Tou ʼAʼahi Te Hahaʼi Fuli ʼAē Neʼe Fia Logo Ke Nātou Maʼu He ʼu Fua Lelei
1 Koteā te meʼa tāfito ʼaē ʼe tokoni kia tatou ke tou ʼiloʼi peʼe tali e he tahi tatatou tohi? Ko te fia logo! ʼE toe moʼoni pe foki te faʼahi ʼaia mokā ʼe tou fai te ʼu ʼaʼahi. ʼI te temi ʼaia ʼe feala pe ke fakahā mai e he tahi ʼe fia logo veliveli pe ki te logo ʼo te Puleʼaga, ʼe tou fia fai anai he fakatuʼutuʼu ke feala tana maʼu te fua lelei. Koia ʼe tou toe ʼaʼahi ia ia ʼaki tatatou fakatuʼutuʼu ʼaē ke tou fakatupu ia ia te fia logo pea ke tou kamata he ako faka Tohi-Tapu mo ia. Koʼeni tatatou fakatuʼutuʼu tatau aipe mokā ʼe mole tou tuku he tohi. E feafeaʼi te fai ʼo te faʼahi ʼaia?
2 Kapau neʼe koulua ʼuluaki palalau ki te tuputupu ʼo te ʼu fihifihia ʼi te nofo ʼohoana pea mo te mavete ʼohoana ʼi te temi nei pea neʼe koutou tuku age te tohi “Te tagata ʼaē ʼe lahi tokotahi,” ʼe feala ke kamata fēnei takotou palalau:
◼ “ ʼI taku haʼu talu mai, neʼe tā palalau ʼo ʼuhiga mo te ʼohoana pea mo te tokoni ʼaoga ʼa te Tohi-Tapu, ʼaē ʼe feala ke tokoni kia tatou ke tou maʼu te fīmālie lahi. ʼE mole moʼoni koa la te manatu ʼaē tatau aipe mo te ʼu famili ʼaē ʼe haʼele lelei tonatou maʼuli, ʼe tautau hoko ai te ʼu fihifihia? [Faka fealagia ke fai atu hana tali.] ʼE tuku mai e te Tohi-Tapu te tokoni lelei ʼaupito ʼe feala ke tokoni kia tatou ke tou tauʼi te ʼu fihifihia ʼi te maʼuli faka famili. ʼE feala ke tapuakina he famili ʼaki hanatou ako fakatahi te Tohi-Tapu.” Tou fakahā age te tohi ʼaē ʼe feala ke fai ai te ako, ohage la ko te tohi Mauli o Heegata ʼi te pasina 246, ʼi te palakalafe 23. Tou lau ia Soane 17:3, pea tou foaki tatatou tokoni ki te famili ke feala he kamata ʼo hanatou ako faka Tohi-Tapu.
3 Kapau neʼe koutou palalau ʼo ʼuhiga mo te tamaliki pea mo te manatu ʼaē ʼe ʼaoga ke akoʼi nātou, ʼe feala ke hoko fēnei te fai palalau:
◼ “ ʼI tatā ʼuluaki felogoi neʼe tā palalau ʼo ʼuhiga mo te ako fakalaumālie ʼaē ʼe ʼaoga ki te tamaliki pea mo te tokoni ʼe feala ke foaki e te ʼu mātuʼa kia nātou. ʼE lahi te ʼu mātuʼa neʼe nātou tuʼania te agakovi ʼa te hahaʼi tūpulaga ia ʼaho nei. Koteā te meʼa ʼe ʼaoga ke fai ʼi te faʼahi ʼaia . . . ? [Koutou talanoa ki he aga ʼe mole lelei ʼe tautau fai e te kau tūpulaga ʼi te kolo ʼaē ʼe koutou nonofo ai. Faka fealagia ke fai atu hana tali.] Koutou fakagafua mai muʼa ke ʼau fakahā atu he tokoni ʼaoga ʼe foaki mai e te Tohi-Tapu.” Koutou fuli te tohi Mauli o Heegata ʼi te palakalafe 22 ʼo te pasina 246, ʼo koutou fai palalau ki te puani tāfito, pea koutou lau ia Efesi 6:4. Koutou fakahā age ʼe lahi te ʼu tamaliki ʼi te agamāhani ʼe nātou loto ke akoʼi pea mo tokoniʼi nātou. Mokā ʼe fai fakalelei e te ʼu mātuʼa te faʼahi ʼaia, ʼe fiafia te ʼu tamaliki pea ʼe lahi age tanatou aga fakaʼapaʼapa. Koutou fakamahino age peʼe feafeaʼi tatatou ako te Tohi-Tapu mo tatatou ʼu tamaliki.
4 Kapau neʼe koutou palalau ki te Palatiso fakakelekele, ʼe feala ke koutou ʼui age te meʼa ʼaenī moʼo toe lagaʼi ʼo tana fia logo:
◼ “Neʼe tā palalau ki te fakapapau ʼaē neʼe fai e Sesu ki te lauʼi miliona hahaʼi—ʼo tatau aipe mo te tagata kaihaʼa ʼaē kua mate—ʼe ina maʼu anai te fealagia ʼaē ko te maʼuli ʼi te palatiso fakakelekele. ʼE mole faʼa maʼuhiga anai kia tatou mo kapau ʼe mole tou maʼuʼuli mo nātou ʼaē neʼe tou ʼofa mamahi ai. ʼE koutou loto tahi koa la mo ʼau?” Faka fealagia ke fai atu hana tali. Koutou lau ia Fakahā 21:3, 4, pea koutou fakamahino age peʼe feafeaʼi anai hatatou maʼuʼuli tuʼumaʼu mo te hahaʼi ʼaē ʼe tou ʼofa mamahi ai. Pea tou fuli age te kapite 91 ʼi te tohi Te tagata ʼaē ʼe lahi tokotahi. Koutou lau ia Soane 5:28, 29 ʼo koutou fakahā age ʼe toe fakatuʼuake anai te kau mate. Koutou fai he fakatuʼutuʼu moʼo fai ʼo he tahi ʼaʼahi ke koutou palalau ai pe koʼe ʼe tou ʼiloʼi kua ōvi mai te faʼahi ʼaia.
5 Ko te fakatuʼutuʼu tāfito ʼo te ʼaʼahi ʼe ko te tokoni ki te hahaʼi ʼaē neʼe fia logo, ke nātou maʼu te fua lelei ʼo te logo ʼo te Puleʼaga. ʼE lahi te hahaʼi ʼe ʼaoga kia nātou he meʼa moʼo lagaʼi ʼo tanatou ʼuakai ki te ʼu meʼa fakalaumālie. Tou fakatokagaʼi ia nātou ki te ʼu puani tāfito ʼaē ʼe ʼaoga ʼo te tohi, ʼo fakahā peʼe feafeaʼi te tokoni ʼa te tohi kia nātou ke nātou mahino lelei ki te Tohi-Tapu. Ko te ʼu ʼaʼahi ʼaē ʼe nātou fakahoko te ʼu fakatuʼutuʼu ʼaia ʼe tokoni anai ke lahi tona ʼu fua lelei ki niʼihi.