Neʼe Fetogi Te Agaaga ʼo Te ʼu Kiʼi Pepa Lotu
1. Kotea te ʼu meʼa gaue foʼou ki tatatou minisitelio neʼe fetogi tona agaaga?
1 ʼI te Fakatahi Fakatisitilike ʼo te taʼu 2013 “Te Folafola ʼa Te ʼAtua ʼe Ko Te Moʼoni!” neʼe tufa ai ia te ʼu kiʼi pepa lotu foʼou ʼe nima. Pea neʼe tufa mo Te ʼu Logo ʼo Te Puleʼaga N° 38, ʼae ko tona kupu tafitō “ ʼE Feala Moʼoni Koa Ke Toe Maʼuli Ake He Mate?” Neʼe fetogi te agaaga ʼo te ʼu kiʼi pepa lotu foʼou ʼaia ʼe ono. Kotea tona tupuʼaga? ʼE tou lava fakaʼaogaʼi lelei feafeaʼi te ʼu kiʼi pepa lotu ʼaia ʼi tatatou faifakamafola?
2. Kotea te tupuʼaga ʼo te fetogi ʼaia?
2 Te Tupuʼaga ʼo Te Fetogi ʼAia: ʼI te agamahani, ʼe ʼi ai faʼahi ʼe fa ʼe tonu ke tou fai ke lelei tatatou faipalalau ʼi te faifakamafola: (1) ʼE tou lagaʼi he fehuʼi moʼo kamata ʼaki te faipalalau. (2) ʼE tou lau pea mo talanoa ki he vaega Tohi-Tapu. (3) ʼE tou foaki age ki ai he tohi. (4) ʼE tou lagaʼi he fehuʼi pea mo fai he fakatuʼutuʼu ke tou toe liliu ʼo tali ki te fehuʼi ʼaia. Koia, ʼaki te ʼu kiʼi pepa lotu foʼou ʼaia, ʼe faigafua tatatou fakahoko ia te ʼu faʼahi ʼaia ʼe fa.
3. ʼE feafeaʼi hatatou tufa he pepa lotu foʼou?
3 ʼE Feafeaʼi Hatatou Tufa: (1) Hili takotou fai te ʼu fakamalō, fakaha age ki ai te fehuʼi ʼae ʼe tuʼu ʼi te ʼuluaki pasina mo ʼona tali kehekehe, pea mo kotou kole age pe kotea tana manatu. (2) Kotou avahi te kiʼi pepa lotu pea mo vakaʼi ia te kupu tafitō “ʼE Ui ʼi Te Tohi-Tapu.” Kapau ʼe feala, kotou lau age ia te vaega ʼi takotou Tohi-Tapu. Kapau ʼe lotolelei ki ai, kotou vakaʼi mo te kupu tafitō “Tona Fakaʼuhiga Kia Koutou.” (3) Kotou foaki age ki ai ia te kiʼi pepa lotu pea mo fakalotomalohiʼi ia ia ke ina lau. (4) ʼI muʼa ʼo hakotou mavae, kotou fakaha age ki ai te fehuʼi ʼae ʼe tuʼu ʼi te pasina fakaʼosi, ʼi te kupu tafitō “Tou Fai Te Fehuʼi ʼAeni.” Kotou fai he fakatuʼutuʼu ke kotou toe liliu ʼo tali ki te fehuʼi ʼaia ʼaki te Tohi-Tapu.
4. Ka tou fai te ʼaʼahi, ʼe tou lava fakaʼaogaʼi feafeaʼi ia te ʼu kiʼi pepa lotu foʼou ʼaia?
4 Ka kotou fai te ʼaʼahi, kotou lau ia te vaega ʼae ʼe tuʼu ʼi te tuʼa pasina moʼo tali ki te fehuʼi ʼae neʼe kotou lagaʼi ʼi takotou ʼuluaki faipalalau. ʼI muʼa ʼo hakotou mavae, kotou fakatokagaʼi age ia te pakī ʼo te kaupepa lahi Te ʼu Logo Lelei ʼae ʼe tuʼu ʼi te kiʼi pepa lotu. Kotou fakatoʼo age ia te kaupepa lahi ʼaia pea mo fakaha age ia te ako ʼae ʼe talanoa ki te fehuʼi ʼaia. Kapau ʼe lotolelei ki ai, kotou fakatuʼutuʼu he ʼaho ke kotou toe liliu ʼo vakaʼi mo ia ia te kaupepa lahi ʼaia. Kua kotou kamata ai leva takotou ako Tohi-Tapu! Kapau ʼe mole kotou foaki te kaupepa lahi ʼaia, ʼe feala ke kotou foaki age he tahi age kiʼi pepa lotu pea mo fai he fakatuʼutuʼu ke kotou toe liliu ʼo talanoa ki ai.
5. ʼE ʼaoga koa te ʼu kiʼi pepa lotu ki tatatou minisitelio?
5 Kua taʼu 130 tupu te fakaʼaogaʼi ʼo te ʼu kiʼi pepa lotu ʼi tatatou minisitelio. Logo la neʼe tautau fetogi te agaaga ʼo te ʼu kiʼi pepa lotu, kaʼe neʼe ko te ʼu meʼa gaue lelei ki te faifakamafola. ʼOfa pe ke tou fakaʼaogaʼi lelei te ʼu kiʼi pepa lotu foʼou ʼaia moʼo fakamafola te ʼatamai malama ʼo te Tohi-Tapu ʼi te kele katoa.—Taag. 15:7.