Koutou Tokagaʼi Te Folafola ʼa Sehova ʼi Te ʼAho Fuli Pe!
1 ʼI te ʼaho fuli pe ʼe ʼahiʼahi ai takotou tui. ʼE lagi fakaneke tuʼumaʼu koutou e hakotou ʼu feʼilo ʼi te mālama ke koutou fakatahi mo he tahi. ʼE loto e takotou tagata faiako ke koutou maʼu tuʼulaga lelei ʼi he gāue, peʼe loto e takotou patolo ke koutou fai he ʼu hola fakalaka. Peʼe lagi koutou mahamahaki. Logope la ʼe feala ke hoko fakafokifā kia koutou te ʼu ʼahiʼahi ʼaia, kae ʼe mole koutou tokotahi. ʼE foaki atu e Sehova te poto ʼaē ʼe ʼaoga moʼo tauʼi te ʼu ʼahiʼahi ʼaia. Ko te vakavakaʼi ʼo te vaega ʼo te Tohi-Tapu pea mo tana fakamatala ʼi te tohi Tou Vakaʼi Te Tohi-Tapu ʼi Te ʼAho Fuli ʼe feala ai ke koutou lau tuʼumaʼu te Folafola ʼa Sehova. ʼE koutou fakaʼaogaʼi fakalelei koa te kiʼi kaupepa ʼaia?
2 ʼE Feala Ke Koutou Maʼu Tokoni: ʼE ʼui ia Isaia 30:20 ʼo ʼuhiga mo Sehova, ko te “Faiako Lahi” ʼaē ʼe feala ke kumi tokoni kiai te hahaʼi ʼa te ʼAtua. ʼE ina foaki atu te meʼa ʼaē ka ʼaoga kia koutou moʼo tauʼi te ʼu ʼahiʼahi ʼaē ka hoko ki takotou tui. ʼO feafeaʼi? ʼE fakamahino fēnei ʼi te vaega 31: “ ʼE logo anai tou ʼu taliga ki he leʼo ʼe haʼu mai ʼou tuʼa, ʼo ina ʼui fēnei: ‘Koʼeni te ala. Koutou haʼele ai.’ ” Ia ʼaho nei, ʼe “palalau” mai Sehova ʼi te Tohi-Tapu pea mo te ʼu tohi ʼo ‘te kaugana agatonu.’ (Mat. 24:45) ʼE feala ke tou maʼu he poto lahi ʼi te ʼu alatike ʼo Te Tule Leʼo ʼo te ʼu taʼu kua hili, heʼe talanoa ai kia teitei faʼahi fuli ʼo te maʼuli ʼa he Kilisitiano. Kapau ʼe koutou toe vakavakaʼi te ʼu alatike ʼaia ʼi te kaupepa Tou Vakaʼi Te Tohi-Tapu ʼi Te ʼAho Fuli, pea ʼe tokoni atu anai ke tuputupu takotou ʼatamai mālama ʼaē ʼe maʼuhiga ʼaupito moʼo tauʼi ʼo te ʼu ʼahiʼahi kehekehe ʼaia.—Isa. 48:17.
3 Koutou Fakatuʼutuʼu He Temi Kiai: Logola neʼe maʼumaʼua ʼi te uhu fuli, kae neʼe fakatuʼutuʼu e te faʼe ke ina lau pea mo fai palalau ki te vaega pea mo tona fakamatala ʼaki tana tama ʼi te ʼinu kafe. ʼI te ʼaho fuli pe, ʼi muʼa ʼo tana ʼalu ʼo ako, neʼe nā fai palalau pea mo faikole. Neʼe maʼu ai e te tama te mālohi moʼo fakafeagai ki te ʼu fakaneke ʼaē ke ina fai he ʼu felāveʼi fakasino, ke mole tō ki te tauhi ki te fuka ʼo te fenua, pea ke lototoʼa moʼo faka mafola ki tona ʼu kaugā ako pea mo te hahaʼi faiako. Logola neʼe ko ia tokotahi ʼaē neʼe ko te Fakamoʼoni ʼa Sehova ʼi te faleako, kae neʼe ina ʼiloʼi ʼe lagolago Sehova kia ia.
4 Koutou tuku kia Sehova pea mo tana Folafola ke nā takitaki koutou. Kapau ʼe koutou fai feiā, pea ʼe koutou faka tui moʼoni anai kia te ia, ohage ko he kaumeʼa ʼe feala hakotou falala ki ai. Koutou haga kia te ia ʼi te ʼaho fuli pe! ʼO fakatahi mo te lauʼi miliona hahaʼi ʼi te malamanei ʼaē ʼe nātou vakavakaʼi ʼi te ʼaho fuli te Folafola ʼa te ʼAtua, ʼe mātou fakaʼamu ke liliu ʼokotou ʼu mata “ko he ʼu mata ʼe sio ki takotou Faiako Lahi.”