Fakaʼaogaʼi Te ʼu Kiʼi Pepa Lotu Moʼo Tala Ia Te Logo Lelei
1. Neʼe fakaʼaogaʼi feafeaʼi e te hahaʼi ʼa te ʼAtua ia te ʼu kiʼi pepa lotu?
1 Kua fualoa ia te fakaʼaogaʼi e te hahaʼi ʼa Sehova ia te ʼu kiʼi pepa lotu moʼo tala ʼaki ia te logo lelei. ʼI te taʼu 1880, neʼe kamata tā e C.T. Russell pea mo ʼona kaugā gāue ia te ʼu kiʼi pepa lotu ʼa te kau Ako Tohi-Tapu, pea neʼe foaki ia te ʼu kiʼi pepa lotu ʼaia ki te kau lautohi ʼo Te Tule Leʼo ke natou tufa ki te hahaʼi. ʼI te maʼuhiga ʼaupitō ʼo te ʼu kiʼi pepa lotu ʼaia, ʼi te taʼu 1884, ʼi te temi ʼaē neʼe fakamoʼoni ai e C.T. Russell ia te kautahi, ʼaē ko te fakatuʼutuʼu ko te lagolago ki te ʼu gāue ʼo te Puleʼaga ʼo te ʼAtua, neʼe ina fakaʼaogaʼi ia te ʼu kupu “kiʼi pepa lotu” ki te higoa ʼo te kautahi Zion’s Watch Tower Tract Society, ʼaē kua higoaʼi ʼi te temi nei ko te Watch Tower Bible and Tract Society of Pennsylvania. Talu mai te taʼu 1880 ʼo kaku ki taʼu 1918, neʼe tufa ia te ʼu kiʼi pepa lotu e 300 miliona tupu e te kau Ako Tohi-Tapu. ʼE kei ʼaoga tāfito ia te ʼu kiʼi pepa lotu ki te gāue fai fakamafola.
2. He koʼē ʼe faigafua ia te tufa ʼo te ʼu kiʼi pepa lotu?
2 He Koʼē ʼe Faigafua Tona Tufa: ʼE lanulanu pea mo matalelei ia te ʼu kiʼi pepa lotu. ʼE mole loaloaga ia te ʼu meʼa ʼaē ʼe tohi ai pea ʼe fakatupu fia lau pea ʼe lahi te ʼu meʼa ʼe tou mahino kiai. ʼE faigafua anai ki he tahi tana toʼo ia te kiʼi pepa lotu ʼi hana toʼo he nusipepa peʼe ko he tohi. ʼE faigafua ki te ʼu kaugā fagona foʼou pea mo te kiʼi kau toe ia tanatou tufa ia te ʼu kiʼi pepa lotu. Pea tahi, ʼe liliki ia te ʼu kiʼi pepa lotu pea ʼe mole mamafa.
3. Kotou fakamatala he ʼaluʼaga neʼe hoko ʼe hā ai ia te maʼuhiga ʼo te ʼu kiʼi pepa lotu.
3 Tokolahi neʼe natou ʼiloʼi ia te moʼoni ʼaki te ʼu kiʼi pepa lotu. Ohagē lā ʼi Haïti, neʼe tokagaʼi e te fafine ia te kiʼi pepa lotu ʼi te ala. Neʼe ina toʼo ʼo lau pea ʼe ina ʼui fēnei: “Kua au mahino ki te moʼoni!” Ki muli age, neʼe ʼalu ki te ʼu fono, neʼe ina kamata ako ia te Tohi-Tapu pea neʼe papitema. Neʼe hoko ia te ʼu ʼaluʼaga ʼaia ʼuhi pē ko te mālohi ʼo te Folafola ʼa te ʼAtua ʼaē neʼe ina maʼu ʼi te kiʼi pepa lotu.
4. Koteā tatatou fakatuʼutuʼu ʼi te māhina ʼaē ʼe tufa ai te ʼu kiʼi pepa lotu?
4 Te Fai Fakamafola ʼi Te ʼu ʼApi: ʼI te maʼuhiga ʼo te ʼu kiʼi pepa lotu ki te gāue fai fakamafola, ʼe tautau tufa anai ʼo kamata atu ʼi te māhina ʼo Novepeli. Ko tatatou fakatuʼutuʼu, ʼe mole gata ʼaki pē te tufa ʼo te ʼu kiʼi pepa lotu ki te hahaʼi kae ke tou kamata ʼaki he fai palalau. Kapau ʼe ʼi ai he tahi ʼe fia mahino, ʼe feala ke tou kamata he ako Tohi-Tapu ʼaki te tohi Te Ako Mai Te Tohi-Tapu peʼe ko he tahi age tohi. ʼE tou tufa feafeaʼi anai ia te ʼu kiʼi pepa lotu ʼi te ʼu ʼapi? ʼE tonu ke tou fakamāmāhani mo te ʼu kiʼi pepa lotu kehekehe.
5. ʼE tou tufa feafeaʼi anai ia te ʼu kiʼi pepa lotu ʼi te ʼu ʼapi?
5 ʼE tonu ke ʼalutahi ʼatatou ʼuluaki palalau mo te agaaga ʼo te hahaʼi pea mo te ʼu kiʼi pepa lotu ʼaē ʼe tou tufa. ʼE feala ke tou kamata ia te fai palalau ʼo tou fakatoʼo age ia te kiʼi pepa lotu. Heʼe ʼi tana sio ki tona takafi, ʼe feala ke ina fia lau. ʼE feala ke tou fakahā age he ʼu tuʼuga kiʼi pepa lotu, pea mo tou tuku ke ina filifili. Kapau ko te kupu tāfito ʼo te kiʼi pepa lotu ʼe ko he fehuʼi ʼe feala ke tou fakaʼaogaʼi moʼo kamata ʼaki he fai palalau. ʼE feala ke tou lau he kiʼi palakalafe ʼo te kiʼi pepa lotu mo ia ʼaē ʼe tou fai palalau, ʼo tou fakaʼaogaʼi ia te ʼu fehuʼi ʼaē ʼe tuʼu ai pea mo fakaafe ia ia ke ina fakahā mai tana manatu. ʼE feala ke tou lau ia te ʼu vaega maʼuhiga ʼi te Tohi-Tapu. ʼI te hili ʼo tatatou fai palalau, ʼe tonu ke tou fakatuʼutuʼu ke tou toe liliu mai. Kapau ʼe māhani, ia te kōkelekāsio ʼi te tuku ʼo te ʼu nusipepa ʼi te ʼu ʼapi ʼaē ʼe lāvaki, ʼe feala ke tou tuku mo te ʼu kiʼi pepa lotu.
6. ʼE tou tufa feafeaʼi anai ia te ʼu kiʼi pepa lotu ʼi te ala?
6 Te Fai Fakamafola ʼi Te Ala: Neʼe kua kotou tufa koa ia te ʼu kiʼi pepa lotu ʼi te fai fakamafola ʼi te ala? Ko ʼihi ʼe natou fakavilivili pea ʼe mole maʼu honatou temi ke natou fai palalau. ʼE faigataʼa ia te ʼiloʼi peʼe natou fia logo ki te logo lelei. ʼE lagi lelei age ke tou foaki he ʼu kiʼi pepa lotu ʼi hatatou foaki age he ʼu nusipepa kae mole tou ʼiloʼi peʼe natou lau anai. ʼI te maʼuhiga ʼo te takafi ʼo te ʼu kiʼi pepa lotu pea mo tana veliveli, ʼe feala ke tupu ai he fia lau e te hahaʼi mokā hoki maʼu honatou temi. Kae kapau ʼe mole natou fakavilivili, ʼe feala ke tou vakavakaʼi he ʼu kiʼi palakalafe mo nātou.
7. Fakamatala he ʼu ʼaluʼaga ʼe hā ai peʼe feafeaʼi hatatou fakaʼaogaʼi ia te ʼu kiʼi pepa lotu ʼi te fagonogono faigamālie.
7 Te Fagonogono Faigamālie: ʼE faigafua ia te fakaʼaogaʼi ʼo te ʼu kiʼi pepa lotu ʼi te fagonogono faigamālie. ʼE ʼai e he tehina ia he ʼu kiʼi pepa lotu ki tona tagaʼi kofu mokā ʼalu ki he faʼahi. Pea kā felāveʼi mo he tahi pē, ohagē ko he tahi ʼi te koloa, ʼe ina foaki age hana kiʼi pepa lotu. ʼI te temi ʼaē neʼe folau mamata ai ia te taumātuʼa ki New York, neʼe nā tokagaʼi ai neʼe feala ke nā maʼu he ʼu hahaʼi mai te ʼu fenua kehekehe. Ko te tupuʼaga lā ʼaia ʼo tanā ʼave ia te kaupepa Une bonne nouvelle pour des gens de toutes nations pea mo te ʼu kiʼi pepa lotu ʼi te ʼu lea kehekehe. ʼI tanā logo ki he tahi ʼe palalau ʼi he lea matāpule ʼe fakatau koloa, peʼe heka fakatahi mo nāua ʼi he mālōlōʼaga peʼe ʼi he fale kai, ʼe feala ke nā ʼavage he kiʼi pepa lotu ʼi tana lea.
8. Ko te ʼaluʼaga fea ʼaē ʼe fakatatau ai ia te ʼu kiʼi pepa lotu ki te pulapula?
8 “Nunusi tau pulapula”: ʼE feala ke fakatatau ia te ʼu kiʼi pepa lotu ki te pulapula. ʼE hoko nunusi e te tagata tō pulapula ia tana pulapula heʼe mole ina ʼiloʼi peʼe ko ia fea ʼaē kā homo anai. ʼE ʼui fēnei iā Ekelesiasi 11:6: “Nunusi tau pulapula mai te uhu pea aua naa tuku ke malolo tou nima i te afiafi, koteuhi e mole ke iloi te mea ae e mauli lelei anai, aeni pee ko ae, pee ko naua toko lua.” Koia, ʼe feala ke tou nunusi ia te ʼatamai mālama ʼo tou fakaʼaogaʼi ia te ʼu kiʼi pepa lotu.—Taag. 15:7.
[Fakamatala ʼo te pāsina 3]
Mai tona ʼaluʼaga ʼaē ʼe faigafua te tufa ʼo te ʼu kiʼi pepa lotu ki te hahaʼi, ʼe tautau tufa anai ʼo kamata atu i te māhina ʼo Novepeli