Te ʼu Aga ʼAē ʼe Lelei—Ko He Fakaʼiloga ʼo Te Hahaʼi ʼAē ʼe Tauhi Ki Te ʼAtua

¹ Ia ʼaho nei, kua tahitahiga te fai e te hahaʼi te ʼu aga ʼaē ʼe lelei. Koteā tona tupuʼaga? Kua fakavilivili te hahaʼi, pea ʼe mole kei lagi nātou manatuʼi te ʼu aga ʼaē ʼe lelei, ohage ko te ʼui ʼaē “Fakalelei siʼi ʼou loto,” “Mālo,” peʼe “Silou.” Neʼe fakakikite e te Folafola ʼa te ʼAtua ʼe ʼāsili kovi anai te aga ʼa te hahaʼi ʼi te ʼu ʼaho fakamuli ʼaenī, he neʼe ina ʼui ko te hahaʼi ʼe nātou liliu anai ʼo ‘tahi ʼofa pe kia te ia, ʼo loto lahi, ʼo agavale, ʼo maʼuli galo, ʼo heʼe ʼofa, ʼo heʼe fakatātāʼofi, ʼo fehiʼa ki te lelei, ʼo fiatuʼu.’ (2 Tim. 3:1-4) Ko te ʼu agaaga fuli ʼaia ʼe tupu ai te ʼu aga ʼe kovi. ʼI tonatou ʼuhiga hahaʼi ʼaē ʼe tauhi ki te ʼAtua, ʼe tonu ke nofo tokaga te kau Kilisitiano naʼa nātou liliu ohage ko te mālama, ʼaē ʼe mole kei fakaʼapaʼapa ki te hahaʼi.

² Koteā Te ʼu Aga ʼAē ʼe Lelei? Ko te ʼu aga ʼaē ʼe lelei ʼe feala ke faka ʼuhiga ki te tokagaʼi ʼo te loto ʼo te hahaʼi, te fealagia ʼaē ke kita maʼuli mo te hahaʼi ʼi te tokalelei. ʼE hā te ʼu aga ʼaē ʼe lelei mokā tou tokaga ki te hahaʼi, mo agalelei kia nātou, pea mo manatu kia nātou. ʼE maʼu e he tahi te ʼu agaaga ʼaia ʼuhi ko tona ʼofa ki te ʼAtua pea mo tona vāhaʼa fale. (Lu. 10:27) ʼE mole faigataʼa te fai ʼo te ʼu aga ʼaia, kae ʼe nātou maʼuhiga ʼaupito ke feala ai hatatou felogoi lelei mo te hahaʼi.

³ Neʼe tuku e Sesu Kilisito te faʼifaʼitaki haohaoa. Neʼe ina maʼuliʼi tuʼumaʼu te Lekula Aulo ʼaenī: “O hagepe ko te aga e koutou loto ke fai e te hahai kia koutou, pea ke koutou fai feia kia natou.” (Lu. 6:31) ʼE mole tou ōfo koa ki te ʼofa ʼa Sesu ki tana kau tisipulo pea mo tana agalelei kia nātou? (Mat. 11:28-30) Neʼe mole fakatafito tana ʼu aga lelei ki he ʼu lekula neʼe tuʼu ʼi he tohi. Neʼe tupu ia mai he loto ʼe moʼoni pea mo fia foaki. ʼE tonu ke tou faiga ke tou mulimuli ki tana faʼifaʼitaki lelei ʼaia.

⁴ Ko te temi fea ʼaē ʼe tonu ke fai ai e te kau Kilisitiano te ʼu aga ʼaē ʼe lelei? ʼI he ʼu lakaga makehe pe koa, mokā tou loto ke leleiʼia tatou e te hahaʼi? Peʼe tonu pe koa ke tou agalelei moʼo fakaneke te hahaʼi ke nātou fai mai te meʼa ʼaē ʼe tou leleiʼia? Kailoa ia! ʼE tonu ke tou fai te ʼu aga ʼaē ʼe lelei ʼi te temi fuli pe. ʼE tou lava fakahā feafeaʼi te aga ʼaia mokā tou fakatahitahi ʼi te kokelekasio?

⁵ ʼI Te Fale ʼo Te Puleʼaga: Ko te Fale ʼo te Puleʼaga ʼe ko te potu ʼaē ʼe tou fai ai tatatou tauhi. ʼE tou ʼolo kiai he neʼe fakaafe tatou e Sehova ʼAtua. ʼE tou lava ʼui ko tatou ko tana kau fakaafe. (Pes. 15:1) Ko tatou koa ko he ʼu hahaʼi fakaafe ʼe nātou tuku he faʼifaʼitaki lelei mokā tou ʼolo ki te Fale ʼo te Puleʼaga? ʼE tou tokaga koa ki tatatou faʼahiga teu pea mo te gaohi ʼo totatou ʼulu? ʼE mahino ia ʼe mole tou fia teu he ʼu mutuʼi meʼa ʼāfea peʼe tokagaʼi fau. Peʼe tou kau ki te ʼu fakatahi peʼe ko tatatou ʼu fono ʼi te vāhaʼa, kae ʼe tokagaʼi te hahaʼi ʼa Sehova ʼuhi ko tanatou teu fakaʼapaʼapa ʼaē ʼe tau mo nātou ʼaē ʼe manavasiʼi ki te ʼAtua. (1 Tim. 2:9, 10) ʼE tou fakahā ai tatatou manatu pea mo tatatou fakaʼapaʼapa ki te ʼAtua, ʼaē neʼe ina fakaafe tatou pea mo te hahaʼi ʼaē neʼe fakaafe.

⁶ Ko te tahi faʼahiga fai ʼo te ʼu aga ʼaē ʼe lelei ʼi te ʼu fono, ʼe ko hatatou ʼōmai tautonu. ʼE moʼoni ʼe mole faigafua tuʼumaʼu te faʼahi ʼaia. Ko ʼihi ʼe nātou nonofo mamaʼo peʼe lagi hahaʼi tonatou foʼi famili ʼaē ʼe tonu ke teuteuʼi. Kae neʼe fakatokagaʼi ʼi ʼihi kokelekasio, ko te toko 25 ki te teau kau fai faka mafola ʼe nātou ʼōmai māhani ʼi te hili ʼo te ʼuluaki katiko pea mo te faikole. ʼE mole ko he meʼa noa te faʼahi ʼaia! ʼE tonu ke tou manatuʼi ke tou fai te ʼu aga ʼaē ʼe lelei ʼo tou manatuʼi te loto ʼo te hahaʼi. Ko Sehova, ia ia ʼaē ʼe agalelei ʼi tana fakaafe tatou, neʼe ina teuteuʼi te meʼa kai fakalaumālie ʼaia ʼe lelei kia tatou. ʼE tou fakahā tatatou loto fakafetaʼi pea mo tatatou tokaga ki te ʼu meʼa ʼo tona loto, mokā tou ʼōmai tautonu. Pea tahi ʼaē meʼa, ko te ʼōmai tauhala ki te ʼu fono ʼe ina fakaleluʼi pea mo fakahā ai tatatou mole fakaʼapaʼapa kia nātou ʼaē ʼi te fono.

⁷ Ka tou fakatahi ʼi te fono, ʼe tou tokagaʼi koa te hahaʼi foʼou? ʼE ko he agalelei mokā tou tali leleiʼi nātou. (Mat. 5:47; Loma 15:7) Ko he fai ʼalofa peʼe ko he malimali—ko te ʼu kiʼi aga kua tou māhani kiai, kae ʼe toe hā ai totatou ʼuhiga Kilisitiano moʼoni. (Soa. 13:35) ʼI tana ʼuluaki haʼu ʼaē ki te Fale ʼo te Puleʼaga, neʼe ʼui fēnei e te tagata: “ ʼI te lotu ʼaē neʼe ʼau tupu ai, neʼe mole heʼeki ʼau maʼu he ʼu hahaʼi agaʼofa feiā logola neʼe mole mātou feʼiloʼiʼaki. Neʼe ʼau mahino ai kua ʼau maʼu te moʼoni.” Koia, neʼe ina fetogi tona maʼuli, pea hili māhina ʼe fitu pea papitema. Ei, ko te ʼu aga ʼaē ʼe lelei ʼe feala ke ʼi ai honatou ʼu fua!

⁸ Kapau ʼe tou fai te ʼu aga ʼaē ʼe lelei kia nātou ʼaē ʼe mole tou ʼiloʼi, pea ʼe mole tonu koa la ke tou fai feiā “kia nātou ʼaē ko ʼotatou ʼu kāiga ʼi te tui.” (Kal. 6:10, MN ) ʼE tonu ke tou mulimuli ki te pelesepeto ʼaenī: “ ʼE tonu anai ke ke fakaʼapaʼapa kia ia ʼaē ʼe matuʼa [peʼe kua finematuʼa].” (Lev. 19:32) ʼE mole tonu ke tou meʼa noaʼi ia nātou ʼaia ʼi tatatou ʼu fakatahi.

⁹ Tou Fakalogo Lelei: ʼI te ʼu fono, ko te ʼu minisi ʼa te ʼAtua ʼe nātou fai akonaki moʼo foaki mai he meʼa ʼofa fakalaumālie ke fakaloto mālohiʼi tatou. (Loma 1:11) ʼE mahino ia ʼe mole tou aga fakaʼapaʼapa anai mo kapau ʼe tou tulemomoe, peʼe tou gau kamu logoaʼa, peʼe tou fanafana tuʼumaʼu kia ia ʼaē ʼi ʼotatou tafa, peʼe tou feʼoloʼaki noa ki te fale mamaʼo, peʼe tou lau he ʼu tohi ʼe mole honatou pikipikiga mo te fono, peʼe tou tokagaʼi he tahi ʼu meʼa lolotoga te fono. ʼE tonu ke foaki e te kau tagata ʼāfea he faʼifaʼitaki ʼi te faʼahi aia. Kapau ʼe tou maʼu te ʼu aga ʼaē ʼe lelei, pea ʼe uga anai tatou ke tou fakaʼapaʼapa kia ia ʼaē ʼe fai akonaki pea mo te logo ʼaē ʼe fakatafito ki te Tohi-Tapu, ʼo tou fakalogo katoa kiai.

¹⁰ Tahi ʼaē meʼa, ʼe tou fakaʼapaʼapa anai kia ia ʼaē ʼe fai akonaki pea mo nātou ʼi te fono, ʼo mole tou fakaleluʼi tatatou ʼu fono ʼaki tatatou ʼu bips pea mo te ʼu telefoni feʼāveʼaki.

¹¹ Te ʼu Aga ʼAē ʼe Lelei Pea Mo Te Fānau: ʼE tonu ke tokaga tuʼumaʼu te ʼu mātuʼa ki te aga ʼo tanatou fānau. Kapau ʼe fakalelu ki te fono he tamasiʼi ʼe kamata tagi peʼe mole nofo maʼu, pea ʼe lelei ke foimo ʼave te tamasiʼi ki tuʼa ke fakanaʼa. ʼE lagi faigataʼa te faʼahi ʼaia ʼi ʼihi temi, kae koutou manatuʼi, ʼe fakahā ai anai takotou fakaʼapaʼapa ki te hahaʼi. Ko te ʼu mātuʼa mo tanatou ʼu tamasiʼi ʼaē ʼe mole nonofo maʼu ʼe nātou heheka anai ʼi muli, ke mole lahi tanatou fakalelu mokā tonu ke nātou ʼolo ki tuʼa lolotoga te fono. ʼE mahino ia, ʼe feala ke fakahā e te kokelekasio ʼe nātou manatu ki te ʼu famili, mo kapau ʼe nātou tuku maʼa nātou ʼaia te ʼu hekaʼaga ʼi muli, mo kapau ʼe nātou loto kiai.

¹² ʼE tonu ke toe tokakaga te ʼu mātuʼa ki te aga ʼo tanatou fānau ʼi muʼa ʼo te kamata ʼo te ʼu fono pea mokā ʼosi te ʼu fono. ʼE mole tonu ke feleleʼaki te ʼu toe ʼi te loto kokelekasio, heʼe feala ke hoko ai he tuʼutāmaki. ʼE toe feala ke nātou tuʼutāmaki ʼi tanatou feleleʼi ʼi tuʼa ʼo te Fale ʼo te Puleʼaga, tāfito ʼi te pōʼuli heʼe mole tou sio lelei. Ko te ʼu fai palalau leʼolahi ʼi tuʼa ʼe feala ke koviʼia e te ʼu vāhaʼa fale pea mo fakatupu kovi ki tatatou tauhi. Ko te ʼu mātuʼa ʼaē ʼe nātou faiga ke nātou leʼoleʼo fakalelei tanatou fānau ʼi loto pea mo tuʼa ʼo te Fale ʼo te Puleʼaga, ʼe vikiʼi nātou heʼe hilifaki te aga ʼaia ki tatatou fiafia ʼi te felogoi ʼi te logo tahi.—Pes. 133:1.

¹³ ʼI Te Ako Tohi: ʼE tou leleiʼia te tali kāiga ʼo tatatou ʼu tēhina ʼaē ʼe nātou tuku mai tonatou ʼapi ke fai ai te ʼu fono. Ka tou ʼolo kiai, ʼe tonu ke tou fakaʼapaʼapa pea mo tokakaga ki tonatou loto fale. ʼE tonu ke tou holoholoʼi fakalelei totatou ʼu sūlie ʼi muʼa ʼo hatatou hū ki fale, ke mole tou ʼulihi te sima peʼe ko te moquette. ʼE tonu ke leʼoleʼo e te ʼu mātuʼa tanatou fānau, ke nātou ʼiloʼi papau ʼe mole nātou ʼolo mamaʼo atu ʼi te ʼapi ʼaē ʼe fai ai te ako tohi. Logola ʼe mole lagi faʼa hahaʼi pea ʼe hage ko he ʼu felogoi faka famili, kae ʼe mole tonu ke tou faʼifaʼitaliha ʼi te loto fale ʼo ʼihi. ʼE tonu ke ʼave e he tahi ʼi te ʼu mātuʼa tanatou tamasiʼi mokā fia ʼalu ki te fale mamaʼo. Pea tahi ʼaē meʼa, mai tona ʼuhiga ʼaē ko te ako tohi ʼe ko he fono, ʼe tonu ke tou teuteu ohage ko hatatou ʼolo ki te Fale ʼo te Puleʼaga.

¹⁴ ʼE Maʼuhiga Ke Fai Te ʼu Aga ʼAē ʼe Lelei: Ko tatatou fai te ʼu aga faka Kilisitiano, ʼe malave ki tatatou minisitelio, pea ʼe toe hoko ai mo he ʼu felogoi lelei mo te hahaʼi. (2 Ko. 6:3, 4, 6) ʼI totatou ʼuhiga kau atolasio ʼo te ʼAtua fiafia, ʼe tonu ke tou malimali, ke tou agalelei pea mo tou fai pe he ʼu kiʼi faʼahiga aga ʼe lelei, heʼe fakafiafia ai te hahaʼi. ʼAki te ʼu aga lelei ʼaia ʼe liliu anai totatou maʼuli ʼo taulekaleka ʼi totatou ʼuhiga hahaʼi ʼa te ʼAtua.