Neʼe Foaki Lahi—ʼE Fakamaʼua Lahi
1 ʼE ko he toe lelei tatatou maʼu te moʼoni! Koteʼuhi kua tou foaki totatou maʼuli kia Sehova, neʼe ‘tuku mai te logo lelei’ kia tatou. (1 Tes. 2:4) Ko te faʼahi ʼaia ʼe tuku mai ai kia tatou he maʼua lahi. Neʼe ʼui fēnei e Sesu: “Ko ia ʼaē neʼe foaki lahi ki ai, ʼe fakamaʼua lahi anai kia te ia.”—Luka 12:48b.
2 ʼE moʼoni te ʼu palalau ʼaia! Mai tona ʼaluʼaga ʼaē neʼe tapuakina fuli ia tatou ʼaki te ʼatamai mālama ki te Folafola ʼa te ʼAtua, mo he fale tautehina fakaofoofo, pea mo he ʼamanaki taulekaleka, ʼe feala ke tou ʼui tonu, neʼe foaki lahi mai kia tatou. Koia, ʼe tonu ai foki te ʼui ʼaē ke lahi te ʼu meʼa ke liufaki.
3 Tou Taupau He Manatu ʼe Totonu Ki ʼAtatou ʼu Maʼua: ʼE ʼui e ʼihi ʼe lahi fau te ʼu meʼa ʼaē ʼe fakamaʼua kia tatou. Ko Sesu Kilisito, ʼi tona ʼuhiga ʼaē ko ia ko te Ulu ʼo te kokelekasio faka Kilisitiano, ʼe ina fakafuafua “te meʼa ʼaē ʼe ʼaoga” ke fai ke haʼele lelei. (Ef. 4:15, 16) ʼE ina fakamoʼoni mai ‘ko tana ʼakau toho ʼe mālū pea ko tana kavega ʼe maʼamaʼa.’ (Mat. 11:28-30) ʼAki te ʼofa, ʼe ina fakatokagaʼi ia nātou ʼaē ʼe siʼisiʼi ʼonatou ʼu fealagia. (Luka 21:1-4) Kapau ʼe tou foaki te meʼa lelei ʼaē ʼe tou maʼu, ʼo mole tou lauʼia tona lahi, ʼe tapuakina anai tatou.—Kol. 3:23, 24.
4 Koutou fai te ʼu fehuʼi ʼaenī kia koutou totonu, ‘ ʼE takimuʼa koa te ʼu meʼa ʼo te Puleʼaga ʼi toku maʼuli? ʼE ʼau fakaʼaogaʼi koa toku temi mo ʼoku ʼu koloā ke tupu ai he faka kolōliaʼi ʼo te huafa ʼo te ʼAtua mo fua manuʼia ki niʼihi? ʼE lahi age koa toku fiafia ʼi te tauhi ʼaē kia Sehova ʼi haku fakafiafia maʼa ʼaku pe ʼi he ʼu koloā fakasino?’ ʼE fakahā e tatatou ʼu tali fakahagatonu ki te ʼu fehuʼi ʼaia te ʼu fakatuʼutuʼu ʼi totatou loto.—Luka 6:45.
5 Tou Fakamamaʼo Mai Te Fakahalaʼi ʼo Tatou Ke Tou Fai Te Meʼa ʼAē ʼe Kovi: Neʼe mole heʼeki ʼi ai he temi neʼe kua feiā te ʼu fakahala pea mo te ʼu holi ʼaē ki te ʼu meʼa ʼa kita, mo te ʼu holi fakavale ki he meʼa, pea mo te manako ʼaē ki te ʼu fakafiafia. ʼI te ʼaho fuli, ʼe ʼahiʼahiʼi tatou ʼi te faʼahi ʼo te ʼu aga ʼaē ʼe tonu ke fai, mo te ʼu fakahala ke tou fakatō laloʼi te aga ʼaē ʼe tonu ke fai. Ke tou mālo ʼi te ʼu faʼahi fuli ʼaia, ʼe tonu ke tou kole kia Sehova ke tokoni mai kia tatou. (Mat. 26:41) ʼE feala hana fakamālohiʼi tatou, ʼaki tona laumālie. (Is. 40:29) Ko te lau ʼo te Folafola ʼa te ʼAtua ʼi te ʼaho fuli ʼe ko he tokoni lahi ia. (Pes. 1:2, 3) ʼE toe maʼuhiga foki te tahi akonakiʼi ʼo kita pea mo te maʼu ʼo te loto lolomi.—1 Ko. 9:27.
6 ʼE mole feʼauga te ʼofa ki te meʼa ʼaē ʼe lelei—ʼe tonu foki ke tou fehiʼa ki te meʼa ʼaē ʼe kovi. (Pes. 97:10) Ko tona faka ʼuhiga, ʼe mole tonu ke tou fafaga he holi ki te ʼu meʼa ʼaē ʼe kovi. ʼE tuʼu te lisi ia Tāʼaga Lea 6:16-19 ʼo ʼuhiga mo te ʼu meʼa e fitu ʼaē ʼe fehiʼa kiai ia Sehova. ʼE mahino ia, ko ʼaē ʼe ina fia fakafiafia ia Sehova, ʼe tonu foki ke fehiʼa ki te ʼu meʼa ʼaia. ʼI te tapuakina ʼo tatou ʼaki tatatou maʼu te ʼatamai mālama totonu ʼo ʼuhiga mo te moʼoni, ʼe tou loto anai ke ʼalutahi tatatou aga mo te ʼatamai mālama ʼaia, ʼo tou tuku maʼu tatatou fakakaukau ki te ʼu meʼa ʼaē ʼe lelei.
7 ʼE tau mo feʼauga ke tou faikole ke tou maʼu he ʼaluʼaga ʼe maui mālie ke ‘lahi tuʼumaʼu ai tatatou gāue ʼi te ʼAliki.’ (1 Ko. 15:58) Tokolahi neʼe nātou fakatokagaʼi, ko te maʼumaʼua ʼi te gāue ʼa Sehova ʼe ko he puipui ia, koteʼuhi ʼe veliveli te temi ʼāteaina ki he ʼu meʼa ʼe mole hona ʼuhiga.
8 ʼI tatatou vakaʼi te ʼu meʼa fuli ʼaia, ko te meʼa ʼaē ʼe kole mai e Sehova kia tatou ʼe mole lahi fau. (Mi. 6:8) ʼE lahi te ʼu tupuʼaga ke tou fakafetaʼi ai ki te ʼu pilivilesio gāue fuli ʼe tou maʼu. (Ef. 5:20) Koia, tou haga “faʼa gāue pea mo faʼafai,” mo tou falala ko tatatou fakapale ʼe lahi age ʼaupito anai ia ʼi te ʼu meʼa fuli ʼaē ʼe fakamaʼua mai kia tatou.—1 Tim. 4:10.