ʼU Mātuʼa—Koutou Akoʼi Takotou Fānau ʼi Tanatou Kei Liliki
1 “Akoʼi te tama ki te ala ʼaē ʼe ʼaoga ki ai; koteʼuhi ka matuʼa anai, pea ʼe mole fakamamaʼo anai ia mai ai.” (Taag. 22:6) ʼU mātuʼa, kapau ʼe mole koutou loto ke “fakamamaʼo” takotou fānau mai te ala ʼo te moʼoni, pea ko te temi fea koa ʼaē ʼe tonu ai ke koutou akoʼi ai nātou? ʼI tanatou kei liliki!
2 ʼI te ʼui ʼa Paulo neʼe fai te ako fakalaumālie ʼa Timoteo “talu mai [tana] kei veliveli,” ʼe mahino ia neʼe akoʼi ia ia ʼi tana kei meamea. (2 Tim. 3:14, 15) Koia neʼe lahilahi ake Timoteo ʼo liliu ko he tagata mālohi ʼi te faʼahi fakalaumālie. (Filp 2:19-22) ʼU mātuʼa, mo koutou ʼe tonu ke koutou kamata ‘talu mai te kei liliki’ ʼo takotou fānau, ke koutou foaki kia nātou te ako ʼaē ʼe ʼaoga ke feala hanatou ‘lahilahi ake ia muʼa ʼo Sehova.’—1 Sam. 2:21.
3 Koutou Foaki Te Vai ʼAē ʼe ʼAoga Ki Tanatou Tuputupu: Ohage pe ko he kiʼi fuʼu ʼakau ʼe ʼaoga ke fakavai tuʼumaʼu ke tuputupu ake ʼo liliu ko he fuʼu ʼakau mālohi, ʼo toe feiā pe, ʼe ʼaoga ki te ʼu fānau fuli ke nātou ʼinu te vai ʼo te moʼoni ʼo te Tohi-Tapu, ke nātou liliu ai ko he ʼu kaugana fakapotopoto ʼo te ʼAtua. Ko te ʼuluaki faʼahi ʼe feala ke koutou fai moʼo akoʼi te moʼoni ki takotou fānau pea mo tokoni kia nātou ke nātou felogoi lelei mo Sehova, ʼe ko hakotou fai tuʼumaʼu he ako Tohi-Tapu faka famili. Kae ʼu mātuʼa, koutou tokaga ki te loaloaga ʼo te temi ʼaē ʼe fai ai te ako ʼa te fānau. Maʼa nātou liliki, ʼe lagi lelei age ke fakanounou te temi ako.—Teu. 11:18, 19.
4 ʼAua naʼa koutou meʼa noaʼi te poto ʼo takotou ʼu fānau ʼi te ako. Koutou fakamatala kia nātou te ʼu hisitolia ʼo te ʼu tagata pea mo te ʼu fafine ʼo te Tohi-Tapu. Koutou tuku ke nātou tohi he ʼu hisitolia ʼo te Tohi-Tapu peʼe nātou fai he ʼu kiʼi gaoʼi ʼo ʼuhiga mo te ʼu hisitolia ʼaia. Koutou fakaʼaogaʼi lelei tatatou ʼu foʼi fime viteo pea mo te ʼu foʼi fime puke leʼo, ʼo kau ai mo te ʼu fime ʼaē neʼe puke ai te ʼu gaoʼi faka Tohi-Tapu ʼi te ʼu fakatahi. Koutou fai te ako faka famili ʼo mulimuli ki te taʼu pea mo te lava mahino ʼa takotou fānau. ʼI te kamata ʼo te ako ʼe tonu anai ke faigafua pea ke mole lahi fau te ʼu manatu; kae ka lahilahi ake te tamasiʼi, pea ʼe tonu ke lahi age te ʼu meʼa ʼaē ʼe ina ako pea ke haʼele ki muʼa. Koutou fai ke maʼuli te ako Tohi-Tapu mo takotou tamasiʼi, pea koutou fetofetogi te ʼu meʼa ʼaē ʼe koutou palalau kiai. Ka koutou loto ke “holi mālohi” takotou fānau ki te Folafola, pea koutou faiga ke fia logo takotou fānau ki te ʼu meʼa ʼaē ʼe nātou ako.—1 Pet. 2:2, MN.
5 Ke Nātou Kau Ki Te Kokelekasio: Koutou fai he ʼu fakatuʼutuʼu maʼa takotou fānau ke nātou kau katoa ki te kokelekasio. Koteā te ʼuluaki fakatuʼutuʼu ʼaē ʼe feala ke nātou fai? Neʼe ʼui fēnei e te ʼu mātuʼa ko ʼana ʼu toe veliveli e toko lua: “Neʼe ma kamata akoʼi kia nāua toko lua ke nā heheka fakalogologo ʼi te Fale ʼo te Puleʼaga.” Ki muli age, koutou tokoni ki te fānau ke nātou tali ʼi te ʼu fono ʼaki tanatou ʼu palalau ʼa nātou totonu, pea ke nātou fakatuʼutuʼu ke nātou tohi tonatou higoa ki te Ako ʼo te Minisitelio Faka Teokalatike. ʼI te fai faka mafola, ʼe lelei mokā nātou lava foaki he kiʼi pepa lotu, mo lau he vaega, mo fakahā te ʼu nusipepa, pea mo fai palalau mo te hahaʼi ki he ʼu manatu ʼe tokoni kia nātou.
6 Koutou Tuku He Faʼifaʼitaki ʼe Fakafiafia: ʼE logo koa takotou ʼu tamaliki ʼe koutou palalau ʼi te ʼaho fuli ʼo ʼuhiga mo Sehova pea mo faikole kia te ia. ʼE nātou sisio koa ʼe koutou ako tana Folafola, mo kau ki te ʼu fono, mo kau ki te fai faka mafola, pea mo fiafia ʼi te fai ʼo te finegalo ʼo te ʼAtua? (Pes. 40:8) ʼE maʼuhiga ke nātou fai te ʼu meʼa ʼaia pea ke koutou fai fakatahi te ʼu meʼa ʼaia. Neʼe ʼui e te taʼahine kua lahi ʼo ʼuhiga mo tana faʼe, ʼaē neʼe ina akoʼi tana ʼu toe e toko ono ke nātou liliu ko he ʼu Fakamoʼoni agatonu: “Ko te meʼa ʼaē neʼe mātou tokagaʼi tāfito, neʼe ko te faʼifaʼitaki ʼo tomatou faʼe—neʼe mālohi age tana aga ʼi he ʼu tuʼuga palalau.” Neʼe ʼui fēnei e te faʼe ko tana ʼu tamasiʼi e toko fā: “Ko tamā ʼui ʼaē ʼe ma ‘fakamuʼamuʼa ia Sehova’ neʼe mole gata pe ʼi te ʼu palalau, kae neʼe ma maʼuliʼi te ʼu palalau ʼaia.”
7 ʼU mātuʼa, koutou akoʼi takotou fānau ʼi tanatou kei liliki, ʼo akoʼi kia nātou te moʼoni ʼa te Folafola ʼa te ʼAtua, mo fai he ʼu fakatuʼutuʼu ke nātou tuputupu māmālie, pea mo koutou foaki he faʼifaʼitaki lelei. ʼE koutou fiafia anai mo kapau ʼe koutou fai te ʼu meʼa ʼaia.