Ko Te Temi ʼAenī
1 ʼI te temi neʼe fai ai e te ʼapositolo ko Paulo tana lua tohi ki te kau Kolonito, neʼe ina fakamanatuʼi age kia nātou neʼe nātou faiga ke nātou fai he gāue lelei moʼo lagolago ki tonatou ʼu kaugā fagona tui ʼi Selusalemi. Kae, hili kiai te taʼu e tahi, neʼe mole heʼeki ʼosi katoa te gāue ʼaē neʼe nātou kamata. Koia neʼe ina fakatokagaʼi ia nātou: “Ke hoko atu . . . pea ke koutou fakaʼosi te gāue. Ke koutou lotolelei ʼo fakaʼosi te meʼa ʼaē neʼe koutou fakatuʼutuʼu.”—2 Ko. 8:11, Français courant.
2 ʼI he temi neʼe feala ke tou fai ʼatatou ʼu fakatuʼutuʼu. E lagi neʼe tou fai he puleʼaki ke fakatuputupu tatatou gāue ʼi te minisitelio, ʼo tou fakatuʼutuʼu ke tou ʼiloʼi lelei ʼo totatou ʼu tēhina, ke tou maʼu te aga fakapotopoto ke feala ai hatatou maʼu he faʼahiga pilivilesio, peʼe ke tou tauʼi hotatou vaivaiʼaga. Logope la ʼi te kamataʼaga neʼe lelei ʼatatou ʼu manatu, e lagi neʼe mole tou fakahoko tatatou fakatuʼutuʼu. Ia muʼa ʼo tatatou tokagaʼi te faʼahi ʼaia, ko te ʼu vāhaʼa, te ʼu māhina, peʼe ko te ʼu taʼu kua fakalaka ka mole heʼeki fakahoko te meʼa ʼaē neʼe fakatuʼutuʼu ke tou fai. Neʼe tonu koa ke tou faka ʼuhiga kia tatou te tokoni ʼaē ke ‘hoko atu pea ke tou fakaʼosi’ te meʼa ʼaē neʼe kua tou kamata?
3 Tou Fakahoko ʼAtatou ʼu Fakatuʼutuʼu: ʼE faigafua te fai ʼo he fakatuʼutuʼu takitokotahi, kae ʼe faigataʼa ʼaupito tona fakahoko. Kapau ʼe tou tuku ki he tahi ʼaho pea ʼe mole feala ia ke tou tuputupu. ʼE ʼaoga ke tou fai he puleʼaki pea ke tou faiga ke foimo hoko. Ke lava lelei te faʼahi ʼaia, ʼe maʼuhiga ke tou fai he fakatuʼutuʼu takitokotahi. ʼE maʼuhiga ke tou toʼo te temi moʼo fakahoko ʼo te faʼahi ʼaia pea ke tou tokakaga ʼo fakaʼaogaʼi te temi ki te fakahoko ʼo te faʼahi ʼaia. ʼE lelei ke tou faka tuʼakoi he hola pea ke tou tokaga ʼo mulimuli ki te tuʼakoi ʼaia.
4 Kapau ʼe faigataʼa te fakahoko ʼo tatatou ʼu fakatuʼutuʼu, ʼe faigafua leva tatatou ʼui: ‘ ʼE hoki ʼau fakahoko ʼi he temi ki ʼamuli.’ Kae ʼe mole tou ʼiloʼi te meʼa ka hoko anai ʼi te temi ka haʼu. ʼE ʼui fēnei ia Tāʼaga Lea 27:1: “ ʼAua naʼa ke faka kolōliaʼi koe ʼi te ʼapogipogi, heʼe mole ke ʼiloʼi anai te meʼa ka hoko ʼi he ʼaho.” Neʼe fakatokagaʼi tatou e te tisipulo ko Sake ke ʼaua naʼa tou tuku katoa tatatou falala ki te temi ka haʼu koteʼuhi “ ʼe mole ke ʼiloʼi anai te meʼa ka hoko ki tou maʼuli ʼi te ʼapogipogi. . . . Kapau ʼe ʼi ai he tahi ʼe ina ʼiloʼi te fai ʼo te meʼa ʼe tonu, kae mole ina fai, ʼe agahala ia.”—Sake 4:13-17.
5 ʼE lahi ʼaupito te ʼu fakafiafia, ʼo feiā aipe ki niʼihi ʼe feala ke nātou kole mai he ʼu meʼa ke tou fai, ʼo faigafua ai leva te tuku keheʼi ʼo tatatou ʼu fakatuʼutuʼu. ʼE ʼaoga ke tou faiga mālohi ke ʼaua naʼa galo tatatou ʼu fakatuʼutuʼu ʼi tatatou fakakaukau. ʼE ʼaoga ke tou manatuʼi te faʼahi ʼaia ʼi ʼatatou ʼu faikole. Ke tou ʼui age ki niʼihi ke nātou fakamanatuʼi mai pea mo nātou fakaloto mālohiʼi tatou. Ke tou fai he fakaʼiloga ʼi tatatou kaletalio ke feala ai hana fakamanatuʼi mai te tuputupu ʼi te faʼahi fakalaumālie. ʼE ʼaoga ke tou fai he puleʼaki pea ke tou ‘fai pe ki te meʼa kua tou fakatotonu ʼi totatou loto.’—2 Ko. 9:7.
6 Ko te māhina ko ʼOketopeli ʼe ina foaki mai he faigamālie lelei moʼo fakahoko ʼo ʼatatou ʼu fakatuʼutuʼu. ʼE mole tou matataku anai ʼi te fakahā ʼo te apone ki Te Tule Leʼo pea mo te nusipepa Réveillez-vous! lolotoga tatatou ʼuluaki fai palalau. ʼE feala koa hatatou fai he ʼu fakatuʼutuʼu fakapotopoto ʼe feala tona fakahoko? E feafeaʼi tatatou faiga ke tuputupu te tufa ʼo ʼatatou ʼu nusipepa peʼe ko te fai ʼo he apone e tahi peʼe lua? Ko te fakatotonu ke lahi te fai ʼo te ʼu ʼaʼahi pea ke kamata ai he ako Tohi-Tapu foʼou, ʼe ko he ʼu fakatuʼutuʼu fakapotopoto ʼaia ʼe feala tona fai e te tokolahi.
7 ʼE mole tou popoto anai mokā ʼe tou tuku ki he temi ka haʼu te meʼa ʼaē ʼe maʼuhiga, koteʼuhi “ ʼe mole te malamanei.” (1 Soane 2:17) ʼE feala ke tou maʼu te ʼu pilivilesio pea mo te ʼu tapuakina makehe ʼi te gāue kia Sehova ʼi te temi ʼaenī. ʼE fakalogo pe kia tatou mo kapau ʼe tou fia maʼu te ʼu pilivilesio ʼaia.