Tou Vikiʼi Ia Sehova ʼi Te ʼAho Fuli Pē
1. Koteā ʼaē ʼe loto moʼoni ke fai e te ʼu kaugana ʼa te ʼAtua, pea koteā tona tupuʼaga?
1 Neʼe fakahā e te Hau ko Tavite tana loto moʼoni ʼaē ke ina vikiʼi ia Sehova “ ʼi te lolotoga ʼo te ʼaho kātoa,” ʼeī ki he ʼu temi ʼe mole ʼiloʼi hona gataʼaga. (Pes. 145: 2, 7, 21) Mo tātou foki, ʼe tou toe maʼu ia te tupuʼaga lelei ke tou vikiʼi ai Sehova ʼi te ʼaho fuli pē.—Pes. 37:10; 145:14, 18; 2 Pet. 3:13.
2. ʼE lava feafeaʼi ki te ʼu fāmili ke natou vikiʼi ia Sehova ʼi te ʼaho fuli pē?
2 Tou Vikiʼi Ia Sehova Mo Totatou Fāmili: ʼE tou maʼu ia te ʼu tohi fakatupu lotomālohi moʼo kamata ʼaki ai ia he ʼu fai palalau ʼaoga ʼi te temi ʼaē ʼe tou vakaʼi ai ia te koga tohi ʼo te ʼaho, mokā tou fai tatatou Tauhi Fakafāmili, pea mokā tou teuteuʼi ia tatatou ʼu fono. ʼE lahi ia te ʼu fāmili kua liliu ko hanatou agamāhani ia te kakai fakatahi tuʼa tahi ʼi te ʼaho. ʼE ko he ʼaluʼaga ʼe feala ai hanatou faifai palalau faʼifaʼitaliha pea mo natou vikiʼi ai ia Sehova. Ko te ʼu taʼi fai palalau ʼaia ʼaē ʼe uga e te ʼu mātuʼa, ʼe feala ke liliu ko he toe tokoni lahi moʼo akoʼi ai ia takotou fānau ʼi “te akonaki pea mo te ʼu fakatokaga ʼa Sehova.”—Efe. 6:4; Teu. 6:5-7.
3. Ko te ʼu faigamālie fea ʼaē ʼe tou maʼu mokā tou fai palalau mo totatou ʼu tehina mo tuagaʼane?
3 Tou Vikiʼi Ia Sehova Mo ʼOtatou Tehina Mo Tuagaʼane: Kā tou fai fakamafola peʼe tou kau ki te ʼu fono, ʼe tou maʼu ai he ʼu faigamālie lelei moʼo vikiʼi ia Sehova ʼaki totatou ʼu tehina mo tuagaʼane. (Taag. 15:30; Filp. 4:8; Hep. 13:15) Mai tona ʼaluʼaga ʼaē ʼe tou ʼoʼofa fuli kiā Sehova, koia ʼe tonu ai ke faigafua hatatou fai he ʼu fakafetaʼi ki te manavaʼofa ʼo Sehova mokā tou fefaipalalauʼaki.—Pes. 106:1.
4. Koteā te tahi ʼu ʼaluʼaga ʼe feala ai ke kotou vikiʼi ia Sehova?
4 Kā Tou Palalau Mo Te ʼu Hahaʼi ʼAē ʼe Mole Tui: Tatau aipē mo kapau ʼe mole feala ʼi te ʼaho fuli ke tou kau ki te minisitelio ʼuhi ko totatou ʼaluʼaga, kae ʼe feala ki te ʼamanaki ke hū māmālie ki te loto ʼo te hahaʼi fakamālotoloto, mokā tou fai he kihiʼi palalau ʼo ʼuhiga mo Sehova pea mo tana ʼu fakatuʼutuʼu ki totatou ʼu kaugā gāue, mo totatou ʼu kaugā ako, pea mo nātou ʼi ʼotatou tafaʼaki. (Pes. 27:14; 1 Pet. 3:15) ʼI tana folau ʼi te vakalele, neʼe lava fai fakamafola ia te tuagaʼane ki te tahi fafine folau, ʼaē neʼe ina maʼu ia te lotofīmālie lahi pea mo te fakalotomālohi lahi ʼaki te ʼu meʼa ʼaē neʼe logo kiai, pea neʼe ina foaki age ki te tuagaʼane ia tona tuʼasila pea mo tona nūmelo telefoni ke feala he hoko atu ʼo tanā fai palalau. ʼI te mamahi ʼa te hahaʼi ʼuhi ko te tuputupu ʼo te ʼu maveuveu pea mo te ʼāsili kovi ʼo te ʼu ʼaluʼaga ʼi te mālamanei, ko te hahaʼi ʼa Sehova ʼe hoko atu pē ia tanatou palalau kiā nātou ʼaē ʼe fia logo ki te “logo lelei ʼo he meʼa ʼe lelei age.” ʼE foaki ai ki te hahaʼi ia he ʼamanaki pea mo he tupuʼaga ke natou vikiʼi ai ia Sehova.—Isa. 52:7; Loma 15:11.
5. He koʼē ʼe tou fia vikiʼi ia Sehova, pea koteā ʼaē ʼe lava hoko ai anai?
5 ʼE mahino ia ʼe fiafia Sehova ʼi tana logo ki te vikiʼi ʼo ia e tana ʼu kaugana ʼi te ʼaho fuli! Ohagē ko te ʼu meʼa ʼaē neʼe faʼu e Sehova pea mo tou sisio kiai, ʼe feala mo tātou ke tou vikiʼi ia ia ʼi te ʼaho fuli pē, ʼi totatou fāmili, ʼi te kōkelekāsio, pea mokā tou fai palalau mo te hahaʼi ʼaē ʼe mole heʼeki natou vikiʼi ia Sehova.—Pes. 19:1-4.