Ke Tāu Tatatou Aga Mo Te Logo Lelei

¹ ʼI totatou ʼuhiga kau Fakamoʼoni ʼa Sehova, ʼe tou loto ke tou faka maʼuhigaʼi te huafa ʼo Sehova. ʼE tou ʼiloʼi ko tatatou aga, tatatou ʼu palalau, te faʼahiga gaohi ʼo totatou ʼulu, pea mo totatou ʼu mutuʼi meʼa ʼe feala ke ʼi ai hona ʼu fua ki niʼihi ʼo ʼuhiga mo tanatou sio ki te tauhi moʼoni. Ko te meʼa ʼaia ʼe moʼoni tāfito mokā ʼe tou ʼolo ki tatatou ʼu fono. ʼE tou tokakaga anai ki tatatou ʼu palalau pea mo tatatou aga ke tau mo feʼauga mo te logo lelei pea ke nātou faka maʼuhigaʼi ia Sehova.​—⁠Filp. 2:⁠4.

² ʼE lahi te ʼu agaaga ʼo te mālama ʼo ʼuhiga mo te ʼu mutuʼi meʼa pea mo te faʼahiga gaohi ʼo tonatou ʼulu, ʼe mole tāu mo te kau Kilisitiano. Ko te faʼahi ʼaia ʼe tonu ke tokakaga fakalelei kiai te ʼu minisi ʼo te logo lelei. Neʼe ʼui fēnei e Te Tule Leʼo ʼo te ʼaho 1 ʼo Sūnio 1989 (fakafalani), ʼi te pasina 20: “ ʼE mole tonu ke tou ʼolo ʼo totogi he ʼu mutuʼi meʼa ʼe totogi kovi, kae ʼe tonu ke maʼa, ke lelei, pea ke fakapoipoi. ʼE tonu ke lelei ʼotatou ʼu sūlie pea ke matamatalelei. ʼO feiā aipe ki te ʼu fono fuli, ʼo kau ai mo te Ako Tohi ʼo te kokelekasio, ʼe tonu ke tou maʼa, pea ʼe tonu ke tou teuteu lelei pea ke tou ʼai he ʼu mutuʼi meʼa ʼe tau mo feʼauga.”

³ Ko te ʼōmai tautonu ki te ʼu fono ʼe ko te fakaʼiloga ʼaia ʼo he fakaʼapaʼapa ʼe fai ʼaki te ʼofa, pea mo he aga fakapotopoto. ʼI ʼihi temi, ʼe ʼi ai te ʼu meʼa ʼe hoko neʼe mole tou ʼamanaki kiai, ʼo mole tou ʼōmai tautonu ai ki te fono. Kae ʼi te agamāhani ko te ʼōmai tauhala ki te ʼu fono, e lagi ʼe hā ʼaki ai te mole fakaʼapaʼapa ki te fakatuʼutuʼu taputapu ʼo te ʼu fono, pea ʼe hā ai tatatou meʼa noaʼi te maʼua ʼaē ke mole tou fakalelu kia nātou ʼaē ʼe kau ki te fono. Ko nātou ʼaē ʼe ʼōmai tauhala ki te ʼu fono, ʼe nātou fakalelu ki niʼihi pea ʼe mole nātou maʼu katoa te ʼu fua lelei ʼo te polokalama. Ko te ʼōmai tautonu ki te ʼu fono ʼe fakahā ʼaki ai tatatou fakaʼapaʼapa ki te meʼa ʼaē ʼe ʼi te loto ʼo nātou fuli ʼe ʼi te fono pea mo te meʼa ʼe nātou fia logo kiai.

⁴ Ko te ʼofa ki ʼotatou kāiga ʼe tonu ke ina uga tatou ke tou tokakaga fakalelei ke ʼaua naʼa tou fakatupu hoha kia nātou lolotoga te ʼu fono. Ko te fai fanafana, te kai, te kai kamu, te logoaʼa ʼaki te ʼu pepa ʼo te ʼu foʼi lole, pea mo te tatuʼu ki te fale mamaʼo ʼe fakalelu ai te fakalogo ʼa ʼihi pea ʼe ina meʼa noaʼi te fakaʼapaʼapa ʼaē ʼe tonu ke fai ki te fale tauhi ʼa Sehova. ʼE mole lelei ke fai palalau niʼihi ʼo ʼuhiga mo te ʼu faʼahiga meʼa ʼo te ʼu kokelekasio ʼi te lolotoga ʼo te ʼu fono, gata pe mokā ko he meʼa ʼe fakavilivili, ʼe fakamaʼua ai ki te ʼu tēhina ke nātou fetatuʼuʼaki. Kae ʼi tona fakahagatonu, ʼe tonu ke tahi nonofo te hahaʼi fuli ʼi tonatou hekaʼaga ʼo fakalogo ki te polokalama ke nātou maʼu ai he ʼu fua lelei pea ke fua lelei ki tonatou famili. Ko te ʼu aga ʼaē ʼe mole lelei, ʼe mole tonu ke fai ʼi te Fale ʼo Te Puleʼaga koteʼuhi ko te “ ʼofa . . . ʼe mole ina fai he ʼu aga ʼe mole mata feʼauga.”​—⁠1 Ko. 13:​4, 5; Kal. 6:⁠10.

⁵ Ko te aga lelei ʼa tatatou ʼu fānau ʼi te ʼu fono ʼe toe kau pe foki ki te fakavikiviki pea mo te faka maʼuhigaʼi ʼo te huafa ʼo te ʼAtua. ʼE maʼuhiga ke tokakaga te ʼu mātuʼa kia nātou. ʼE tonu ke fakaloto mālohiʼi te fānau ke nātou fakalogo pea ke nātou fai hanatou ʼu tali ʼi te ʼu fono. ʼE lahi te ʼu mātuʼa ʼe maʼu fānau ʼe nātou heheka ʼi he faʼahi ʼe faigafua ai tanatou ʼolo ki tuʼa pea mo nātou tokaga ki te ʼu meʼa ʼaē ʼe ʼaoga ki tanatou fānau ʼo mole nātou fakalelu ki niʼihi.

⁶ Neʼe fai e Paulo te tokoni ʼaenī: “Ke tāu takotou aga mo te logo lelei.” (Filp. 1:27) Koia, tou fai he ʼu aga ʼe lelei pea mo tou aga fakaʼapaʼapa kia nātou ʼaē ʼe kau ki te ʼu fono. Kapau ʼe tou fetokoni lelei ʼaki, pea ʼe mahino ia ʼe tou maʼu anai he “fefakaloto mālohiʼaki . . . ʼo tahi lotomālohi ʼi te tui ʼa he tahi age.”​—⁠Loma 1:⁠12.