“Ko Te ʼu Faʼahiga Tagata Feafeaʼi Anai Ia Koutou!”
“Mai tona ʼuhiga ʼaē ʼe tonu ki te ʼu meʼa fuli ʼaia ke mavetevete, ko te ʼu faʼahiga tagata feafeaʼi anai ia koutou ʼi te aga fakamāʼoniʼoni pea mo te ʼu gāue ʼaē ʼe fakaʼiloga ʼaki takotou pipiki ki te ʼAtua!”—2 PET. 3:11.
1. He koʼē neʼe tō lelei te lua tohi fakalotomālohi ʼa Petelo ki te kau Kilisitiano ʼo tona temi?
ʼI TE temi ʼaē neʼe fai e Petelo tana lua tohi ʼaki te takitaki ʼa te laumālie māʼoniʼoni, neʼe kua lahi pē te ʼu fakataga neʼe hoko ki te kōkelekāsio Fakakilisitiano, kae neʼe mole vaivai ai tana lotomālohi ʼi te fakamafola pea neʼe mole fakasiʼisiʼi tana tuputupu. Koia neʼe fai e te Tēvolo te tahi puleʼaki fakakākā, ʼaē neʼe kua lava lelei ʼi te tahi ʼu lakaga. Ohagē ko tona fakahā mai e Petelo, neʼe faiga e Satana ke ina fakahalaʼi te hahaʼi ʼa te ʼAtua ʼaki hana fakaʼaogaʼi he kau faiakonaki loi “ ʼe fonu ʼonatou mata ʼi te tono” pea “kua akoako tonatou loto ki te mānumānu.” (2 Pet. 2:1-3, 14; Suta 4) Koia lā ʼaē ko te lua tohi ʼa Petelo ʼe ko he fakalotomālohi maʼuhiga ke tou nofo agatonu.
2. Koteā te kupu tāfito ʼo te lua tohi ʼa Petelo kāpite 3, pea koteā te ʼu fehuʼi ʼaē ʼe tonu ke tou fai kiā tātou takitokotahi?
2 Neʼe tohi fēnei e Petelo: “ ʼE au manatu ʼe tonu ke au fakaʼalaʼala koutou ʼaki taku ʼu fakamanatu, ʼi taku kei nofo ʼi te tapenakulo nei, ʼi taku ʼiloʼi ʼaē kua vave hoko mai taku tuku ia taku tapenakulo ʼaenī. . . . Koia ʼe au faiga mālohi anai ʼi te temi fuli pē ʼaē ʼe feala ai mokā au ʼosi mavae, ke kotou toe lava talanoa mo koutou ki te ʼu faʼahi ʼaia.” (2 Pet. 1:13-15) ʼEī, neʼe kua ʼiloʼi pē e Petelo te kua ovi mai ʼo tona mate, kae neʼe fakaʼamu mālohi ke fakamanatuʼi tana ʼu tokoni. Pea ʼe mahino ia, neʼe tohi te ʼu tokoni ʼaia ki te Tohi-Tapu, pea ʼe kei feala hona lau e te hahaʼi fuli ʼi te temi nei. ʼE maʼuhiga ʼaupitō kiā tātou ia te kāpite 3 ʼo te lua tohi ʼa Petelo, heʼe talanoa tāfito ai ki “te ʼu ʼaho fakaʼosi” ʼo te mālama ʼaenī pea mo te fakaʼauha ʼo te ʼu lagi pea mo te kele fakatātā. (2 Pet. 3:3, 7, 10) Koteā te tokoni ʼaē ʼe fai mai e Petelo kiā tātou? ʼE feafeaʼi anai hatatou maʼu ia te ʼofa ʼo Sehova mo kapau ʼe tou maʼuliʼi te tokoni ʼaia?
3, 4. (a) Koteā te fakalotomālohi ʼaē neʼe fai e Petelo, pea koteā te fakatokaga neʼe ina fai? (b) Koteā te ʼu puani e tolu ʼaē kā tou vakaʼi anai?
3 ʼI tana ʼosi talanoa ki te fakaʼauha ʼo te mālama ʼa Satana, neʼe tohi fēnei e Petelo: “Ko te ʼu faʼahiga tagata feafeaʼi anai ia koutou ʼi te aga fakamāʼoniʼoni pea mo te ʼu gāue ʼaē ʼe fakaʼiloga ʼaki takotou pipiki ki te ʼAtua!” (2 Pet. 3:11, 12) ʼE hā lelei mai ai, neʼe mole fai ʼi henī e Petelo he fehuʼi, kae neʼe ina fai he fakalotomālohi ki tana kau lautohi. Neʼe ʼiloʼi e Petelo, ʼe ko nātou pē ʼaē kā natou fai te finegalo ʼo Sehova pea mo natou maʼuliʼi he ʼu kalitātē fakaʼatua ʼaē kā fakamaʼuli anai ʼi te “ ʼaho lagavaka” ʼaē kā hoko mai. (Isa. 61:2) Koia, neʼe toe ʼui fēnei ai e te ʼapositolo: “Koia kiā koutou ʼu ʼofaina, ʼaē kua kotou ʼiloʼi fakatomuʼa te faʼahi ʼaia, kotou nonofo tokaga, naʼa taki koutou mo nātou ʼaia [ia te kau faiakonaki loi] ʼi te hala ʼo te hahaʼi ʼaē ʼe natou meʼa noaʼi te lao pea ke ʼaua naʼa kotou hehē mai takotou tutuʼu mālohi.”—2 Pet. 3:17.
4 ʼI tana kau iā nātou ʼaē ʼe natou “ ʼiloʼi fakatomuʼa” te ʼu faʼahi ʼaia, neʼe ʼiloʼi lelei e Petelo ʼo ʼuhiga mo te ʼu ʼaho fakaʼosi, ʼe maʼua anai ki te kau Kilisitiano ke natou nonofo ʼalaʼala ke feala ai hanatou nofo agatonu. Ki muli age, neʼe fakamahino lelei e te ʼapositolo ko Soane pe koʼē ʼe tonu ke natou fai te faʼahi ʼaia. Neʼe sio fakatomuʼa ki te kapu ifo ʼo Satana mai te lagi pea mo tona “ ʼita lahi” kiā nātou “ ʼaē ʼe natou mulimuli ki te ʼu fakatotonu ʼa te ʼAtua pea mo natou maʼu ia te gāue ʼaē ko te fai fagonogono ʼo ʼuhiga mo Sesu.” (Fakh. 12:9, 12, 17) ʼE mālo anai te ʼu kaugana fakanofo agatonu ʼa te ʼAtua pea mo tonatou ʼu kaugā gāue agatonu ʼaē ko te “tahi ʼu ovi.” (Soa. 10:16) Kae ʼe feafeaʼi kiā tātou takitokotahi? ʼE tou nonofo agatonu anai koa? ʼE tou lavaʼi anai te faʼahi ʼaia mo kapau ʼe tou faiga ke tou (1) maʼuliʼi he ʼu klitātē fakaʼatua, (2) mo tou maʼa mo heʼe mele tuʼumaʼu ʼi tatatou ʼu aga pea mo te faʼahi fakalaumālie (3) pea mo tou taupau he manatu ʼe lelei ʼo ʼuhiga mo te ʼu fihifihia. Tou vakaʼi age muʼa te ʼu puani ʼaia.
Tou Maʼuliʼi He ʼu Kalitātē Fakaʼatua
5, 6. Koteā te ʼu kalitātē ʼaē ʼe tonu ke tou maʼuliʼi, pea he koʼē ʼe ʼaoga ke tou “faiga mālohi” kiai?
5 ʼI te kamataʼaga ʼo tana lua tohi, neʼe tohi fēnei e Petelo: “ ʼI takotou haga ʼo fai he ʼu faiga mālohi, kotou fakatahiʼi ki takotou tui te vilitūtē, ki takotou vilitūtē te ʼatamai mālama, ki takotou ʼatamai mālama te loto lolomi, ki takotou loto lolomi te faʼa kātaki, ki takotou faʼa kātaki te aga fakalotu, pea ki takotou aga fakalotu te agalelei fakatautēhina, ki takotou agalelei fakatautēhina te ʼofa. Kapau ko te ʼu meʼa ʼaia ʼe maʼu iā koutou pea mo mahu ai, pea ʼe natou tāʼofi anai koutou ke mole kotou liliu ʼo tō noa peʼe heʼe fua ʼo ʼuhiga mo te ʼatamai mālama totonu ʼo totatou ʼAliki ko Sesu Kilisito.”—2 Pet. 1:5-8.
6 ʼE moʼoni, ʼe tonu ke tou “faiga mālohi” ke tou kau ʼi te ʼu gāue ʼaē ʼe tou maʼuliʼi ai te ʼu kalitātē fakaʼatua. Ohagē lā, ʼe tonu ke tou faiga mālohi ke tou tatuʼu tuʼumaʼu ki te ʼu fono fuli, pea mo lau te Tohi-Tapu ʼi te ʼaho fuli, pea mo mulimuli lelei ki tatatou polokalama ako takitokotahi. Pea ʼe lagi ʼaoga anai ke tou gāue mālohi ke feala hatatou fai tuʼumaʼu ia te Tauhi Fakafāmili ʼi te afiafi, ʼe lelei pea mo ʼaoga. Kae kapau ʼe fai tuʼumaʼu te ʼu agamāhani ʼaia, pea ʼe mole toe mamafa anai tona fakahoko, tāfito lā mokā ʼe tou maʼu tona ʼu fua lelei.
7, 8. (a) Koteā te ʼui ʼa ʼihi ʼo ʼuhiga mo te afiafi ʼaē neʼe fakatuʼutuʼu ki te Tauhi Fakafāmili? (b) Koteā te ʼu fua lelei ʼaē ʼe kotou maʼu ʼi takotou ako fakafāmili?
7 Neʼe tohi fēnei e te tuagaʼane ʼo ʼuhiga mo te tauhi fakafāmili: “ ʼE ko he fealagia ʼaia ke tou ako ai he ʼu faʼahiga meʼa kehekehe.” ʼE ʼui fēnei e te tahi tuagaʼane: “ ʼI te kamata, neʼe mole au loto ke tuku te ako tohi. Neʼe ko te fono tāfito ʼaia neʼe au leleiʼia. Kae ʼi te temi nei, kua tou maʼu totatou afiafi ki te Tauhi Fakafāmili, pea kua mahino kiā au ʼe ʼiloʼi pē e Sehova te ʼu meʼa ʼaē ʼe ʼaoga kiā tātou ʼi tona temi totonu.” ʼE ʼui fēnei e te pule fāmili: “Ko te tauhi fakafāmili ʼe ko he toe tokoni lahi kiā māua. ʼE mā teuteuʼi tamā ako, ʼo mulimuli pē ki te ʼu meʼa ʼaē ʼe ʼaoga ki he taumātuʼa! ʼE mā logoʼi tamā kua tuputupu ʼi te fakahā ʼo te ʼu fua ʼo te laumālie māʼoniʼoni, pea kua lahi age tomā fiafia ʼi te minisitelio.” ʼE toe ʼui fēnei e te tahi pule fāmili: “ ʼE fai e te fānau hanatou ʼu kumi pea ʼe lahi age te ʼu meʼa ʼaē ʼe natou ako, pea ʼe natou fiafia ai. Ko te fakatuʼutuʼu ʼaia ʼe ko he tokoni ke matou falala ko Sehova ʼe ina ʼiloʼi te ʼu meʼa ʼaē ʼe matou tuʼania kiai, pea ʼe tali mai ki tamatou ʼu faikole.” Ko te ʼu palalau ʼaia ʼe tatau koa pea mo te ʼu meʼa ʼaē ʼe kotou logoʼi ʼo ʼuhiga mo te fakatuʼutuʼu fakalaumālie maʼuhiga ʼaia?
8 ʼAua naʼa kotou tuku he ʼu kiʼi fihifihia noa pē ke natou fakalelu ki takotou tauhi fakafāmili. Neʼe ʼui fēnei e te taumātuʼa: “ ʼI te ʼu vāhaʼa ʼaenī e fā kua hili ʼi te ʼu Feliatolu afiafi fuli, neʼe hoko te fihifihia ʼi tomā fāmili pea neʼe feala aipē ke tuku tamā ako fakafāmili, kae neʼe mole mā tuku ke hoko te faʼahi ʼaia.” ʼE mahino ia, ʼi ʼihi temi ʼe tonu anai ke kotou fetogi takotou polokalama. Kae kotou lotomālohi ke ʼaua naʼa kotou tuku ke ʼosi he vāhaʼa kātoa kae mole heʼeki fai takotou Tauhi Fakafāmili!
9. Neʼe tokoni feafeaʼi ia Sehova kiā Selemia, pea koteā te ako ʼe tou tāʼofi mai te meʼa ʼaē neʼe hoko kiā Selemia?
9 Ko te polofetā ko Selemia ʼe ko he faʼifaʼitaki lelei kiā tātou. Neʼe ʼaoga ʼaupitō kiā ia te tokoni fakalaumālie ʼaē neʼe fai age e Sehova kiā te ia, pea neʼe loto fakafetaʼi ʼaupitō ki te faʼahi ʼaia. Ko te meʼa kai ʼaia neʼe ina fakafealagia ki ai ke faʼa kātaki ʼo fai fakamafola ki ni ʼu hahaʼi logogataʼa. Neʼe ina ʼui fēnei: “[Ko] te folafola ʼa Sehova . . . neʼe hagē . . . ko he afi kakaha ʼe nofo ʼi toku ʼu hui.” (Sel. 20:8, 9) Neʼe toe tokoni ki ai ke ina kātakiʼi te ʼu temi faigataʼa ʼaē neʼe iku ki te maumauʼi ʼo Selusalemi. Iā ʼaho nei, kua tou maʼu te Folafola kātoa ʼa te ʼAtua. Kā tou ako fakalelei, ʼo tou faiga ke tou manatu ohagē ko te ʼAtua, pea ʼe tou kātaki fakafiafia anai ʼi te minisitelio ohagē ko Selemia, pea ʼe tou nofo agatonu anai ʼi te ʼu faigataʼaʼia, ʼo tou maʼa tuʼumaʼu ʼi tatatou aga pea mo te faʼahi fakalaumālie.—Sake 5:10.
Tou Nonofo “Maʼa Mo Heʼe Mele”
10, 11. He koʼē ʼe tonu ke tou nonofo “maʼa mo heʼe mele,” pea koteā ʼaē ʼe fakamaʼua kiā tātou?
10 Ko tātou Kilisitiano, ʼe tou ʼiloʼi ʼe tou māʼuʼuli ʼi te temi fakaʼosi. Koia ʼe mole tou punamaʼuli ai, ki te kumi fakavale ʼaē e te hahaʼi ia te ʼu meʼa ʼaē ʼe fakalialia kiai Sehova, ohagē ko te mānumānu paʼaga, mo te ʼu aga heʼeʼaoga, pea mo te agamālohi. Ko te manatu ʼa Satana ʼe feala ke fakanounou fēnei: ‘Kapau ʼe mole feala ke fakamatakuʼi ia te hahaʼi kaugana ʼa te ʼAtua, pea ʼe lagi feala ke fakahalaʼi nātou.’ (Fakh. 2:13, 14) Koia, ʼe tonu ke tou tokaga fakalelei ki te tokoni ʼofa ʼaenī ʼa Petelo: “Kotou faiga ke ina [ia te ʼAtua] maʼu mai koutou, ʼe kotou maʼa mo heʼe mele pea mo maʼuli ʼi te tokalelei.”—2 Pet. 3:14.
11 Ko te kupu “faiga” ʼe tatau pē mo te ʼuluaki tokoni a Petelo ʼaē ke tou “faiga mālohi.” ʼE hā lelei mai ai, ko Sehova ʼaē neʼe ina uga ia Petelo ke ina fai te ʼu tokoni ʼaia, ʼe ina ʼiloʼi pē te ʼaoga ʼaē ke tou “maʼa mo heʼe mele,” pea ke ʼaua naʼa ʼulihi tātou e te mālama fakalialia ʼa Satana. Ko te ʼu faiga ʼaia, ʼe kau ai te puipui ʼo totatou loto ke ʼaua naʼa kākāʼi ʼaki te ʼu holi ki te ʼu meʼa ʼaē ʼe kovi. (Lau ia Tāʼaga Lea 4:23; Sake 1:14, 15.) ʼE toe kau ai mo te nofo agatonu tatau aipē peʼe punamaʼuli te hahaʼi ki totatou maʼuli Fakakilisitiano pea mo “natou talanoa kovi ʼo ʼuhiga mo [tātou].”—1 Pet. 4:4.
12. Koteā te fakapapau ʼaē ʼe fai mai iā Luka 11:13?
12 ʼI totatou ʼuhiga agahala, ʼe faigataʼa kiā tātou ia te fai ʼo te meʼa ʼaē ʼe lelei. (Loma 7:21-25) ʼE hoki tou lavaʼi anai te faʼahi ʼaia mo kapau ʼe tou haga kiā Sehova, ʼaē ʼe ina folahi tona laumālie kiā nātou ʼaē ʼe kole fakamālotoloto age kiā te ia. (Luka 11:13) Pea ko te laumālie ʼaia ʼe ina fakatuputupu iā tātou he ʼu kalitātē ʼe leleiʼia e te ʼAtua, pea ʼe toe tokoni mai te laumālie ke tou tauʼi te ʼu fakahala pea mo te ʼu fihifihia ʼo te maʼuli, ʼaē ʼe toe ʼāsili kovi anai ʼi te fakaovi mai ʼo te ʼaho ʼo Sehova.
Ke Kotou Mālolohi ʼi Te ʼu ʼAhiʼahi
13. Kā tou felāveʼi mo ni ʼu fihifihia ʼi te maʼuli, koteā ʼaē ʼe feala ke tokoni mai ke tou faʼa kātaki ai?
13 ʼI tatatou kei nonofo ʼi te tuʼu agakovi ʼaenī, ʼe tou felāveʼi aipē mo ni ʼu fihifihia. Ke ʼaua naʼa kotou lotovaivai, kae ke kotou fakaʼuhiga te ʼu fihifihia ʼaia ʼe ko he faigamālie ke kotou fakahā ai tokotou ʼofa ʼaē kiā Sehova, mo kotou fakamālohiʼi takotou tui kiā te ia pea mo tana Folafola. Neʼe tohi fēnei e te tisipulo ko Sake: “Kotou fakaʼuhigaʼi te faʼahi ʼaia ohagē ko he fiafia kātoa, ʼoku tehina, mokā kotou felāveʼi mo he ʼu faʼahiga ʼahiʼahi kehekehe, ʼi takotou ʼiloʼi ʼaē ko te maʼuhiga ʼo takotou tui ʼaē kua ʼahiʼahiʼi ʼe ina fakatupu te faʼa kātaki.” (Sake 1:2-4) Kotou manatuʼi foki, “ ʼe ʼiloʼi e Sehova peʼe feafeaʼi te fakahao mai te ʼahiʼahi ia te hahaʼi ʼaē ʼe pipiki ki te ʼAtua.”—2 Pet. 2:9.
14. ʼE fakalotomālohiʼi koa koutou e te faʼifaʼitaki ʼa Sosefo?
14 Kotou vakaʼi te faʼifaʼitaki ʼo te foha ʼo Sakopo ko Sosefo, ʼaē neʼe fakatau e tona ʼu tehina totonu ke liliu ko he tagata kaugana. (Sen. 37:23-28; 42:21) Neʼe vaivai ai koa te tui ʼa Sosefo ʼuhi ko te toe agakovi ʼaia neʼe fai kiā te ia? Neʼe lotomamahi koa ki te ʼAtua ʼi tana tuku ʼaē ke hoko he meʼa kovi fēia kiā ia? ʼE ʼui ʼi te Folafola ʼa te ʼAtua, neʼe mole manatu fēia ia. Kae ko te ʼu mamahi ʼo Sosefo neʼe mole gata ai. Ki muli age, neʼe tukugākoviʼi hala ia ia ke pilisoniʼi he neʼe ʼui, neʼe ina fia fakaʼalikiʼi te ʼohoana ʼo Potifale. ʼI te ʼahiʼahi ʼaia, neʼe hoko atu pē tana pipiki ʼaē ki te ʼAtua. (Sen. 39:9-21) Kae ʼaki te ʼahiʼahi ʼaia, neʼe ina fakamālohiʼi aipē tana tui, pea neʼe iku ai ki tona fakapale lahi.
15. Koteā ʼaē ʼe tou ako mai te faʼifaʼitaki ʼa Naomi?
15 ʼE moʼoni, ko te ʼu fihifihia ʼe feala ke fakatupu lotomamahi pea ke tou lotovaivai ai. ʼE lagi mo Sosefo, neʼe fēia ʼi ʼihi temi. Pea neʼe toe fēia pē mo ʼihi kaugana agatonu ʼa te ʼAtua. Kotou fakatokagaʼi te fafine ko Naomi, ʼaē neʼe mate tona ʼohoana pea mo tana ʼu tama e toko lua. Neʼe ina ʼui fēnei: “ ʼAua naʼa kotou fakahigoa au ko Naomi. Kotou fakahigoa au ko Mala, he ko te Māfimāfi neʼe ina fakaliliu ʼo kona ʼaupitō te ʼu meʼa kiā te au.” (Lute 1:20, 21) Neʼe mamahi tonu ia Naomi pea ʼe tou mahino kiai. Kae ohagē ko Sosefo, neʼe mole vaivai tana tui ki te ʼAtua pea neʼe mole puli tana agatonu kiā te ia. Pea ko Sehova neʼe ina fakapale te fafine makehe ʼaia. (Lute 4:13-17, 22) Tahi ʼaē meʼa, ʼi te Palatiso ʼaē kā fakatuʼu ʼi te kele, ʼe ina holoholoʼi anai te ʼu kovi fuli pē ʼaē neʼe fai e Satana pea mo tona mālama kovi. “ ʼE mole tou toe manatuʼi anai te ʼu meʼa ʼāfea, pea ko te ʼu meʼa ʼaia ʼe mole toe hake anai ki te loto.”—Isa. 65:17.
16. ʼE tonu ke feafeaʼi tatatou manatu ʼo ʼuhiga mo te faikole, pea koteā tona tupuʼaga?
16 Tatau aipē pe koteā te ʼu fihifihia ʼaē ʼe tou felāveʼi mo ia, kae ko te ʼofa ʼo te ʼAtua ʼe ko he tokoni maʼuhiga ia. (Lau ia Loma 8:35-39.) Logopē lā ʼe mole tuku anai e Satana tana ʼu faiga ʼaē ke ina fakavaivaiʼi tātou, kae ʼe mole iku anai tana ʼu faiga mo kapau ʼe ‘maʼa tatatou fakakaukau’ pea mo tou “nofo ʼalaʼala ki te ʼu faikole.” (1 Pet. 4:7) Neʼe ʼui fēnei e Sesu: “Koia ke kotou nonofo ʼalaʼala pea mo kotou kole mamahi ʼi te temi fuli pē, ke feala ai hakotou hao ʼi te ʼu meʼa fuli ʼaia ʼaē ʼe tonu ke hoko mai, pea mo kotou tutuʼu iā muʼa ʼo te Foha ʼo te tagata.” (Luka 21:36) Kotou fakatokagaʼi te fakaʼaogaʼi ʼaē e Sesu ia te kupuʼi palalau “kole mamahi,” ʼaē ʼe fakaʼuhiga ki he faikole fakamālotoloto. ʼI tana kole mai ʼaē ke tou faikole mamahi, neʼe fakamaʼuhigaʼi e Sesu te ʼaoga ʼaē ke ʼaua naʼa tou fakaʼauʼauganoa ʼi tatatou tutuʼu ʼaē iā muʼa ʼo tana Tamai pea mo ia. ʼE ko nātou pē ʼaē ʼe nonofo ʼi te ʼofa ʼo Sehova ʼaē kā haofaki anai ʼi te ʼaho ʼo Sehova.
Kotou Maʼumaʼua ʼi Te Selevisi ʼAē Kiā Sehova
17. Kapau ʼe faigataʼa te fai fakamafola ʼi tokotou telituale, koteā te ako ʼe kotou lava maʼu mai te faʼifaʼitaki lelei ʼaē neʼe tuku mai e te ʼu polofetā ʼāfea?
17 ʼE tou fiafia mokā tou kau ki te ʼu gāue ʼo te kōkelekāsio. ʼE tou manatuʼi ai te ʼu palalau ʼa Petelo: “Ko te ʼu faʼahiga tagata feafeaʼi anai ia koutou ʼi te aga fakamāʼoniʼoni pea mo te ʼu gāue ʼaē ʼe fakaʼiloga ʼaki takotou pipiki ki te ʼAtua!” (2 Pet. 3:11) Ko te gāue ʼaē ʼe maʼuhiga tāfito ʼe ko te fakamafola ʼo te logo lelei. (Mat. 24:14) ʼE moʼoni, ʼe ʼi ai te ʼu telituale ʼe faigataʼa ʼaupitō ai te fai fakamafola, lagi ʼuhi ko te mole fia logo ʼa te hahaʼi pea mo te fakafeagai ʼa ʼihi, peʼe lagi maʼumaʼua te hahaʼi ʼi te ʼu gāue māhani ʼo te maʼuli. ʼI te ʼu temi ʼāfea, neʼe toe felāveʼi te hahaʼi kaugana ʼa Sehova mo te ʼu fihifihia ʼaia. Kae neʼe mole natou tuku tanatou ʼolo “liuliuga” ʼo tala te logo ʼa te ʼAtua. (Lau ia 2 Fakamatala 36:15, 16; Sel. 7:24-26) Koteā ʼaē neʼe tokoni age ke natou faʼa kātaki? Neʼe natou maʼu ia te manatu ʼa Sehova ʼo ʼuhiga mo tanatou gāue, kae mole ko te manatu ʼa te mālama. Koia neʼe natou ʼiloʼi te toe pilivilēsio lahi ʼaē ke natou fua ia te huafa ʼo te ʼAtua.—Sel. 15:16.
18. Ko te fai fakamafola ʼe malave feafeaʼi anai ki te fakatapuhā ʼo te huafa ʼo te ʼAtua ʼi te kā haʼu?
18 ʼE tou maʼu mo tātou te pilivilēsio ʼaē ke tou tala te huafa ʼo Sehova pea mo tana fakatuʼutuʼu. Kotou fakakaukauʼi age muʼa ia te faʼahi ʼaenī: ʼAki tatatou fai fakamafola, ʼe mole feala anai ki te ʼu fili ʼo te ʼAtua ke natou ʼui neʼe mole tala fakatomuʼa age kiā nātou te hoko mai ʼo te ʼaho lahi ʼo Sehova mokā fakahoko anai kiā nātou te ʼaho ʼaia. ʼE moʼoni, ohagē pē ko Falaone ʼi te temi ʼāfea, ʼe natou ʼiloʼi pē anai ʼe ko Sehova ʼaē ʼe fakafeagai kiā nātou. (Eke. 8:1, 20; 14:25) ʼI te temi pē ʼaia, ʼe fakakolōliaʼi ai anai e Sehova ia tana ʼu kaugana agatonu, ʼo ina fakahā lelei ki te hahaʼi fuli, ʼe ko nātou tana kau fakafofoga ʼi te kele.—Lau ia Esekiele 2:5; 33:33.
19. ʼE tou fakahā feafeaʼi anai ʼe tou fakaʼaogaʼi fakalelei te kātaki fualoa ʼa Sehova?
19 ʼI te fakaʼosi ʼo tana lua tohi, neʼe tohi fēnei e Petelo ki tona ʼu tehina: “Kotou fakaʼuhiga te kātaki fualoa ʼo totatou ʼAliki ko he fakamaʼuli ʼo tātou.” (2 Pet. 3:15) Koia, tou haga fakaʼaogaʼi fakalelei te kātaki fualoa ʼa Sehova. ʼO feafeaʼi? ʼE tonu ke tou maʼuliʼi he ʼu kalitātē ʼe ina leleiʼia, ʼo tou “maʼa mo heʼe mele,” mo tou maʼu he manatu ʼe lelei ʼo ʼuhiga mo te ʼu fihifihia, pea mo tou maʼumaʼua ʼi te selevisi ʼo te Puleʼaga. Kapau ʼe tou fai fēia, pea ʼe tou lava ʼamanaki anai ke tou maʼu te ʼu tapuakina ʼaē kā foaki ki te “ ʼu lagi foʼou pea mo te kele foʼou.”—2 Pet. 3:13.
ʼE Kei Kotou Manatuʼi Koa?
• ʼE tou maʼuliʼi feafeaʼi anai he ʼu kalitātē fakaʼatua?
• ʼE lava feafeaʼi hatatou nonofo “maʼa mo heʼe mele”?
• Koteā ʼaē ʼe tou ako mai te maʼuli ʼo Sosefo pea mo Naomi?
• He koʼē ko te fai fakamafola ʼe ko he toe pilivilēsio lahi?
[Paki ʼo te pasina 17]
Koteā ʼaē kā tokoni atu anai kiā koutou ʼu tagata ʼohoana pea mo tokotou fāmili ke kotou maʼuliʼi he ʼu kalitātē fakaʼatua?
[Paki ʼo te pasina 18]
Koteā ʼaē ʼe tou ako mai te faʼahiga fakatokatoka ʼaē e Sosefo tona ʼu fihifihia?