Tou Fai He ʼu Fakatuʼutuʼu Fakalaumālie
1 ʼE ko he pilivilesio anai hatatou fakavikiviki kia Sehova ʼo talu ai! Moʼo tokoni kia tatou ke tou fakahoko te fakatuʼutuʼu ʼaia, ʼe feala ke tou fai ʼi te temi nei he ʼu fakatuʼutuʼu fakalaumālie, pea mo tou faigaʼi ke tou fakahoko. ʼE tou fakaʼaogaʼi fakapotopoto anai totatou mālohi mo kapau ʼe tou fai te faʼahi ʼaia. (1 Ko. 9:26) Koteā te ʼu fakatuʼutuʼu ʼaē ʼe feala anai hakotou fakahoko?
2 Te Ako Faka Tohi-Tapu: ʼE koutou teuteuʼi koa te ʼu fono fuli? Kapau koia, pea ʼe koutou fakaʼaogaʼi koa he temi moʼo fai he ʼu kumi pea mo metitasio mokā koutou ako? Ohage la, ka koutou teuteuʼi Te Tule Leʼo pea mo te Ako Tohi, ʼe gata pe koa takotou fakaʼiloga te ʼu tali, peʼe koutou vakaʼi koa te ʼu vaega Tohi-Tapu pea mo fakakaukauʼi te ʼu fakamahino ʼaē ʼe tuʼu ai? ʼE koutou lava fakatuʼutuʼu koa ke koutou kumi he ʼu puani ʼi te vāhaʼa fuli ʼo ʼuhiga mo te ʼu vaega Tohi-Tapu ʼaē ʼe tonu ke lau ki te Ako ʼo Te Minisitelio Faka Teokalatike? Ko te ʼu kumi ʼaia ʼe ʼaoga kiai he temi pea mo he ʼu faiga, kae ʼe kita maʼu ai he ʼu tapuakina lahi.—Taag. 2:4, 5.
3 Te ʼu Fono ʼo Te Kokelekasio: Ko te tahi fakatuʼutuʼu, ko te kau tuʼumaʼu ki te ʼu fono e nima ʼo te kokelekasio. ʼE ko he fakaloto mālohi ki te kokelekasio hatatou ʼōmai fakatomuʼa, ke tou kau mo totatou ʼu tēhina mo tuagaʼane ki te katiko pea mo te faikole ʼo te kamata. Tahi ʼaē meʼa lelei, ʼe tou lava faiga ke tou tali ʼi te ʼu fono fuli, pea mo tou hikihiki te lelei ʼo tatatou ʼu tali. Lagi ʼe feala hakotou fakahā te pikipikiga ʼo he vaega ʼi te palakalafe mo te fai palalau, peʼe koutou fakahā peʼe ʼaoga feafeaʼi ki totatou maʼuli te ʼu manatu ʼaē neʼe tou vakaʼi.—Hep. 10:24, 25.
4 Te Fai Faka Mafola: ʼE tou lava hikihiki ʼaupito totatou minisitelio, mokā tou fai he ʼu fakatuʼutuʼu. ʼE ʼi ai koa hakotou fakatuʼutuʼu ʼo ʼuhiga mo te ʼu hola ʼaē ʼe koutou fia fai ʼi te minisitelio ʼi te māhina fuli? Ko ʼihi ʼe nātou sio ʼe lelei te fai ʼo te fakatuʼutuʼu ʼaia. Peʼe feala koa hakotou hikihiki te tahi ʼu agaaga ʼo tokotou minisitelio, ohage ko te fakaʼaogaʼi ʼo te Tohi-Tapu ʼi te fai faka mafola ʼi te ʼu ʼapi, te fai ʼo he ʼu ʼaʼahi ʼe ʼi ai hona ʼu fua, ke koutou faigaʼi ʼo kamata he ako Tohi-Tapu, peʼe koutou hikihiki takotou faʼahiga fai ʼo te ʼu ako?
5 ʼU mātuʼa, ʼe koutou fakaloto mālohiʼi koa takotou fānau ke nātou fai he ʼu fakatuʼutuʼu ʼi te tauhi kia Sehova? Koutou tokoni kia nātou ke nātou mahino ko te gāue pionie, misionea, peʼe ko te gāue ʼi te Petele, ʼe ko he ʼaluʼaga lelei moʼo fakahā ai tanatou loto fakafetaʼi kia Sehova.—Tnk. 12:1.
6 Tou vakaʼi tatatou ʼu gāue, ʼo tou fai he ʼu fakatuʼutuʼu fakalaumālie, pea mo tou faigaʼi ke tou fakahoko, heʼe tou maʼu ai anai he fiafia lahi ʼi totatou minisitelio, pea mo tou fakaloto mālohi anai ʼihi.—Loma 1:12.