Te Tufa Makehe ʼo Te Pepa Lotu ʼi Te ʼAho 20 ʼo ʼOketopeli ʼo Kaku Ki Te ʼAho 16 ʼo Novepeli!
1 ʼO kamata atu ʼi te Mōnite ʼaho 20 ʼo ʼOketopeli, pea mo fai hoholo atu ʼi te ʼu fakaʼosi vāhaʼa e fā, ʼe tou kau anai ki te tufa makehe ʼo te pepa lotu foʼou ʼaē ko tona kupu tāfito ʼE Kotou Fia ʼIloʼi Koa Te Moʼoni? ʼE tou fakaʼamu ko te tufa makehe ʼaia ʼaē ʼe fai ʼi te mālamanei kātoa, ʼe ina fakafealagia anai ki he tokolahi ke natou fia logo ki te matapuna pē e tahi ʼo te moʼoni.—Soa. 17:17.
2 Ko te pepa lotu ʼaia ʼe tou maʼu ai ia te ʼu tali totonu ki te ʼu fehuʼi Fakatohi-tapu maʼuhiga e ono: “ ʼE tokaga moʼoni koa te ʼAtua kiā tātou?” “ ʼE gata anai koa ʼi he ʼaho ia te tau mo te mamahi?” “Koteā ʼaē ʼe hoko kiā tātou mokā tou mamate?” “ ʼE ʼi ai koa he ʼamanaki ki te kau mate?” “ ʼE feafeaʼi koa haku faikole pea ʼe logo mai te ʼAtua?” pea “ ʼE feafeaʼi koa haku maʼuli fiafia?” Neʼe heʼeki feala ki te ʼēkelesia ʼo te Keletiate ke ina foaki ia he ʼu tali ʼe lelei ki te ʼu fehuʼi ʼaia. Māʼiapē lā mo te tokolahi ʼaē ʼe natou lau ʼe mole natou Kilisitiano ʼe natou feʼekeʼaki ʼo ʼuhiga mo te ʼu faʼahi ʼaia, kae ʼe lagi mole natou ʼiloʼi ʼe foaki mai ʼi te Tohi-Tapu ia te ʼu tali ʼe totonu ki te ʼu fehuʼi ʼaia. Koia lā ʼaē, ʼe tou fakaʼamu ai ʼe kaugamālie anai ia nātou ʼaē kā natou tali ia te logo ʼaia.
3 Kotou Gāueʼi Kātoa Ia Tokotou Telituale: Kapau ko he faʼahi ʼe feala, kotou faiga fakamālotoloto ke kotou gāueʼi kātoa ia te ʼu ʼapi fuli ʼo tokotou telituale. Kapau ʼe lahi tokotou telituale, ʼe lagi fakalotomālohiʼi anai koutou e te kau tagata ʼāfea ke kotou tuku ia he pepa lotu ʼi te ʼu ʼapi ʼaē ʼe lāvaki ʼi takotou ʼuluaki fai fakamafola ai. Kotou manatuʼi ʼe tonu ke kotou foaki he pepa lotu ki te hahaʼi fuli, ki tokotou ʼu fāmili, ki tokotou ʼu feʼilo ʼi te fale gāue peʼe ʼi te faleako, pea mo ʼihi atu ʼe kotou fai palalau tuʼumaʼu mo nātou. ʼE lagi feala anai ke kotou fakatuʼutuʼu ke kotou pioniē vaeluaʼi temi ʼi ʼOketopeli peʼe ko Novepeli. ʼE ʼi ai koa hakotou tamasiʼi peʼe ko hakotou ako Tohi-Tapu ʼe tuputupu lelei ʼi te faʼahi fakalaumālie pea mo lagi kua feala hana kau mo tātou ki te tufa makehe ʼaia, ʼo liliu ko he kaugā fagona? Kapau koia, kotou fakahā ki te kau tagata ʼāfea.
4 Te ʼu Palalau ʼAē ʼe Kotou Fai: Ke ʼiloʼi e te hahaʼi fuli ia te logo, ʼe lelei ke kotou fakanounou tuʼumaʼu takotou ʼu ʼuluaki palalau. Kotou lagaʼi he fehuʼi ʼi te ʼu fehuʼi e ono ʼaē ʼe tuʼu ʼi te takafi pea mo kotou fakahā age ia tona tali ʼaē ʼe tuʼu ʼi te pepa lotu. ʼE ina fakafealagia anai ki te kau fai fakamafola fuli ke natou fakaʼalutahi ia tanatou ʼu ʼuluaki palalau mo te ʼu meʼa ʼaē ʼe ʼaoga ki te telituale. Kapau ʼe ʼi ai he tahi ʼe fia logo, kotou tohi pea mo kotou toe liliu ʼo ʼaʼahi. ʼI te ʼu fakaʼosi vāhaʼa, ʼe feala ke tufa fakatahi ia te ʼu nusipepa pea mo te pepa lotu. ʼI te fakaʼosi ʼo te tufa makehe ʼaia ʼi te ʼaho 16 ʼo Novepeli, ʼe tou tufa anai ia te tohi Te Ako Mai Te Tohi-Tapu. Ko te ʼu pepa lotu ʼaē kā toe anai mai te tufa makehe ʼaia, ʼe fakaʼaogaʼi anai ohagē pē ko te ʼu pepa lotu ʼaē.
5 Kotou Kamata He ʼu Ako Tohi-Tapu: Neʼe tā tāfito ia te pepa lotu ʼaia moʼo tokoni mai kiā tātou ke tou kamata he ʼu ako Tohi-Tapu. Kā tou toe liliu ʼo ʼaʼahi he tahi neʼe fia logo, ʼe feala hakotou fehuʼi age, peʼe ko te moʼoni Fakatohi-tapu fea ʼaē kā ina maʼu ai anai he fakalotofīmālie? Kotou fakahā age ʼi te pāsina fakaʼosi ia te fakatuʼutuʼu ʼaē ʼe tou fai ki he ʼu ako Tohi-Tapu, pea mo kotou tuku age hana tohi Te Ako Mai Te Tohi-Tapu. Kapau ʼe feala, vakaʼi fakanounou mo ia, ia he palakalafe e tahi peʼe lua ʼo te kāpite ʼaē ʼe lahi ai ia te ʼu manatu ʼaē neʼe ina filifili.
6 Ko Sehova ʼe ina kumi ia nātou ʼaē ʼe natou tauhi anai kiā te ia “ ʼaki te laumālie pea mo te moʼoni.” (Soa. 4:23) ʼOfa pē ke tou kau fuli ki te tufa makehe ʼaia, ke tou tokoni ki niʼihi ke natou ʼiloʼi ia te moʼoni!