He Koʼe ʼe Maʼuhiga Te ʼu Kiʼi Pepa Lotu ʼi Totatou Minisitelio Ia ʼAho Nei
1 ʼI Te Tule Leʼo ʼo te ʼaho 1 ʼo sanualio 1991, pasina 30, neʼe ʼi ai te fakamatala koʼeni tona kupu “Ko he kiʼi pepa lotu ʼe ina taki te ala”. ʼE talanoa ki he tagata neʼe pule ki te fakamaʼa ʼo te ala ʼo te saliote afi neʼe ina maʼu te kiʼi pepa lotu ʼe pipiki ʼi te lalo ukamea ʼo te ala. Neʼe ina lau aipe te kiʼi pepa lotu, ʼosi pea ʼalu ia ʼo fakahā ki te tagata ʼaē ʼe ʼohoana mo tona ʼofafine: “ ʼI te ʼaho nei ku ʼau maʼu te moʼoni!” Ko te ʼu tagata ʼaia e lua neʼe lahi tana ʼu tohi neʼe nā kole pea neʼe nā ako. ʼI te temi nei, kua laka ʼi te teau te hahaʼi ʼi tonā hōloga kua faiva ʼi te moʼoni. ʼE hā mai ai ʼe feala ke maʼu he fua lelei ʼaki pe te lau ʼo he kiʼi pepa lotu.
2 Tou fakaʼaoga te ʼu temi faigamālie: Ko te ʼu tēhina ʼi te ʼu potu fuli ʼe nātou fakaʼaogaʼi te ʼu temi faigamālie moʼo tufa ʼo te ʼu kiʼi pepa lotu. Ko he tuagaʼane kei finemui neʼe ina fakatokagaʼi te lotomamahi ʼo tana fafine faiako ʼuhi ko te mate ʼo te faʼe ʼo tona ʼohoana. Neʼe fai e te tuagaʼane ʼaia te tohi fakafimālie ki tana fafine faiako pea ina ʼai ki ai te kiʼi pepa lotu Quel espoir y a-t-il pour nos chers disparus? Neʼe faitohi te fafine faiako ʼo fakamālo ki ai pea ʼi te temi ʼaia neʼe fai palalau ai mo totatou tuagaʼane. ʼI te temi nei kua tali tuʼumaʼu e te fafine faiako ʼaia te ʼu nusipepa ʼaē ʼe ʼavage e te tuagaʼane.
3 Ko he ʼu kau faka mafola ʼe nātou fagonogono ʼi he ala ʼe ʼalu ki he tānuma neʼe nātou sio ai ki te hahaʼi ʼe nātou pena te ʼu falemaka ʼaki te pena ʼe fai ʼaki te lahe. Neʼe fakaʼaoga e te kau faka mafola te temi faigamālie ʼaia moʼo tufa ʼo tanatou ʼu kiʼi pepa lotu. ʼI he ʼaho ki muli mai neʼe ko he ʼaho mālōlō ʼo te tokolahi neʼe ʼolo ki te tānuma, koia neʼe fakatotonu e te kau faka mafola ke nātou tutuʼu ʼi te hūʼaga ʼo te tānuma ʼo tufa te ʼu kiʼi pepa lotu. ʼI te ʼu kiʼi pepa lotu ʼaē e nima geau neʼe tufa, ko te toko tolu pe neʼe mole nātou tali. ʼI te taʼu ki muli mai, neʼe toe liliu te kau faka mafola kiai pea neʼe nātou tufa te ʼu kiʼi pepa lotu ʼo laka ʼi te lauʼi afe, ko te toko ono pe neʼe mole nātou tali. Tokolahi neʼe nātou fakahā te loloto ʼo tanatou fiafia. Ko he tagata neʼe ina lau te kiʼi pepa lotu lolotoga tana mavae atu, mole faʼa fualoa pea toe liliu ia ʼo fai palalau mo te tuagaʼane ʼaē neʼe ina foaki age te kiʼi pepa lotu. Neʼe ina ʼui age: “ ʼE ʼi ai te tahi ʼe ʼau fia lau ki ai te logo ʼaenī. ʼE feala koa haku maʼu he tahi kiʼi pepa lotu?”
4 Ko te ʼu kiʼi pepa lotu ʼe liliki pea ʼe faigafua tona ʼave haʼele ʼi te faʼahi fuli ʼe tou ʼolo ai. Kapau ʼe tou fai palalau mo niʼihi, peʼe ko ni hahaʼi ʼe mole tou ʼiloʼi peʼe ko niʼihi ʼe feʼiloʼiʼaki mo tatou, ʼe feala hatatou faiga ʼo fakahā he manatu nounou ʼo fai palalau ki he kiʼi pepa lotu ʼi te ʼu kiʼi pepa lotu e valu ʼaē ʼe tou maʼu ʼi te temi nei. ʼE feala ke fakahoko te faʼahi ʼaia lolotoga hatatou fai palalau mo ʼotatou vāhaʼa fale, ʼi te fale koloā peʼe ko te talitali ki he tahi, ʼi te ʼu ʼaʼahi ki te famili, peʼe ko niʼihi atu ʼu ʼaluʼaga.
5 He koʼe ʼe lelei: Ko te ʼu kiʼi pepa lotu ʼe lanu matalelei. ʼE nounou. Ko te hahaʼi pea mo nātou fuli ʼaē ʼe felāveʼi mo tatou ʼi te ʼu ʼaluʼaga faigamālie ʼe mole nātou ogosia, heʼe mole fakamaʼuaʼi nātou ki he lautohi loaloaga. Ko te logo ʼe fakatupu lelei ʼaupito pea mo akoʼi tatou. Ko ia ʼaē ʼe lautohi ʼe ina maʼu hana fakasiosio lelei ki te Tohi-Tapu ʼaki tana lau te kiʼi pepa lotu. ʼI te ʼosi toʼo ʼo te kiʼi pepa lotu Une vie paisible dans un monde nouveau pea mo vakaʼi mo ia te ʼu puani, neʼe ʼui fēnei e te tūpulaga: “Neʼe mole heʼeki ʼau logo ki he ʼu palalau fakaloto mālohi feiā ʼo ʼuhiga mo te ʼaluʼaga ʼo te malamanei!”
6 ʼE tou fia fakaʼaogaʼi te ʼu kiʼi pepa lotu ʼi te ʼu faʼahi fuli ʼe ʼaoga ki ai. Tokolahi te kau faka mafola neʼe nātou maʼu he tokoni ʼi te ʼu kiʼi pepa lotu ʼo ʼuhiga mo te kamata ʼo tanatou fai palalau ʼi te gāue ʼi te ʼu ʼapi. E lahi te ʼu ako ʼi te temi nei neʼe kamata ʼaki he kiʼi pepa lotu. ʼI te pasina 4 ʼo te alatike ʼo te Minisitelio ʼo te Puleʼaga, ʼe ʼi ai he ʼu faʼahiga manatu ʼo ʼuhiga mo te fakaʼaogaʼi fakalelei ʼo te ʼu kiʼi pepa lotu. ʼE moʼoni, ko te ʼu kiʼi pepa lotu ʼe liliki kae ko te ʼu meʼa gāue maʼuhiga ʼi totatou minisitelio.