Te ʼu Fiafia ʼi Te Selevisi Temi Katoa
1 Kapau ʼe kei koutou tūpulaga, pea ʼe mahino ia neʼe kua koutou fakakaukau ʼo ʼuhiga mo takotou ka haʼu. ʼE ʼui mai kia tatou ia Tāʼaga Lea 21:5 “ko te ʼu fakatuʼutuʼu ʼo te tagata poto ʼe fua manuʼia moʼoni.” ʼE fua manuʼia anai kia koutou mokā koutou fakakaukauʼi lelei te fakatuʼutuʼu ʼo tokotou maʼuli. ʼI takotou ʼu fakatuʼutuʼu ki te ka haʼu, koutou vakaʼi ke koutou kau ki te selevisi temi katoa. Koteā tona tupuʼaga?
2 Koutou fehuʼi ki ʼihi hahaʼi lalahi ʼaē neʼe pionie ʼi tonatou temi tūpulaga pe koteā tanatou manatu, pea ʼe mahino ia ʼe nātou tali fuli atu anai: “Neʼe ko te ʼu taʼu lelei ʼaupito ʼaia ʼo toku maʼuli!” Ko te tēhina neʼe fiafia ʼi tana selevisi temi katoa talu mai tona temi tūpulaga, neʼe ina ʼui fēnei ʼi tana kua matuʼa: “ ʼE ʼau fiafia lahi ʼi taku toe manatuʼi toku temi tūpulaga pea ʼe feala ke ʼau ʼui neʼe ʼau tokagaʼi te tokoni poto ʼaenī: ‘Manatuʼi tou Tupuʼaga lahi ʼi te ʼu ʼaho ʼo tou temi tūpulaga.’ (Tnk. 12:1) Koutou fakatuʼutuʼu ʼi te temi nei mo takotou ʼu mātuʼa, ke koutou ʼiloʼi te fiafia ʼaia ʼi tokotou temi tūpulaga peʼe finemui.
3 ʼU Mātuʼa, Koutou Fakaloto Mālohiʼi Te Selevisi Temi Katoa: Ohage he Tāmai ʼofa, ko Sehova ʼe ina fakahā atu kia koutou te ala ʼaē ʼe tonu ke koutou haʼele ai. (Isa. 30:21) ʼI tana foaki te takitaki ʼofa ʼaia, ʼe ina tuku he faʼifaʼitaki lelei kia koutou, ʼu mātuʼa Kilisitiano. ʼE mole tonu ke koutou tuku ki takotou fānau te filifili ʼo te meʼa ʼaē ʼe lelei kia nātou, kae koutou akoʼi fakapotopoto nātou ʼi te ala ʼaē ʼe tonu ke nātou haʼele ai, ke nātou maʼu ai te tapuakina ʼa Sehova. Pea ka nātou lahilahi ake, ʼe tokoni anai takotou ako ʼaia ke nātou “iloi . . . te kehekehe o te lelei pea mo te kovi.” (Hep. 5:14) ʼAki te ʼu meʼa ʼaē kua hoko ki tonatou maʼuli, kua ʼiloʼi e te hahaʼi lalahi, ʼe mole feala ke nātou falala ki tanatou manatu ʼo nātou totonu, kae ʼe tonu ke nātou falala kia Sehova moʼo fakatonutonuʼi tanatou ʼu ala. (Taag. 3:5, 6) ʼE toe ʼaoga lahi age te faʼahi ʼaia ki te kau tūpulaga, ʼaē mole heʼeki nātou ʼiloʼi lelei te maʼuli.
4 ʼU mātuʼa, ʼi te kei liliki ʼo takotou fānau, peʼe kua nātou vave aʼu ki tonatou temi tūpulaga, koutou palalau fakalelei mo nātou ʼo ʼuhiga mo tanatou ʼu fakatuʼutuʼu ki te gāue. Ko te ʼu hahaʼi fai tokoni ʼi te faleako, te ʼu faiako, pea mo te ʼu kaumeʼa, ʼe nātou uga anai nātou ke nātou filifili he gāue fakamālama pea mo maʼu koloā. Koutou tokoni ki takotou ʼu fānau ke nātou fili he kalasi ʼe ina akoʼi age kia nātou he gāue, ke feala hanatou popoto ʼi te taupau ʼo tonatou maʼuli fakasino, kae mole nātou līaki te ʼu gāue ʼo te Puleʼaga. (1 Tim. 6:6-11) ʼE lahi te ʼu ʼaluʼaga, ʼe feʼauga pe ki te tūpulaga ke ʼalu ki he faleako ʼe akoʼi ai he gāue, ke ina lava taupau tona maʼuli fakasino, pea mo kamata toʼo te selevisi pionie katoa.
5 Fakaloto mālohiʼi te kau tūpulaga ke nātou nonofo selipatea. Kapau ki muli age ʼe nātou fia ʼohoana, pea ʼe nātou lava fakahoko anai te ʼu maʼua mamafa ʼo te nofo ʼohoana. (Vakaʼi te palakalafe 19 ʼi te kiʼi pepa ʼe ʼalutahi mo Te Minisitelio ʼo Te Puleʼaga ʼo Sūnio 2001 “ ʼE Koutou Fealagia Koa?”) Ko he ʼu palalau lelei ʼo ʼuhiga mo te selevisi pionie, te ʼolo ʼo gāue ʼi te ʼu koga meʼa ʼaē ʼe ʼaoga lahi ai he kau gāue, te gāue ʼi te Petele, pea mo te gāue faka misionea, ʼe ina fakahū anai ki te loto ʼa te kau tūpulaga, ʼo feiā mo nātou liliki, te holi ʼaē ke nātou fakaʼaogaʼi tonatou maʼuli ʼi he ʼaluʼaga ʼe ina fakafiafia ia Sehova, pea mo ʼaoga ki te hahaʼi pea ke nātou maʼu ai he fiafia.
6 Kau Tūpulaga, Koutou Fakamuʼamuʼa Te Selevisi Temi Katoa: Kau tūpulaga, ʼe tonu ke koutou fia ʼiloʼi peʼe feafeaʼi te gāue pionie. ʼE feala ke koutou ʼahiʼahi te selevisi pionie vaeluaʼi temi mokā feala, lolotoga he māhina peʼe ʼi te ʼu māhina mālōlō. Pea ʼe koutou ʼiloʼi ai anai te fiafia moʼoni ʼi te selevisi pionie. ʼE feala koa ke koutou vakaʼi fakatomuʼa peʼe feala hakotou pionie vaeluaʼi temi ʼi te ʼu māhina ʼaē ka hoko mai?
7 Ko te ʼu tēhina tūpulaga ʼi te kautahi ʼa te ʼAtua ʼe feala ke nātou fakakaukauʼi fakalelei mo nātou, ke nātou liliu ko he ʼu tēhina faifekau faka minisitelio. (1 Tim. 3:8-10, 12) Tahi ʼaē meʼa, koutou vakaʼi peʼe koutou kole anai ke koutou gāue ʼi te Petele peʼe koutou kau ki te Ako ʼAē ʼe Ina Teuteuʼi Ki Te Minisitelio, mo kapau kua feʼauga tokotou taʼu ki te faʼahi ʼaia. ʼE lahi anai te ʼu meʼa ka koutou ako ʼi takotou selevisi pionie, ohage la peʼe feafeaʼi te mulimuli ki he polokalama, peʼe feafeaʼi te hikihiki ʼo te fakatuʼutuʼu ʼo takotou ʼu gāue, peʼe feafeaʼi hakotou felogoi mo te hahaʼi, pea mo feafeaʼi hakotou lava fakahoko tokotou ʼu maʼua. Ko te ʼu meʼa fuli ʼaia ʼe nātou teuteuʼi anai koutou ki he tahi ʼu pilivilesio ʼe lahi age ki muli age.
8 Ke fua lelei takotou selevisi temi katoa, koutou fai te ʼu gāue faka teokalatike ʼaki he loto faiva. Neʼe fakaloto mālohiʼi e te ʼapositolo ko Paulo te aga ʼaia, pea neʼe ina fakahā lelei tona ʼu fua lelei: “Ko he mea’pe e koutou fai, koutou fai mo te lotolelei, o hage e koutou gaue ki te Aliki, . . . i te iloi ae e koutou tali anai mai te Aliki te fakapale.” (Kol. 3:23, 24) ʼOfa pe ke tapuakina koutou e Sehova ʼaki he fiafia lahi ʼi te selevisi temi katoa!