12 Te ʼu Fakatuʼutuʼu

TONA FAKAʼUHIGA

ʼE mole ko he meʼa ʼe ke ʼamanaki pe ke hoko moʼoni. ʼE ʼaoga ki ai he polokalama, ke ke aga fakapotopoto pea ke ke faʼa gaue.

ʼE feala ke ke fai he ʼu fakatuʼutuʼu ki he temi ʼe mole loaloaga (he ʼu ʼaho peʼe ko he ʼu vahaʼa) peʼe loaloaga (he ʼu mahina pe ko he ʼu taʼu). ʼE feala te fakahoko ʼo te ʼu fakatuʼutuʼu loaloaga ʼaki he ʼu kiʼi fakatuʼutuʼu ʼe fakahoko mamalie.

TONA MAʼUHIGA

Ka ke kakusia ʼau fakatuʼutuʼu, ʼe fakamalohiʼi ai tau falala mo tau fakakaumeʼa pea mo tau fiafia.

Te falala kia kita: Ka ke kakusia he ʼu kiʼi fakatuʼutuʼu neʼe ke fai, ʼe ke maʼu anai te lotofalala, pea ʼe uga ai koe ke ke fai he ʼu fakatuʼutuʼu ʼe maʼuhiga age. Pea ʼe ke maʼu ai he malohi moʼo tauʼi te ʼu fakaneke. Ohage la, ʼe mole ke tuku anai he tahi ke ina fakakinauʼi koe ke ke fai te meʼa ʼae ʼe kovi.

Te fakakaumeʼa: ʼE leleiʼia e te hahaʼi ia natou ʼae ʼe natou fai he ʼu fakatuʼutuʼu fakapotopoto. Ko tona fakaʼuhiga, ko natou ʼae ʼe natou iloʼi te meʼa ʼae ʼe natou loto mo faʼa gaue ki ai. Pea tahi, ke fakamalohiʼi he fakakaumeʼa, ʼe tonu ke ke kaugā gaue mo he tahi ʼe tatau ʼana fakatuʼutuʼu mo ʼae ʼa koe.

Te fiafia: Ka ke fai ni fakatuʼutuʼu pea neʼe iku, e ke fiafia anai.

ʼE ui fenei e Christopher ʼae ʼe taʼu 14: “ ʼE au leleiʼia te fai ʼo ni fakatuʼutuʼu. He ʼe au maʼumaʼua ai pea mo au faigaʼi ke au fakahoko. Pea ka kua kaku, ʼe au ui fenei leva: “Neʼe au lavaʼi. Neʼe au fakahoko te meʼa ʼae neʼe au loto ki ai.”

PELESEPETO FAKATOHI-TAPU: “Ko ia ae e ina sivi te matagi, e mole ina nunusi anai, pea ko ia ae e sio ki te ao e mole ina tuusi anai he fulumeto.” —Ekelesiasi 11:4.

TE MEʼA ʼAE ʼE FEALA KE KE FAI

Muliʼi te ʼu tokoni ʼaeni moʼo fai he ʼu fakatuʼutuʼu pea ke ke fakahoko.

Vakaʼi te meʼa ʼae ʼe tonu ke ke fai. Fai he lisi ʼo he ʼu fakatuʼutuʼu, pea ke filifili ʼae ʼe ke fia gaueʼi muʼa.

Fakatuʼutuʼu. Muliʼi fenei:

• Hinoʼi he temi.

• Fakakaukauʼi tona fakaalualu.

• Fakakaukauʼi te ʼu fihifihia ʼae ʼe feala ke hoko pea mo hona faʼahiga tauʼi.

Fakahoko. ʼAua naʼa ke fakatalitali ke ke mahino kia aluʼaga fuli pea hoki ke kamata. Fai te fehuʼi ʼaeni: ‘Kotea ʼe tonu muʼa ke au fai ke au fakahoko ai taku fakatuʼutuʼu?’ Pea ke fakahoko leva. Vakavakaʼi la tau tuputupu.

PELESEPETO FAKATOHI-TAPU: “Ko te ’u fakatuʼutuʼu ’a te tagata poto ’e fua manu’ia moʼoni.” —Taaga Lea 21:5, MN.