Tou Fakahā Fakalelei Te Tohi Mauli O Heegata
1 Neʼe fua lelei te gāue ʼa Sesu ʼi tana fakaʼaogaʼi te ʼu ʼuluaki palalau. Neʼe ina ʼiloʼi te meʼa ʼaē ʼe tonu ke talanoa kiai, moʼo uga ʼo te fia logo ʼa te hahaʼi. ʼI he tahi temi, neʼe kamata palalau ia ki te fafine Samalitana ʼaki pe tana kole age ki ai he moʼi vai. Ko te palalau ʼaia neʼe uga aipe ia ia koteʼuhi ‘neʼe mole felogoi te kau Sutea pea mo te kau Samalitana.’ Ko te hoko ʼo tana fai palalau neʼe tokoni ki te fafine ʼaia pea mo ʼihi age ke nātou liliu ʼo tui. (Soane 4:7-9, 41) ʼE feala ke tou maʼu he ako mai tana faʼifaʼitaki.
2 Mokā koutou teuteu ke koutou tufa te tohi Mauli O Heegata, koutou fai te fehuʼi ʼaenī, ‘Koteā te ʼu meʼa ʼe ʼaoga ki te hahaʼi ʼi totatou telituale? Koteā te meʼa ʼe feala ke tokoni ki he tūpulaga, ki he matuʼa, ki he tagata ʼohoana, peʼe ki he fafine ʼohoana?’ ʼE feala hakotou teuteuʼi he ʼu ʼuluaki palalau pea ke koutou fakatuʼutuʼu ke koutou fakaʼaogaʼi he ʼuluaki palalau ʼe feʼauga mo tona ʼaluʼaga.
3 Mai tona ʼaluʼaga ʼaē ʼe tokolahi ʼe nātou tuʼania te haʼele kovi ʼo te maʼuli faka famili, ʼe feala hakotou ʼui age:
◼ “ ʼI te ʼaho fuli ko te maʼuli ʼo te famili ʼe tau mo te ʼu faigataʼaʼia lahi ia ʼaho nei. ʼE feala koa ke nātou maʼu he tokoni ʼifea? [Faka fealagia ke fai atu hana tali.] ʼE feala he tokoni moʼoni ʼa te Tohi-Tapu kia tatou. [Lau ia 2 Timoteo 3:16, 17.] ʼE tuku mai e te Tohi-Tapu he ʼu takitaki ʼaoga moʼo tokoni ki te ʼu famili. Koutou fakatokagaʼi te meʼa ʼe tuʼu ʼi te palakalafe 3 ʼo te pasina 238 ʼo te tohi ʼaenī, E Feala Keke Mauli O Heegata Ite Palatiso Ite Kele.” Lau te palakalafe 3, pea koutou tuku age te tohi.
4 Kapau ʼe koutou fakaʼaogaʼi he logo ʼo te telituale, ʼe feala hakotou ʼui age:
◼ “Neʼe koutou logo koa ki he fakamatala ʼo ʼuhiga mo te meʼa ʼaenī [talanoa ki he logo ʼi te telituale]? Koteā koa takotou manatu ʼo ʼuhiga mo te faʼahi ʼaia? [Faka fealagia ke fai atu hana tali.] ʼE koutou feʼuiʼaki anai pe koteā te meʼa ka hoko ki te mālama ʼaenī, kaeā koa la? Neʼe fakakikite e te Tohi-Tapu ko te ʼu faʼahiga meʼa ʼaia ʼe fakahā ʼaki ai ʼe tou maʼuli nei ʼi te ʼu ʼaho fakamuli.” ʼOsi ʼaia pea koutou fakatokagaʼi te manatu ʼi te tohi Mauli O Heegata, ʼi te ʼu pasina 150 ki te 153.
5 Tokolahi ʼe nātou tuʼania te tuputupu ʼo te fai fakapō. ʼE feala hakotou fakaʼaogaʼi he ʼuluaki palalau ʼi lalo ʼo te kupu tāfito “Crime/Sécurité” ʼi te pasina 11 ʼo te tohi “Comment raisonner”:
◼ “ ʼE mātou palalau mo te hahaʼi ʼo ʼuhiga mo te fīmālie takitokotahi. ʼE lahi ʼaupito te fai fakapō ʼi ʼotatou tafaʼaki, pea ʼe lave ki totatou maʼuli. Koteā takotou manatu ʼo ʼuhiga mo te meʼa ʼe ʼaoga ke fai e te hahaʼi ohage ko koutou pea mo ʼau ke feala ai hatatou maʼu ia te fīmālie ʼi te ʼu ala ʼi te pōʼuli?” ʼE feala hakotou lau ia Pesalemo 37:10, 11 pea koutou fakahā age te ʼu tapuakina ʼaē ka foaki mai anai e te Puleʼaga ʼo te ʼAtua, ʼo koutou fakaʼaogaʼi te ʼu pasina 156 ki te 158 ʼo te tohi Mauli O Heegata.
6 Kapau ʼe koutou loto ke faigafua takotou palalau, ʼe feala hakotou fakaʼaogaʼi he manatu ʼe tatau mo te lua ʼuluaki palalau ʼe koutou maʼu ʼi te tohi “Comment raisonner” ʼi te pasina 10 ʼi te kupu tāfito “Avenir/Sécurité”:
◼ “ ʼE mātou fakaloto mālohi ʼomātou vāhaʼa fale ke nātou tokagaʼi te ʼamanaki ʼo ʼuhiga mo te temi ka haʼu ʼe tuku mai e te Tohi-Tapu kia tatou. [Lau ia Fakahā 21:3, 4.] ʼE koutou fiafia koa ʼi te ʼamanaki ʼaenī? [Faka fealagia ke fai atu hana tali.] Ko te kapite 19 ʼo te tohi ʼaenī ʼe ina fakahā ai te tahi ʼu tapuakina ʼe maʼu e te hahaʼi fakalogo ʼaē ka maʼuʼuli anai ʼi te pule ʼa te Puleʼaga ʼo te ʼAtua.” Koutou tuku ki ai te tohi Mauli O Heegata.
7 Ko te teuteuʼi ʼo he ʼuluaki palalau ʼe lelei, ʼe feala ke tokoni kia koutou, ke koutou aʼu kia nātou ʼaē ʼe holi mālohi ki te faitotonu.—Mat. 5:6.