Tou Uga Te Fia Logo Ki Te Tohi Mauli O Heegata
1 Mokā tou ʼaʼahi te hahaʼi ki tonatou ʼu ʼapi, ʼe tou maʼu tuʼumaʼu ia nātou ʼe nātou tau mo “te ʼu hoha ʼo te tuʼu ʼo te ʼu faʼahiga meʼa ʼaenī.” (Maleko 4:19) Neʼe tou tau mo te faigataʼaʼia ʼaē ko te fakatuputupu ʼo tanatou fia logo, ʼaki he faʼahiga fakahā ʼo te tohi ʼe ina uga ia te fakakaukau. ʼUluaki, tokolahi te hahaʼi e lagi siʼisiʼi tanatou fia logo ki te logo ʼaē ʼe tou fakahā age. Kapau ʼe feala ke tou ʼui age he meʼa ʼe lave anai ki tonatou maʼuli, e lagi feala ke tou uga te fia logo ki te logo ʼo te Puleʼaga. Moʼo kamata ʼo he ʼu fai palalau ʼe ʼaoga ke fili he ʼu puani ʼe ʼaoga ʼo te tohi Mauli O Heegata. Koteā koa te meʼa ʼe feala ke koutou ʼui age?
2 ʼE feala ke koutou fakaʼaogaʼi te manatu ʼaenī:
◼ “Ka na pau la neʼe koutou maʼu he faʼahiga mālohi, ko te faigataʼa fea koa la ʼaē ʼi te temi nei ʼe koutou faigaʼi anai ke koutou fakatokatoka? [Koutou faka fealagia ke ina fai atu hana tali, pea kapau ʼe ʼaoga, koutou fakahā age ʼe tokolahi te hahaʼi ʼe nātou maʼu ia te manatu ʼaia.] ʼO aʼu mai ki te temi nei, ko te ʼu takitaki ʼo te malamanei ʼe hage ʼe siʼisiʼi te fua lelei ʼe nātou foaki ki te hahaʼi ʼaki te ʼu puleʼaki ʼaē ʼe nātou fai moʼo tauʼi ʼo te ʼu faigataʼaʼia lalahi ʼaupito ia ʼaho nei. Kae ʼe ʼi ai te Tahi ʼe feala ke ina fakahoko te faʼahi ʼaia pea ʼe ina fakagata anai te ʼu faigataʼaʼia fuli ʼe tau mo te malamanei. Koutou fakatokagaʼi te manatu ʼe tuʼu ia Pesalemo 145:16. [Lau te vaega, pea koutou fakaʼaogaʼi te ʼu paki ʼi te ʼu pasina 11 ki te 13.] Ko te palakalafe 14 ʼo te pasina 14 ʼe ina lagaʼi te fehuʼi ʼaē ʼe tou palalau kiai ʼo fēnei: ‘Kae ko ʼafea koa?’ ” Koutou fakamahino age ko te tohi ʼe tali anai ki te fehuʼi ʼaia, pea koutou fakahā fakafiafia age ki ai te tohi.
3 Peʼe feala ke koutou ʼui age he manatu fēnei:
◼ “Kua lagi koutou ʼiloʼi te mamahi ʼaē ʼe tau mo kita mokā mate he tahi neʼe kita ʼofa mamahi ai. E lagi neʼe koutou logoʼi te lotomamahi pea mo te lotovaivai. E lagi neʼe koutou fakakaukauʼi te ʼu fehuʼi ʼaenī: [Lau te ʼu fehuʼi ʼi te palakalafe 1 ʼo te pasina 76.] ʼE mole ko he meʼa fakafiafia koa la takotou maʼu he ʼu tali ki te ʼu fehuʼi ʼaia? E lagi ʼe koutou lotomālohi mokā koutou ʼiloʼi ʼe foaki mai e te Tohi-Tapu te ʼamanaki moʼoni kia nātou ʼaē kua mamate. [Lau ia Soane 5:28, 29.] Ko te tohi ʼaenī ʼe tokoni kia tatou ke tou mahino ki te ʼaluʼaga ʼo te kau mate pea mo te ʼamanaki ki te temi ka haʼu.” Koutou vakaʼi fakanounou te kapite 8 pea mo te 20. Koutou fakaloto mālohiʼi ia ia ʼaē ʼe palalau mo koutou ke ina vakaʼi te tohi.
4 ʼE lahi ʼaupito te ʼu fealagia ʼe feala ai anai hakotou fai te fagonogono faigamālie. Kapau ʼe feala, koutou ʼui age ʼaki ʼakotou ʼu palalau māhani:
◼ “Ko te malamanei katoa ʼe fonu ia ko te ʼu faigataʼaʼia, pea e lagi ʼe koutou tau pe mo te ʼu fihifihia ʼaia. ʼI meʼa fakaʼofaʼofa foki, ʼe hage ia ko te hahaʼi ʼaē ʼe mole nātou fai he meʼa ʼe kovi ʼaē ʼe lahi age tanatou mamahi. ʼI takotou manatu ʼe fakagata anai koa e te ʼAtua te ʼu mamahi fuli? [Koutou faka fealagia ke ina fai atu hana tali.] Koutou faka fealagia mai muʼa ke ʼau fakahā atu te fakapapau neʼe fai e te ʼAtua kia nātou ʼaē ʼe kaugana kia te ia. [Lau ia Pesalemo 37:40 pea koutou avahi te tohi Mauli O Heegata ʼi te pasina 99.] Ko te tohi ʼaenī ʼe ina fakamatala te tupuʼaga ʼo te fakagafua e te ʼAtua te agakovi pea ʼe feafeaʼi anai tana fakagata te faʼahi ʼaia.”
5 Kapau ko koutou ko he kaugā faka mafola ʼe kei tūpulaga, ʼe feala hakotou fakaʼaogaʼi te ʼu paki ʼi te ʼu pasina 156 ki te 158 ʼo te tohi. ʼE feala ke koutou kamata ʼaki te ʼu palalau ʼaenī:
◼ “ ʼE koutou fia maʼuʼuli koa ʼi he mālama ʼe hage ko te mālama ʼaē ʼe tuʼu ʼi te ʼu paki ʼaenī? [Koutou faka fealagia ke ina fai atu hana tali.] Ko te ʼu paki taulekaleka fuli ʼaenī ʼe fakatafito ki te fakapapau ʼaē ʼe tuʼu ʼi te Folafola ʼa te ʼAtua, te Tohi-Tapu. [Koutou fakahā age te ʼu vaega faka Tohi-Tapu.] Ko te tohi ʼaenī ʼe feala ke ina tokoni kia koutou ke lahi takotou mahino ki te fakapapau ʼa te ʼAtua ʼaē ka ina fakaliliu anai te kele katoa ko he palatiso. Ko te tohi ʼaenī ʼe tuʼu ʼi loto te manatu fakatupu hāofaki pea ko te temi lelei ʼaenī mo ʼona lau.”—Soane 17:3.
6 Mokā koutou fakahā te tohi, koutou manatuʼi ʼo teuteuʼi ia ia ki he fai ʼo he tahi ʼaʼahi.