Tou Fakavikiviki Tuʼumaʼu Ia Sehova

¹ ʼE siʼisiʼi te ʼu gāue ʼe maʼuhiga ʼaupito ke tou tokakaga tuʼumaʼu kiai. ʼI te ʼu gāue ʼaia ʼe kau ai te kai, te mānava pea mo te moe. Ko te ʼu meʼa ʼaia ʼe maʼuhiga moʼo taupau ʼo totatou maʼuli fakasino. Neʼe fakatatau e te ʼapositolo ko Paulo te fai faka mafola ʼo te logo lelei ki te ʼu meʼa ʼaia, ʼi tana fakaloto mālohiʼi fēnei tatou: “Tou momoli tuʼumaʼu ki te ʼAtua he sakilifisio fakavikiviki.” (Hep. 13:15) Koia, ʼe tonu ke tou tokakaga tuʼumaʼu ʼo fakavikiviki ia Sehova. ʼE tonu ke tou fai te meʼa ʼaia ʼi te ʼaho fuli, ʼo tou fakavikiviki tuʼumaʼu tatatou Tāmai ʼe ʼi selo.

² ʼI te faiga ʼa ʼihi ke tokaga ia ia ki he tahi age meʼa, neʼe tali age e Sesu: “ ʼE tonu ke ʼau toe faka mafola te logo lelei ʼo te puleʼaga ʼo te ʼAtua.” (Luka 4:43) Lolotoga te ʼu taʼu e tolu vaelua ʼo tona minisitelio, ko te ʼu meʼa fuli ʼaē neʼe ina fai ʼi te ʼaho fuli ʼe pipiki ki te faka kolōlia ʼo te ʼAtua. ʼE tou ʼiloʼi neʼe logoʼi e Paulo ia te faʼahi ʼaia, koia neʼe ina ʼui ai ia 1 Kolonito 9:16: “Malaʼia kia te ʼau mo kapau ʼe mole ʼau tala te logo lelei!” Neʼe fakaloto mālohiʼi ʼihi kau Kilisitiano agatonu ke nātou teuteu tuʼumaʼu moʼo fakahā ʼo tanatou ʼamanaki ki niʼihi. (1 Pe. 3:15) Ia ʼaho nei ko te lauʼi teau afe pionie faiva pea ko te toko miliona kau fai faka mafola ʼo te kokelekasio, ʼe nātou faiga ke nātou mulimuli ki te faʼahiga faʼifaʼitaki lelei ʼaia.

³ Ka tou fakakaukauʼi ʼi totatou loto katoa te faiva ʼaē neʼe fakahā e Sesu Kilisito, ko totatou Faʼifaʼitakiʼaga, ʼe tou foimo mulimuli fakalelei ki tona ʼu ala. (1 Pe. 2:21) ʼI ʼihi temi e lagi ʼe tou lotovaivai mokā ʼe tou tau mo he ʼu fihifihia ʼi totatou maʼuli ʼi te ʼaho fuli. ʼE lava feafeaʼi koa hatatou fakaʼaogaʼi he fealagia moʼo fakavikiviki ʼo Sehova ʼi tatatou gāue ʼi te ʼaho katoa? ʼE mole feala ia ke tou līaki totatou ʼu maʼua faka famili ʼaē ʼe lahi te fakamaʼuaʼi kiai ʼi totatou temi. Tokolahi ʼi te kau tūpulaga ʼe nātou maʼumaʼua ʼi tanatou ako ʼi te ʼaho fuli. ʼE ʼui e ʼihi ʼe mole feala hanatou fakavikiviki ia Sehova ʼi te ʼaho fuli. ʼAki te temi, e lagi ʼe tuku e ʼihi he māhina katoa ke fakalaka ka mole nātou kau ʼi he faʼahiga fai ʼo te fai faka mafola ʼo te logo lelei.

⁴ Neʼe mole feala tāʼofi e Selemia ia ia ʼo ʼuhiga mo te fakahā ʼo te logo lelei. ʼI te kiʼi temi nounou ʼaē neʼe mole palalau ai ia ki te huafa ʼo Sehova, neʼe ina logoʼi ʼi tona loto ohage he afi ʼe vela ʼe faigataʼa tona matehi. (Sel. 20:⁠9) ʼI tana felāveʼi mo te fakafeagai fakatupu lotovaivai, neʼe maʼu tuʼumaʼu e Selemia he fealagia ke ina fakahā ki niʼihi te logo ʼa Sehova. ʼE feala koa hatatou mulimuli ki tana faʼifaʼitaki lototoʼa pea mo tou haga kumi te ʼu fealagia moʼo fakavikiviki ʼo totatou Tupuʼaga ʼi te ʼaho fuli?

⁵ Ko tatatou palalau ʼo ʼuhiga mo Sehova, ʼe mole tonu pe ke gata ʼaki te ʼu temi ʼaē ʼe tou fai faka mafola ai mo ʼihi kau faka mafola ʼi te telituale ʼo te kokelekasio. ʼE ʼaoga anai kia tatou fuli ke tou fakalogo kia nātou ʼaē ʼe fia logo. ʼE tou felāveʼi mo te hahaʼi ʼi te ʼaho fuli​—⁠ʼe nātou ʼōmai ki totatou ʼapi, ʼe tou gāue mo nātou, ʼe tou tutuʼu mo nātou ʼi te fakatauʼaga meʼa, peʼe tou ʼolo mo nātou ʼi te kā. Ko tatatou fakamālo fakalelei pea mo tatatou lagaʼi he fehuʼi peʼe ko he talanoa ʼe feala ke kamata ʼaki anai he fai palalau. ʼE tokagaʼi e te tokolahi ko te faʼahi ʼaia ʼe lahi ʼaupito ai tanatou maʼu te fua lelei ʼi te fagonogono faigamālie. Ka tou tokagaʼi te ʼu faigamālie lahi ʼe tou maʼu ke tou palalau ai ki niʼihi ʼo ʼuhiga mo te logo lelei, ʼe mole tonu ke tou tuku he māhina katoa ke fakalaka ka mole tou logologo te Puleʼaga.

⁶ Ko te pilivilesio ʼaē ko te fakavikiviki ʼo Sehova ʼe mole gata anai ʼi he temi. Ohage ko tona fakahā e te tagata fai pesalemo, ko meʼa fuli ʼe mānava ʼe tonu ke nātou fakavikiviki ia Sehova, pea ʼe mahino ia, ʼe tou fia kau kia nātou ʼaia. (Pes. 150:⁠6) Kapau ʼe uga tatou e totatou loto ke tou fai tuʼumaʼu te faʼahi ʼaia, ʼe tou toʼo anai te ʼu faigamālie ʼi te ʼaho fuli moʼo palalau kia Sehova pea mo tana Folafola.