Ko He Faʼifaʼitaki Ke Tou Muliʼi Fakalelei
1 ʼE mahino ia ko Sesu neʼe ko te tagata ʼaē ʼe lahi tokotahi ʼo te ʼu temi fuli. Neʼe ina tuku he faʼifaʼitaki haohaoa ki tana kau tisipulo. Logope la te mole feala ʼo tatatou maʼuliʼi tana ʼu lekula haohaoa māʼoluga, ʼe fakatokagaʼi tatou ke tou “mulimuli fakalelei ki tona ʼu ala.” (1 Pe. 2:21) ʼE tonu ke tou fakaʼamu ke tou hage ko Sesu, ʼo tou faiva ʼi te fakahā ʼo te moʼoni ki niʼihi.
2 Ko Sesu neʼe mole gata pe ʼi te ʼui ʼaē ko ia ko te tagata fai faka mafola; neʼe ko he tagata faiako ʼe mole hona fakatatau. “Neʼe ōfo ai te hahaʼi ʼi tana taʼi faʼahiga fai akonaki.” (Mat. 7:28) He koʼe koa neʼe faiva feiā ia? Tou vakaʼi muʼa tana “faʼahiga fai akonaki.”
3 ʼE Lava Feafeaʼi Hatatou Mulimuli Kia Sesu: Neʼe akoʼi Sesu e tana Tāmai. (Soane 8:28) Ko tona loto ke ina faka maʼuhigaʼi ia Sehova pea mo faka kolōliaʼi Tona huafa. (Soane 17:4, 26) Ko tatatou fai faka mafola pea mo tatatou fai akonaki, ʼe uga ai tatou ke tou faka maʼuhigaʼi Sehova pea ke ʼaua naʼa tou faiga ke faka maʼuhigaʼi tatou e te hahaʼi.
4 Ko te ʼu akonaki fuli ʼa Sesu neʼe fakatafito ki te Folafola ʼa te ʼAtua. Neʼe ina fakaʼaogaʼi tuʼumaʼu te manatu ʼaē ʼe tuʼu ʼi te Tohi-Tapu. (Mat. 4:4, 7; 19:4; 22:31) ʼE tou fia fakatokagaʼi ia nātou ʼaē ʼe fia logo ki te Tohi-Tapu; koia ʼe tou faka fealagia ai kia nātou ke nātou mahino, ko te meʼa ʼaē ʼe tou faka mafola pea mo tou akoʼi ʼe fakatafito ki te pule māʼoluga.
5 Neʼe fakaʼaogaʼi e Sesu te ʼu palalau fakanounou, ʼaoga, ʼe mole faigataʼa. Ohage la, ʼi tana fakamahino pe ʼe feafeaʼi tatatou maʼu ia te fakamolemole ʼa te ʼAtua, neʼe ina fakaloto mālohiʼi tatou ke tou loto fakamolemole ki niʼihi. (Mat. 6:14, 15) ʼE tonu ke tou faiga ke tou fakamahino te logo ʼo te Puleʼaga, ʼaki he ʼu palalau ʼe faigafua, mo ʼaoga.
6 Neʼe fakaʼaogaʼi fakalelei e Sesu te ʼu lea fakatātā pea mo te ʼu fehuʼi moʼo uga ʼo te ʼu manatu ʼa ʼihi. (Mat. 13:34, 35; 22:20-22) Ko te ʼu lea fakatātā ʼo ʼuhiga mo te ʼu meʼa ʼe hoko ʼi te ʼaho fuli, ʼe feala ke tokoni ki te hahaʼi ke mahino kia nātou ia te ʼu akonaki faigataʼa ʼo te Tohi-Tapu. ʼE tonu ke tou fai he ʼu fehuʼi moʼo fakaloto mālohiʼi ʼo nātou ʼaē ʼe fakalogo mai, ke nātou fakahā mai tanatou manatu. Ko te fai ʼo te ʼu fehuʼi ʼaē ʼe uga ai tanatou fakakaukau ʼe feala ke nātou fai ai he ʼu puleʼaki.
7 Neʼe toʼo e Sesu te temi moʼo fakamahino ʼo te ʼu manatu faigataʼa kia nātou ʼaē ʼe lahi tanatou fia mahino. Ko nātou ʼaē neʼe fia logo moʼoni, ohage la ko tana ʼu tisipulo, neʼe mahino kia nātou te fai akonaki ʼa Sesu. (Mat. 13:36) ʼO feiā aipe mo tatou, ʼe tonu ke tou tokoni kia nātou ʼaē ʼe nātou fai mai he ʼu fehuʼi fakamalotoloto. Kapau ʼe mole tou ʼiloʼi te ʼu tali, ʼe feala ke tou kumi te tali ʼo ʼuhiga mo te talanoa ʼaia pea tou liliu ʼo ʼaʼahi ia ia ʼi he tahi temi.
8 Neʼe fakaʼaogaʼi e Sesu te faʼifaʼitaki moʼo akoʼi. Ko he faʼifaʼitaki neʼe ina fai ʼi tana fufulu te ʼu vaʼe ʼo tana ʼu tisipulo, ka ko ia foki ko tonatou Pule. (Soane 13:2-16) Kapau ʼe tou fakahā te agavaivai, ko nātou ʼaē ʼe tou akoʼi ʼe nātou holi anai ke nātou maʼuliʼi te meʼa ʼaē ʼe nātou akoʼi.
9 Neʼe faiga Sesu ke lave ʼi te loto ʼo te hahaʼi pea mo tonatou ʼofa ʼaē ki te faitotonu. ʼE tou loto foki ke tou uga tonatou ʼu loto. ʼE tou faiga anai ke hake ia nātou te manatu ʼaē ʼe maʼu e te hahaʼi fuli ko te tauhi ki he tahi ʼe māʼoluga ake, pea ke nātou maʼuli mo niʼihi ʼi te tokalelei pea mo te fīmālie.
10 ʼI te māhina ko Tesepeli ʼe tou vaevae mo niʼihi te ʼu meʼa ʼaē neʼe tou akoʼi ʼo ʼuhiga mo Sesu, ʼaki tatatou tufa te tohi Te Tagata ʼAē ʼe Lahi Tokotahi ʼo Te ʼu Temi Fuli. Kaʼe tou faʼifaʼitaki ki te ʼu kalitate maʼuhiga ʼo te ʼu fai akonaki ʼa Sesu, ʼe tou uga anai te hahaʼi fakamalotoloto, ke nātou fakalogo ki tana fai akonaki ʼaē ʼe tou fakamahino age.—Mat. 10:40.