Tou Tokoni Ki Niʼihi Ke Nātou Maʼu He ʼu Fua Lelei
1 ʼE fakapapau mai e Sehova ʼe ina ako tatou ʼo ʼuhiga mo te ʼu meʼa ʼe ʼaoga ke tou ʼiloʼi. ʼE ina fakamoʼoni mai ia Pesalemo 32:8: “ ʼE ʼau fakaliliu anai koe ko he tahi ʼe fakasiosio tonu pea ʼe ʼau ako anai koe ʼi te ala ʼaē ʼe tonu ke ke haʼele ai. ʼE ʼau fai anai he ʼu tokoni, ʼo sio maʼu toku mata kia te koe.” ʼE mole tou manatu pe kia tatou, ʼe tou fia fakahā ki niʼihi peʼe lava feafeaʼi hanatou maʼu te ʼu fua lelei ʼaki hanatou tokagaʼi te tokoni poto ʼe tuku mai e te Tohi-Tapu, pea tāfito te tokoni ʼe tuku mai e Sesu. (Is. 48:17; Soane 7:46) Lolotoga te māhina ʼo Sepetepeli ʼe feala ke tou fai te faʼahi ʼaia ʼaki tatatou tufa te tohi Te tagata ʼaē ʼe lahi tokotahi. Moʼo fakahāhā ʼo te tohi ʼaia, ʼe ʼi ai te ʼu faʼahiga fai ʼe feala ke tou fakahā ai te ʼaoga tāfito ʼo te ʼu akonaki ʼa Sesu.
2 ʼUhi ko te lahi ʼo te ʼu fihifihia ʼi te nofo ʼohoana ia ʼaho nei, ʼe feala ke koutou fili te manatu ʼaenī ʼe tuʼu ʼi te tohi “Te tagata ʼaē ʼe lahi tokotahi”:
◼ “Tokolahi ia nātou ʼaē neʼe palalau mo ʼau, ʼe nātou tuʼania ʼaupito te tuputupu ʼo te mamahi ʼi te nofo ʼohoana pea mo te ʼu mavete ʼohoana. Koteā takotou manatu ʼo ʼuhiga mo te fihifihia ʼaia? [Faka fealagia ke fai atu hana tali.] Tokolahi neʼe mole nātou tokagaʼi te ʼu tupuʼaga ʼo te fihifihi ʼaia. Kapau ʼe nātou fai he faiga fakamalotoloto, ʼe mole gata pe ʼi te taupau e te ʼu taumatuʼa tonatou nofo ʼohoana kae ʼe toe feala ai tanatou maʼu te fiafia moʼoni. Ko te kalavi ʼo te fua lelei ʼe ko te maʼuliʼi te tokoni ʼe tuʼu ʼi te Tohi-Tapu.” Tou Lau ia Efesi 5:28, 29, 33. Tou fuli age te kapite 95, ʼo tou fai palalau ki te ʼu palakalafe 3 pea mo te 6, pea tou tuku age te tohi.
3 ʼE ʼaoga ki te tamaliki ke foaki age e te ʼu mātuʼa tonatou temi pea mo akoʼi nātou. ʼI takotou fakahā te tohi “Te Tagata ʼaē ʼe lahi tokotahi,” ʼe feala ke koutou ʼui age fēnei:
◼ “Ko tatou fuli ʼe tou tuʼania ʼo ʼuhiga mo te maʼuli fīmālie ʼi te temi ka haʼu ʼo te kau tūpulaga. ʼI takotou manatu, ʼe ʼi ai koa he faʼahiga meʼa ʼe lelei ke fai e te ʼu mātuʼa moʼo tokoni ki tanatou ʼu tamaliki ke nātou maʼu te fīmālie ʼi te temi ka haʼu? [Faka fealagia ke fai atu hana tali.] Koutou logo muʼa ki te tokoni ʼaenī ʼe haʼu mai te tāʼaga lea ʼa te Tohi-Tapu neʼe tohi kua hili nei kiai taʼu e 3 000. [Lau ia Tāʼaga Lea 22:6.] Logope la ʼe feala ke maʼu e takotou ʼu tamaliki he ako lahi ʼi te faleako, ʼe maʼuhiga age kia nātou ke akoʼi nātou e tanatou ʼu mātuʼa ʼi tonatou ʼapi. ʼE fakamaʼuaʼi kiai te temi, te tokaga, pea mo te ʼofa, pea ʼe ʼaoga kiai te ʼu faiga.” Tou fuli age te pasina 95, ʼo tou fai palalau ki te paki pea mo te ʼu palakalafe fakaʼosi e lua. Fakaʼiloga lelei te aga ʼa Sesu ki te ʼu tamaliki, pea tou fakamahino age peʼe feafeaʼi te fakaʼaogaʼi ʼo te tohi moʼo fai ʼo he ako faka Tohi-Tapu.
4 E lagi ʼe koutou fia tuku te tohi “Te tagata ʼaē ʼe lahi tokotahi” ʼaki takotou fakahā ake ʼe liliu anai te kele ko he palatiso:
◼ “ ʼE ʼau ʼiloʼi papau ʼe koutou tuʼania ʼo ʼuhiga mo tokotou maʼuli ʼi te temi ka haʼu. ʼI te faikole ʼo te ʼAliki, neʼe akoʼi mai e Sesu kia tatou ke tou kole ke hoko te finegalo ʼo te ʼAtua ʼi te kele ohage pe ko selo. ʼE feafeaʼi anai te kele mokā hoko te faʼahi ʼaia? [Faka fealagia ke fai atu hana tali.]” Tou fakahā age te paki ʼi te kapite 125 pea tou fakamahino te fakapapau neʼe fai e Sesu ki te tagata kaihaʼa. Pea tou fehuʼi age peʼe feala ke maʼu e te hahaʼi kua mamate ʼaē ʼe tatau tanatou aga mo te tagata ʼaia, he fealagia ke nātou toe maʼuʼuli ʼi te kele ʼi te temi ka haʼu. Tou fuli age te paki ʼi te kapite 133 pea ke tou lau te palakalafe 4. “ ʼE mole ko he meʼa fakafiafia anai koa ia te maʼuli ʼi te taʼi mālama ʼaia? Ko te tohi ʼaenī ʼe ina fakahā atu peʼe feafeaʼi hakotou lava maʼuli mo tokotou famili ʼi te palatiso ohage ko tona tuʼu ʼi te paki ʼaenī.”
5 Ko te teuteuʼi fakatomuʼa ʼo takotou faʼahiga palalau ʼe ko te kalavi tāfito ʼaia ke fua lelei ai takotou palalau mo he tahi. Ia muʼa ʼo takotou fisifisi te matapā, ke koutou ʼiloʼi papau ʼe ʼi ai te meʼa tāfito ʼe koutou talanoa kiai ʼo ʼuhiga mo te Tohi-Tapu. Pea tahi ʼaē meʼa, ke koutou fakakaukauʼi he talanoa fakanounou ʼo ʼuhiga mo he puani ʼaoga ʼo te nusipepa, peʼe ko te kiʼi pepa lotu ʼe koutou fakatuʼutuʼu ke koutou tuku ki he tahi mokā ʼe mole ina toʼo te tohi. Koutou fakaʼaogaʼi te ʼu faigamālie fuli ʼe koutou maʼu moʼo tūtū te ʼu fua ʼo te moʼoni ʼo ʼuhiga mo te Puleʼaga lolotoga te māhina ʼo Sepetepeli. (Tnk. 11:6) ʼE koutou tokoni anai ki niʼihi ke nātou utu te ʼu fua lelei heʼegata.