Koteā Te Fakatuʼutuʼu ʼe Koutou Fai Maʼa Takotou Fānau?
1 Ko te fua lelei ʼo te maʼuli ʼe fakalogo ki te meʼa ʼe koutou fai pea mo te fakahoko ʼo te ʼu fakatuʼutuʼu ʼaē ʼe tau. Ko nātou ʼaē ʼe mulimuli ki te ʼu fakatuʼutuʼu ʼe mole faʼa maʼuhiga peʼe mole moʼoni, ʼe feala ke nātou mamahi pea mo ʼiʼita. ʼE ko he agapoto te fakasiosio fakalelei pe ko te ʼu fakatuʼutuʼu fea ke tou mulimuli kiai ke feala ai hatatou “puke maʼu te maʼuli moʼoni.” (1 Tim. 6:19) ʼE feala ke tou fakamālo kia Sehova ʼi tana fakahā fakalelei mai te ala ʼaē ʼe tonu ke tou ʼolo ai, ʼaki tana Folafola pea mo tana kautahi!—Is. 30:21.
2 ʼI tana foaki mai te taʼi tokoni ʼofa ʼaia, ʼe tuku mai e Sehova he faʼifaʼitaki lelei ki te ʼu mātuʼa. ʼO mole nātou mulimuli ki tanatou fānau ʼaē ʼe mole heʼeki māhani ki te ʼu meʼa ʼo te maʼuli, ʼe tonu ke nātou filifili tonu te ala ʼaē ʼe lelei age kia nātou, pea ko te ʼu mātuʼa popoto ʼe nātou taki tanatou fānau ʼi te ala ʼaē ʼe tonu ke nātou ʼolo ai, pea ʼi te temi ʼaē ʼe nātou lalahi anai, “ ʼe mole fakamamaʼo anai [nātou] mai ai.” (Taag. 22:6) Ko te ʼu mātuʼa Kilisitiano ʼe nātou ʼiloʼi ʼaki te meʼa neʼe hoko kia nātou, ʼe mole feala ke nātou falala pe ki tanatou manatu; ʼe tonu ke nātou falala kia Sehova. (Taag. 3:5, 6) Ko te meʼa ʼaia ʼe toe lahi age tona moʼoni ki te fānau, ʼaē ʼe mole lahi hanatou mālama pea ʼe mole nātou māhani ki te ʼu meʼa ʼo te maʼuli.
3 ʼE feala ke teuteuʼi e te ʼu mātuʼa tanatou fānau ke nātou fai he ʼu fakatuʼutuʼu ʼe tau, ʼe tokoni anai kia nātou ke nātou fakatokagaʼi “te ʼu meʼa ʼaē ʼe maʼuhiga tāfito.” (Filp. 1:10) ʼE feala ke nātou kamata ʼaki te ako faka famili, ʼo fakaloto mālohiʼi te tamaliki ke nātou leleiʼia te maʼuhiga ʼo te ako pea ke nātou ako te ʼu meʼa ʼaia. ʼE ko he meʼa lelei ki te tamaliki ke nātou fakamāmāhani ke nātou teuteuʼi fakatomuʼa te ʼu fono ʼo te kokelekasio, pea mo teuteuʼi he ʼu tali ʼi tanatou ʼu palalau māhani. Ko te kau tuʼumaʼu ki te gāue fai faka mafola ʼe ko he meʼa maʼuhiga ia. ʼE feala ke kau te ʼu tamaliki liliki ki te tufa ʼo te ʼu kiʼi pepa lotu, ki te lau ʼo te ʼu vaega faka Tohi-Tapu, peʼe ko te tufa ʼo te ʼu nusipepa. Kapau kua nātou popoto ʼi te lautohi, ʼe feala ke nātou kau ki te Ako ʼo te Minisitelio faka Teokalatike, pea ʼe feala ai tanatou tuputupu ʼi te faʼahi fakalaumālie. Ko te liliu ko te kau fai faka mafola mole heʼeki papitema, peʼe ko te tali ʼaē ke papitema ʼe ko he faʼahi maʼuhiga ia ʼi te tuputupu ki muʼa.
4 ʼI te fakaōvi ʼo te ʼu tamaliki ki tonatou temi tūpulaga, ʼo feiā aipe ʼi tonatou kei veliveli, ʼe tonu ke palalau te ʼu mātuʼa kia nātou ʼo ʼuhiga mo te gāue ʼaē ʼe nātou fakatuʼutuʼu ke nātou fai. Ko te ʼu tagata fai tokoni ʼi te faleako pea mo tonatou ʼu kaugā ako, ʼe faigafua tanatou uga ia nātou ke nātou maʼu te ʼofa ʼo te mālama, ʼo nātou mulimuli ʼi he ʼu meʼa fakamālama. ʼE tonu ke tokoni te ʼu mātuʼa ki tanatou fānau ke nātou fili ʼi te faleako te meʼa ʼe ʼaoga, ʼo nātou tokoni kia nātou ke nātou tokakaga ki te ʼu meʼa fakamālama ʼaē ʼe ʼaoga ʼo mole nātou lītuʼa ki te ʼu meʼa ʼo te Puleʼaga. (1 Tim. 6:6-10) ʼE feala ke nātou fakaloto mālohiʼi tanatou fānau ke nātou mulimuli ki te “meʼa ʼofa” ʼaē ko te nofo selipatea, pea ki muli age, kapau ʼe nātou fakatuʼutuʼu ke nātou ʼohoana, ʼe feala anai tanatou fakahoko tonatou ʼu maʼua ʼi te nofo ʼohoana. (Mat. 19:10, 11; 1 Ko. 7:36-38) ʼAki hanatou palalau fakalelei ʼo ʼuhiga mo te gāue pionie, mo te fai faka mafola ʼi te faʼahi ʼaē ʼe ʼaoga ai ke lahi te kau gāue faka mafola, ʼi te gāue ʼi te Petele, peʼe ko te gāue faka misionea, ʼe feala ke palalau te ʼu mātuʼa ki tanatou fānau tatau aipe ʼi te temi kei nātou liliki ai, ke nātou fia fakaʼaogaʼi tonatou maʼuli ʼi te ʼu faʼahi ʼaē ʼe leleiʼia e Sehova, heʼe feala ke fua lelei ki niʼihi, pea ʼe toe fua lelei aipe kia nātou totonu.
5 ʼE mole fakapunamaʼuli tatatou sisio ki te tokolahi ʼi te kau tūpulaga ʼi te kautahi ia ʼaho nei, ko he kau Kilisitiano maʼuhiga pea ʼe nātou mulimuli ki he ʼu fakatuʼutuʼu faka teokalatike. ʼE feala ke vikiʼi te ʼu mātuʼa ʼofa ʼo ʼuhiga mo te ʼu fua lelei ʼo te ako ʼaē neʼe nātou fai ki tanatou ʼu fānau. Kapau ko koutou ko he tāmai peʼe ko he faʼe, koteā te meʼa ʼe fakamuʼamuʼa e takotou fānau? ʼAki te temi, ʼe nātou fakamuʼamuʼa koa ʼi tonatou maʼuli te ʼu meʼa ʼo te Puleʼaga? Koutou manatuʼi, ko te meʼa ʼaē ʼe maʼuhiga age, ʼe feala ke koutou akoʼi te moʼoni ki takotou fānau, pea ke koutou palalau mo nātou ʼi te ʼaho fuli. ʼE lagi tapuakina anai koutou ʼaki he loto fale agatonu ʼi te tauhi ʼaē kia Sehova.—Teu. 6:6, 7; Sos. 24:15.