Te Polokalama Faka Famili—Ki Te Lau ʼo Te Koga Tohi ʼo Te ʼAho
1 Ko te ʼu mātuʼa ʼofa ʼe nātou faiga ʼaupito ʼi te ʼaho fuli ke nātou foaki he meʼa kai maʼa tanatou fānau. Kae ʼe maʼuhiga age ia te foaki ʼo te meʼa kai fakalaumālie ʼaē ʼe haʼu mai te Folafola ʼa te ʼAtua. (Mat. 4:4) Kapau ʼe koutou vakaʼi faka famili ʼi te ʼaho fuli ia te koga tohi ʼo te ʼaho, pea ʼe koutou tokoni anai ki takotou fānau ke nātou tuputupu ʼi te faʼahi fakalaumālie pea mo nātou “[tuputupu] ake ki te [hāofaki].” (1 Pet. 2:2) Ko te temi fea ʼaē ʼe koutou lava fai ai te faʼahi ʼaia ʼi takotou polokalama faka famili?
2 ʼI Te Temi ʼInu Kafe Peʼe ʼi Te ʼu Temi Kai: ʼE feala ki tokotou famili ke ina manatuʼi ia Sehova ʼi te ʼaho kātoa, mo kapau ʼe koutou lau ʼi te uhu he vaega faka Tohi-Tapu. (Pes. 16:8) ʼI te temi ʼinu kafe, neʼe lau e te faʼē te koga tohi ʼo te ʼaho mo tana kiʼi tama pea mo nā fai palalau kiai, pea neʼe faikole mo ia ʼi muʼa ʼo tana ʼalu ʼo ako. Neʼe maʼu ai e te kiʼi tama tona lotomālohi ke ʼaua naʼa kau ki te tauhi fakavale ki te fenua, mo ina tekeʼi te ʼu aga heʼeʼaoga, pea mo lototoʼa ʼo fai fagonogono ki tona ʼu kaugā ako pea mo tana kau faiako. Logola neʼe ko ia tokotahi te Fakamoʼoni ʼo te faleako, kae neʼe mole hage kiā ia ʼe tokotahi.
3 Kapau ʼe faigataʼa te lau ʼo te koga tohi ʼi te uhu, ʼe lagi vakaʼi anai e te famili he tahi age temi, ohage la ʼi te temi ʼo te kakai afiafi. Ko ʼihi ʼi te ʼu lakaga ʼaia, ʼe nātou fai palalau ʼo ʼuhiga mo tanatou minisitelio pea mo te ʼu puani ʼaē neʼe nātou leleiʼia ʼi tanatou lau ia te Tohi-Tapu. Ko ʼihi ʼe nātou manatuʼi ko tanatou ʼu ako faka famili neʼe ko he ʼu temi fakafiafia ʼaupito.
4 ʼI Te Pōʼuli: Ko ʼihi famili, ʼe nātou lau te koga tohi ʼo te ʼaho ʼi muʼa ʼo tanatou momoe. ʼE ko he tahi ʼaia faigamālie ke faikole fakatahi ai te famili. Kapau ʼe logo takotou fānau ʼi te ʼaho fuli ʼe koutou palalau ʼo ʼuhiga mo Sehova pea mo faikole kiā te ia, ʼe liliu ai anai te ʼAtua maʼa nātou ko he tahi ʼe maʼuli moʼoni.
5 ʼOfa pe ke tapuakinaʼi e Sehova takotou ʼu faiga moʼo akoʼi ia te ʼu moʼoni ki takotou fānau ʼaki te kiʼi kaupepa Vakaʼi Ia Te Tohi-Tapu ʼi Te ʼAho Fuli.