Ko Te Kai Fakalaumālie ʼi Te ʼAho Fuli — Ko He Maʼua ʼAia Ki Te Famili Faka Kilisitiano Katoa
1 “Ko te tagata ʼe mole tonu ke maʼuli ʼaki pe te pane, kae ʼaki te folafola fuli pe ʼe haʼu mai te gutu ʼo Sehova.” (Mat. 4:4). Ko te ʼu folafola ʼaenī ʼe moʼoni ia! Ohage pe ko te ʼaoga ʼaē kia tatou te meʼa kai fakasino ʼi te ʼaho fuli, ʼe toe feiā ai pe foki mo te meʼa kai fakalaumālie ʼe ʼaoga kia tatou ʼi te ʼaho fuli. Moʼo tokoni kia tatou ke tatuʼu tatatou kai ki te Folafola ʼa te ʼAtua, neʼe ta e te Sosiete te kiʼi kaupepa Scrutons les Ecritures chaque jour. Kau famili faka kilisitiano, ʼe koutou fakatuʼutuʼu koa ʼi te ʼaho fuli he temi moʼo fakasiosio ai te koga tohi ʼaia?
2 ʼE mauʼa ke fakahā e te ʼu mātuʼa he faʼifaʼitaki: Kapau ʼe lahi fau te ʼu meʼa ʼaē ʼe fai, ʼe faigafua te holo ki ʼa muli te fakasiosio ʼo te koga tohi, ʼo kita ʼui ʼe hoki fai ʼi he tahi temi. Kae kapau ko te ʼu mātuʼa ʼe nātou ʼiloʼi te maʼuhiga ʼo te ʼu meʼa fakalaumālie ʼe ʼaoga ki tonatou famili, ʼe nātou maʼu anai he temi, ʼio, ʼe nātou toʼo he temi ke nātou lau ai ʼi te ʼaho fuli, mokā katoa te famili (Mat. 5:3). E nātou fai he fakatuʼutuʼu ʼo mole gata ʼaki pe te lau ʼo te koga tohi ʼaia mo tanatou fānau, kae ʼe nātou fakahā anai te ʼu manatu tāfito ʼo Te Tule Leʼo, pea mo fakasiosio fakalelei pe ʼe feafeaʼi te mauliʼi ʼo te ʼu manatu pe ʼe ko te ʼu tokoni ʼe tuʼu ʼi ai. Koia, ko te māhani ki te fahaʼi ʼaia, ʼe tonu ke kita faiga pea mo taupau te fahaʼi ʼaia ʼi totatou maʼuli, kae ko te ʼu tapuakina ʼaē ʼe tou maʼu ʼe ʼaoga ai tatatou faiga (vakaʼi ia Gāue 17:11, 12). Koia, ʼu mātuʼa, koutou fai te ʼu meʼa fuli ʼe koutou fealagia ki ai moʼo fakahā he faʼifaʼitaki lelei.
3 Maʼu he temi ʼe faiga lelei: Ko te temi fea koa ʼaē ʼe ʼaoga ki te fakasiosio ʼo te koga tohi ʼaia ʼi te famili, kae mole fai pe mokā ʼe manatuʼi pe ʼe feala? ʼE lelei age te kamata ʼo te ʼaho ʼaki te fakasiosio ʼo he koga tohi faka tohi-tapu. ʼI te ʼu Petele fuli pea mo te ʼu ʼapi ʼo te kau misionea ʼi te malamanei katoa, ko te ʼaho ʼe kamata ʼaki te tauhi ʼi te uhu, ʼaki he fakasiosio ʼo te koga tohi ʼo te ʼaho ʼaia. ʼE feala ai ki te ʼu tuagaʼane pea mo te ʼu tēhina ke nātou kamata lelei ai te ʼaho ʼaia, ʼuhi he ʼe feala ke nātou metitasio ʼi te ʼaho fuli ki te ʼu fakamanatu ʼa Sehova. — Pes. 1:1, 2; Filp. 4:8.
4 ʼO tatau aipe, ʼe ko he meʼa lelei foki ki te ʼu famili faka kilisitiano ke nātou palalau ki he ʼu meʼa faka tohi-tapu ʼi te uhu. Ko he tokoni ʼaia ki te ʼu fānau ke feala tanatou tauʼi te ʼu faigataʼa ia ʼe tau mo tonatou ʼaluʼaga fakalaumālie ʼi te fale ako. Kapau ʼe ʼi ʼai he ʼaho ʼe mole feala ke katoa ai te famili moʼo fakasiosio ʼo te koga tohi ʼaia, ʼe fai anai e te ʼu mātuʼa he tahi ʼu fakatuʼutuʼu ke mole tuku noa te meʼa kai fakalaumālie maʼuhiga ʼaia. Ohage la, kapau ko te tāmai ʼe ʼalu ki tana gāue ʼi te uhu ka kei momoe tana ʼu toe, ko te faʼe ʼe ina toʼo anai he kiʼi temi moʼo vakaʼi ai te koga tohi ʼaia mo tana ʼu toe. Ko ʼihi famili ʼe nātou fai te koga tohi ʼi te afiafi, he ʼe katoa fuli ai te famili. ʼE tahi mo ia pe te famili te fakatuʼutuʼu ʼo he polokalama ʼe ʼaoga kia ia.
5 ʼE maʼuhiga tāfito ki he famili faka kilisitiano ke kai fakalaumālie ʼi te ʼaho fuli. Ko te fakasiosio ʼo te koga tohi ʼo te ʼaho ʼe tonu ke hage kia tatou ko he meʼa maʼuhiga ʼaupito (Filp. 1:10). Ko te fakasiosio ʼi te ʼaho fuli ʼo he vaega ʼo te Tohi-Tapu ʼe tokoniʼi ai tatou ke tou nonofo ʼo pipiki ki te ʼu fakatuʼutuʼu pea mo te ʼu lao faitotonu ʼa Sehova. ʼAki te faifaitahi ʼa te famili katoa, ko te fakatuʼutuʼu ʼaia ʼe toe lelei anai ia kia tatou fuli.