokelekasio ʼe nātou fia fai anai ki te ʼu tohi ʼāfea ʼaia moʼo fakakatoa ʼaki tanatou ʼu tānakiʼaga tohi.

5. ʼE tou lava fakahā feafeaʼi ʼe tou fia fakaʼaogaʼi lelei tatatou ʼu tohi?

⁵ ʼE tou fakaʼamu ke tokoni tatatou ʼu tohi ki te hahaʼi fakamalotoloto ke nātou mahino ki te tahi ʼu faʼahi ʼo ʼuhiga mo te ʼu fakatuʼutuʼu taulekaleka ʼa Sehova. Ohage ko Sesu neʼe mole ina maumauʼi te meʼa kai ʼaē neʼe toe ʼi tana ʼosi fai ia te milakulo moʼo fafaga te hahaʼi, koia ʼe tou fia fakaʼaogaʼi lelei anai ia te ʼu tohi faka Tohi-Tapu maʼuhiga ʼaē neʼe foaki mai. (Soa. 6:​11-13) Kapau ʼe tou tuku pe tatou te ʼu tohi ʼaia ʼi tatatou tānakiʼaga tohi peʼe ʼi tatatou ʼu kato, ʼe mole feala anai ki te logo ʼaē ʼe tuʼu ʼi te ʼu tohi ʼaia ke malave ki te ʼu loto ʼo te hahaʼi fakamalotoloto. Koia, ʼe tonu ke tou aga fakapotopoto mokā tou fakaʼui hatatou ʼu tohi ʼo ʼuhiga mo te minisitelio pea mo tou fakaʼaogaʼi lelei te ʼu tohi ʼaia ke fua lelei ki te hahaʼi.​—Filp. 4:⁠5.