ʼU Tūpulaga—Koteā Takotou ʼu Fakatuʼutuʼu Fakalaumālie?
1 ʼE ʼiloʼi e Sehova ko he gāue maʼuhiga pea mo he ʼu fakatuʼutuʼu ʼe feala ke fakahoko, ʼe nātou foaki mai te fiafia. (Vakaʼi ia Senesi 1:28; 2:15, 19.) Ia ʼaho nei, neʼe fakatotonu e Sehova ki tana hahaʼi ke nātou fai faka mafola pea mo nātou akoʼi te hahaʼi. ʼE toe ʼi ai foki mo te fakatuʼutuʼu ʼaē ke tou aʼu ki te maʼuli heʼegata ʼi te Palatiso. Kae ʼi te temi ʼaenī, ʼe tonu ke tou fai he ʼu fakatuʼutuʼu fakalaumālie mo kapau ʼe mole tou fia fakaʼaogaʼi noa totatou mālohi pea mo totatou ʼu koloā.—1 Ko. 9:26.
2 Ko He ʼu Fakatuʼutuʼu ʼe Lelei Maʼa Te Kau Tūpulaga: ʼE tonu ke fai e te ʼu tūpulaga he ʼu fakatuʼutuʼu faka teokalatike ʼe feala hanatou fakahoko ʼo mulimuli ki tonatou ʼu fealagia takitokotahi. (1 Tim. 4:15) Ko ʼihi ʼu tamaliki kua nātou fakahoko te fakatuʼutuʼu ʼaē ke nātou maʼu loto te ʼu higoa ʼo te ʼu tohi ʼo te Tohi-Tapu ʼi muʼa ʼo tanatou popoto ʼi te lautohi. ʼI te ako faka famili, ʼe ako e te ʼu tamaliki peʼe feafeaʼi te teuteuʼi ʼo te ʼu fono, ke feala ai hanatou fakatuʼutuʼu ke nātou fai he ʼu tali ʼe lelei, pea ke nātou kau ki te Ako ʼo Te Minisitelio Faka Teokalatike. ʼE feala ke kaugā gāue te ʼu tamaliki mo tanatou ʼu mātuʼa ʼi te gāue fai faka mafola, ʼo nātou ako ai peʼe feafeaʼi te fai faka mafola, pea ʼaki te temi ke nātou fakatuʼutuʼu ke nātou liliu ko he kaugā fagona. ʼE tonu anai ke faka maʼuhigaʼi e te ʼu mātuʼa ki tanatou ʼu tūpulaga, te foaki ʼo tonatou maʼuli ki te ʼAtua pea mo nātou papitema.
3 Kapau ko koutou ko he ʼu tūpulaga, pea koteā takotou ʼu fakatuʼutuʼu fakalaumālie? ‘Koutou manatuʼi tokotou Tupuʼaga lahi,’ ʼo koutou tokakaga tāfito ki te ʼu fakatuʼutuʼu ʼaē ʼe maʼuhiga moʼoni ʼi te maʼuli. (Tnk. 12:1; Pes. 71:17) He koʼe koa ʼe mole koutou pionie vaeluaʼi temi lolotoga te ʼu māhina ʼaē ʼe koutou mālōlō ai ʼi te ako? Kua koutou fakakaukau koa peʼe feala hakotou pionie katoa? He koʼe koa ʼe mole koutou ako he tahi lea ke feala ai ʼi te temi ka haʼu, ke koutou kau ki he kūtuga pe ko he kokelekasio ʼe palalau ʼi he tahi lea, ʼi te fenua ʼaē ʼe koutou nonofo ai, peʼe ʼi he tahi koga meʼa? Tokolahi ia nātou ʼaē ʼe nātou gāue ʼi te temi nei ʼi te Petele peʼe ko he ʼu tagata taupau feʼaluʼaki peʼe ko he ʼu misionea, neʼe nātou fakatuʼutuʼu ke nātou kau ki he koga ʼo te gāue katoa ʼi te temi ʼaē neʼe kei nātou ako ai. He koʼe koa ʼe mole koutou fai feiā?
4 Logope la ʼe kei koutou veliveli, koutou faiga ke koutou mulimuli ki te faʼifaʼitaki ʼa Sesu. Ko he tūpulaga logope la tona taʼu 12, kae neʼe palalau ʼo ʼuhiga mo te ʼu meʼa fakalaumālie. (Luka 2:42-49, 52) Kapau ʼe koutou fai he ʼu fakatuʼutuʼu ʼe ʼaoga kia koutou ʼo koutou fai hakotou ako takitokotahi, ʼo koutou lau te Tohi-Tapu ʼi te ʼaho fuli, pea mo koutou fakatahi tuʼumaʼu mo tokotou ʼu tēhina mo tuagaʼane ʼi te ʼu fono pea mo te gāue fai faka mafola, pea ʼe tokoni atu anai te ʼu faʼahi ʼaia kia koutou ke koutou poto ʼi te akoʼi ʼo te hahaʼi ʼo ʼuhiga mo te Puleʼaga ʼo te ʼAtua ohage ko te meʼa ʼaē neʼe fai e Sesu.