Tou Vikiviki Ia Sehova ʼi Te ʼAho Fuli
1 Ko totatou ʼAtua, ko Sehova, ʼe ko he Tupuʼaga taulekaleka mo ʼofa, ko te Matapuna ʼo te maʼuli fuli pea mo te fiafia. ʼUhi ko tona māʼoluga, ʼe tāu mo ia te ʼu fakavikiviki ʼa tana ʼu meʼa fuli ʼaē neʼe ina fakatupu. ʼE tou ʼui takitokotahi anai ohage ko te tagata fai pesalemo: “ ʼE ʼau hilifaki anai kia meʼa fuli te fakavikiviki ʼo koe. ʼE fakamatala anai e toku gutu tau faitotonu, ʼi te ʼaho fuli tau fakamaʼuli.” (Pes. 71:14, 15) Moʼo fai ʼo te faʼahi ʼaia, ʼe tonu ke tou kumi te ʼu faʼahi ʼaē ʼe feala ai ke tou vikiviki ia Sehova ʼi te ʼaho fuli pe, pea ke tou uga ia tatou ke tou talanoa lelei ʼo ʼuhiga mo ia, mo tana faitotonu, pea mo tana ʼu fakatuʼutuʼu ʼo ʼuhiga mo te fakamaʼuli.
2 Neʼe tuku mai e te ʼu ʼuluaki Kilisitiano te faʼifaʼitaki lelei ʼo ʼuhiga mo te fakavikiviki ʼo Sehova. ʼE tou lau fēnei ia Gāue 2:46, 47 ʼo ʼuhiga mo te toko 3 000 hahaʼi ʼaē neʼe papitema ʼi te Penikosite: “ ʼI te ʼaho fuli pe, ʼaki he loto tahi neʼe nātou ʼolo tuʼumaʼu ki te fale lotu, . . . ʼo nātou fakavikiviki ki te ʼAtua pea neʼe leleiʼia nātou e te hahaʼi fuli. . . . [Pea] neʼe hoholo atu pe te hilifaki e Sehova kia nātou ʼi te ʼaho fuli, te hahaʼi ʼaē kua hāofaki.” Neʼe nātou ako te ʼu moʼoni fakatalakitupua ʼo ʼuhiga mo Sehova pea mo tona Mesia. Ko tanatou fiafia neʼe lave mālohi ki te hahaʼi, pea mo fakaloto mālohiʼi nātou ke nātou fakalogo pea mo nātou ako pea mo nātou fakavikiviki ia Sehova.
3 Te ʼu Faigamālie ʼe Tou Maʼu ʼi Te ʼAho Fuli: Ia ʼaho nei tokolahi ʼe nātou maʼu te ʼu fealagia moʼo fakavikiviki ʼo Sehova ʼi te ʼaho fuli ʼaki te fagonogono faigamālie. Ko te fai ʼo he fakatuʼutuʼu fakatomuʼa ʼe tokoni ai kia tatou ke lelei age tatatou gāue. Ko te tuagaʼane neʼe ina fakatuʼutuʼu ke ina fai te fagonogono faigamālie, neʼe ina fakatokagaʼi neʼe ʼi ai te tahi neʼe ina maumauʼi tona ʼu matapā sioʼata e lua pea mo kaihaʼa tana motokā. Neʼe telefoni ki te tagata gaohi matapā sioʼata ke haʼu ʼo gaohi tona ʼu matapā sioʼata ʼaē neʼe foaʼi, pea neʼe teuteu ke fai faka mafola ki ai. ʼI tana teuteu ʼaia, neʼe faikole kia Sehova ke tokoni age kia ia. Koia, neʼe fai faka mafola ia ki te tagata ʼaia ʼi te hola katoa, pea neʼe ina tuku ki ai te tohi Mauli Heegata.
4 Ko te tahi tuagaʼane neʼe felāveʼi tuʼumaʼu mo te fafine ʼe nā vāhaʼa fale, lolotoga tana faka ʼevaʼeva tanā ʼu kuli. ʼI te tahi ʼaho, neʼe nā palalau ai ʼo ʼuhiga mo te ʼu fihifihia ʼo te maʼuli, pea neʼe hoko ai mo tana tahi ʼu fai palalau. ʼAki te temi, neʼe kamata te ako Tohi-Tapu. Ko te meʼa ʼaē ʼe feala ke tou fakatokagaʼi, ki muli age neʼe fakahā age e te fafine ʼaia ʼe nā vāhaʼa fale, ʼe mole fakalogo anai ia mo kapau neʼe ʼolo age te kau Fakamoʼoni ʼa Sehova ʼo fisifisi tona matapā, koteʼuhi ʼe mole tui ia ki te ʼAtua pea mo te Tohi-Tapu.
5 Ko ʼihi ʼe nātou tokagaʼi ʼe feala te fai ʼo te fagonogono mokā ʼōmai niʼihi ʼe fakatau meʼa ʼi te ʼu ʼapi peʼe ko niʼihi age ʼe ʼōmai ʼo fisifisi ʼonatou matapā. Ko te tuagaʼane ʼi Ilelani neʼe ʼaʼahi e te tagata ʼe gāue ʼi te assurance vie. Neʼe fakamahino age e te tuagaʼane ʼe fakatalitali ke ina maʼu te maʼuli heʼegata. Ko te ʼu manatu ʼaia neʼe ko he ʼu meʼa foʼou ki te tagata ʼaia, ʼaē neʼe tupu ʼi te famili ʼe tauhi ki te lotu Katolika Loma. Neʼe ina tali te tohi Mauli Heegata, pea neʼe kau ki te fono ʼi te vāhaʼa ki muli age, pea neʼe ina tali ke fai hana ako Tohi-Tapu. ʼI te temi nei kua papitema te tagata ʼaia.
6 Ko tatou fuli ʼe tonu ke tou fakaʼaogaʼi te ʼu faigamālie ʼaē ʼe feala ke tou maʼu moʼo vikiviki ʼo Sehova ʼi te ʼaho fuli. ʼE ʼaoga ke tou maʼu he ʼu nusipepa peʼe ko he ʼu kiʼi pepa lotu ʼi te ʼu potu ʼaē ʼe feala ke sio kiai te hahaʼi pea ʼe feala ai ke tou tufa ai. ʼI ʼihi ʼu koga meʼa ʼe feala ke koutou ʼolo ʼi he kiʼi temi nounou ʼi te ʼu lotoʼā ʼaē ʼe ʼi ai te ʼu ʼōloto matalelei, ke koutou fagonogono ai ki te hahaʼi ʼaē ʼe mālōlō ai ʼi he kiʼi temi nounou. Ko ʼihi kau Fakamoʼoni tūpulaga ʼi te faleako ʼe nātou hili he tohi faka Tohi-Tapu ki tonatou pilō, ke feala ai he kamata ʼo he fai palalau mo he tahi ʼe ina tokagaʼi pea ʼe feala ke ina fai age he ʼu fehuʼi. Koutou taupau maʼu he vaega faka Tohi-Tapu e tahi peʼe lua ʼe feala ke koutou fakaʼaogaʼi. Koutou kole kia Sehova ke tokoni atu kia koutou. ʼE tapuakina anai koutou ʼi takotou fai te faʼahi ʼaia.—1 Soane 5:14.