Kotou Ako Takotou Fānau Ke Natou Liliu Ko He ʼu Minisi
1. Iā Pesalemo 148:12, 13, koteā ʼaē ʼe fakalotomālohiʼi ke fai e te ʼu mātuʼa Kilisitiano?
1 ʼE fakaafe e Sehova te kau tūpulaga ke natou fakavikiviki kiā te ia. (Pes. 148:12, 13) Koia ko te ʼu mātuʼa Kilisitiano ʼe mole natou haga akoʼi pē ki tanatou fānau te ʼu moʼoni ʼo te Tohi-Tapu, pea mo te lao ʼa te ʼAtua ʼo ʼuhiga mo te aga ʼaē ʼe tonu ke fai. ʼE natou toe akoʼi foki ia nātou ke natou liliu ko he ʼu minisi ʼo te logo lelei. ʼE feafeaʼi hanatou fakahoko māmālie ia te faʼahi ʼaia?
2. ʼE feala ke malave feafeaʼi te faʼifaʼitaki ʼa te ʼu mātuʼa ki tanatou fānau?
2 Kotou Tuku He Faʼifaʼitaki Lelei: Neʼe ʼui fēnei e te tuʼi fakamāu ko Seteone ki tana ʼu tagata e toko 300: ‘Kotou sioʼi taku faʼahiga fai.’ (Ktf. 7:17) ʼI te agamāhani, ko te ʼu fānau ʼe natou sio pea mo faʼifaʼitakiʼi tanatou ʼu mātuʼa. Ko te tamai ʼe gāue ʼi te pōʼuli, kae ʼi tana ʼosi gāue ʼi te Moeaki ʼuhu, ʼe mole ʼalu ia ʼo mālōlō kae ʼe ʼalu ia mo tana fānau ki te minisitelio logolā tona gaʼegaʼe ʼaupitō. ʼAki pē tana faʼifaʼitaki ʼaia, ʼe ina akoʼi ki tana fānau ʼe tonu ke fakamuʼamuʼa te minisitelio. (Mat. 6:33) ʼE sio atu koa takotou fānau ʼe kotou fai ʼaki he loto fiafia te ʼu faʼahiga gāue kehekehe ʼo te tauhi, ohagē ko te faikole, mo te lau ʼo te Tohi-Tapu, mo te fai ʼo he ʼu tali, pea mo te fai fakamafola? ʼE mahino papau ia, ʼe mole feala anai ke kotou liliu ko he faʼifaʼitaki haohaoa. Kae ʼe fia muliʼi anai e takotou fānau takotou faiga ʼaē ke akoʼi kiā nātou ke natou tauhi kiā Sehova, mo kapau ʼe natou sio ʼe kotou faʼa gāue ʼi te tauhi kiā te ia.—Teu. 6:6, 7; Loma 2:21, 22.
3. Koteā lā he ʼu fakatuʼutuʼu fakalaumālie ʼe feala ke tokoni ia te ʼu mātuʼa ke fai e tanatou fānau pea ke natou fakahoko ʼaki te temi?
3 Ko He ʼu Fakatuʼutuʼu Ke Fakahoko ʼAki Te Temi: ʼE mole fiu te ʼu mātuʼa ʼi te akoʼi ʼo tanatou fānau ke natou haʼele, ke natou palalau, ke natou popoto ʼi te teuteu tokotahi, pea mo te tahi atu ʼu meʼa. ʼE ʼi ai te ʼu gāue ʼe feala ke fai e te fānau ʼaki te temi, ʼi tanatou lahilahi ake, koia ʼe ʼi ai anai te tahi ʼu gāue ʼe feala anai ke natou fai. Kapau ko te ʼu mātuʼa ko he ʼu Kilisitiano, ʼe natou toe tokoni ki tanatou fānau ke natou fai hanatou ʼu fakatuʼutuʼu fakalaumālie pea ke natou fakahoko ʼo mulimuli ki tonatou taʼu pea mo tonatou ʼu fealagia. (1 Ko. 9:26) ʼE kotou akoʼi koa takotou fānau ke natou fai he ʼu tali ʼaki tanatou faʼahiga palalau, pea mo teuteuʼi tokotahi tanatou ʼu kiʼi akonaki peʼe ko tanatou faifai palalau ʼi te Ako Fakateokalatike? (Pes. 35:18) ʼE kotou akoʼi koa nātou ke natou kau ki te ʼu faʼahi kehekehe ʼo te minisitelio? ʼE kotou talanoa koa kiā nātou ʼo ʼuhiga mo te fakatuʼutuʼu ʼaē ko te papitema pea mo te selevisi temi kātoa? ʼE kotou tokoni koa kiā nātou ke natou fakakaumeʼa mo te kau fai fakamafola fiafia ʼaē kā natou fakalotomālohiʼi anai ia nātou?—Taag. 13:20.
4. ʼE fua lelei feafeaʼi anai ki te ʼu fānau tonatou kamata akoʼi e tanatou ʼu mātuʼa ki te minisitelio talu mai tanatou liliki?
4 Neʼe ʼui fēnei e te tagata fai pesalemo: “Ê ʼAtua, neʼe ke akoʼi au talu mai toku temi tūpulaga, pea ʼo aʼu mai ki te temi nei ʼe au fakamatala tau ʼu gāue fakatalakitupua.” (Pes. 71:17) Kotou kamata ako takotou fānau ʼi tanatou kei liliki ke natou liliu ko he ʼu minisi. Ko te tafitoʼaga fakalaumālie ʼaia ʼaē ʼe kotou tokoni ke natou fakatuʼu, ʼe mahino papau ia ʼe fua lelei anai kiā nātou mokā natou lalahi ake!—Taag. 22:6.