Ko Te Faʼahiga Tagata Feafeaʼi Anai Ia Koutou?
1 Kua ōvi mai te temi ʼaē ʼe huʼi maʼua ai te malamanei katoa. ʼE fakahigoa e te Tohi-Tapu te temi ʼaia ko “te ʼaho ʼo Sehova.” Ko te temi ʼaia ʼaē ka fakahoko ai anai e te ʼAtua tana fakamāu ki te kau agakovi; pea ko te temi foki ʼaia ʼe hāofaki ai te kau faitotonu. Ko te hahaʼi fuli ʼaē ʼe maʼuʼuli anai ʼi te temi ʼaia ʼe tonu anai ke nātou huʼi maʼua ʼo ʼuhiga mo tanatou faʼahiga fakaʼaogaʼi ʼo tonatou maʼuli. ʼI tana manatuʼi te faʼahi ʼaia, neʼe lagaʼi e Petelo te fehuʼi loloto ʼaenī: “Ko te faʼahiga tagata feafeaʼi anai ia koutou”? Neʼe ina fakahā te maʼuhiga ʼo te ‘ ʼu aga fakamaʼoniʼoni, mo te ʼu aga faka lotu, pea ke ʼaua naʼa galo te hoko mai ʼo te ʼaho ʼo Sehova,’ ʼo feiā aipe ki te maʼuhiga ʼaē ʼo te aga ‘maʼa, te haohaoa, pea ʼi te tokalelei.’—2 Pe. 3:11-14.
2 Te ʼu Aga Fakamaʼoniʼoni Pea Mo Te ʼu Aga Faka Lotu: Ko te ʼu aga fakamaʼoniʼoni ʼe kau kiai tatatou ʼu gāue faʼifaʼitaki ʼaē ʼe hā ʼaki ai tatatou fakaʼapaʼapa ki te ʼu pelesepeto ʼa te Tohi-Tapu. (Tito 2:7, 8) ʼE tonu ke līaki e te Kilisitiano te aga ʼo te mālama ʼaē ʼe uga e te manatu pe ʼaē kia kita, mo te ʼu holi fakasino.—Lom. 13:11, 14.
3 ʼE faka ʼuhiga te “aga faka lotu” ohage “ko he pipiki mālohi ki te ʼAtua, ʼe haʼu mai te loto ʼaē ʼe uga e te loto fakafetaʼi ʼo ʼuhiga mo tona ʼu kalitate taulekaleka.” Ko tatatou gāue mālohi ʼi te minisitelio ʼe ko he faʼahiga meʼa lelei moʼo fakahā ʼo te kalitate ʼaia. Ko te meʼa ʼaē ʼe ina uga tatou ke tou fai faka mafola ʼe laka age ia ʼi te fakahoko pe ʼo he maʼua, ʼe tou fai ʼuhi ko te loloto ʼo tatatou ʼofa ʼaē kia Sehova. (Maleko 12:29, 30) ʼI te uga ʼo tatou e te taʼi ʼofa ʼaia, ʼe tou tokagaʼi anai totatou minisitelio ohage ko he fakahā fakamalotoloto ʼaia ʼo tatatou aga faka lotu. Mai tona ʼaluʼaga ʼaē ko tatatou aga faka lotu ʼe tonu ke tou fai tuʼumaʼu, koia ko tatatou kau ki te gāue faka mafola ʼe tonu ke fai tuʼumaʼu. ʼE tonu ke liliu te faʼahi ʼaia ko he koga tāfito ʼo tatatou polokalama gāue ʼi te vāhaʼa.—Hep. 13:15.
4 Ko te taupau ʼo te ʼaho ʼo Sehova ʼo tou “manatuʼi fakalelei” ko tona faka ʼuhiga ko te ʼaho ʼaia ʼe tonu ke maʼuhiga tāfito ʼi totatou ʼatamai ʼi te ʼaho fuli, ke ʼaua naʼa tou tuku ki muli te ʼaho ʼo Sehova. Ko tona faka ʼuhiga ke tou fakamuʼamuʼa ʼi totatou maʼuli te ʼu meʼa ʼaē ʼe ʼaoga ʼo te Puleʼaga.—Mat. 6:33.
5 Maʼa, Haohaoa, Pea ʼi Te Tokalelei: ʼI tatatou kau ki te toe hahaʼi tokolahi, neʼe tou ‘fō ʼotatou ʼu kofu loloa pea mo tou fakahihina ʼi te taʼataʼa ʼo te Akeno.’ (Fkhā. 7:14) Ko tatatou nofo “maʼa” ko tona faka ʼuhiga, ʼe tonu ke tou tokakaga mālohi ke ʼaua naʼa tou ʼulihi totatou maʼuli maʼa, ʼaē kua tou foaki ki te ʼAtua ʼaki te ʼu meʼa heʼemaʼa ʼo te mālama. ʼE tou taupau totatou “haohaoa” ʼaki tatatou fakafisi ki te ʼu aga heʼe faka lotu, mo te ʼu meʼa fakakoloa ʼaē ʼe feala ke nātou maumauʼi totatou ʼuhiga faka Kilisitiano. (Sake 1:27; 1 Soane 2:15-17) ʼE tou fakahā ai ʼe tou maʼuli “ ʼi te tokalelei” ʼaki tatatou fakahā “te tokalelei ʼo te ʼAtua” ʼi tatatou ʼu felogoi mo te hahaʼi.—Filp. 4:7; Lom. 12:18; 14:19.
6 Kapau ʼe tou tokakaga fakalelei ki te ʼu meʼa ʼuli ʼo te mālama, ʼe mole tou “toe faʼifaʼitaki anai ki te tuʼu ʼo te ʼu faʼahiga meʼa ʼaenī,” ʼaē kua tauteaʼi e Sehova. Kae, ko tatatou ʼu gāue lelei ʼe tokoni anai ki te hahaʼi ke nātou tokagaʼi te kehekehe ʼo “ ʼaē ʼe gāue ki te ʼAtua pea mo ʼaē neʼe mole gāue kia ia.”—Lom. 12:2; Mal. 3:18.
7 Kua vave pe tatatou kau anai ki te Fakatahi Faka Tisitilike ko tona kupu tāfito “Tou Vikiviki Fakafiafia,” pea ʼe mahino ia ko te meʼa kai fakafiafia mo fakaloto mālohi ʼe tou holi ai ke tou fakahā tatatou aga faka lotu. Tokolahi te hahaʼi foʼou ʼe nātou maʼu te holi ʼaia. ʼE feala ke tou liliu ko he tapuakina ʼaki tatatou tokoni kia nātou ke nātou kau ki te gāue fai faka mafola lolotoga te māhina ʼo ʼAukusito.
8 ʼE fakavikiviki te huafa ʼo Sehova, ʼe fakaloto mālohiʼi te kokelekasio pea ʼe maʼu e ʼihi te ʼu fua lelei mokā ʼe tou haga fai fakalelei te “ ʼu gāue ʼe lelei.” (1 Pe. 2:12) ʼOfa pe ke tou liliu tuʼumaʼu ko te faʼahiga hahaʼi ʼaia.