Kotou Tautonu Tuʼumaʼu Mai
1. Kotea te faʼifaʼitaki ʼe tuku mai e Sehova ʼo ʼuhiga mo te tautonu tuʼumaʼu?
1 ʼE tautonu tuʼumaʼu ia Sehova. Ohage la, ʼe ina foaki ki ʼana kaugana ia te ‘tokoni ʼi tona temi totonu.’ (Hep. 4:16, MN) Pea ʼi te faʼahi fakalaumalie, ʼe ina foaki “te meakai i tona temi totonu.” (Mat. 24:45) Koia ʼe feala ke tou lotofalala ko te ʼaho ʼo tona hauhau “ʼe mole tauhala anai ia.” (Hap. 2:3) ʼE ko he toe tapuakina kia tatou ia te tautonu ʼa Sehova. (Pes. 70:6) ʼI totatou ʼuhiga heʼe haohaoa pea mo maʼumaʼua, ʼe feala ke faigataʼa hatatou tautonu. Kaʼe he ko ʼe ʼe tonu ke tou tautonu tuʼumaʼu?
2. He ko ʼe ʼe tou fakavikiviki kia Sehova moka tou tautonu?
2 ʼE ko he aluʼaga makehe ia te tautonu ʼi te ʼu ʼaho fakamuli ʼaeni heʼe ko te tokolahi kua natou tahi manatu pe kia natou totonu pea mo fakaʼaoʼaoganoa. (2 Tim. 3:1-3) Koia moka tautonu he Kilisitiano ki te gaue, peʼe ki hana fakatuʼutuʼu mo he tahi, ʼo feia pe ki te ʼu fono, ʼe tokagaʼi e ʼihi pea ʼe natou fakavikiviki kia Sehova. (1 Pet. 2:12) ʼE tou kamata tautonu tuʼumaʼu koa tatatou gaue, kaʼe tou tauhala tuʼumaʼu tatou ki te ʼu fakatuʼutuʼu fakateokalatike? Ko te tautonu mai ki te ʼu fono, ʼo kau ki te ʼuluaki katiko pea mo te faikole, ʼe ha ai tatatou fia faʼifaʼitakiʼi ia tatatou Tamai ʼae ʼe ʼi selo ʼae ʼe ina fai he ʼu fakatuʼutuʼu lelei.—1 Ko. 14:33, 40.
3. He ko ʼe ʼe tou fakaha ʼe tou fakaʼapaʼapa ki ʼihi moka tou tautonu?
3 Moka tou tautonu, ʼe tou toe fakaha ai tatatou fakaʼapaʼapa ki ʼihi. (Filp. 2:3, 4) Ohage la, moka tou tautonu ki te ʼu fono mo te ʼu fono gaue ki te faifakamafola, ʼe mole tou fakalelu anai ki ʼotatou tehina mo tuagaʼane. Pea tahi, moka tou tauhala tuʼumaʼu, pea ʼe hage ʼe tou meʼa noaʼi ia natou. Ko te tautonu ʼe ha ai ʼe tou tuha mo te falala pea ʼe tou faʼa kataki. Ko he ʼu kalitate ʼe leleiʼia e te hahaʼi.
4. Kapau ʼe tou tauhala tuʼumaʼu, kotea ʼae ʼe feala ke tou fai ke tou tautonu ai?
4 Kapau ʼe kotou tauhala tuʼumaʼu, pea ʼe tonu ke kotou fakakaukauʼi ia te ʼu tupuʼaga ʼo te faʼahi ʼaia. Kotou fai ni fakatuʼutuʼu ʼe feala ai hakotou tautonu mai. (Ekl. 3:1; Filp. 1:10) Kotou kole tokoni kia Sehova. (1 Soa. 5:14) Moka tou tautonu ʼe tou fakaha ai tatatou fia mulimuli ki te ʼu fakatotonu lahi ʼe lua ʼo te Lao, ʼae ke tou ʼofa ki te ʼAtua pea mo totatou kaiga.—Mat. 22:37-39.