Hilifaki Ki Takotou Faʼa Kātaki Te Aga Faka Lotu

“Hilifaki ki takotou tui (...) te faʼa kātaki, ki takotou faʼa kātaki te aga faka lotu.” — 2 Petelo 1:5, 6.

1, 2. a) ʼI te kamataʼaga ʼo te ʼu taʼu 1930, koteā te meʼa ʼaē neʼe hoko ki te kau Fakamoʼoni ʼa Sehova ʼi te ʼu fenua ʼaē neʼe puleʼi e te kau nasi, pea koteā tona tupuʼaga? b) Neʼe tali feafeaʼi e te hahaʼi ʼa Sehova te taʼi gaohi koviʼi ʼaia?

NEʼE ko te temi fakapōʼuli ʼi te hisitolia ʼo te 20 sēkulō. ʼI te kamataʼaga ʼo te ʼu taʼu 1930, ko te kau Fakamoʼoni ʼa Sehova ʼe lauʼi afe ʼi te ʼu fenua ʼaē neʼe puleʼi e te kau nasi neʼe hoko puke pe nātou ʼo ʼave ki te ʼu lotoʼā fakamamahi. Koteā tona tupuʼaga? Koteʼuhi neʼe nātou fakatotonu ke mole nātou pipiki ki te ʼu meʼa faka malamanei pea mo nātou fakafisi te fetapā kia Itilele. Neʼe feafeaʼi te gaohi ʼo nātou? “Neʼe mole he tahi age kūtuga pilisoni (...) neʼe felāveʼi mo te aga fakapō ʼa te kau solia S.S. ʼi te kau Ako ʼo te Tohi-Tapu [te kau Fakamoʼoni ʼa Sehova]. Neʼe ko he aga fakapō neʼe ʼiloga ʼaki te ʼu fakamamahiʼi fakaʼatamai pea mo fakasino, ʼo ʼuhiga mo te ʼaluʼaga ʼo te ʼu fakamamahiʼi ʼe mole maʼu he kupu ʼi te malamanei moʼo na fakamatalatala.” — Neʼe ko te palalau neʼe fai e Karl Wittig, ko te tagata maʼu tuʼulaga ʼāfea ʼo te puleʼaga Siamani.

² Neʼe feafeaʼi te tali ʼa te kau Fakamoʼoni ʼa Sehova? ʼI tana tohi The Nazi State and the New Religions: Five Case Studies in Non-Conformity, neʼe fakatokaga fēnei te fafine fai hisitolia ko Christine E. King: “Neʼe gata pe ki te kau Fakamoʼoni [ʼo mole hage ko te ʼu kūtuga faka lotu ʼaē] ʼaē neʼe mole lava te faiga ʼa te Puleʼaga.” ʼIo, ko te kau Fakamoʼoni ʼa Sehova ʼi tona fakatahiʼi neʼe nātou tutuʼu maʼu, logo aipe la neʼe faka ʼuhiga ki te lauʼi teau ia nātou, ke nātou faʼa kātaki ʼo kaku ki te mate.

3. Koteā ʼaē neʼe ina faka fealagia ki te kau Fakamoʼoni ʼa Sehova ke nātou kātakiʼi te ʼu ʼahiʼahi kovi ʼaupito ʼaia?

³ Koteā ʼaē neʼe ina faka fealagia ki te kau Fakamoʼoni ʼa Sehova ke nātou kātakiʼi te ʼu taʼi ʼahiʼahi ʼaia ʼo mole gata pe ʼi Siamani Nasi kae hoko atu ʼi te malamanei katoa? Ko tanatou Tāmai ʼaē ʼe ʼi selo neʼe tokoni age kia nātou ke nātou faʼa kātaki ʼuhi ko tanatou aga faka lotu. E fēnei te fakamahino ʼa te ʼapositolo ko Petelo: “ ʼE ʼiloʼi e Sehova peʼe feafeaʼi te hāofakiʼi ʼo tana hahaʼi ʼaē ʼe aga faka lotu mai te ʼahiʼahi.” (2 Petelo 2:9). ʼI muʼa atu ʼi tana tohi, neʼe fēnei te tokoni ʼa Petelo ki te kau kilisitiano: “Hilifaki ki takotou tui (...) te faʼa kātaki, ki takotou faʼa kātaki te aga faka lotu.” (2 Petelo 1:5, 6). Ko te faʼa kātaki ʼe pipiki ʼosi mo te aga faka lotu. ʼI tona fakahagatonu, ke tou faʼa kātaki ʼo kaku ki te fakaʼosi, ʼe tonu ke tou ‘haga kumi te aga faka lotu’ pea mo maʼuliʼi (1 Timoteo 6:11). Kae koteā moʼoni koa te aga faka lotu?

Koteā te aga faka lotu

4, 5. Koteā te aga faka lotu?

⁴ Ko te kupu keleka ki te “aga faka lotu” (eusébéïa) ʼe feala pe ke faka ʼuhiga ki te “fakaʼapaʼapa ʼaē ʼe taua”. (2 Petelo 1:6, Kingdom Interlinear.) ʼE faka ʼuhiga ki he meʼa ʼi he loto ʼe māfana pea mo fakamalotoloto ki te ʼAtua. Kia W. E. Vine, ko te kupu eusébês, ʼaē ʼe faka ʼuhiga ʼuluaki “ki he fakaʼapaʼapa ʼe tau”, ʼe faka ʼuhiga ki “te mālohi ʼaē, ʼe takitaki e te manavasiʼi taputapu ki te ʼAtua, ʼe ʼiloga ʼi te gāue ʼaē kua foaki ki te ʼAtua”. — 2 Petelo 2:9, Int.

⁵ Koia ko te kupu “aga faka lotu” ʼe faka ʼuhiga ki te fakaʼapaʼapa peʼe ko te pipiki kia Sehova ʼaē ʼe ina uga tatou ke tou fai te meʼa ʼaē ʼe ina leleiʼia. Ko te meʼa ʼaia ʼe fai tatau aipe peʼe tou tau mo he ʼu ʼahiʼahi faigataʼa koteʼuhi ko totatou ʼofa kia Sehova ʼe haʼu mai te loto. Ko te pipiki agatonu pea mo takitokotahi kia Sehova ʼaē ʼe ʼiloga ʼi tatatou faʼahiga maʼuliʼi. ʼE fakaloto mālohiʼi te kau kilisitiano moʼoni ke nātou faikole ke fealagia hanatou fakahoahoa “he maʼuli fīmālie pea mo tokalelei ʼaki he aga faka lotu katoa”. (1 Timoteo 2:1, 2.) ʼI te fakamatala ʼa te ʼu tagata ako ʼo te lea ko J. P. Louw pea mo E. A. Nida, “e lahi te ʼu lea ko te kupu [eusébéïa] ia 1 Timoteo 2:2 ʼe feala ke fakaliliu fēnei ke tau ‘ko te maʼuli ohage ko te loto ʼaē ʼa te ʼAtua ke tou maʼuliʼi’ peʼe ‘ko te maʼuli ohage ko te fakatotonu mai e te ʼAtua ke tou maʼuliʼi’ ”.

6. Koteā te pikipikiga ʼo te faʼa kātaki pea mo te aga faka lotu?

⁶ ʼE feala ʼi te temi nei ke lelei age tatatou fakafuafua te pikipikiga ʼo te faʼa kātaki mo te aga faka lotu. Koteʼuhi ʼe tou maʼuli ohage ko te loto ʼaē ʼa te ʼAtua ke tou maʼuli — ʼaki te aga faka lotu — ko te malamanei ʼe fehiʼa ia tatou, pea ʼe ko he ʼu ʼahiʼahiʼi ʼo totatou tui (2 Timoteo 3:12). Kae ʼe mole ʼi ai anai he meʼa ʼe ina uga anai tatou ke tou faʼa kātaki mo kapau neʼe mole hona pikipikiga mo tatatou pipiki takitokotahi ki tatatou Tāmai ʼaē ʼe ʼi selo. Pea tahi, ʼe tali e Sehova ki te taʼi pipiki fakamalotoloto ʼaia. Koutou fakakaukauʼi age muʼa ki te meʼa ʼaē ʼe ina logoʼi ʼi tana sio ifo mai te lagi pea mo mamata kia nātou ʼaē, ʼuhi ko tanatou pipiki kia te ia, ʼe nātou faiga ke nātou fakafiafiaʼi ia ia logo aipe te fakafeagai fuli ʼe hoko ai. ʼE mole fakapuna’maʼuli ʼo hana lotolelei ke ina “hāofakiʼi ʼo tana hahaʼi ʼaē ʼe aga faka lotu mai te ʼahiʼahi”!

7. He koʼe koa ʼe tonu ke gāueʼi te aga faka lotu?

⁷ Kae, neʼe mole tou tutupu ʼaki te aga faka lotu, peʼe neʼe tou maʼu mai tatatou ʼu mātuʼa ʼaē ʼe aga faka lotu (Senesi 8:21). Kailoa, ʼe tonu ke tou gāueʼi (1 Timoteo 4:7, 10). ʼE tonu ke tou gāue ke tou hilifaki te aga faka lotu ki tatatou faʼa kātaki pea mo tatatou tui. Ki te faʼahi ʼaia, ʼe ʼui e Petelo, ʼe hoko ai “te ʼu faiga mālohi”. (2 Petelo 1:5.) Koia, e feafeaʼi ʼo he fealagia ke tou maʼu te aga faka lotu?

E feafeaʼi hatatou maʼu te aga faka lotu?

8. ʼI te fakamatala ʼa te ʼapositolo ko Petelo, koteā ʼaē ʼe ina faka fealagia te maʼu ʼo te aga faka lotu?

⁸ Neʼe fakamahinohino e te ʼapositolo ko Petelo te fealagia ʼaē ki te maʼu ʼo te aga faka lotu. Neʼe fēnei tana ʼui: “Ko te ʼofa ʼaē ʼe mole hona tau pea mo te tokalelei ke hikihiki ʼi te ʼatamai mālama totonu ʼa te ʼAtua pea mo Sesu totatou ʼAliki, koteʼuhi ko tona mālohi fakaʼatua neʼe ina foaki fakalelei mai te ʼu meʼa fuli ʼo ʼuhiga mo te maʼuli pea mo te aga faka lotu, ʼaki te ʼatamai mālama totonu ʼo ia ʼaē neʼe ina pāui tatou ʼaki te kolōlia pea mo te vilitute.” (2 Petelo 1:2, 3). Koia moʼo hilifaki te aga faka lotu ki tatatou faʼa kātaki, ʼe tonu ke tou tuputupu ʼi te ʼatamai mālama totonu, ko tona ʼuhiga, ko te tuputupu ʼi te ʼatamai mālama lelei kia Sehova ʼAtua pea mo Sesu Kilisito.

9. Fakamahino ʼaki he fakatā ko te maʼu ʼo he ʼatamai mālama totonu ʼo ʼuhiga mo te ʼAtua pea mo Kilisito ʼe mole gata ʼaki pe te ʼiloʼi peʼe ko ai ia nāua?

⁹ Koteā te faka ʼuhiga ʼo te maʼu ʼo te ʼatamai mālama totonu ʼo te ʼAtua pea mo Kilisito? ʼE mahino ia, ʼe laka age ia ʼi te ʼiloʼi peʼe ko ai ia nāua. Moʼo fakatā te meʼa ʼaia: E lagi koutou ʼiloʼi peʼe ko ai ia ia ʼaē ʼi tokotou vāhaʼa fale ʼe hoa mai kia koutou pea lagi ʼe koutou fakamālo age ki ai ʼaki tona higoa. Kae ʼe koutou foaki age anai koa he toe falā? Kailoa, ʼe gata pe mokā neʼe koutou ʼiloʼi lelei peʼe ko te faʼahiga tagata feafeaʼi (vakaʼi ia Tāʼaga Lea 11:15). ʼE toe feiā aipe, ko te ʼiloʼi lelei ʼaē ʼo Sehova pea mo Sesu ʼe laka age ia ʼi te tui ʼaē ʼe nā maʼuʼuli pea mo te mahino ki tonā ʼu higoa. Ke tou lotolelei ke tou kātakiʼi te ʼu ʼahiʼahi tatau aipe peʼe kaku ai ki te mate, ʼe tonu ke tou ʼiloʼi moʼoni ia nāua (Soane 17:3). Koteā te meʼa ʼe fakapipiki ki te faʼahi ʼaia?

10. Koteā te ʼu meʼa ʼaē e lua ʼe fakapipiki ki te maʼu ʼo te ʼatamai mālama totonu ʼo ʼuhiga mo Sehova pea mo Sesu, pea koteā tona tupuʼaga?

¹⁰ ʼE fakapipiki meʼa e lua ki te maʼu ʼo te ʼatamai mālama totonu, peʼe katoa, ʼo ʼuhiga mo Sehova pea mo Sesu: 1) ko te faiga ke ʼiloʼi ia nāua ʼi tonā ʼuhiga tagata — tonā ʼu kalitate, te meʼa ʼe nā logoʼi, pea mo tanā ʼu agaaga — pea 2) te faʼifaʼitaki ʼo tanā aga. Ko te aga faka lotu ʼe fakapipiki kiai he pipiki fakamalotoloto pea mo takitokotahi kia Sehova pea ke ʼiloga ʼi totatou faʼahiga maʼuli. Koia, moʼo maʼu ʼo te mālama ʼaia ʼe tonu ke tou ʼiloʼi ʼāteaina pe ia Sehova pea mo tou liliu ʼo mahino ki tona finegalo pea mo te ʼu aga ʼi te ʼaluʼaga ʼo te fealagia ki te tagata. Ke tou ʼiloʼi moʼoni ia Sehova, ia tatou ʼaenī neʼe fakatupu ki tona paki, ʼe tonu ke tou fakaʼaogaʼi te taʼi ʼatamai mālama ʼaia pea mo tou faiga ke tou hage ko ia (Senesi 1:26-28; Kolose 3:10). Pea koteʼuhi ko Sesu neʼe ina faʼifaʼitakiʼi ʼi he ʼaluʼaga haohaoa ia Sehova ʼi te meʼa ʼaē neʼe ina ʼui pea mo ina fai, ko te ʼiloʼi totonu ia Sesu ʼe ko he tokoni maʼuhiga ki te tuputupu ʼo te aga faka lotu. — Hepeleo 1:3.

11. a) E feafeaʼi he fealagia ke tou maʼu he ʼatamai mālama totonu ʼo ʼuhiga mo te ʼAtua pea mo Kilisito? b) He koʼe koa ʼe maʼuhiga te metitasio ki te meʼa ʼaē ʼe tou lau?

¹¹ Kae, e feafeaʼi he fealagia ke tou maʼu te taʼi ʼatamai mālama totonu ʼaia ki te ʼAtua pea mo Kilisito? ʼAki he ako fakalelei ʼo te Tohi-Tapu pea mo te ʼu tohi ʼe fakatafito ki te Tohi-Tapub. Kae, kapau ko tatatou ako faka tohi-tapu takitokotahi ʼe tonu ke iku ki tatatou maʼu ʼo te aga faka lotu, ʼe maʼuhiga ke tou maʼu he temi moʼo metitasio, ko tona faka ʼuhiga ke tou fakakaukauʼi, peʼe ke tou vakavakaʼi lelei, ki te meʼa ʼaē ʼe tou lau (vakaʼi ia Sosue 1:8). He koʼe koa ʼe maʼuhiga te faʼahi ʼaia? Koutou manatuʼi ko te aga faka lotu ko te meʼa ʼi te loto ʼe fakahā fakamalotoloto pea mo māfana kia Sehova. ʼI te Tohi-Tapu, ko te metitasio ʼe tau fakatahiʼi ki te loto — ko te tagata ʼi loto (Pesalemo 19:14; 49:3; Tāʼaga Lea 15:28). Ka tou fakakaukau ki te meʼa ʼaē ʼe tou lau, ʼe ina fakaoʼo tatatou tagata ʼi loto, ʼo malaga ai te ʼu meʼa ʼe tou logoʼi, ʼo lave ki te ʼu meʼa ʼaē ʼi totatou loto, pea mo ōfeʼi tatatou manatu. Koia ʼe gata pe ki te ako ʼe feala ke ina fakamālohiʼi tatatou pipiki takitokotahi kia Sehova pea mo uga tatou ke tou maʼuli ʼi he ʼaluʼaga ʼe leleiʼia e te ʼAtua tatau aipe peʼe tou tau mo he mafuliʼaga faigataʼa peʼe ko he ʼu ʼahiʼahi faigataʼa.

Ko te maʼuliʼi ʼo te aga faka lotu ʼi te loto fale

12. a) ʼI te fakamatala ʼa Paulo, e feafeaʼi he fealagia ki he kilisitiano hana maʼuliʼi te aga faka lotu ʼi tona loto fale? b) He koʼe koa ʼe tokakaga te kau kilisitiano moʼoni ki ʼanatou ʼu mātuʼa ʼaē kua matutuʼa?

¹² Ko te aga faka lotu ʼe tonu ke ʼuluaki maʼuliʼi ʼi te loto fale. ʼE ʼui fēnei e te ʼapositolo ko Paulo: “Kapau ko he vitua ʼe ʼi ai hana fānau peʼe ko hona ʼu mokopuna, ke ʼuluaki ako e nātou ʼaia te maʼuliʼi ʼo te aga faka lotu ʼi tonatou loto fale pea ke nātou haga totogi te meʼa ʼaē ʼe tau mo ʼanatou ʼu mātuʼa pea mo ʼanatou ʼu kui, koteʼuhi ko te meʼa ʼaia ʼe lelei kia mata ʼa te ʼAtua.” (1 Timoteo 5:4). Ko te tokaga ki te ʼu mātuʼa ʼaē kua matutuʼa, ohage ko tana talanoa kiai ia Paulo, ʼe ko he fakahāʼaga ʼo te aga faka lotu. Ko te kau kilisitiano moʼoni ʼe nātou foaki te taʼi tokaga ʼaia, ʼo mole nātou fai pe ʼuhi ko tonatou maʼua kae ʼuhi ko tonatou ʼofa ki ʼanatou ʼu mātuʼa. Kae laka age ia, ʼe mahino kia nātou te maʼuhiga kia Sehova ia te tokaga ki to kita famili. ʼE mahino kia nātou ko te fakafisi ki te tokoni ki te ʼu mātuʼa ʼi te lakaga ʼaē ʼe ʼaoga kiai ʼe fakatatau anai ki te ‘fakafisi ki te tui faka kilisitiano’. — 1 Timoteo 5:8.

13. He koʼe koa ko te maʼuliʼi ʼo te aga faka lotu ʼi te loto fale ʼe feala ko he faigataʼa moʼoni, kae koteā te fīmālie ʼaē ʼe tupu mai te tokakaga ki ta kita ʼu mātuʼa?

¹³ ʼE mahino ia, ʼe mole faigafua tuʼumaʼu te maʼuliʼi ʼo te aga faka lotu ʼi te loto fale. Ko te ʼu hahaʼi ʼo te famili e lagi nātou mavete ʼo nātou tahi nofo mamaʼo. Ko te fānau kua lalahi lagi kua nātou fakatuʼutuʼu ʼonatou famili pea lagi nātou lolotoga tau mo te ʼu fihi faka ekonomike. Ko te agaaga peʼe ko te fakafuafua ʼo te tokaga ki he tahi ʼi te ʼu mātuʼa ʼe feala ke mamafa ki te maʼuli fakasino, fakaʼatamai pea mo te ʼu meʼa ʼaē ʼi te loto ʼo nātou ʼaē ʼe nātou foaki te tokaga ʼaia. Kae, ʼe ʼi ai te fīmālie moʼoni ʼi te tokaga ki ta kita ʼu mātuʼa koteʼuhi ʼe mole gata pe tana kau ʼaē ʼi “te totogi ʼaē ʼe tau” kae ʼe toe leleiʼia e Ia “ ʼaē ʼe maʼua ki ai te famili katoa ʼi selo pea mo te kele tonatou higoa”. — Efesi 3:14, 15.

14, 15. Fakamatala he faʼifaʼitaki ʼo he tokaga faka lotu ʼa he fānau ki he tahi ʼo tanatou ʼu mātuʼa.

¹⁴ Koutou fakatokagaʼi te faʼifaʼitaki ʼe malave moʼoni. Ko Ellis mo te toko nima ʼo tana ʼu tēhina mo tokolua ʼe nātou felāveʼi mo te gāue faigataʼa ʼaē ko te tokakaga ki tanatou tāmai ʼi te loto fale. ʼE fēnei te fakamahino e Ellis: “ ʼI te 1986, neʼe laga te mahaki ʼo te apoplexie ʼi taku tāmai pea neʼe palalisia katoa ai.” Ko te fānau toko ono ʼe nātou kau ki te tokakaga ki te ʼu meʼa ʼaē ʼe ʼaoga ki tanatou tāmai, mai tona fakamaʼanuʼi ʼo aʼu ki te tokakaga fakalelei ʼo siosioʼi ke fetogi te ʼaluʼaga ʼo tana takoto naʼa tuputupu he ʼu mataʼi papala. “ ʼE mātou lautohi, mo palalau age ki ai, pea mo gaoʼi musika maʼa ia. ʼE mole mātou ʼiloʼi papau peʼe ina ʼiloʼi te meʼa ʼaē ʼe lolotoga hoko ʼi ʼona tafa, kae ʼe mātou gaohi pe ia ia ohage pe kia mātou ʼe mahino pe ia kia meʼa fuli.”

¹⁵ He koʼe koa ʼe tokakaga te fānau ki tanatou tāmai ohage ko tanatou fai? ʼE toe ʼui fēnei e Ellis: “Hili te mate ʼo tamatou faʼe ʼi te 1964, neʼe taupau mātou e papa tokotahi. ʼI te temi ʼaia, neʼe fakaʼalu ʼaia ia mātou mai te taʼu 5 ki te 14. Neʼe ʼi hē moʼo tokoni kia mātou; ʼi te temi nei ʼe mātou ʼi henī maʼa ia.” ʼE ʼiloga ia, ʼe mole ko he meʼa faigafua te foaki te taʼi tokaga ʼaia, pea ko te fānau ʼe nātou lotovaivai ʼi ʼihi temi. ʼE ʼui fēnei e Ellis: “Kae ʼe mahino kia mātou ko te ʼaluʼaga ʼo tamatou tāmai ʼe ko he fihifihia faka temi pe. ʼE mātou sisio ki muʼa ki te temi ʼaē ʼe toe maʼu ai e tamatou tāmai he maʼuli haohaoa lelei pea ʼe feala ke mātou toe fakatahi mo tamatou faʼe.” (Isaia 33:24; Soane 5:28, 29). ʼE mahino ia, ko te taʼi tokaga ʼaia ʼe foaki ki he tahi ʼi te ʼu mātuʼa ʼe ina fakamāfana te loto ʼo Ia ʼaē ʼe ina fakatotonu ki te fānau ke nātou fakaʼapaʼapa ki tanatou ʼu mātuʼac! — Efesi 6:1, 2.

Ko te aga faka lotu pea mo te minisitelio

16. Koteā ʼaē ʼe tonu ke faka ʼuhiga ko te tupuʼaga ʼuluaki ʼaia ʼo te meʼa ʼaē ʼe tou fai ʼi te minisitelio?

¹⁶ ʼI te temi ʼaē ʼe tou tali te fakaafe ʼa Sesu ke tou ‘muli tuʼumaʼu ia te ia’, ʼe tou fakalogo ai ki te fakatotonu fakaʼatua ʼaē ko te faka mafola ʼo te logo lelei ʼo te Puleʼaga pea mo fai he kau tisipulo (Mateo 16:24; 24:14; 28:19, 20). ʼE mahino, ko te kau ʼaia ʼi te minisitelio ʼe ko he maʼua faka kilisitiano ʼi te ʼu “ ʼaho fakamuli” ʼaenī (2 Timoteo 3:1). Kae ko te meʼa ʼaē ʼe ina uga tatou ki te faka mafola pea mo te fai ako ʼe tonu ia ke fakalaka ʼi tona ʼuhiga maʼua. Ko he ʼofa loloto kia Sehova ʼe tonu ko te ʼuluaki tupuʼaga ʼo te meʼa ʼaē ʼe tou fai pea mo te lahi ʼo te ʼu meʼa ʼaē ʼe tou fai ʼi te minisitelio. Neʼe ʼui fēnei e Sesu: “Ko te mahu ʼo te loto ʼaē ʼe palalau ai te gutu.” (Mateo 12:34). ʼIo, ka fonu totatou loto ʼi te ʼofa kia Sehova, ʼe tou logoʼi ʼe uga tatou ke tou fakamoʼoni ʼo ʼuhiga mo ia ki niʼihi. Kapau ko te ʼofa ki te ʼAtua ko te meʼa ʼaia ʼaē ʼe ina uga tatou, ko totatou minisitelio ʼe ko te fakaʼiloga ʼaia ʼo totatou aga faka lotu.

17. E feafeaʼi hatatou gāueʼi te fakatuʼutuʼu tonu ʼaē ʼe ina uga tatou ki te minisitelio?

¹⁷ E feafeaʼi hatatou gāueʼi te fakatuʼutuʼu tonu ʼaē ʼe ina uga tatou ki te minisitelio? Koutou fakakaukauʼi kia tupuʼaga e tolu neʼe foaki mai e Sehova kia tatou ke tou ʼoʼofa kia te ia. 1) ʼE tou ʼoʼofa ia Sehova ʼuhi ko te meʼa ʼaē neʼe ina fai maʼa tatou. ʼE mole he ʼofa lahi age neʼe ina fakahā mai kia tatou ʼi tana foaki te totogi (Mateo 20:28; Soane 15:13). 2) ʼE tou ʼoʼofa ia Sehova ʼuhi ko te meʼa ʼaē ʼe ina lolotoga fai maʼa tatou. ʼE tou palalau faʼitaliha mo Sehova, ia ia ʼaē ʼe ina tali ʼatatou ʼu faikole (Pesalemo 65:2; Hepeleo 4:14-16). ʼI tatatou tuku ki muʼa te ʼu meʼa ʼo te Puleʼaga, ʼe tou fakafiafia ʼi te ʼu meʼa ʼaoga ʼo te maʼuli (Mateo 6:25-33). ʼE foaki mai te meʼa kai fakalaumālie mālohi ʼe ina faka fealagia kia tatou ke tou maʼu he ʼu puleʼaki ki te ʼu fihifihia ʼaē ʼe tau mo tatou (Mateo 24:45). Pea ʼe tou maʼu te tapuakina ʼi tatatou kau ʼaē ki te fakatahi fakatautehina ʼi te malamanei ʼaē ʼe ina fakaʼiloga kehe tatou mai te malamanei (1 Petelo 2:17). 3) ʼE tou toe ʼoʼofa foki ia Sehova ʼuhi ko te meʼa ʼaē ka ina fai anai maʼa tatou. ʼUhi ko te ʼofa ʼaia, ʼe tonu ke tou “fā fakalelei ki te maʼuli moʼoni” — te maʼuli heʼegata ʼi te temi ka haʼu (1 Timoteo 6:12, 19). Ka tou vakavakaʼi te ʼofa ʼo Sehova kia tatou, ʼe mahino ko totatou loto ʼe ina uga anai tatou ke tou kau fakalelei ki te talanoa ki ʼihi ʼo ʼuhiga mo ia pea mo tana ʼu fakatuʼutuʼu maʼuhiga! ʼE mole tonu anai ke ʼui mai e ʼihi te meʼa ʼaē ʼe tonu ke tou fai pea mo te lahi ʼo te meʼa ʼe tonu ke tou fai ʼi te minisitelio. ʼE uga anai tatou e totatou loto ke tou fai te meʼa ʼaē ʼe feala ke tou fai.

18, 19. Koteā te meʼa ʼaē neʼe mālo ai te tuagaʼane ʼi tana fakatotonu ʼaē ke kau ki te minisitelio?

¹⁸ Tatau aipe peʼe felāveʼi mo he ʼu mafuliʼaga faigataʼa, ko he loto ʼe ʼeke e te aga faka lotu, ʼe uga anai ke palalau (vakaʼi ia Selemia 20:9). Ko te meʼa ʼaia ʼe hā ʼi te meʼa ʼaē neʼe hoko kia Stella, ko he fafine kilisitiano mole loko palalau. ʼI tana ʼuluaki kamata ako te Tohi-Tapu, neʼe manatu ia ‘ ʼe mole feala anai he temi ke ʼau feʼaluʼaki ʼi te ʼu ʼapi!’ ʼE fēnei tana fakamahino: “Neʼe mole ʼau loko gūgū. Neʼe mole pe feala ia kia ʼau ke ʼau fakaōviōvi ki niʼihi ʼo ʼau kamata he fai palalau.” ʼAki tana haga ako, ko tona ʼofa kia Sehova neʼe tuputupu, pea neʼe ina fakatuputupu e ia te holi mālohi ke palalau ki ʼihi ʼo ʼuhiga mo te ʼAtua. “ ʼE ʼau manatuʼi neʼe ʼau ʼui age kia ia ʼaē ʼe ina fai taku ako, ‘ ʼe ʼau holi mālohi ke ʼau palalau, kae ʼe mole fealagia kia ʼau, pea ko te meʼa ʼaia ʼe fakatupu hoha moʼoni kia ʼau’. ʼE mole galo anai ia ʼau te meʼa ʼaē neʼe ina ʼui mai: ‘Stella, fiafia koe heʼe ke fia palalau.’ ”

¹⁹ Mole fualoa kiai, ko Stella neʼe fagonogono ki te fafine ʼo tona vāhaʼa fale. Ko he meʼa fakaofoofo neʼe hoko kia ia — ko tana ʼuluaki kau ki te faka mafola ʼi te ʼu ʼapi (Gāue 20:20, 21). ʼE kei na manatuʼi: “Neʼe ʼau tohi te palalau ʼaē neʼe tonu ke ʼau fai. Kae ʼi te kovi ʼosi ʼo taku mataku, tatau aipe la mo tona ʼai ʼaē ki ʼoku muʼa, neʼe mole pe la feala ke ʼau lau ʼaku nota!” ʼI te temi nei, kua hili kiai te taʼu e 35, ko Stella ʼe kei aga fakalogologo aipe. Kae ʼe manako ʼi te gāue faka mafola pea ʼe kei hoko atu pe tana kau ki te gāue ʼaia ʼaki tona ʼuhiga.

20. Koteā te faʼifaʼitaki ʼe fakahā ʼaki māʼia mo te fakatagaʼi peʼe ko te pilisoniʼi ʼe mole feala ke ina tāpunuʼi te ʼu gutu ʼo te kau Fakamoʼoni ʼa Sehova ʼaē kua foaki tonatou maʼuli?

²⁰ Māʼia mo te fakataga peʼe ko te pilisoni ʼe mole feala he tāpunuʼi te ʼu gutu ʼo te kau Fakamoʼoni ʼa Sehova ʼaē kua foaki tonatou maʼuli kia Sehova. Koutou fakatokagaʼi te faʼifaʼitaki ʼa Ernst pea mo Hildegard Seliger ʼi Siamani. ʼUhi ko tanā tui, neʼe nā fai taʼu e 40 ʼi te ʼu lotoʼā fakamamahi nasi pea mo te ʼu fale pilisoni faka komunisi. Māʼia mo te fale pilisoni, neʼe nā haga fagonogono ki ʼihi kau pilisoni. Neʼe fēnei te meʼa ʼaē neʼe fakamanatu e Hildegard: “Ko te kau pule ʼo te fale pilisoni neʼe nātou fakafuafua ia ʼau ohage ko he tahi ʼe fakamataku, koteʼuhi, ohage ko tana ʼui e te fafine leʼo, neʼe ʼau palalau ʼo ʼuhiga mo te Tohi-Tapu ʼi te ʼaho katoa. Koia, neʼe ʼave ai ʼau ki te koga fale ʼi te lalo kele.” Hili te tuku ake ʼa nāua, ko te tēhina pea mo te tuagaʼane ko Seliger neʼe nā foaki tona temi katoa ki te minisitelio faka kilisitiano. Neʼe nā gāue agatonu ʼo kaku ki tonā mate, ko te tēhina ʼi te 1985 pea ko tona ʼohoana ʼi te 1992.

21. Koteā ʼaē ʼe tonu ke tou fai ke tou hilifaki te aga faka lotu ki te faʼa kātaki?

²¹ ʼAki he ako fakalelei ʼo te Folafola ʼa te ʼAtua pea mo toʼo he temi moʼo metitasio fakalelei ki te meʼa ʼaē ʼe tou ako, ʼe tou tuputupu anai ʼi te ʼatamai mālama totonu ʼo Sehova pea mo Sesu Kilisito. Ko te meʼa ʼaia ʼe iku anai ki tatatou maʼu he fua ʼe katoa age ʼo te kalitate maʼuhiga ʼaia — ko te aga faka lotu. Ka mole ʼi ai he aga faka lotu, ʼe mole he ʼuhiga ʼo te kātakiʼi ʼo te ʼu tuʼuga ʼahiʼahi ʼe hoko kia tatou ʼi totatou ʼuhiga kilisitiano. Koia, tou haga mulimuli ki te tokoni ʼa te ʼapositolo ko Petelo ʼaē ke tou haga ‘hilifaki ki tatatou tui te faʼa kātaki pea ki tatatou faʼa kātaki te aga faka lotu’. — 2 Petelo 1:5, 6.

[Nota ʼi te lalo pasina]

Koteā takotou tali?

◻ Koteā te aga faka lotu?

◻ Koteā te pikipikiga ʼo te faʼa kātaki pea mo te aga faka lotu?

◻ Koteā ʼaē ʼe ina faka fealagia te maʼu ʼo te aga faka lotu?

◻ E feafeaʼi he fealagia ki he kilisitiano hana maʼuliʼi te aga faka lotu ʼi tona loto fale?

◻ Koteā ʼaē ʼe tonu ko te tupuʼaga ʼuluaki ʼaia ʼo tatatou fai te minisitelio?

[Paki ʼo te pasina 18]

Ko te faʼa kātaki pea mo te aga faka lotu neʼe ʼiloga ʼi te kau Fakamoʼoni ʼa Sehova ʼaē neʼe pilisoniʼi ʼi te lotoʼā faka mamahi nasi ʼi Ravensbrück.