Tou Fakahā Tatatou Tokaga Ki Niʼihi—Lua Faʼahi
1 ʼAki te fakapotopoto, ʼe tou loto anai ke tou taupau maʼu te ʼu felogoi lelei mo te hahaʼi ʼaē ʼe maʼuʼuli ʼi totatou kolo. Ko te faʼahi ʼaia ʼe fakamaʼua ke tou fakahā tatatou tokaga pea mo te fakaʼapaʼapa ki ʼonatou ʼu maʼua pea mo ʼanatou ʼu manatu.
2 ʼE ʼiloa te kau Fakamoʼoni ʼa Sehova ʼi tanatou ʼu aga ʼaē ʼe lelei. Ko ʼatatou ʼu aga ki ʼotatou vāhaʼa fale, ʼi te faleako, pea ʼi te faʼahi ʼe tou gāue ai, ʼo feiā aipe ʼi ʼatatou ʼu fakatahi, neʼe lahi ʼaupito te talanoa lelei ki te faʼahi ʼaia.—Vakaʼi Te Tule Leʼo (fakafalani), ʼo te ʼaho 15 ʼo Sūnio 1989 ʼi te pasina 20.
3 ʼE mahino ia, ko te aga ʼaē ʼe lelei, ʼe kau kiai te ʼu meʼa lahi, ohage ko te agatonu, te tokaga, pea mo te ʼu aga lelei ʼaē ʼe tonu ke fai. ʼE kau ai foki mo te aga fakaʼapaʼapa kia nātou ʼaē ʼe nonofo ʼi te ʼu koga meʼa ʼi te tafaʼaki ʼo te Fale ʼo te Puleʼaga. Ko tatatou aga faka lotu ʼi te tahi ʼu faʼahi ʼe feala ke meʼa noaʼi, mokā ʼe mole tou tokagaʼi ʼotatou ʼu vāhaʼa fale. Neʼe fakaloto mālohiʼi tatou e Paulo ke tou tokakaga ke “tau tatatou aga mo te logo lelei.”—Filp. 1:27.
4 ʼI ʼihi temi, ʼe tautau fai e ʼihi ʼe nonofo ōvi ki te ʼu Fale ʼo te Puleʼaga te ʼu talanoa, koteʼuhi ʼe nātou fakatokagaʼi ko nātou ʼaē ʼe ʼōmai ki te ʼu fono ʼe mole nātou fakahā tanatou fakaʼapaʼapa ʼaē kia nātou. ʼE tonu ke tokakaga te ʼu tēhina pea mo te ʼu tuagaʼane ʼo mole nātou ʼolo ʼo haʼele ʼi muʼa ʼo te Fale ʼo te Puleʼaga, pea mo hoko atu te ʼu palalau leʼolahi ʼaē ʼe logoʼi e te ʼapi ʼaē ʼe ōvi mai. ʼE mole tonu ke faka fealagia ki te fānau ke nātou feleleʼi ʼi loto pea mo tuʼa ʼo te Fale ʼo te Puleʼaga. Ko te logoaʼa ʼo te pupunu ʼo te ʼu matapā ʼo te motokā peʼe ko te ʼu kī siti ʼe feala ke fakahohaʼa ki te vāhaʼa fale. Ko te taʼi aga ʼaia ʼe fakatupu kovi ki te kokelekasio. Koia, ʼe maʼuhiga ke tou tokakaga ki te ʼu lao ʼo te ala mokā tou taki motokā ʼi te loto kolo.—Lom. 13:1, 2, 5.
5 ʼE mole tonu anai ke tau te ʼu motokā ʼi he koga meʼa ʼe tapu peʼe ʼi te ʼu koga meʼa ʼaē ʼe fakatupu gaohaʼa ki te feʼaluʼaki ʼa te ʼu motokā peʼe ko te ʼu hūʼaga ki te ʼu ʼapi. Ko te tauʼaga motokā ʼe ōvi ki he ʼu matani gāue ʼaē ʼe fakatuʼutuʼu maʼa te kau gāue, ʼe mole tonu anai ke fakaʼaogaʼi mokā ʼe mole fakagafua mai. ʼI te koga meʼa ʼaē ʼe fakaʼaogaʼi ai e te ʼu kokelekasio e tolu peʼe fā te Fale ʼo te Puleʼaga pe e tahi, ko te ʼu fono ʼe fakatuʼutuʼu anai ʼi te ʼaho fuli ʼo te vāhaʼa, pea ko te faʼahi ʼaia ʼe fakamaʼuaʼi ke felogoi lelei te ʼu kolesi ʼo te kau tagata ʼāfea.—Vakaʼi Te Tule Leʼo (fakafalani), ʼo te ʼaho 1 ʼo ʼOketopeli 1988, ʼi te pasina 17, ʼi te palakalafe 13.
6 Ko te Tohi-Tapu ʼe ina fakaloto mālohiʼi tatou ke tou “fai ia meʼa fuli ki te kolōlia ʼa te ʼAtua,” pea ʼe kau ai mo tatatou fakahā ʼo tatatou fakaʼapaʼapa ki te hahaʼi ʼo te mālama. (1 Ko. 10:31-33) Kapau ʼe tou ‘tokakaga ki te ʼu meʼa ʼa ʼihi,’ ʼe mole tou ʼolo anai ʼo tau fakakinau ʼi tonatou kele. (Filp. 2:4) ʼE tou toe tokakaga foki anai naʼa tou gaohaʼa ki te ʼu gāue fakatau koloā ʼa te hahaʼi ʼo te telituale.
7 Ko tatatou fakahā ʼo tatatou tokaga ki niʼihi—ʼi loto pea mo tuʼa ʼo te kokelekasio—ʼe ko te fakahā ʼaia ʼo te meʼa ʼi totatou loto. Ko te meʼa ʼaē ʼe tou fai pea mo talanoa kiai ʼe tonu ke hā ʼaki ai ʼe tou ‘ ʼoʼofa ki ʼotatou kāiga ohage pe ko tatou totonu.’—Mat. 7:12; 22:39.