Ko Te Fakaʼaogaʼi ʼo Te ʼu Kiʼi Pepa Lotu ʼe Maʼu Ai He Fua ʼe Lelei
1 Talu mai tona kamataʼaga, ko te kautahi ʼa Sehova ʼo te temi nei neʼe ina fakaʼaogaʼi lelei te ʼu kiʼi pepa lotu. Ko te higoa totonu ʼo te Sosiete ʼaē kua ʼiloa ʼi te malamanei, Watch Tower Bible and Tract Society, ʼe hā ʼaki mai ai te gāue mālohi ʼa te ʼu kiʼi pepa lotu ʼi te faka mafola ʼo te logo lelei. ʼI te taʼu 1881 ʼo aʼu mai ki te 1918, ko kiʼi pepa lotu ʼe fakalaka ʼi te 300 miliona neʼe tufa e te hahaʼi ʼa Sehova. Tokolahi ia nātou neʼe liliu ko te ʼu tēhina ʼo Kilisito ʼi te temi ʼaia neʼe nātou ʼiloʼi ai te moʼoni ʼaki te ʼu ʼuluaki kiʼi pepa lotu.
2 ʼI te taʼu 1987, neʼe toe fakahāhā ai te maʼuhiga ʼo te fakaʼaogaʼi ʼo te ʼu kiʼi pepa lotu ʼi te hā ʼaē ʼo te ʼu kiʼi pepa lotu e fā, ʼaē kei tou fakaʼaogaʼi ʼi te temi nei. Lolotoga te fakatahi faka tisitilike ʼo te taʼu 1992 “Hahaʼi toʼo mālama”, neʼe fakahā ai ko te fahaʼi ʼaia ʼe tokoni anai ki ai te ʼu kiʼi pepa lotu lanu e fā, ʼe feala ai ke nātou faigaʼi ke fakakaukau te hahaʼi. Ko tonatou ʼu kupu: Ko te malamanei ʼo te temi ʼaenī ʼe hāo anai koa?, Te fakafimālie ʼo ʼuhiga mo te kau lotovaivai; Fiafia ʼi he maʼuli faka famili; Ko ai koa te ʼu pule ʼo te malamanei? ʼE tou fakaʼaogaʼi leleiʼi koa te ʼu kiʼi pepa lotu ʼaia e valu ʼi totatou minisitelio?
3 ʼE tou maʼu anai he ʼu fua lelei mokā ʼe tou fakaʼaogaʼi lelei te ʼu kiʼi pepa lotu ʼaia. ʼE tonu ke tou ʼiloʼi lelei te ʼu kiʼi pepa lotu takitokotahi. Ohage la, neʼe kua tou lau fakaleleiʼi koa ke feala ai hatatou manatuʼi pe koteā te manatu ʼe palalau ki ai te ʼu kiʼi pepa lotu takitokotahi? Neʼe kua tou fakakaukauʼi koa pe ko te faʼahiga hahaʼi feafeaʼi ʼaē ʼe ʼaoga ki ai te ʼu kiʼi pepa lotu? Kapau ʼe tou fakamāhani lelei ki te ʼu kiʼi pepa lotu, ʼe faigafua anai tatatou fakaʼaogaʼi ʼi te ʼu ʼapi, ʼo feiā foki mo te ʼu temi ʼe feala ai ke tou fakahā te logo lelei lolotoga te fagonogono faigamalie.
4 Tou fakaʼaogaʼi ʼi te ʼu ʼapi: Neʼe tohi fēnei e te tagata taupau faka silikosikilipisio: “ ʼE feala te kamata ʼo haku ʼu fai palalau ʼaki te kiʼi pepa lotu.” Neʼe kua tou ʼahiʼahiʼi koa te faʼahi ʼaia? He koʼe ʼe mole tou fakaʼaogaʼi te ʼu kiʼi pepa lotu ʼi tatatou ʼu ʼuluaki palalau? ʼAki te ʼu kiʼi pepa lotu e valu, kua feala ke fai hatatou ʼu ʼuluaki palalau e valu moʼo uga ʼo te hahaʼi. Ko te kiʼi pepa lotu takitokotahi ʼe ina foaki mai he faka fealagia kia tatou ke kamata ai he ako faka tohi-tapu lolotoga te ʼuluaki fai palalau peʼe lolotoga ʼo he ʼaʼahi.
5 ʼE ʼi ai ʼihi faʼahiga fakaʼaogaʼi ʼo te ʼu kiʼi pepa lotu. ʼI he matapā, lolotoga te fai palalau, ʼe feala ke tou ʼiloʼi ai lagi ko ia ʼaē ʼe fai palalau mo tatou neʼe mate hona kaumeʼa peʼe ko hona kāiga ʼe mahaki. Ko te hahaʼi ʼaē ʼe tau mo te ʼu faigataʼaʼia ʼo loaloaga ʼe ia nātou te ʼu manatu ʼe mole lelei pea ʼe nātou mahamahaki. ʼE ko he meʼa ʼofa ia te fakahā age kia nātou ʼaia te logo fakaloto mālohi ʼi te kiʼi pepa lotu Te fakafimālie ʼo ʼuhiga mo te kau lotovaivai. ʼE lagi ʼui mai anai ʼe he tahi neʼe hoki mavete nei pe mo tona ʼohoana peʼe kua fakamavae mai tana gāue. ʼE ko he ʼu faʼahi ʼaia ʼe fakatupu mamahi, mo mamafa ki te famili. Tou fakaʼaogaʼi te fehuʼi ʼe tuʼu ʼi te pasina 2 ʼo te kiʼi pepa lotu Fiafia ʼi he maʼuli faka famili: “He koʼe koa ia ʼaho nei kua tau te ʼu famili mo te ʼu fihifihia faigataʼa feiā? ʼE feafeaʼi koa ha kita fiafia ʼi he maʼuli faka famili?” ʼE lagi ko te ʼu fehuʼi ʼaia ʼe fai ʼe ia ʼaē ʼe fai palalau mo tatou. Tatau aipe peʼe mole fia logo ia ʼi te temi pe ʼaia, ʼe feala pe ke ina lau te kiʼi pepa lotu ʼi he temi ki muli age. — Tnk. 11:6.
6 Ko ʼihi kokelekasio ʼe nātou fai tuʼumaʼu tonatou telituale, pea kua tokolahi ʼi te hahaʼi kua ʼi ai tanatou ʼu tohi ʼo te Sosiete. ʼAki te fakaʼaogaʼi ʼo te ʼu kiʼi pepa lotu, ʼe faigafua ke tou palalau ki te ʼu fehuʼi ʼe ʼaoga ki te hahaʼi, ke feala ai tanatou fakahā mai tanatou manatu pea ke nātou fakakaukauʼi te amanaki ʼaē ʼe foaki mai e te Puleʼaga. Tou lagaʼi he fehuʼi ke feala ai hatatou toe ʼomai ʼo hoko atu te fai palalau. Tou toe liliu ʼo ʼaʼahi ia nātou pea mo taupau tanatou fia logo. ʼI te fakaʼosi, ʼe lagi tou kamata anai he ako faka tohi-tapu ʼaki he kaupepa pe ko he tohi neʼe kua ina toʼo.
7 Tou fakaʼaogaʼi te ʼu kiʼi pepa lotu ʼi te fagonogono faigamalie: Kapau ʼe ʼi ai tuʼumaʼu hatatou ʼu kiʼi pepa lotu (ʼi he tagaʼi kofu, he kato taki, peʼe ko he kato fai faka mafola), ʼe lahi anai he ʼu faʼahi ʼe feala anai ke tou tuku ki te hahaʼi ʼi te koga meʼa fuli pe ʼe tou aʼu ki ai. Tou fakaʼaogaʼi mokā ʼe tou ʼolo ʼo fai fakatau, mokā tou folau, mokā tou fai palalau mo niʼihi ʼi totatou famili peʼe ko ni hahaʼi ʼe ʼeʼeva. Ko te ʼu kiʼi pepa lotu ʼe feala ai te fakahā ʼo te logo fakanounou? Ko he kiʼi pepa lotu ʼe mole loa pea ʼe faigafua tona lau, kae ʼe ina fakahā fakahagatonu kia ia te tupuʼaga ʼo te kiʼi pepa lotu ʼaki te fakapotopoto. ʼE tali gafua e te hahaʼi te ʼu kiʼi pepa lotu ʼi te ʼu tohi pe ko te ʼu nusipepa, heʼe mole loaloaga foki tona lau.
8 Tou fakaʼaoga te ʼu faigamalie kehekehe ke tou fakahā te ʼu kiʼi pepa lotu kia nātou ʼe gāue tahi mo tatou, ʼi te ʼu fale kai, ki te hahaʼi ʼe gāue ʼi te fale ʼuʼutu penesini, pea mo ʼihi ʼatu ʼu fahaʼi. Ko he tuagaʼane neʼe teuteu ʼo ʼave tana kui fafine ki te tōketā neʼe ina fakatokagaʼi muʼa peʼe ʼi ai hana ʼu kiʼi pepa lotu. ʼI te koga fale talitali, neʼe kamata ai tana fai palalau mo te fafine ʼe teuteu fānau. ʼI tana ʼosi fakahā age te kiʼi pepa lotu Une vie paisible dans un monde nouveau, neʼe ina fehuʼi age: “ ʼE mole ke fakaʼamu koa ke lalahi tau fānau ʼi he mālama ʼe tatau mo te paki ʼaenī?” Neʼe feala ai te hoko ʼo tana fai palalau ʼo toe ʼalu ia ʼo ʼaʼahi te fafine ki tona ʼapi. Ki muli mai neʼe tau ʼalu ia ʼo ʼaʼahi tuʼumaʼu te fafine.
9 ʼE feala hatatou kamata he ʼu ako faka tohi-tapu ʼaki te ʼu kiʼi pepa lotu: Neʼe fakahā e te taupau faka silikosikilipisio, ko te kokelekasio neʼe kamata tana ʼu ako faka tohi-tapu e 64 ʼi te ʼu ʼapi ʼi te vāhaʼa ʼaē neʼe fai, ʼaki pe te ʼu ʼuluaki palalau mai te ʼu kiʼi pepa lotu.
10 Neʼe kua koutou ʼahiʼahi faigaʼi koa he ako faka tohi-tapu ʼi te ʼuluaki felogoi pe? ʼAki te ʼu kiʼi pepa lotu, ʼe feala hatatou fakahā fakanounou ʼe feafeaʼi te kamata ʼo he ako faka tohi-tapu. Neʼe fēnei te fakaʼaogaʼi e te tuagaʼane te kiʼi pepa lotu Une vie paisible dans un monde nouveau. Neʼe ina fakahā te paki mo ina fehuʼi age kia ia ʼaē ʼe nā felogoi peʼe ʼi tana manatu ʼe liliu anai te kele ʼi he ʼaho ohage ko te paki. ʼI te ʼosi ʼo tana fakahā mai tana manatu, neʼe ina fakaafe ia ke ina lau ia 2 Petelo 3:13 pea mo Isaia 65:17, ʼe tuʼu foki ʼi te kiʼi pepa lotu. ʼOsi ʼaia neʼe ina toe ʼui age leva: “Ko te ʼu fakapapau ʼaenī ʼe mole ko he moemisi, koteʼuhi heʼe tuʼu ia ʼi te Folafola ʼa te ʼAtua, te Tohi-Tapu.” ʼO ina fakatuʼutuʼu te ʼaho ki te vāhaʼa ka hoko mai ke toe haʼu ai ʼo hoko atu te fai palalau. Lolotoga te ʼaʼahi ki muli mai, neʼe ina tali ki te ʼu fehuʼi neʼe lagaʼi e te fafine pea neʼe ina tuku age te tohi E Feala Keke Mauli O Heegata Ite Palatiso Ite Kele. ʼO kamata atu aipe tana ako faka tohi-tapu.
11 ʼE lagi ko koutou ko he kau faka mafola mole heʼeki papitema peʼe kua papitema kua ʼosi ki ai he kiʼi temi nounou ʼe koutou kumi ke koutou faiva ʼi te fai faka mafola. ʼI te fahaʼi ʼaia, ʼe lagi ʼe koutou fia kole anai ki te ʼu kau faka mafola kua faiva ʼi te fahaʼi ʼaia, he ʼu manatu ʼo ʼuhiga mo te fakaʼaogaʼi ʼo te ʼu kiʼi pepa lotu ʼi te telituale ʼo tokotou kokelekasio. ʼE lahi te ʼu faʼifaʼitaki ʼi te Tohi-Tapu ʼo te kau kilisitiano neʼe fakaloto mālohiʼi pea mo tokoniʼi ʼe niʼihi neʼe fakapotopoto age ia nātou ʼaia ʼi te fahaʼi fakalaumālie. — Gāue 18: 24-27; 1 Ko. 4:17.
12 Ko te tagata takitaki ʼo te ako tohi ʼe faiva ʼi te fahaʼi ʼaia ʼe feala tanakole ki he tahi ke ina tokoniʼi koutou ke koutou fakaʼaogaʼi fakapotopoto te ʼu kiʼi pepa lotu. Ko te maʼua ʼo te ʼu mātuʼa ke nātou tokoniʼi tanatou fānau ke nātou liliu ko he kau faka mafola faiva. Ko he ʼu mātuʼa neʼe nā akoʼi tana taʼahine ke ina fakahā te kiʼi pepa lotu Une vie paisible dans un monde nouveau. ʼI tana kaugā ʼalu mo tana faʼe ʼo fai ako faka tohi-tapu, neʼe ina fakahā te kiʼi pepa lotu ki te ʼohoana ʼo te fafine ʼaē ʼe fai tana ako. Neʼe puna’maʼuli te tagata ʼi tana sio ki he tamasiʼi kua loloto tana tui faka lotu. Neʼe ina leleiʼia te kiʼi pepa lotu ʼaia. ʼI te ʼaho fuli pe ʼe haʼu ai te kiʼi taʼahine mo tana faʼe, ʼe ina fakahā age ki te tagata he vaega pe ko he hisitolia faka tohi-tapu neʼe ina teuteuʼi ʼo ʼuhiga mo ia. Ko te tagata ʼaia kua ina lau tuʼumaʼu ʼi te temi nei te ʼu nusipepa, neʼe fia fai foki ia ki te tohi Révélation: dénouement pea neʼe kua ʼalu ia ki te ʼu fono. Neʼe hoko te meʼa ʼaia koteʼuhi neʼe toʼo e te ʼu mātuʼa te temi moʼo akoʼi ʼo tanā taʼahine ke ina fakaʼaogaʼi lelei te ʼu kiʼi pepa lotu.
13 Tou fakaʼaogaʼi fakapotopoto te ʼu kiʼi pepa lotu: Moʼo foaki te kiʼi pepa lotu Ko te malamanei ʼo te temi ʼaenī ʼe hāo anai koa? ʼe feala hatatou fakahā totatou higoa pea ke kamata fēnei te fai palalau: “Mālo. ʼE mātou felogoi mo te hahaʼi ʼo ʼuhiga mo te maʼuhiga ʼo te maʼuli ʼi totatou temi. ʼI takotou manatu ʼe fakaʼaluʼalu anai koa ke lelei peʼe hoholo atu pe te haʼele kovi? [Tuku ke fai mai hana tali.] ʼE manatu ʼihi ko te ʼu meʼa ʼe hoko ʼi te temi nei ʼe ina fakahoko te ʼu lea faka polofeta faka tohi-tapu pea kua vave pe te fakaʼosi ʼo te mālama ʼaenī. Koteā tau manatu?” ʼI te ʼosi ʼo tana tali mai, fakahā age ki ai te kiʼi pepa lotu pea mo fakatokagaʼi age kia ia te ʼu fehuʼi e tolu ʼe tuʼu ʼi te lua palakalafe. Tou mulimuli ki te manatu ʼa te kiʼi pepa lotu ʼo fakahā neʼe ʼi ai te mālama neʼe pulihi ʼi te temi kua hili pea ko te mālama ia ʼaho nei kua vave pe foki tona pulihi. ʼI te ʼosi ʼo te fai palalau, ʼe tou fakatuʼutuʼu anai he ʼaho ke tou toe haʼu ai ʼo fakasiosio mo ia te fakamoʼoni faka tohi-tapu ʼaē ʼe ina fakahā mai ko te mālama ʼaenī kua vave pulihi.
14 ʼE moʼoni ʼi ʼihi temi ʼe mole feʼauga te temi moʼo palalau ki te ʼamanaki ʼaē ʼe foaki mai e te Puleʼaga, ʼi te gāue peʼe ʼi he tahi ʼatu fahaʼi. ʼI te gāue, ʼe feala ke palalau te hahaʼi ki te ʼu logo faka politike ia ʼaho nei. ʼE feala ke tou fakatokagaʼi age, logope la te ʼu faiga fuli ʼa te kau takitaki, ʼuhi ko tanatou loto ke hoko he meʼa ʼe lelei, neʼe tau te mālama mo te ʼu mamahi fakamataku lolotoga te Hisitolia. Tou fakaʼaogaʼi te manatu ʼi lalo ʼo te palakalafe 2 ʼo te kiʼi pepa lotu ʼaē Ko ai koa te te ʼu pule ʼo te malamanei? pea tou lau te ʼu fehuʼi e tolu ʼe tuʼu ʼi ai. Kapau ko te temi ʼe feʼauga pe ki te fai palalau fakanounou, tou foaki age te kiʼi pepa lotu kia ia, peʼe ki te hahaʼi, pea ke tou fakatuʼutuʼu ke hoko atu te fai palalau ʼi he tahi temi peʼe ki he tahi fahaʼi.
15 Peʼe tokotahi peʼe faka famili, tou toʼo he temi ke tou fakakaukauʼi ai te fakahā ʼo te ʼu kiʼi pepa lotu takitokotahi. Tou fai he ʼu faʼifaʼitaki. ʼE feafeaʼi anai hatatou fakaʼaogaʼi te ʼu kiʼi pepa lotu ke pipiki tahi mo te tufa ʼo te māhina? ʼE ʼi ai koa hatatou ʼu fakatuʼutuʼu ʼe ʼaoga ai ke ia tatou he ʼu kiʼi pepa lotu? ʼE tou faka felogoi anai koa ʼi te vāhaʼa ʼaenī mo he tahi ʼe feala ai tana maʼu he lelei ʼaki te logo ʼi te ʼu kiʼi pepa lotu ʼaia?
16 Ko te loloto ʼo totatou ʼofa kia Sehova pea mo te kāiga ʼe ina uga tatou ke tou fai ia meʼa fuli ʼe tou felagia moʼo fakahā ʼo te logo lelei. Ko he fakaʼaogaʼi tuʼumaʼu ʼo te ʼu kiʼi pepa lotu ʼe ko he tokoni kia tatou. Ko he kiʼi tamasiʼi e taʼu fitu neʼe ina fia tokoniʼi tona vāhaʼa fale ke feala ai hana hu ki te mālama foʼou. Neʼe ina foaki age he kiʼi pepa lotu, pea neʼe kamata aipe he ako faka tohi-tapu. Ko he faʼahi faigafua ia! Kae, ʼe tou fakaʼaogaʼi koa te faʼahi faigafua ʼaia ʼi totatou minisitelio? ʼE lagi ʼi he tahi ʼaho ʼe tou tuku ai he kiʼi pepa lotu ki he tahi, ko ai ʼaē ʼe ina ʼiloʼi peʼe lagi kamata ai foki he ako faka tohi-tapu? Kapau ʼe tou faka mafola te logo lelei ʼo te Puleʼaga ʼo fakaʼaogaʼi te ʼu kiʼi pepa lotu ʼaki te fakapotopoto, ʼe tou maʼu anai hona ʼu fua lelei!