Tou Kamata Te Fai Palalau ʼAki Te ʼu Kiʼi Pepa Lotu
1 ʼI takotou manatu, ʼe mole fakalogo koa la te fua lelei ʼo tatatou fai faka mafola ki te faʼahiga kamata ʼo tatatou ʼu fai palalau? Ko te meʼa ʼaē ʼe faigataʼa, ʼe ko te fai ʼo he ʼu palalau ʼe fia logo kiai te hahaʼi pea ke nātou fia palalau kiai. Kae e feafeaʼi tona lava fakahoko lelei?
2 Tokolahi te kau fai faka mafola neʼe nātou fakatokagaʼi, ʼe feala ke nātou kamata he fai palalau, mo kapau ʼe nātou filifili lelei te ʼu palalau nounou ʼaē ka nātou fai mokā nātou tufa he kiʼi pepa lotu. Ko te ʼu kupu tāfito ʼo te ʼu kiʼi pepa lotu ʼe ina fakatupu takita fia lau, pea ko te lanu ʼo te ʼu paki ʼe kehekehe pea mo matalelei. ʼE nounou te ʼu fakamatala ʼo te kiʼi pepa lotu, pea ʼe faigafua anai tona lau. Pea ʼe maʼuhiga ʼaupito te ʼu logo nounou ʼaē ʼe tuʼu ʼi te ʼu kiʼi pepa lotu pea ʼe toe feala pe ke fakaʼaogaʼi moʼo kamata ʼaki he ako Tohi-Tapu.
3 Neʼe ʼui fēnei e te tuagaʼane: “ ʼE maʼumaʼua ʼaupito te hahaʼi, pea ʼi te agamāhani ʼe mole nātou fia fakaʼaogaʼi he temi loaloaga ki te lautohi. Kae ʼe maʼuhiga te logo ʼaē ʼe fakahā ʼi te ʼu kiʼi pepa lotu pea mo nounou, koia ʼe tali gafua anai e te hahaʼi he kiʼi pepa lotu. Neʼe lahi te ʼu kiʼi pepa lotu neʼe ʼau lau, pea neʼe ʼau maʼu ai te moʼoni.” ʼAua naʼa koutou meʼa noaʼi te mālohi ʼo te Folafola ʼa te ʼAtua ʼaē ʼe fakamahino ʼi te ʼu kiʼi pepa lotu.—Hep. 4:12.
4 Te ʼu Puani e Fā: Neʼe fua lelei te fai faka mafola ʼa te tokolahi he neʼe faigafua tanatou kamata palalau mo te hahaʼi. (1) Koutou fakahā ki he tahi te ʼu kiʼi pepa lotu pea mo fehuʼi age pe ko te kiʼi pepa lotu fea ʼaē ʼe ina fia lau. (2) ʼI tana ʼosi fili tana kiʼi pepa lotu, koutou lagaʼi he fehuʼi neʼe kua koutou teuteuʼi lelei, ʼe talanoa ai ki he manatu maʼuhiga ʼi te kiʼi pepa lotu. (3) Moʼo tali ki te fehuʼi, koutou lau he palakalafe peʼe ko he vaega ʼe tuʼu ʼi te kiʼi pepa lotu. (4) Kapau ʼe fia fai palalau pea koutou fakatafito ki te kiʼi pepa lotu peʼe koutou fakahā age he kapite ʼo te kaupepa Fakamaʼua peʼe ko te tohi Te ʼAtamai Mālama ʼaē ʼe maʼu ai te tahi ʼu manatu. ʼE feala ai leva ke koutou fakahā age te ako Tohi-Tapu. Ko te ʼu manatu ʼaē ʼe hoa mai ʼe tokoni atu anai ke koutou teuteuʼi he ʼu palalau moʼo tufa te ʼu kiʼi pepa lotu ʼaenī e tolu.
5 ʼE feala ke koutou lagaʼi te fehuʼi ʼaki te kupu tāfito ʼo te kiʼi pepa lotu ʼaenī “Ko Ai Koa Te ʼu Pule ʼo Te Malamanei?”:
◼ Kapau ʼe tali atu e he tahi “ko te ʼAtua” peʼe ina ʼui atu “ ʼe mole ʼau ʼiloʼi,” koutou lau te kamataʼaga ʼo te pasina 2 pea mo te ʼuluaki palakalafe ʼo te pasina 3. Koutou fakahā age te vaega ʼo 1 Soane 5:19 pea mo Apokalipesi 12:9. Tatau aipe peʼe tui peʼe kailoa ʼe maʼuli moʼoni ia Satana te Tevolo, peʼe fakamoʼoni ʼe ina puleʼi ia te malamanei, kae koutou hoko atu te fai palalau ʼaki te kupu tāfito ʼaenī “Te fakaʼiloga mai te ʼu meʼa faka malamanei.” Kapau ʼe koutou sio ʼe fia fai palalau, pea koutou fakamahino age te haʼuʼaga ʼo te Tevolo, ʼo koutou fakaʼaogaʼi te ʼu manatu ʼo te pasina 3 mo te 4 ʼo te kiʼi pepa lotu.
6 Ko te kiʼi pepa lotu “Ko Te Malamanei ʼo Te Temi ʼAenī ʼe Hāo Anai Koa?” ʼe lagi fia lau anai e te hahaʼi. ʼE feala hakotou kamata te fai palalau, ʼo koutou ʼui fēnei:
◼ “ ʼE tuʼania ʼaupito te hahaʼi ʼo ʼuhiga mo te ʼu fihifihia ʼaē ʼe tou felāveʼi fuli mo ia ʼi te ʼaho fuli. ʼI tau manatu, ʼe feala anai koa ke fakatokatoka te ʼu fihifihia ʼaia? [Koutou tuku ke fai mai hana tali.] Ko ʼihi ʼe nātou ʼui ʼe mole tokagaʼi e te ʼAtua totatou ʼu faigataʼaʼia. Kae ʼe ʼau fia fakahā atu te fakapapau ʼaē ʼe tuʼu ia Apokalipesi 21:3, 4.” Koutou lau te vaega. ʼE feala ke koutou fakahā age te kiʼi pepa lotu Ko Te Malamanei ʼo Te Temi ʼAenī ʼe Hāo Anai Koa? Kapau ʼe ina tali te kiʼi pepa lotu, pea ʼe feala ke koutou fakahā age te ʼu manatu ʼo te pasina 2 mo te 3 ʼi te kupu “Te ʼapogipogi ʼo te mālama ʼaenī.” Kapau ʼe koutou sio ʼe fia logo, pea ʼe koutou filifili anai he tohi ke koutou fakahā age ki ai.
7 ʼI te malamanei katoa, neʼe leleiʼia e te ʼu famili te kiʼi pepa lotu “Fiafia ʼi He Maʼuli Faka Famili”. Ka koutou fakaʼaogaʼi te kiʼi pepa lotu ʼaia, ʼe feala ke koutou ʼui fēnei:
◼ “Kua lagi ke fakatokagaʼi ʼe tau te famili mo te ʼu faigataʼaʼia ia ʼaho nei. ʼI tau manatu, koteā ʼaē ʼe feala ke tou fai moʼo fakamālohiʼi te ʼu felogoi faka famili?” ʼI tana ʼosi tali atu, koutou fakahā age te ʼu manatu ʼo te ʼuluaki palakalafe ʼi te pasina 6. Koutou filifili he vaega ʼi te ʼu vaega ʼaē ʼe tuʼu ʼi te pasina 4 pea mo te 5 ʼo te kiʼi pepa lotu, pea koutou fakamahino age ki ai. Pea koutou fakaafe ia ia ke fai hana ako Tohi-Tapu.
8 Ko te tufa ʼo te ʼu kiʼi pepa lotu ʼe ko he meʼa kua fai talu mai fualoa, pea ʼe ko he ʼu meʼa lelei moʼo tala te logo lelei. ʼE feala ke tou fakaʼaogaʼi lelei te ʼu kiʼi pepa lotu ʼaia ʼi tatatou fai faka mafola ʼi te ʼu ʼapi pea ʼi te fagonogono faigamālie, heʼe faigafua hakita ʼave mo kita ʼi tatatou ʼu feʼoloʼaki. ʼE maʼuhiga te ʼu kiʼi pepa lotu moʼo fakahoko totatou minisitelio. Koutou ʼave he ʼu kiʼi pepa lotu mo koutou, pea koutou fakaʼaogaʼi lahi moʼo kamata ʼaki he fai palalau.—Kol. 4:17.