Te Tali Ki ʼAkotou ʼu Fehuʼi
◼ Ko te faʼahiga tokaga fea ʼaē ʼe ʼaoga ki te ʼu meʼa ʼaē ʼe tou fakaʼaogaʼi ʼi te gāue faka mafola?
1 Logope ʼe ina maʼu fakaʼatamai he faʼahiga palalau faka Tohi-Tapu ʼe mata feʼauga, e lagi neʼe mole teuteuʼi lelei te kaugā faka mafola te ʼu meʼa gāue ʼaē ka ina fakaʼaogaʼi. ʼI tana tuʼu ʼi te muʼa matapā, e lagi mole ina maʼu te tohi ʼaē ʼe tonu ke tufa. E lagi kua makapelupelu peʼe kua mahaehae te ʼu nusipepa, mo te ʼu kaupepa lalahi pea mo te ʼu kiʼi pepa lotu ʼi tana kato fai faka mafola. ʼE lagi mole ina maʼu anai he peni peʼe ko te kiʼi pepa ʼaē ʼe tohi ai te ʼu ʼapi, koteʼuhi neʼe mole teuteuʼi fakalelei tana kato. ʼE maʼuhiga ke tou teuteuʼi fakatomuʼa te ʼu meʼa ʼaē ka tou fakaʼaogaʼi ki te fai faka mafola.
2 Koteā te ʼu meʼa ʼaē ʼe tonu ke maʼu ʼi he kato kua tokalelei ki te gāue faka mafola? ʼE maʼuhiga ke maʼu ai he Tohi-Tapu. Tou ʼai mo te ʼu kiʼi pepa ʼaē ʼe tohi ai te ʼu ʼapi. Tou tokakaga ke tou maʼu te tohi ʼaē ʼe fakahā ʼi te māhina. ʼE toe ʼaoga foki ke maʼu ai te ʼu nusipepa foʼou, ʼo feiā mo te ʼu kiʼi pepa lotu pea mo te ʼu kaupepa lalahi. Tou ʼave mo te tohi Comment raisonner. ʼI tatatou maʼu Te Minisitelio ʼo Te Puleʼaga, ʼe tou lava vakaʼi ai te ʼu faʼahiga palalau ʼaē ʼe tuʼu ai ʼi muʼa ʼo hatatou ʼolo ki he ʼapi. ʼI tatatou gāue ʼi he telituale ʼe lagi tou felāveʼi anai mo he hahaʼi ʼe palalau ʼi he tahi lea, ʼe lelei hatatou ʼave te kiʼi kaupepa Une bonne nouvelle pour toutes les nations. Ko tatatou maʼu he tohi ki te kau tūpulaga ʼe tokoni anai kia tatou mokā tou fai palalau mo he kau tūpulaga.
3 Ko te ʼu meʼa fuli ʼaē ka fakaʼaogaʼi ʼe tonu ke fakatokatoka lelei ʼi tatatou kato. ʼE mole ʼaoga leva ke foʼou te kato, kae ʼe tonu ke maʼa pea mo lelei. Ko tatatou kato ʼe kau ʼi te ʼu meʼa gāue ʼaē ʼe tou fakaʼaogaʼi ki te tala ʼo te logo lelei. Koutou fakatokatoka lelei.