Tou Fakaloto Mālohi Ke Hoholo Atu Te ʼu Fakatuʼutuʼu Fakalaumālie
1 ʼI muʼa atu neʼe mole hahaʼi fēnei te kau tūpulaga ʼi te faka mafola ʼo te logo lelei ʼo te Puleʼaga. Ko te ʼu lauʼi afe e hogofulu kua nātou mulimuli ki te tokoni ʼaē ia Tagata Tānaki 12:1: “Manatuʼi foki ʼe koe tou Tupuʼaga lahi ʼi te ʼu ʼaho ʼo tou temi tūpulaga.” Koteā koa ʼaē ʼe uga ai te kau tūpulaga ke nātou tatuʼu ki te minisitelio, pea he koʼe ʼe tokolahi ia nātou ʼe pionie?
2 ʼE mole fai he mahalohalo ia ki ai heʼe tokolahi ia nātou ʼaē ʼe nātou muliʼi te maʼuli ʼo Timoteo, neʼe ko he tūpulaga faʼifaʼitaki lelei. Ko tana faʼe pea mo tana kui neʼe nā foaki age ki ai he ako fakalaumālie talu mai tona tupu pea neʼe nā fakaloto mālohiʼi ia ke hoholo atu tana fai te ʼu fakatuʼutuʼu fakalaumālie (2 Tim. 3:14, 15). Koia, ʼi te feala ʼo tana fakahoko atu tana ʼu pilivilesio, neʼe kua faiva ia pea mo teuteu ki te fahaʼi ʼaia. — Gāue 16:1-3.
3 ʼE feafeaʼi koa he fakaloto mālohiʼi ʼo he kau tūpulaga ʼe tokolahi ke hoholo atu tanatou ʼu fakatuʼutuʼu fakalaumālie? Koteā koa he taʼi fakatafito ʼe tonu ke fai? ʼE feafeaʼi koa te faigaʼi e te ʼu mātuʼa ia tanatou ʼu fānau ke ia nātou te fakafetaʼi ki te moʼoni pea mo tokoniʼi nātou ke nātou fai ni fakatuʼutuʼu ʼo hoholo atu?
4 Tou fai he fakatafito faka tohi-tapu: Ko te ʼu mātuʼa ʼe tonu ke nātou tokaga ʼo foaki ki tanatou ʼu fānau te ako ʼaē ʼe haʼu mai ia Sehova pea ʼe liliu ai leva nātou ʼo ‘aga fakapotopoto ki te maʼuli’. (2 Tim. 3:15.) Koutou faigaʼi ke loloto ʼi tonatou loto te ʼofa ki te Folafola ʼa te ʼAtua, te Tohi-Tapu. Koia ʼe ʼaoga ai he ako faka tohi-tapu tuʼumaʼu mo fai fakamalotoloto pea ke ʼalu tahi mo tonatou ʼu taʼu pe ʼe ko he tahi atu ʼu faʼahiga meʼa ʼe ʼaoga kia nātou, ʼo feiā foki mo te tatuʼu ʼaē ki te ʼu fono. Moʼo tokoni ki te kau tūpulaga ke mālohi tanatou tui ke uga ai nātou ke hoholo atu tanatou fai he ʼu fakatuʼutuʼu fakalaumālie, ʼe tonu ke ʼi ai hanatou polokalama ako takitokotahi pea mo faigaʼi ke lelei tanatou vahaʼa mo Sehova. — 1 Tes. 5:21; Hep. 11:1.
5 Ko te kau kilisitiano kei tūpulaga ʼe hoholo atu tanatou faigaʼi ʼaē he ʼu fakatuʼutuʼu fakalaumālie mo kapau ʼe foaki age ʼe tanatou ʼu mātuʼa pea mo ʼihi atu kilisitiano fakapotopoto ʼo te kokelekasio he faʼifaʼitaki lelei pea mo ia nātou te “fiafia ʼa Sehova”. (Neh. 8:10.) ʼAki tatatou fiafia, ʼe feala ai hatatou tokoniʼi fuli te kau tūpulaga ke nātou mahino ʼe ko te ʼu fakatuʼutuʼu ʼo te lotu moʼoni ʼe mole mamafa ia. — 1 Soane 5:3.
6 Tokolahi te ʼu tūpulaga neʼe talatuʼu mālohi nātou e te kau pionie, te kau misionea pe ko te ʼu tagata taupau feʼaluʼaki neʼe nātou fai faka mafola mo nātou pe ʼe neʼe nātou foaki age he ʼu palalau moʼo fakaloto mālohiʼi ai nātou. ʼE feala ke fakaafe e te ʼu mātuʼa ia nātou ʼaē ʼe faʼifaʼitaki lelei ʼi te gāue katoa ki tonatou ʼapi pe ʼe ko he tahi atu faʼahiga meʼa ʼe nātou fai. Neʼe tuku mai e Sesu Kilisito te faʼifaʼitaki lelei ʼo ina foaki he fakasiosio faka potopoto ki te kau tūpulaga. — Maleko 10:13-16.
7 Te maʼuhiga ʼo te ʼu fakatuʼutuʼu: Kapau ʼe taki lelei nātou ʼe tanatou ʼu mātuʼa, ko te ʼu tūpulaga ʼe nātou faigaʼi anai hanatou ʼu fakatuʼutuʼu fakalaumālie. Ka ʼosi leva tanatou fakatotonu ʼaē pe koteā hanatou fakatuʼutuʼu fakalaumālie, ohage la ʼo pionie pe ʼe kau ki te famili ʼo te Petele pe ʼe misionea, pe ʼe ko te ʼalu ʼo gāue ʼi te telituale ʼaē ʼe ʼaoga ke lahi he tokoni ki ai, ko tanatou ʼu mātuʼa pea mo ʼihi atu ʼi te kau kilisitiano māhani ʼe nātou fakaloto mālohiʼi anai nātou ke nātou faigaʼi ʼo fakahoko atu te meʼa ʼaia pea mo nātou foaki age te ʼu tokoni ʼaoga ke uga ai nātou.
8 Ko te kokelekasio ʼe hage ia ko he famili. ʼE tonu ke tou tokaga lelei ki te kau tūpulaga pea mo tokoniʼi nātou ke nātou haga haʼele ʼi te moʼoni pea mo fai he ʼu tuputupu fakalaumālie. ʼE hoko anai te fahaʼi ʼaia mokā ʼe tou fakahā totatou ʼofa pea mo fakaloto mālohiʼi nātou ʼi tanatou ʼu fakatuʼutuʼu fakalaumālie.