Tou Fakahā Totatou Loto Fakafetaʼi Ki Te ʼApi ʼo Te ʼAtua
1 ʼI te ʼu temi faka Tohi-Tapu neʼe fakatokagaʼi e Sehova tana hahaʼi ke nātou fakatahitahi tuʼumaʼu ʼi tona ʼapi. (Lev. 23:2) Ko te ʼu fakatahi ʼaia neʼe tokoni ai kia nātou ke nātou manatuʼi ia te folafola ʼa te ʼAtua, ʼo nātou toʼo he temi moʼo metitasio, moʼo fakatahitahi, pea mo palalau ki te Lao ʼa Sehova. Ko tonatou ʼatamai neʼe fonu ia ʼi te ʼu manatu ʼa te ʼAtua, ʼo feala ai hanatou maʼu he ʼu tapuakina fakalaumālie. Ko te ʼu fakatahi ʼaia neʼe ko te ʼu temi fakafiafia. Ko te fakatuʼutuʼu ʼaia neʼe faka fealagia ai te logo tahi pea mo te tauhi maʼa. Ko te ʼu fakatahi ʼi te ʼapi ʼo te ʼAtua ia ʼaho nei ʼe mole ko he meʼa ke tou meʼa noaʼi.
2 ʼE Lava Feafeaʼi Hatatou Fakahā ʼe Tou Leleiʼia Te ʼu Fono? Ko ʼihi kokelekasio ʼe nātou fakahā ʼe mole mālohi te lagolago ʼo tanatou ʼu fono. ʼI he temi ʼe hoko ai he faʼahiga meʼa ki he tahi ʼo mole feala ai tana ʼalu ki te ʼu fono. Kae ʼe koutou faka fealagia koa ki he ʼu kiʼi faigataʼaʼia ke ʼaua naʼa koutou tatuʼu ki te ʼu fono? Ko ʼihi e lagi ʼe nātou fakatuʼutuʼu ke nātou nonofo ʼi tonatou ʼapi mokā ʼe mamahi tonatou foʼi ʼulu peʼe nātou gaʼegaʼe ʼi he ʼaho neʼe nātou gāue kinakina ai. Ko ʼihi ʼe nātou ʼui ʼe nātou nonofo ʼo fakatalitali tonatou ʼu kāiga ʼe mole ʼi te moʼoni ʼe ʼōmai ʼo ʼaʼahi ia nātou. Ko ʼihi foki ʼe nātou meʼa noaʼi te ʼu fono ʼi tanatou fia sio ki he ʼata ʼe nātou leleiʼia ʼi te televisio peʼe ko he fai gaoʼi neʼe hoko. Ko te fai ʼo te ʼu faʼahi ʼaia ʼe fakahā ʼaki ʼe mole tatau tatatou aga mo te holi fakamalotoloto ʼaē neʼe fakahā e te ʼu foha ʼo Kolea: “Ko toku nefesi neʼe mamahi pea neʼe holi foki ia ki te ʼu malaʼe ʼaē ʼo Sehova.”—Pes. 84:2.
3 Logope la te lahi ʼo te meʼa kai fakalaumālie ʼaē ʼe tou maʼu ʼi te ʼu fono, ko ʼihi ʼe faigataʼa tanatou nofo tokakaga. E lagi ʼe mole ʼalu tanatou fakakaukau ʼi te fono, ʼe nātou manatuʼi te ʼu faigataʼaʼia ʼi te ʼaho fuli, peʼe nātou tulemomoe. Tokolahi ʼe nātou fakatokagaʼi ko te tohi ʼo te ʼu manatu fakanounou ʼi te ʼu fono, ʼe tokoni kia nātou ke nātou nonofo ʼalaʼala pea mo tokakaga ki te meʼa ʼaē ʼe fakamatala ʼi te ʼu fono. Ko te tohi ʼo te ʼu manatu ʼe feala foki ke fakamaʼumaʼu ʼi te fakakaukau. Tahi ʼaē meʼa, ko te teuteu fakatomuʼa ʼe ko he tokoni ʼaia ke fua lelei katoa kia tatou. Kapau ʼe lelei tatatou teuteu, ʼe feala anai ke “lahi age tatatou nonofo tokaga.”—Hep. 2:1.
4 Ko te fānau ʼo feiā aipe ki te hahaʼi lalahi ʼe ʼaoga ke nātou tokagaʼi te ako ʼaē ʼe fai ʼi te ʼu fono. Ko te meʼa ʼaē ʼe akoʼi e te fānau ʼe faka tuʼakoi anai, mo kapau ʼe foaki e te ʼu mātuʼa he ʼu tohi ki te fānau ke nātou faitohi ke feala ai hanatou maʼumaʼua pea ke ʼaua naʼa nātou logoaʼa. ʼE mole ko he akoʼi ʼo te fānau mo kapau ʼe fakagafua age ke nātou gaoʼi, fai palalau, kalaga, peʼe nātou fai he tahi meʼa ʼe fakalelu kia nātou ʼaē ʼe ōvi mai. Ko te tatuʼu ki te fale vao peʼe ko te ʼolo ʼo ʼinu lolotoga te fono, ʼe mole fai tuʼumaʼu anai mo kapau ʼe ʼiloʼi e te tamasiʼi ʼe ʼalu tuʼumaʼu he tahi ʼi tana ʼu mātuʼa mo ia.
5 Ko Te ’Ōmai Tautonu Ki Te ʼu Fono ʼe Maʼuhiga: ʼI he tahi temi, ʼe ʼi ai he ʼu ʼaluʼaga neʼe mole tou ʼamanaki kiai, ʼe feala ke tou ʼōmai tauhala ai ki te fono, kae ko te fakamāhani ʼaē ʼo te ʼōmai tauhala ki te fono ʼi te hili ʼo te katiko pea mo te faikole ʼi te kamataʼaga, ʼe fakahā ʼaki ai tatatou mole fakaʼapaʼapa ki te fakatuʼutuʼu taputapu ʼo te ʼu fono pea mo totatou maʼua ʼaē ko te fakaʼapaʼapa ki niʼihi. Tou manatuʼi ko te katiko pea mo te faikole mo ʼotatou ʼu tēhina ʼi te ʼu fono ʼo te kokelekasio ʼe ko he koga ia ʼo tatatou tauhi. Ko te ʼōmai tauhala tuʼumaʼu ʼe fakahā ʼaki ai ʼe mole tou teuteu peʼe mole fai hatatou fakatuʼutuʼu ke tou ʼōmai fakatomuʼa. Ko te ʼōmai fakatomuʼa ʼe fakahā ʼaki ai ʼe tou fakaʼapaʼapa pea ʼe tou leleiʼia ʼatatou ʼu fono.
6 ʼI te kua ōvi mai ʼo te ʼaho, ʼe ʼaoga ke lahi tatatou fakatahitahi. (Hep. 10:24, 25) Tou fakahā tatatou fakafetaʼi ʼaki tatatou kau tuʼumaʼu ki te ʼu fono, ʼo tou teuteu fakatomuʼa, ʼo tou ʼolo fakatomuʼa, ʼo tou tokaga fakalelei, pea mo tou maʼuliʼi te ʼu meʼa ʼaē ʼe tou akoʼi ai.