E Feafeaʼi Hakotou Fakahoko Takotou ʼu Fakatuʼutuʼu Fakalaumālie?
1. Koteā te ʼu fakatuʼutuʼu fakalaumālie ʼa te tokolahi ʼo te kau tūpulaga?
1 ʼI tokotou ʼuhiga Kilisitiano tūpulaga, ʼe mahino ia ko te ʼu fakatuʼutuʼu ʼo tokotou maʼuli ʼe mulimuli ki takotou ʼoʼofa ʼaē kiā Sehova, pea mo takotou mulimuli ki te fakatotonu ʼaē ʼa Sesu ki te kau Kilisitiano fuli ke nātou “kumi muʼa [ia] te Puleʼaga.” (Mat. 6:33, MN ) Lagi ʼe koutou fakatuʼutuʼu ke koutou fakalahi takotou minisitelio, ʼo gāue pionie pea mo ʼolo ʼo gāue ʼi te ʼu fenua ʼaē ʼe ʼaoga ke kaugamālie te kau fai faka mafola. Ko ʼihi neʼe lagi nātou fakakaukauʼi te gāue faka malamanei ʼaē ko te laga fale, peʼe ko te gāue ʼi he Petele, peʼe ko te gāue misionea. ʼE ko he ʼu fakatuʼutuʼu lelei ʼaia pea ʼe tāu ke fakavikivikiʼi!
2. Koteā ʼaē ʼe lava tokoni atu ke koutou fakahoko takotou ʼu fakatuʼutuʼu fakalaumālie?
2 Ke feala hakotou fakahoko ia te ʼu fakatuʼutuʼu fakalaumālie ʼaia, ʼe ko he meʼa lelei hakotou tohi te ʼu fakatuʼutuʼu ʼaia ki he moʼi pepa. Neʼe tohi fēnei ʼi Te Tule Leʼo ʼo te ʼaho 15 ʼo Sūlio 2004: “ ʼE hoki mahino lelei he manatu mo kapau ʼe tou filifili lelei te ʼu kupu ʼaē ka tou fakaʼaogaʼi. ʼE lagi [koutou] fia tohi [anai] ki he moʼi pepa, [takotou] ʼu fakatuʼutuʼu pea mo te ʼu puleʼaki ʼaē moʼona fakahoko.” Tahi ʼaē meʼa, ko he ʼu fakatuʼutuʼu ʼe fakahoko gafua, ʼe lava tokoni atu ke koutou fakafuafua takotou tuputupu pea mo hoko atu ki he fakatuʼutuʼu ʼe fai anai lolotoga he temi loaloaga.
3. Ko te ʼu fakatuʼutu fea ʼaē ʼe lava tokoni anai ki he tūpulaga ke kaku ki te papitema?
3 Ko Te ʼu Fakatuʼutuʼu Fea ʼAē ʼe Feala Ke Koutou Fakahoko?: Kapau ʼe mole heʼeki koutou papitema, pea koutou vakaʼi peʼe koteā te ʼu meʼa ʼaē ʼe tonu ke koutou fai ke feala hakotou fakahoko ia te fakatuʼutuʼu ʼaia. ʼE lagi tonu anai ke koutou hikihiki takotou mahino lelei ki te ʼu akonaki tāfito ʼo te Tohi-Tapu, pea ki te faʼahi ʼaia, koutou fakatuʼutuʼu ke koutou ako ia te tohi Te Ako Mai Te Tohi-Tapu, ʼo vakaʼi ia te ʼu vaega Tohi-Tapu fuli. (1 Tim. 4:15) Koutou fakatuʼutuʼu foki ke koutou lau ia te Tohi-Tapu kātoa, mai ia Senesi ʼo aʼu kiā Apokalipesi, ohage ko tona fakamaʼua ki te kau Petelite pea mo te kau ako ʼo Kileate. ʼOsi ʼaia, koutou haga mulimuli ki takotou polokalama lautohi ʼo te Tohi-Tapu ʼi te ʼaho fuli. (Pes. 1:2, 3) Koutou fakakaukauʼi age muʼa tona ʼaoga ʼaupito anai ki takotou tuputupu ʼi te faʼahi fakalaumālie! Ka koutou lau pea mo ako ia te Tohi-Tapu, koutou kamata pea mo fakaʼosi ʼaki he faikole fakamalotoloto, pea mo koutou faiga tuʼumaʼu ke koutou maʼuliʼi te ʼu meʼa ʼaē ʼe koutou ako.—Skp. 1:25.
4. Ko te ʼu fakatuʼutuʼu fea ʼe lava fai e he Kilisitiano ke feala hana Petelite peʼe misionea?
4 Kapau kua koutou papitema, koteā te tahi ʼu fakatuʼutuʼu ʼe feala ke koutou fai? ʼE tonu koa ke koutou hikihiki takotou ʼu fealagia ki te fai faka mafola? Ohage la, ʼe feala koa hakotou fakatuʼutuʼu ke koutou liliu ko he tahi ʼe faiva ʼaupito ʼi te fakaʼaogaʼi ʼo te Folafola ʼa te ʼAtua ʼi te minisitelio? (2 Tim. 2:15) E feafeaʼi hakotou fakalahi ia takotou minisitelio? Koutou fai he ʼu fakatuʼutuʼu ʼe ʼalutahi mo tokotou taʼu pea mo tokotou ʼu ʼaluʼaga, pea ʼe lava tokoni atu anai ke koutou fakahoko takotou ʼu fakatuʼutuʼu ohage ko te gāue ʼi te Petele peʼe ko te selevisi misionea.
5. Neʼe tokoni feafeaʼi te fai fakatuʼutuʼu ʼa te tēhina ke ina fakahoko tana fakatuʼutuʼu ʼaē ke gāue ʼi te Petele?
5 Neʼe Iku Lelei Tana Fakatuʼutuʼu: ʼI tona taʼu 19, neʼe ʼalu Tony ʼo ʼaʼahi ia te filiale ʼa te kau Fakamoʼoni ʼa Sehova, pea neʼe tupu ai tana fia gāue ʼi te Petele. Kae neʼe mole lelei tona faʼahiga maʼuli, pea neʼe mole heʼeki ina foaki tona maʼuli ki te ʼAtua. Pea neʼe fakatotonu ai leva e Tony ke ina faka ʼalutahi tona maʼuli mo te ʼu lēkula ʼa Sehova pea mo ina fakatuʼutuʼu ke papitema. ʼI te lava ʼo tana fakatuʼutuʼu ʼaia, neʼe ina fakatuʼutuʼu ke pionie vaeluaʼi temi, pea ke pionie kātoa ki muli age, ʼo ina tohi ki tana kaletalio te ʼu ʼaho ʼaē ʼe ina fia kamata ai tana selevisi ʼaia. Koutou fakakaukauʼi age tana fiafia, ʼi tana ʼosi pionie lolotoga he kiʼi temi, neʼe fakaafe ia ia ke gāue ʼi te Petele.
6. Koteā ʼaē ʼe lava tokoni atu ke koutou fakahoko takotou ʼu fakatuʼutuʼu fakalaumālie?
6 ʼO feiā mo koutou, ʼe koutou lava fakahoko takotou ʼu fakatuʼutuʼu fakalaumālie, mo kapau ʼe takimuʼa kiā koutou ia te ʼu gāue ʼo te Puleʼaga. Koutou faikole kiā Sehova ke tokoni atu ki “[takotou] ʼu gāue,” pea mo koutou faiga mālohi ke koutou fakahoko.—Taag. 16:3; 21:5.