ʼE Koutou “Fia Fakatalitali” Koa?

“Ko te ʼu faʼahiga tagata feafeaʼi anai ia koutou ʼi te ʼu aga fakamaʼoniʼoni pea mo te ʼu gāue ʼaē ʼe ʼiloga ai ʼe koutou pipiki ki te ʼAtua, ʼo talitali pea mo koutou taupau tuʼumaʼu ʼi tokotou ʼatamai te hoko mai ʼo te ʼaho ʼo Sehova!”—2 Petelo 3:11, 12, MN.

1, 2. Koteā anai te fakatātā ʼe feala ke tou fai ʼo ʼuhiga mo tatatou “fia fakatalitali” ki te ʼaho ʼo Sehova?

KOUTOU fakakaukauʼi age muʼa ko he famili neʼe nātou fakaafe he ʼu hahaʼi ke nātou kakai fakatahi. Kua nātou vave ʼōmai pe. Pea ʼe vakaʼi e te fafine peʼe katoa ia meʼa fuli ki tanatou meʼa kai. Ko tona ʼohoana pea mo tanā ʼu fānau ʼe nātou tokoni ki ai ke tokalelei ia meʼa fuli, pea kua nātou fiafia fuli. Ei, ko te famili katoa kua nātou loto la ke ʼōmai tanatou kau fakaafe pea ke nātou kai fakatahi te meʼa kai kano lelei ʼaē neʼe teuteuʼi.

² ʼI totatou ʼuhiga Kilisitiano, ʼe tou fakatalitali ki te meʼa ʼe maʼuhiga age. Koteā ʼaē ʼe tou fakatalitali kiai? ʼE tou fakatalitali fuli ki “te ʼaho ʼo Sehova”! ʼO aʼu ki tana hoko mai, ʼe tonu ke tou hage ko te polofeta ko Mikea, ʼaē neʼe ina ʼui fēnei: “ʼE ko Sehova ʼaē ʼe ʼau lamalama anai. ʼE ʼau fia fakatalitali ki te ʼAtua ʼo toku hāofaki.” (Mikea 7:7) ʼE tonu koa ke tou fakaʼauʼauganoa? Kailoa, heʼe kei lahi te gāue ʼaē ʼe tonu ke fai.

3. Ia 2 Petelo 3:11, 12, ʼe tonu ke feafeaʼi te aga ʼa te kau Kilisitiano?

³ ʼE tokoni mai te ʼapositolo ko Petelo ke tou maʼu te manatu ʼaē ʼe lelei ʼi tatatou lolotoga fakatalitali ki te ʼaho ʼaia. ʼE ina ʼui fēnei: “Ko te ʼu faʼahiga tagata feafeaʼi anai ia koutou ʼi te ʼu aga fakamaʼoniʼoni pea mo te ʼu gāue ʼaē ʼe ʼiloga ai ʼe koutou pipiki ki te ʼAtua, ʼo talitali pea mo koutou taupau tuʼumaʼu ʼi tokotou ʼatamai te hoko mai ʼo te ʼaho ʼo Sehova!” (2 Petelo 3:11, 12, MN) Koutou fakatokagaʼi ʼe ina fakahā lelei peʼe tonu ke tou feafeaʼi. ʼE mole fakalotolotolua te palalau ʼa Petelo. ʼI tana ʼu tohi e lua, neʼe ina fakahāhā te faʼahiga maʼuli ʼaē ʼe tonu ke maʼuliʼi e te kau Kilisitiano. Neʼe ina toe tokoniʼi nātou ke nātou fai ia te “ʼu aga fakamaʼoniʼoni pea mo te ʼu gāue ʼaē ʼe ʼiloga ai ʼe [nātou] pipiki ki te ʼAtua.” Logola kua hili taʼu e 30 ki te fakahā ʼaē e Sesu Kilisito te fakaʼiloga ʼo ʼuhiga mo “te fakaʼosi ʼo te tuʼu ʼo te ʼu faʼahiga meʼa ʼaenī,” koia la ʼaē ʼe mole tonu ai ki te kau Kilisitiano ke nātou fakaʼauʼauganoa. (Mateo 24:3, MN) ʼE tonu ke nātou “talitali pea mo [nātou] taupau tuʼumaʼu ʼi [tonatou] ʼatamai” te hoko mai ʼo te ʼaho ʼo Sehova.

4. Koteā te faka ʼuhiga ʼo te “taupau tuʼumaʼu ʼi [tonatou] ʼatamai te hoko mai ʼo te ʼaho ʼo Sehova”?

⁴ Ko te kupu faka Keleka ʼaē neʼe fakaliliu ʼaki te kupusiga palalau “taupau tuʼumaʼu ʼi tokotou ʼatamai” ko tona faka ʼuhiga ke “fakaviliviliʼi.” ʼIo, ʼe mole feala moʼoni ke tou “fakaviliviliʼi” te ʼaho ʼo Sehova. ʼO ʼuhiga mo te faʼahi ʼaia, ʼe mole tou “ʼiloʼi te ʼaho peʼe ko te hola” ʼaē ʼe haʼu ai anai ia Sesu Kilisito ʼo fakahoko ia te fakamāu ki te ʼu fili ʼo tana Tāmai. (Mateo 24:36; 25:13, MN) ʼE ʼui e te tohi ko te haʼuʼaga ʼo te kupusiga palalau “fakaviliviliʼi” ko tona faka ʼuhiga “‘ke fakavaveʼi,’ pea ʼe fakapipiki ‘ki te faʼafai, ki te fai ʼo he meʼa.’” Koia neʼe fakaloto mālohiʼi ai e Petelo tona ʼu tēhina ke nātou “holi mālohi” ki te hoko mai ʼo te ʼaho ʼo Sehova. Neʼe feala ke nātou fai ia te faʼahi ʼaia mo kapau neʼe nātou taupau tuʼumaʼu ʼi tonatou ʼatamai ia te ʼaho ʼaia. (2 Petelo 3:12, kiʼi nota ʼi te lalo pasina) ʼI te kua ōvi mai ʼo “te ʼaho lahi pea mo fakamanavahe ʼo Sehova,” ʼe tonu ke feiā mo tatou.—Soele 2:31.

Tou Fakatalitali ʼAki Ni ʼu “Aga Fakamaʼoniʼoni”

5. ʼE tou lava fakahā feafeaʼi ʼe tou “holi mālohi” ke tou sisio ki “te ʼaho ʼo Sehova”?

⁵ Kapau ʼe tou “holi mālohi” ke tou hāo ʼi te ʼaho ʼo Sehova, ʼe tou fakahā anai te faʼahi ʼaia ʼaki tatatou ʼu “aga fakamaʼoniʼoni pea mo te ʼu gāue ʼaē ʼe ʼiloga ai ʼe [tou] pipiki ki te ʼAtua.” Ko te kupusiga palalau “aga fakamaʼoniʼoni” ʼe ina fakamanatuʼi mai te tokoni ʼaenī ʼa Petelo: “Ohage ko he ʼu fānau talagafua, ke ʼaua naʼa koutou toe maʼuli ʼo ʼalutahi mo te ʼu holi ʼaē neʼe koutou maʼu ʼi te temi muʼa, ʼi te temi ʼaē neʼe kei koutou nonofo ai ʼi te fakapōʼuli, kae ʼo ʼalutahi mo te Maʼoniʼoni ʼaē neʼe ina pāuiʼi koutou, mo koutou foki ke koutou liliu ʼo maʼoniʼoni ʼi takotou aga katoa, he neʼe tohi fēnei: ‘ʼE tonu ke koutou maʼoniʼoni, heʼe ʼau maʼoniʼoni.’”—1 Petelo 1:14-16, MN.

6. Ke tou maʼoniʼoni, koteā ʼaē ʼe tonu ke tou fai?

⁶ Ke tou maʼoniʼoni, ʼe tonu ke tou maʼa ʼi te faʼahi fakasino, ʼi te faʼahi ʼo te fakakaukau, mo te faʼahi ʼo te aga ʼaē ʼe tonu ke fai, pea mo te faʼahi fakalaumālie. ʼE tou nofo teuteu koa ki “te ʼaho ʼo Sehova” ʼo tou nonofo maʼoniʼoni ʼi totatou ʼuhiga hahaʼi ʼa Sehova? ʼE mole faigafua ia ʼaho nei ke tou maʼu te taʼi maʼa ʼaia, koteʼuhi ʼi te malamanei ʼe hifohifo māmālie pe te ʼu aga ʼaē ʼe tonu ke fai. (1 Kolonito 7:31; 2 Timoteo 3:13) ʼE kehekehe koa ia tatatou ʼu lekula ʼo ʼuhiga mo te aga ʼaē ʼe tonu ke fai pea mo ʼaē ʼa te malamanei? Kapau ʼe mole kehekehe mo tanatou ʼu lekula, pea ʼe tonu ke tou fetogi. ʼE tonu koa ki tatatou ʼu lekula ʼaē ʼe māʼoluga age, ke fetogi e te ʼu lekula ʼo te malamanei? Kapau ʼe tou nonofo ʼi te ʼaluʼaga ʼaia, pea ʼe tonu ke tou fai he puleʼaki kiai ke leleiʼia ai tatou e te ʼAtua.

7, 8. (a) ʼE tou lava pulihi feafeaʼi te maʼuhiga ʼo te fai ʼo ni ʼu “aga fakamaʼoniʼoni”? (b) Koteā te ʼu fakatonutonu ʼe feala ke tou fai ʼo ʼuhiga mo tatou?

⁷ ʼI te kua mālohi ʼo te fakahā ʼo te ʼu felāveʼi fakasino heʼeʼaoga ʼi te Internet, pea mo te kua faigafua ʼo tona maʼu, ko ʼihi ʼaē ki muʼa atu neʼe mole nātou maʼu te ʼu meʼa ʼaia, ʼe ʼui e te tōketā, ʼi te temi nei kua nātou maʼu “he ʼu tuʼuga fealagia ʼo ʼuhiga mo ni ʼu felāveʼi fakasino.” Kapau ʼe tou kumi te ʼu meʼa heʼemaʼa ʼaia ʼi te Internet, ʼe mahino ia ʼe mole tou ʼiloʼi te fakatotonu ʼa te Tohi-Tapu ʼaē ke “ʼaua naʼa [tou] fāfā ki he meʼa ʼe heʼemaʼa.” (Isaia 52:11) ʼE tou ‘taupau tuʼumaʼu moʼoni koa ʼi totatou ʼatamai te hoko mai ʼo te ʼaho ʼo Sehova’? Peʼe lagi tou fakaholomuli koa te ʼaho ʼaia, ʼo tou ʼui ʼe tatau aipe peʼe tou ʼulihi totatou ʼatamai ʼaki ni ʼu meʼa heʼeʼaoga, kae ʼe tou maʼu anai he temi moʼo fakamaʼa ʼo tatou totonu? Kapau ʼe tou tau mo ni ʼu fihifihia ʼi te ʼu ʼaluʼaga ʼaia, tou foimo kole kia Sehova ke ina ‘leʼei kehe totatou ʼu mata ke ʼaua naʼa sio ki te meʼa ʼaē ʼe vaʼiganoa pea mo puipui ia tatou ʼi tona ʼu ala’!—Pesalemo 119:37.

⁸ Tokolahi te kau Fakamoʼoni ʼa Sehova, peʼe matutuʼa peʼe tūpulaga, neʼe nātou taupau maʼu te ʼu lekula māʼoluga ʼa te ʼAtua, pea neʼe nātou tekeʼi te ʼu fakaneke heʼeʼaoga ʼo te malamanei. ʼI tanatou mahino ki te maʼuhiga ʼo totatou temi pea mo te fakatokaga ʼa Petelo ʼaē “ko te ʼaho ʼo Sehova ʼe haʼu anai ohage ko he tagata kaihaʼa,” ʼe nātou haga fai te ʼu “aga fakamaʼoniʼoni.” (2 Petelo 3:10, MN) ʼE nātou fakahā ʼi tanatou ʼu aga ʼe nātou “talitali pea mo [nātou] taupau tuʼumaʼu ʼi [tonatou] ʼatamai te hoko mai ʼo te ʼaho ʼo Sehova.”a

Tou Fakatalitali ʼAki Ni ‘ʼu Gāue ʼe ʼIloga Ai ʼe Tou Pipiki Ki Te ʼAtua’

9. Ko tatatou pipiki ki te ʼAtua ʼe tonu ke ina uga tatou kiteā?

⁹ ʼE toe maʼuhiga foki mo te “ʼu gāue ʼaē ʼe ʼiloga ai ʼe [tou] pipiki ki te ʼAtua” ke feala hatatou manatuʼi tuʼumaʼu ia te ʼaho ʼo Sehova. Ko te “pipiki ki te ʼAtua” ko tona faka ʼuhiga, ʼe tou fakaʼapaʼapa kia te ia, ʼo fai te meʼa ʼaē ʼe ina leleiʼia. ʼE tou pipiki agatonu kia Sehova ʼuhi ko te ʼu gāue ʼaē ʼe ʼiloga ai ʼe tou pipiki ki te ʼAtua. ʼE ko tona finegalo “ke hāofaki te faʼahiga tagata fuli pe, pea ke nātou aʼu ki te ʼatamai mālama totonu ʼo te moʼoni.” (1 Timoteo 2:4, MN) Ko te ʼAtua ʼe “mole ina loto ke fakaʼauha he tahi kae ʼe loto ia ke aʼu te hahaʼi fuli ki te fakahemala.” (2 Petelo 3:9, MN) Koia, ʼaki tatatou pipiki ki te ʼAtua ʼe tou fakalahi age anai tatatou ʼu faiga ʼaē ke tou tokoni ki te hahaʼi ke nātou ako ia Sehova pea mo faʼifaʼitakiʼi ia ia?—Efeso 5:1.

10. He koʼe ʼe tonu ke tou tokakaga ki “te mālohi fakahala ʼo te ʼu koloā”?

¹⁰ Kapau ʼe tou ʼuluaki kumi muʼa te Puleʼaga ʼo te ʼAtua, pea ʼe mahu anai totatou maʼuli ʼaki ni ʼu gāue ʼe fakaʼiloga ai ʼe tou pipiki ki te ʼAtua. (Mateo 6:33) Koia ʼaē ʼe tonu ai ke tou fakapotopoto ʼi tatatou faʼahiga fakaʼaogaʼi te ʼu koloā faka mālama. Neʼe fakatokaga fēnei e Sesu: “Ke koutou tokaga pea ke koutou taupau ia koutou mai te ʼu faʼahiga mānumānu kehekehe, heʼe tatau aipe peʼe nofo he tahi ʼi te mahu, ko tona maʼuli ʼe mole haʼu mai te ʼu meʼa ʼaē ʼe ina maʼu.” (Luka 12:15, MN) Logola ʼe ʼe feala ke tou manatu, ʼe mole fakahalaʼi anai tatou e te manako ki te paʼaga, kae ʼe tonu ke tou tokakaga fakalelei ko “te hoha ki te tuʼu ʼo te ʼu faʼahiga meʼa ʼaenī pea mo te mālohi fakahala ʼo te ʼu koloā” ʼe feala ke ina “taʼotaʼo te folafola” ʼa te ʼAtua. (Mateo 13:22, MN) ʼE lagi feala ke faigataʼa totatou maʼuli. Koia ʼaē ʼi ʼihi fenua ʼo te malamanei, tokolahi ʼi tanatou manatu kapau ʼe tonu ke nātou maʼuli fīmālie, pea ʼe tonu ke nātou ʼolo ki he tahi ʼu fenua koloaʼia, ʼo lagi nātou mamaʼo ai ʼi tonatou ʼu famili lolotoga ni ʼu taʼu. Māʼiape la mo ʼihi ʼi te hahaʼi ʼa te ʼAtua neʼe nātou manatu feiā. ʼI tanatou ʼolo ki te tahi ʼu fenua, lagi neʼe feala ai ke nātou foaki ki tonatou ʼu famili te ʼu meʼa ʼaē ʼe ʼaoga ki tonatou maʼuli. Kae ʼi tanatou toe liliu mai ki tonatou ʼapi, e feafeaʼi te maʼuli fakalaumālie ʼo tonatou famili? Kapau ʼe mole kei ʼi ai te takitaki fakapotopoto ʼa te pule famili, ʼe nātou maʼu anai koa te ʼu meʼa fakalaumālie ʼaē ʼe ʼaoga kia nātou ke feala hanatou hāo ʼi te ʼaho ʼo Sehova?

11. Neʼe fakahā feafeaʼi e te tagata neʼe ʼalu ʼo gāue faka temi ʼi he tahi fenua, neʼe maʼuhiga age kia ia te ʼu gāue ʼaē ʼe ʼiloga ai tana pipiki ki te ʼAtua ʼi ni ʼu koloā?

¹¹ Ko te tagata mai Filipine neʼe ʼalu ʼo gāue faka temi ʼi te tahi fenua, neʼe ina ako mo te kau Fakamoʼoni ʼa Sehova ʼi Saponia ia te ʼu moʼoni ʼo te Tohi-Tapu. ʼI tana ako te ʼu meʼa ʼaē ʼe fakamaʼua mai e te Tohi-Tapu ki te ʼu famili, neʼe mahino kia ia neʼe tonu ke tokoni ki tona famili ke nātou liliu ko ni kau atolasio ʼa Sehova. (1 Kolonito 11:3) ʼI Filipine ko tona ʼohoana neʼe fakafeagai lahi ki tana tui, pea neʼe ina loto pe ke momoli tuʼumaʼu mai e tona ʼohoana kia ia te falā, kae ke ʼaua naʼa toe liliu age ki tona ʼapi moʼo akoʼi ki tona famili te ʼu moʼoni ʼo te Tohi-Tapu. Kae ʼi tana mahino ʼaē kua nounou te temi pea mo tana ʼofa ʼaē ki tona kiʼi famili, neʼe toe liliu mai ki tona ʼapi. Neʼe ʼi ai te ʼu fua ʼo tana faʼa kātaki ʼo felogoi ʼi te ʼofa mo tona famili. Ki muli age, neʼe nātou logo tahi ʼi te tauhi moʼoni, pea ko tona ʼohoana kua kau ki te selevisi temi katoa.

12. He koʼe ʼe tonu ke tou fakamuʼamuʼa te ʼu meʼa fakalaumālie ʼi totatou maʼuli?

¹² ʼE feala ke fakatatau totatou ʼaluʼaga mo niʼihi ʼe nonofo ʼi he falefata ʼe lolotoga vela. ʼE tou fakapotopoto anai koa mo kapau ʼe tou liliu ʼo toʼo mai he meʼa ʼi he fale ʼe vela pea mo ʼamanaki holo? Kailoa ia, ʼe maʼuhiga age ke tou hāofaki totatou maʼuli—ia tatou totonu pea mo totatou famili, pea mo ʼihi ʼe nonofo ʼi te falefata? Ko te tuʼu ʼaenī ʼe ʼamanaki fakaʼauha fakavilivili, pea ʼe lahi te hahaʼi ʼe tonu ke hāofaki. Kapau ʼe tou mahino ki te faʼahi ʼaia, pea ʼe tonu ke tou fakamuʼamuʼa te ʼu meʼa fakalaumālie, pea ke tou tokakaga fakalelei ki te faka mafola ʼo te Puleʼaga, te gāue ʼaē ka ina hāofaki te hahaʼi.—1 Timoteo 4:16.

ʼE Tonu Ke Tou “Heʼe Mele”

13. ʼE tonu ke tou feafeaʼi mokā hoko mai te ʼaho ʼo Sehova?

¹³ Moʼo faka maʼuhigaʼi tatatou fia fakatalitali, ʼe ʼui fēnei e Petelo: “Kau ʼofaina, mai tona ʼuhiga ʼaē ʼe koutou talitali ki te ʼu meʼa ʼaia, koutou faiga ke ina maʼu mai koutou, ʼe koutou heʼe mele mo maʼa pea mo maʼuli ʼi te tokalelei.” (2 Petelo 3:14, MN) ʼO mole gata pe ʼi tana tokoni ʼaē ke tou fai ni ʼu aga fakamaʼoniʼoni pea mo ni ʼu gāue ʼe fakaʼiloga ai tatatou pipiki ki te ʼAtua, kae ʼe toe fakahā e Petelo ia te maʼuhiga ʼaē ke tou maʼa ʼaki te taʼataʼa ʼo Sesu ia muʼa ʼa Sehova. (Apokalipesi 7:9, 14) ʼE tonu ke tou haga tui ki te sakilifisio ʼo Sesu, pea ke tou foaki totatou maʼuli ʼo tou papitema ko he kaugana ʼa Sehova.

14. Koteā ʼaē ʼe tonu ke tou fai mo kapau ʼe tou fia “heʼe mele”?

¹⁴ ʼE fakaloto mālohiʼi tatou e Petelo ke tou faiga ʼaupito ke maʼu tatou ʼe tou “heʼe mele.” ʼE heʼe mele koa tatatou aga pea mo totatou ʼulugaaga Kilisitiano, peʼe ʼulihi koa e te malamanei? Ka tou fakatokagaʼi he pule ʼi totatou kofu, ʼe tou foimo faigaʼi ke tou fakamaʼa. Kapau ko hotatou kofu ʼe tou leleiʼia, ʼe tou fō fakaleleiʼi anai. ʼE tou feiā koa mo kapau kua tou ʼuli ʼi te faʼahi fakalaumālie, ʼuhi ko he mele ʼi totatou ʼulugaaga peʼe ko tatatou aga?

15. (a) He koʼe neʼe tonu ki te kau Iselaele ke nātou sipi tonatou ʼu tapaʼi kofu? (b) He koʼe ʼe tonu ke kehe te ʼu kaugana ʼa Sehova ʼo te temi nei?

¹⁵ Neʼe tonu ki te kau Iselaele ke nātou “sipi tonatou ʼu tapaʼi kofu” pea ke nātou “tui he kauʼi filo ʼuʼui ʼi ʼoluga ʼo te tapaʼi kofu [ʼaia].” Koteā tona tupuʼaga? Kapau ʼe nātou fai feiā, pea ʼe nātou manatuʼi ai anai te ʼu fakatotonu ʼa Sehova, pea mo nātou fakalogo kiai, pea ʼe nātou “maʼoniʼoni” ki tonatou ʼAtua. (Faka au 15:38-40) ʼI totatou ʼuhiga kaugana ʼa Sehova ʼi te temi nei, ʼe tou kehekehe mo te malamanei, heʼe tou maʼuliʼi te ʼu lao pea mo te ʼu pelesepeto ʼa te ʼAtua. Ohage la, ʼe tou maʼa ʼi te faʼahi ʼo te aga ʼaē ʼe tonu ke fai, pea ʼe tou fakaʼapaʼapa ki te maʼoniʼoni ʼo te toto, pea ʼe tou tekeʼi te faʼahiga tauhi tamapua kehekehe. (Gaue 15:28, 29) Tokolahi ʼe nātou fakaʼapaʼapaʼi tatou ʼuhi ko tatatou faiga mālohi ʼaē ke ʼaua naʼa tou ʼuli.—Sakopo 1:27.

ʼE Tonu Ke Tou “Maʼa”

16. ʼE tonu ke tou feafeaʼi mo kapau ʼe tou fia “maʼa” tuʼumaʼu?

¹⁶ ʼE ʼui e Petelo ʼe tonu ke tou “maʼa.” ʼO feafeaʼi? Ko he pule ʼi he kofu, ʼe feala pe tona fō, kae ko he mele ʼe faigataʼa tona fakatō pea ko tona faka ʼuhiga ʼe ʼi ai te meʼa ʼe kovi ʼi tokita loto, ʼe lākahala. Neʼe tokoniʼi fēnei e te ʼapositolo ko Paulo ia tona ʼu tēhina Kilisitiano ʼi Filipe: “Koutou haga fai ia meʼa fuli ʼo mole koutou muhumuhu pea mo fakafifihi, ke mole tukugakoviʼi ai koutou ʼi he meʼa pea mo koutou maʼa, ʼu fānau ʼa te ʼAtua, ʼo heʼe mele ʼi te lotolotoiga ʼo he taʼiake ʼe aga fakalialia pea mo fakapikopiko, ʼaē ʼe koutou gigila ai ohage ko he ʼu mālama ʼi te malamanei.” (Filipe 2:14, 15, MN) Kapau ʼe tou muliʼi te tokoni ʼaia, ʼe tou tekeʼi anai te muhumuhu pea mo te ʼu fakafifihi, pea ʼe tou tauhi anai ki te ʼAtua ʼaki ni ʼu manatu ʼe lelei. ʼE tou faka mafola te “logo lelei ʼaenī ʼo te puleʼaga,” heʼe tou ʼofa kia Sehova pea mo totatou tatau. (Mateo 22:35-40; 24:14, MN) Tahi ʼaē meʼa, ʼe tou haga faka mafola anai te logo lelei tatau aipe mo kapau ko te hahaʼi ʼe mole nātou mahino pe koʼe ʼe tou fakaʼaogaʼi totatou temi moʼo tokoni ki te hahaʼi ke nātou ako te ʼAtua pea mo tana Folafola ia te Tohi-Tapu.

17. Koteā ʼaē ʼe tonu ke ina uga tatou mokā ʼe tou fakahoko hotatou ʼu pilivilesio ʼi te kokelekasio faka Kilisitiano?

¹⁷ Kapau ʼe tou loto ke maʼu mai tatou ʼe tou “maʼa,” pea ʼe tonu ke tou vakavakaʼi fakalelei te ʼu meʼa ʼaē ʼe ina uga tatou ʼi te ʼu meʼa fuli ʼaē ʼe tou fai. Kua tou situʼa ki te ʼu meʼa ʼaē ʼe fai ʼi te mālama, ohage la ko te fia maʼu koloā peʼe ko te fia maʼu tuʼulaga. Kapau ʼe tou maʼu hotatou ʼu pilivilesio ʼi te kokelekasio, ʼofa pe ke maʼa pea ke tou ʼofa tuʼumaʼu kia Sehova pea mo te hahaʼi. ʼE ko he meʼa lelei hakita sio ki ni ʼu tagata ʼe nātou aga fakalaumālie, mo fiafia pea mo agavaivai, ʼe nātou “loto . . . ki he gāue faka taupau” ʼo nātou kaugana maʼa Sehova pea mo tonatou ʼu tēhina. (1 Timoteo 3:1, MN; 2 Kolonito 1:24) ʼIo, ko nātou ʼaē neʼe fakanofo ko te kau tagata ʼāfea moʼo “fafaga te faga ōvi ʼa te ʼAtua . . . [ʼe nātou] lotolelei; ʼo mole [nātou] fai ʼaki te manako ki he koloā heʼe faitotonu, kae ʼaki he fia gāue mālohi; ʼo mole [nātou] fai ohage ko he ʼu hahaʼi ʼe nātou pule fakaʼaliki kia nātou ʼaē ko te tōfiga ʼa te ʼAtua, kae [ʼe] nātou liliu ko ni ʼu faʼifaʼitakiʼaga ki te faga ōvi.”—1 Petelo 5:1-4, MN.

ʼE Tonu Ke Tou Nonofo “ʼi Te Tokalelei”

18. Koteā te ʼu kalitate ʼaē ʼe ʼiloa ai te kau Fakamoʼoni ʼa Sehova?

¹⁸ ʼOsi ʼaia, ʼe ʼui e Petelo ke tou nonofo “ʼi te tokalelei.” Moʼo fakahoko lelei te faʼahi ʼaia, ʼe tonu ke tou tokalelei mo Sehova pea mo totatou tatau. ʼE fakahā e Petelo ia te maʼuhiga ʼaē ke “mālohi [tatatou] feʼofaʼofani” pea mo tou maʼuli tokalelei mo totatou ʼu tēhina. (1 Petelo 2:17; 3:10, 11; 4:8; 2 Petelo 1:5-7) ʼE tonu ke tou feʼofaniʼaki moʼo taupau tatatou tokalelei. (Soane 13:34, 35; Efeso 4:1, 2) ʼE ʼasi lelei ia totatou ʼofa pea mo totatou tokalelei ʼi tatatou ʼu fakatahi lalahi. ʼI te fakatahi ʼi Costa Rica ʼi te 1999, ko te tagata faifakatau neʼe ʼita ʼi te malaʼe vakalele he neʼe ū tana fakatauʼaga meʼa ʼuhi ko te fakatalitali ʼa te kau Fakamoʼoni ʼa Sehova ki te tahi kau folau Fakamoʼoni. Kae ʼi te lua ʼaho, neʼe ina fakatokagaʼi te ʼofa pea mo te tokalelei ʼaē neʼe ʼasi ʼi te fakatalitali fakafiafia ʼaē neʼe fakahā ki te kau Fakamoʼoni ʼaē neʼe ʼōmai, logola tanatou mole feʼiloʼiʼaki lelei mo te kau Fakamoʼoni ʼa Sehova ʼaē neʼe nātou fakatalitali kiai. ʼI te ʼaho fakaʼosi, neʼe kau mo te tagata faifakatau ʼaia ki te fakatalitali pea neʼe ina kole ke fai hana ako Tohi-Tapu.

19. He koʼe ʼe maʼuhiga tāfito ke tou maʼuli tokalelei mo totatou ʼu tēhina mo tuagaʼane fakalaumālie?

¹⁹ Ko tatatou faiga fakamalotoloto ʼaē ke tou maʼuli tokalelei mo totatou ʼu tēhina mo tuagaʼane fakalaumālie, ʼe iku lelei anai ki tatatou fakatalitali ki te ʼaho ʼo Sehova pea mo tona mālama foʼou ʼaē neʼe ina fakapapauʼi mai. (Pesalemo 37:11; 2 Petelo 3:13) Kapau la ʼe faigataʼa hatatou tokalelei mo he tēhina, ʼe feala koa hatatou ʼui ʼe tou maʼuli tokalelei anai mo ia ʼi te palatiso? Kapau ʼe mamahi he tēhina kia tatou, ʼe tonu ke tou foimo ʼalu ʼo ‘fakatokatoka mo ia.’ (Mateo 5:23, 24) ʼE maʼuhiga ia te faʼahi ʼaia mo kapau ʼe tou fia tokalelei mo Sehova.—Pesalemo 35:27; 1 Soane 4:20.

20. Ko te ʼu ʼaluʼaga fea ʼaē ʼe tou fakahā ai ʼe tou “fia fakatalitali”?

²⁰ ʼE tou ‘talitali koa pea mo tou taupau tuʼumaʼu ʼi totatou ʼatamai te hoko mai ʼo te ʼaho ʼo Sehova’? Kapau ʼe tou nonofo maʼa ʼi te mālama heʼeʼaoga ʼaenī, pea ʼe tou fakahā ai anai tatatou holi mālohi ʼaē ke tou sio ki te fakaʼosi ʼo te tuʼu agakovi ʼaenī. Tahi ʼaē meʼa, ʼaki tatatou ʼu gāue ʼaē ʼe fakaʼiloga ai ʼe tou pipiki ki te ʼAtua, ʼe tou fakahā ai tatatou holi mālohi ʼaē ke aʼu mai la te ʼaho ʼo Sehova pea ke tou maʼuli ʼi te pule ʼo te Puleʼaga. Pea ʼe hā tatatou fakaʼamu ʼaē ke tou maʼuʼuli ʼi te tokalelei ʼi te mālama foʼou, ʼi tatatou faiga ʼaē ke tou maʼuli tokalelei mo totatou ʼu tēhina ʼi te temi nei. Kapau ʼe tou fai feiā, pea ʼe tou fakahā ai ʼe tou “fia fakatalitali,” pea ʼe tou “taupau tuʼumaʼu ʼi [totatou] ʼatamai te hoko mai ʼo te ʼaho ʼo Sehova.”

[Kiʼi nota]

Kei Koutou Manatuʼi Koa?

• Koteā te faka ʼuhiga ʼo te taupau “tuʼumaʼu ʼi [totatou] ʼatamai te hoko mai ʼo te ʼaho ʼo Sehova”?

• ʼE tou fakahā feafeaʼi ʼi tatatou aga ʼe tou “fia fakatalitali”?

• He koʼe ʼe maʼuhiga ia te “ʼu gāue ʼaē ʼe ʼiloga ai ʼe [tou] pipiki ki te ʼAtua”?

• He koʼe ʼe tonu ke maʼu tatou e Sehova ʼe tou “heʼe mele mo maʼa pea mo maʼuli ʼi te tokalelei”?

[Paki ʼo te pasina 11]

ʼAki tatatou ʼu aga fakamaʼoniʼoni ʼe tou fakahā ai ʼe tou “fia fakatalitali”

[Paki ʼo te pasina 12]

Ko te faka mafola ʼo te Puleʼaga ʼe ko he gāue moʼo hāofaki te hahaʼi

[Paki ʼo te pasina 14]

ʼO fakatalitali ki te ʼaho ʼo Sehova, tou haga maʼuli tokalelei mo te hahaʼi