ʼE ʼAoga Ke Lahi He ʼu Tēhina ʼi Te Gāue Pionie
1 Neʼe fakaloto mālohiʼi tatou e Paulo ke ‘lahi tuʼumaʼu tatatou ʼu gāue ʼi te ʼAliki.’ (1 Ko. 15:58) Ko tona faka ʼuhiga ki te tokolahi, ke nātou toʼo te selevisi pionie. Talu mai te māhina ʼo Sepetepeli ʼo te taʼu kua ʼosi, neʼe kau te toko 13 ki te kau pionie!
2 ʼI te temi nei ko te kaugamālie ʼo nātou ʼaē ʼe pionie ʼi henī, ʼe ko te ʼu tuagaʼane. (Pes. 68:11) ʼE ko he meʼa fakafiafia anai ki te ʼu kokelekasio mo kanapaula neʼe feala ke lahi age ni ʼu tēhina ʼe nātou toʼo te selevisi pionie katoa! (Pes. 110:3) ʼE mahino ia ko te tokolahi ʼo te ʼu tēhina ʼe tonu ke nātou gāue ʼuhi ko tonatou ʼu maʼua faka famili. Tahi ʼaē meʼa, ko ʼihi ʼe nātou gāue kinakina ʼo ʼuhiga mo te ʼu meʼa ʼaē ʼe ʼaoga ʼi te faʼahi fakalaumālie ʼo te kokelekasio. ʼE tou loto fakafetaʼi ki te ʼu tēhina ʼaia ʼaē ʼe nātou gāue kinakina ki te Puleʼaga.—1 Tim. 4:10.
3 Kae, ko koutou ʼu tēhina, ʼe feala koa ki he tokolahi ia koutou ke nātou kau ki te selevisi pionie? Kapau ʼe pionie tokotou ʼohoana, ʼe feala koa ke koutou pionie mo koutou? Kapau kua koutou letelete, ʼe mole koutou loto koa la ke lahi age takotou fakaʼaogaʼi tokotou temi ʼi te minisitelio ʼi te temi katoa? Kapau ʼe mole kei koutou ako, kua koutou fakakaukauʼi lelei koa ʼi te faikole, ke koutou toʼo te selevisi pionie, ke feala ai hakotou maʼu he tahi ʼu pilivilesio, ohage la ko hakotou ʼolo ʼo fai faka mafola ʼi te ʼu koga meʼa ʼaē ʼe mole lahi ai te ʼu kaugā fai faka mafola, ʼi te vao peʼe ʼi he tahi ʼu koga meʼa ʼo tatatou filiale?—Ef. 5:15-17.
4 Ko te tēhina neʼe ina līaki tana gāue lelei, pea ina fai te gāue vaeluaʼi temi ke feala ai hana pionie. ʼAki tana faʼifaʼitaki lelei, neʼe liliu ai te toko tolu ʼi tana ʼu tamaliki e toko fā ʼo pionie ʼi te ʼosi pe ʼo tanatou ako. Neʼe fakaʼamu te fā tamasiʼi ke kau mo ia ki te selevisi pionie. Neʼe lahi ʼaupito te ʼu tapuakina ʼaē neʼe maʼu e te tēhina ʼaia pea mo tona famili.
5 Ko He Matapā Lahi Kua Ava: Ko te gāue pionie ʼe feala ke ina avahi “he matapā lahi ki te gāue.” (1 Ko. 16:9) Ko te ʼu tēhina ʼaē ʼe pionie e lagi lahi tonatou fakaʼaogaʼi ʼi te kokelekasio. Ko tanatou faiva ʼi te gāue fai faka mafola ʼe toe kau ki tanatou tuputupu ʼi te faʼahi fakalaumālie, pea ʼe tokoni kia nātou ke nātou tuputupu ʼi te faʼahi faka teokalatike. Ko te gāue pionie ʼe feala ke ina avahi ai he ala ki te ʼu pilivilesio ʼi te gāue. ʼE ko he faka fealagia ʼaia ke kita pionie makehe peʼe kita gāue ʼi te Petele. ʼI te ʼosi ʼo te ʼuluaki taʼu pionie, ʼe nātou maʼu te tapuakina ʼaē ko te kau ki te Ako ʼo te Kau Pionie. Ko te ʼu tagata faifekau faka minisitelio pea mo te ʼu tagata ʼāfea ʼaē ʼe mole heʼeki ʼohoana, ʼe feala hanatou faiga ke nātou kau ki te Ako Faka Minisitelio. Ko te ʼu taumatuʼa ʼaē kua fakapotopoto ʼi te faʼahi fakalaumālie, e lagi feala ke nātou faiga ke nātou kau ki te Ako ʼo Kalaate. Pea ʼe feala ke faigaʼi e te ʼu tēhina ke nātou faiva ʼo ʼuhiga mo te gāue feʼaluʼaki. ʼIo, ko te gāue pionie ʼe ina avahi te matapā ki te ʼu pilivilesio lahi ʼi te kautahi ʼa Sehova.
6 Ko te ʼu tēhina ʼaē ʼe feala hanatou fai he fakatuʼutuʼu ʼo ʼuhiga mo tanatou gāue ke feala hanatou pionie katoa, ʼe nātou maʼu anai he fiafia lahi ʼi te foaki ʼo tonatou temi.—Gāue 20:35.