Tou Faʼifaʼitakiʼi Te Faiako Lahi

“Koutou ʼolo pea ke koutou fai ni ʼu tisipulo ʼi te hahaʼi . . . , ʼo koutou ako ia nātou ke nātou mulimuli ki te ʼu meʼa fuli pe ʼaē neʼe ʼau fakatotonu atu kia koutou.”—Mateo 28:19, 20, MN.

1, 2. (a) He koʼe ʼe feala ke tou ʼui ko tatou fuli ko he kau faiako? (b) ʼO ʼuhiga mo te akoʼi ʼo te hahaʼi, koteā te pilivilesio makehe ʼe maʼu e te kau Kilisitiano moʼoni?

ʼE KOUTOU faiako koa? ʼE feala pe ke tou ʼui ko tatou fuli ʼe tou faiako. ʼE koutou faiako mokā ʼe koutou fakahā age te ala ki he tahi neʼe hēʼia, peʼe koutou fakahā ki hokotou kaugā gāue peʼe feafeaʼi te fai ʼo te gāue, peʼe koutou fakamahino ki he tamasiʼi te haʼi ʼo tona ʼu sūlie. ʼE mole koutou fiafia koa la ʼi takotou tokoni ʼaia ki ʼihi?

² ʼO ʼuhiga mo te faiako, ʼe maʼu e te kau Kilisitiano te maʼua makehe. Neʼe fakatotonu mai kia tatou ke tou ‘fai ni ʼu tisipulo ʼo akoʼi nātou.’ (Mateo 28:19, 20) Pea ʼe toe feiā ʼi te kokelekasio, ʼe feala ke tou faiako. ʼE hinoʼi he ʼu tagata popoto ke nātou “tauhiovi mo faiʼako,” ke feala ai hanatou lagalaga te kokelekasio. (Efeso 4:11-13) ʼI tanatou ʼu gāue faka Kilisitiano, ko te kau fafine aga fakapotopoto ʼe nātou “fakaʼako te lelei” ki te kau fafine ʼaē kei finemui. (Tito 2:3-5) ʼE uga ia tatou fuli ke tou fakaloto mālohiʼi totatou ʼu tēhina ʼi te tui, pea ʼe feala ke tou fakahoko te faʼahi ʼaia ʼaki tatatou fakaʼaogaʼi te Tohi-Tapu moʼo fakaloto mālohiʼi ʼihi. (1 Tesalonika 5:11) ʼE ko he pilivilesio lahi ke tou liliu ko he ʼu faiako ʼo te Folafola ʼa te ʼAtua, pea mo tou vaevae te ʼu moʼoni fakalaumālie ʼaē ka fua lelei anai kia tatou ʼo talu ai!

3. ʼE tou lava hikihiki feafeaʼi tatatou faiako?

³ Kae ʼe lava feafeaʼi hatatou hikihiki tatatou faiako? ʼUluaki, ʼe tonu ke tou faʼifaʼitakiʼi te Faiako Lahi ko Sesu. Kae lagi feʼekeʼaki fēnei ʼihi: ‘ ʼE faigataʼa hatatou faʼifaʼitakiʼi ia Sesu koteʼuhi neʼe ko he tagata haohaoa.’ ʼE moʼoni, ʼe mole feala ke tou liliu ko he kau faiako haohaoa. Kae tatau aipe pe koteā tatatou ʼu fealagia, kae ʼe feala ke tou faiga lahi ke tou faʼifaʼitakiʼi te faʼahiga faiako ʼa Sesu. Tou vakaʼi ʼi te temi nei peʼe tou lava faʼifaʼitakiʼi feafeaʼi te ʼu faʼahiga faiako e fā ʼa Sesu—te faigafua ʼo tana faiakonaki, tana fai he ʼu fehuʼi lelei, tana uga ia te hahaʼi ke nātou fakakaukau poto, pea mo tana fakaʼaogaʼi te ʼu lea fakatātā.

Ke Faigafua

4, 5. (a) He koʼe ʼe ko he koga maʼuhiga te mahino gafua ʼo te moʼoni ʼo te Tohi-Tapu? (b) Ke faigafua tatatou faiako, he koʼe ʼe maʼuhiga ke tou filifili lelei te ʼu palalau ʼaē ka tou fai?

⁴ Ko te ʼu moʼoni tāfito ʼo te Folafola ʼa te ʼAtua ʼe mole faigataʼa. ʼI tana faikole, neʼe ʼui fēnei e Sesu: “E au fakafetai atu kia te koe, Tamai, koteuhi kua ke fufu ia mea aeni maia tagata poto mo atamai, pea ke fakaha kia natou liliki.” (Mateo 11:25) Neʼe fakahā e Sehova tana ʼu fakatuʼutuʼu ki te hahaʼi ʼaē neʼe loto moʼoni pea mo agavaivai. (1 Kolonito 1:26-28) Koia ʼe ko he koga maʼuhiga te mahino gafua ʼo te moʼoni ʼo te Tohi-Tapu.

⁵ Ka koutou fai he ako Tohi-Tapu peʼe koutou ʼaʼahi nātou neʼe fia logo, pea ʼe lava feafeaʼi ke faigafua takotou faiako? Koteā ʼaē neʼe tou ako mai te Tagata Faiako Lahi? Ke mahino lelei te hahaʼi kia te ia, tokolahi ia nātou neʼe ‘ko he ʼu hahaʼi neʼe mole ako pea neʼe nātou hage ko te hahaʼi fuli,’ koia neʼe fakaʼaogaʼi e Sesu he ʼu palalau neʼe feala hanatou mahino kiai. (Gaue 4:13) Koia ke faigafua takotou faiako, ʼe tonu ʼuluaki ke koutou tokakaga ki te ʼu palalau ʼaē ʼe koutou fakaʼaogaʼi. Ke feala he tui ʼa te hahaʼi ki te Folafola ʼa te ʼAtua, ʼe mole ʼaoga kia nātou he ʼu kupu peʼe ko he ʼu palalau ʼe faigataʼa fau. Ko “te faiva lea” ʼaia ʼe feala ke matataku ai te hahaʼi, tāfito nātou ʼaē neʼe mole fualoa tanatou ako. (1 Kolonito 2:1, 2) ʼE fakahā e te faʼifaʼitaki ʼa Sesu ko te ʼu kupu ʼaē ʼe filifili lelei ʼe feala ke ina fakahā mālohi te moʼoni.

6. Koteā ʼaē ʼe feala ke tou fai ke mole lahi fau te ʼu manatu ʼe tou fakahā kia ia ʼe ako?

⁶ Ke faigafua tatatou faiako, ʼe tonu ke tou tokakaga ke mole lahi fau te ʼu manatu ʼaē ʼe tou fakahā kia ia ʼaē ʼe ina ako te Tohi-Tapu. Neʼe ʼiloʼi e Sesu te ʼu tuʼakoi ʼo tana kau tisipulo. (Soane 16:12) ʼO feiā mo tatou ʼe tonu ke tou ʼiloʼi te ʼu tuʼakoi ʼo ia ʼaē ʼe ako. Ohage la, ka tou fai he ako ʼi te tohi Te ʼAtamai Mālama ʼAē ʼe Ina Taki Ki Te Maʼuli Heʼegata, ʼe mole ʼaoga ke tou fakamatala ia meʼa fuli pe.a Kae ʼe mole tonu foki ke tou vakaʼi fakavilivili te ʼu manatu, ohage leva ʼe maʼuhiga age te ʼu pasina ʼaē ʼe tonu ke tou fai. Kae ʼe lelei ke mulimuli te ako ki te ʼu meʼa ʼaē ʼe ʼaoga kia ia ʼaē ʼe ako pea mo tana ʼu fealagia. Ko tatatou fakatuʼutuʼu ko te tokoni kia ia ʼaē ʼe ako ke liliu ko he tisipulo ʼa Kilisito pea mo atolasio kia Sehova. ʼE tonu ke tou toʼo he temi feʼauga moʼo tokoni kia ia ʼaē ʼe ako ke mahino ki te meʼa ʼaē ʼe ina ako. ʼE feala ai ke malave te moʼoni ki tona loto pea mo ina uga ke ina maʼuliʼi.—Loma 12:2.

7. Koteā te ʼu tokoni ʼe ʼaoga kia tatou ke faigafua ai tatatou faiakonaki ʼi te kokelekasio?

⁷ Ka tou fai he akonaki ʼi te kokelekasio, tāfito mo kapau ʼe ʼi ai he ʼu hahaʼi foʼou, koteā te ʼu palalau ʼaē ʼe feala ke tou fai ke “[nātou] mahino kiai”? (1 Kolonito 14:9, MN ) Koutou tokagaʼi te ʼu manatu ʼaenī e tolu ʼe feala ke tokoni atu. ʼUluaki, koutou fakamahino te ʼu kupu fuli ʼaē ka koutou fakaʼaogaʼi pea mo tahitahiga te logo kiai. ʼUhi ko tatatou mahino ki te Folafola ʼa te ʼAtua, ʼe ʼi ai te ʼu kupu ʼe ko tatou pe ʼaē ʼe tou mahino kiai. Kapau ʼe tou palalau ki “te kaugana agatonu mo fakapotopoto,” “te tahi ʼu ōvi,” pea mo “Papiloni Lahi,” pea ʼe feala ke tou fakamahino lelei ʼaki he ʼu kupu ʼe faigafua. Lua, ʼaua naʼa lahi fau takotou palalau. ʼE feala ke mole kei tokagaʼi e te kokelekasio takotou akonaki mo kapau ʼe lahi fau takotou ʼu palalau peʼe faigataʼa fau. ʼE tou mahino lelei ki he puani mo kapau ʼe mole tou fakaʼaogaʼi te ʼu kupu ʼaē ʼe mole ʼaoga. Tolu, ʼaua naʼa koutou faiga ke lahi fau te ʼu manatu ʼe koutou fia palalau kiai. ʼE lagi ʼi ai he ʼu manatu lelei ʼi te ʼu kumi ʼaē neʼe tou fai. Kae ʼe lelei age te fakatuʼutuʼu ke mole lahi te ʼu puani tāfito ʼaē ka tou palalau kiai, ʼo tou fakaʼaogaʼi pe te manatu ʼaē ʼe lagolago ki te ʼu puani ʼaia pea mo feala ke tou talanoa kiai ʼi te temi ʼaē neʼe tuku atu.

Tou Fakaʼaogaʼi Lelei Te ʼu Fehuʼi

8, 9. ʼE tou lava filifili feafeaʼi he fehuʼi ʼe ʼalutahi mo te ʼu meʼa ʼe fia logo kiai te hahaʼi? Koutou tuku mai he ʼu faʼifaʼitaki.

⁸ Koutou manatuʼi ko Sesu neʼe poto lelei ʼi te fakaʼaogaʼi ʼo te ʼu fehuʼi ke fakahā e tana kau tisipulo tanatou manatu pea mo uga nātou ke nātou fakakaukau. ʼAki tana ʼu fehuʼi, neʼe malave Sesu ʼaki he agamālū ki tonatou loto pea mo ina uga nātou. (Mateo 16:13, 15; Soane 11:26) Ohage ko Sesu, ʼe tou lava fakaʼaogaʼi lelei feafeaʼi te ʼu fehuʼi?

⁹ Ka tou fai faka mafola ʼi te ʼu ʼapi, ʼe feala ke tou fai he ʼu fehuʼi ʼe fakatupu ai te fia logo ʼa te hahaʼi, ke feala ai hatatou palalau ki te Puleʼaga ʼo te ʼAtua. ʼE tou lava filifili feafeaʼi he fehuʼi ʼe fia logo anai kiai te tagata peʼe ko te fafine ʼo te ʼapi? Koutou fakasiosio lelei. Ka tou fakaōvi ki he ʼapi, tou fakasiosio ʼi te ʼu tafaʼaki. Kapau ʼe ʼi ai he ʼu meʼa gaoʼi ʼe leta ʼi tuʼa, pea ʼe tou ʼiloʼi ai ʼe ʼi ai te ʼu toe ʼi te ʼapi. Kapau koia, pea ʼe feala ke tou fehuʼi age fēnei: ‘Kua ke feʼekeʼaki koa peʼe feafeaʼi anai te malamanei ʼi te temi ʼaē ka lalahi ai tau ʼu fānau?’ (Pesalemo 37:10, 11) ʼE ʼi ai koa he ʼu tuʼuga loka ʼi te matapā peʼe ko he ʼā hila ʼo te ʼapi? ʼE feala ke koutou fehuʼi fēnei: ‘ ʼE ke manatu koa ʼe feala anai ʼi he ʼaho ke maʼuli fīmālie te hahaʼi ʼi tonatou loto fale pea ke mole nātou matataku mokā nātou feʼoloʼaki ʼi te ala?’ (Mikea 4:3, 4) Kapau ʼe koutou sio ki he ʼu meʼa faitoʼo, pea ʼe feala ke koutou fehuʼi age fēnei: ‘ ʼE ʼi ai anai koa he temi ʼe mole toe mahahaki ai te hahaʼi fuli?’ (Isaia 33:24) ʼE lahi te tahi ʼu manatu ʼe feala ke koutou maʼu ʼi te tohi Te ʼu Tokoni Ki Te ʼu Fai Palalau Faka Tohi-Tapu.b

10. ʼE tou lava fakaʼaogaʼi feafeaʼi te ʼu fehuʼi moʼo ‘toʼo mai ki tuʼa’ te ʼu manatu ʼo ia ʼaē ʼe ako, kae koteā ʼaē ʼe tonu ke tou manatuʼi?

¹⁰ ʼE koutou lava fakaʼaogaʼi lelei feafeaʼi te ʼu fehuʼi mokā koutou fai te ʼu ako Tohi-Tapu? ʼO mole hage ko Sesu, ʼe mole feala ke tou ʼiloʼi te loto ʼo te hahaʼi. Kae ʼaki he ʼu fehuʼi poto ʼe feala ke tou ‘toʼo mai ki tuʼa’ te ʼu manatu ʼo ia ʼaē ʼe ako. (Tāʼaga Lea 20:5) Ohage la ʼe koutou ako te kapite “He Koʼe Ko Te Maʼuliʼi ʼo Te Aga Faka Lotu ʼe Ina ʼAumai Te Fīmālie,” ʼi te tohi Te ʼAtamai Mālama. ʼE talanoa ai ʼo ʼuhiga mo te manatu ʼa te ʼAtua ki te aga fakakākā, te folonikasio, pea mo te tahi ʼatu ʼu meʼa. ʼE feala kia ia ʼaē ʼe ako ke ina tali lelei ki te fehuʼi, kae ʼe manatu tahi koa mo te meʼa ʼaē ʼe ina ako? ʼE feala ke tou fehuʼi age fēnei: ‘Kia koe la, ʼe fakapotopoto koa te manatu ʼa Sehova ʼo ʼuhiga mo te ʼu meʼa ʼaia?’ ‘ ʼE ke lava maʼuliʼi feafeaʼi te ʼu pelesepeto faka Tohi-Tapu ʼaenī?’ Kae koutou manatuʼi, ʼe tonu ke koutou fakaʼapaʼapa, ke koutou tokagaʼi te matagafua ʼo ia ʼaē ʼe ako. ʼE mole tou fai anai he ʼu fehuʼi ʼe ufiufi ai ia ia ʼe ina ako te Tohi-Tapu.—Tāʼaga Lea 12:18.

11. ʼE lava fakaʼaogaʼi lelei feafeaʼi e te ʼu tēhina faiakonaki te ʼu fehuʼi?

¹¹ Ko te ʼu tēhina faiakonaki, ʼe feala ke nātou fakaʼaogaʼi lelei te ʼu fehuʼi. Ko te ʼu fehuʼi ʼaē ʼe mole tonu ke tali leʼolahi kiai te kokelekasio, ʼe tokoni kia nātou ke nātou fakakaukauʼi. Neʼe tau fakaʼaogaʼi e Sesu te ʼu fehuʼi ʼaia. (Mateo 11:7-9) Tahi ʼaē meʼa, ʼi tana ʼosi fai tana ʼu ʼuluaki palalau, ʼe feala ki te tēhina faiakonaki ke ina lagaʼi he ʼu fehuʼi moʼo fakahā lelei te ʼu puani tāfito ʼaē ka talanoa anai kiai. ʼE feala ke ina ʼui fēnei: “ ʼI tatatou fai palalau ʼi te ʼaho nei, ʼe tou tali anai ki te ʼu fehuʼi ʼaenī . . .” Pea ʼi te fakaʼosi, ʼe feala ke ina toe fai te ʼu fehuʼi ʼaia moʼo fakamanatu te ʼu puani tāfito.

12. Koutou tuku mai he faʼifaʼitaki ʼe fakahā ai peʼe lava fakaʼaogaʼi feafeaʼi e te ʼu tagata ʼāfea te ʼu fehuʼi moʼo tokoni ki he tēhina ke ina maʼu te loto fīmālie ʼi te Folafola ʼa te ʼAtua?

¹² ʼI tanatou ʼaʼahi faka tauhi ōvi, ʼe feala ki te kau tagata ʼāfea ke nātou fakaʼaogaʼi te ʼu fehuʼi moʼo tokoni ki he tahi “kua lotovaivai” ke ina maʼu he loto fīmālie mai te Folafola ʼa Sehova. (1 Tesalonika 5:14) Ohage la, moʼo tokoni ki he tahi ʼe lotovaivai, ʼe feala ke fakahā age e te tagata ʼāfea ia Pesalemo 34:18. ʼE ʼui fēnei ai: “Ko Sehova ʼe ōvi kia nātou ʼaē ʼe lavea ʼonatou loto; pea ʼe ina hāofaki ia nātou ʼaē ʼe taʼomia tonatou laumālie.” Ke ʼiloʼi papau e te tagata ʼāfea peʼe kua mahino ia ia ʼaē ʼe lotovaivai ki te faka ʼuhiga ʼo te vaega ʼaia ki tona maʼuli, ʼe feala ke ina fehuʼi age fēnei: ‘ ʼE ōvi Sehova kia ai? ʼE lavea koa tou loto ʼi ʼihi temi pea mo ‘taʼomia tou laumālie’? Kapau, ohage ko tona ʼui e te Tohi-Tapu, ʼe ōvi Sehova ki te hahaʼi ʼaia, pea ko tona faka ʼuhiga ʼe ōvi atu kia koe.’ Ko te ʼu palalau fakaloto fīmālie ʼaia ʼe feala ke nātou fakaloto mālohi te laumālie ʼo ia ʼaē kua lotovaivai.—Isaia 57:15.

Tou Uga Te Hahaʼi Ke Nātou Fakakaukau Poto

13, 14. (a) ʼE tou lava uga feafeaʼi he tahi ʼe mole tui ki he ʼAtua fakapulipuli, ke ina maʼu he fakakaukau poto? (b) He koʼe ʼe mole tonu ke tou ʼamanaki ʼe tui anai te hahaʼi fuli?

¹³ ʼI tatatou minisitelio, ʼe tou fia malave ki te loto ʼo te hahaʼi, ʼo tou uga nātou ke nātou fakakaukau poto. (Gaue 19:8; 28:23, 24) Ko tona faka ʼuhiga koa ʼe tonu ke tou ako he ʼu manatu faigataʼa moʼo uga te hahaʼi ke nātou fakakaukau poto, pea mo feala hanatou tui ki te moʼoni ʼo te Folafola ʼa te ʼAtua? Kailoa ia. Ko he fakakaukau poto ʼe mole ʼaoga ia ke faigataʼa. ʼI te agamāhani, kapau ʼe faigafua tona fakamahino pea ʼe fua lelei age. Koʼeni te faʼifaʼitaki.

¹⁴ ʼE feafeaʼi anai hatatou tali ki he tahi ʼe ina ʼui mai ʼe mole feala ke tui ki he ʼAtua ʼe fakapulipuli? ʼE feala ke tou uga ia ia ke ina fakakaukauʼi te manatu ʼaenī: ʼe ʼi ai te tupuʼaga ʼo te ʼu meʼa fuli ʼaē neʼe hoko. Ka tou sio neʼe hoko he meʼa, pea ʼe tou ʼiloʼi neʼe ʼi ai tona tupuʼaga. ʼE feala ke tou ʼui fēnei: ‘Kapau ʼe koutou nofo ʼi he koga meʼa ʼe tuʼu mamaʼo pea mo koutou sio ki he ʼapi matalelei ʼe tānaki ai he ʼu meʼa kai (ko te meʼa ʼaia neʼe hoko), ʼe mahino ʼe koutou ʼui anai neʼe ʼi ai te tagata neʼe ina laga te ʼapi pea mo fafaʼo kiai te meʼa kai (hona tupuʼaga). ʼO toe feiā pe, ka koutou sio ki te faʼufaʼu ʼo te natula pea mo te mahu ʼo te meʼa kai ʼi te kele (ko te meʼa ʼaia neʼe hoko), ʼe mole tou tali anai koa neʼe ko he Tahi (hona tupuʼaga) ʼaē neʼe ina fakatupu te ʼu meʼa ʼaia?’ ʼE lelei ʼaupito te manatu ʼaenī ʼe tou maʼu ʼi te Tohi-Tapu: “Ko te api fuape e i ai tona tufuga, kae ko te tufuga o meafuape e ko te Atua.” (Hepeleo 3:4) Kae tatau aipe peʼe feafeaʼi tatatou fai palalau mo te hahaʼi, kae ʼe mole tui anai te hahaʼi fuli. ʼE fakamanatuʼi mai e te Tohi-Tapu, ko nātou pe ʼaē ʼe “lotolelei” ʼe nātou tui anai.—Gaue 13:48, MN; 2 Tesalonika 3:2.

15. Koteā te ʼu faʼahiga palalau ʼe tou lava fakaʼaogaʼi moʼo fakahā lelei te ʼu kalitate pea mo te aga ʼa Sehova, pea koteā te ʼu faʼifaʼitaki ʼe fakahā ai peʼe feafeaʼi hatatou fakaʼaogaʼi te faʼahi ʼaia?

¹⁵ ʼI tatatou faiako, ʼi te fai faka mafola peʼe ʼi te kokelekasio, ʼe feala ke tou uga te hahaʼi ke nātou fakakaukau ʼo ʼuhiga mo te ʼu kalitate pea mo te aga ʼa Sehova. ʼE fua lelei tāfito te faʼahiga fakakaukau ʼaē neʼe tau fakaʼaogaʼi e Sesu, ʼi tana ʼui ‘e feafeaʼi leva la.” (Luka 11:13; 12:24) Ko te faʼahiga fakakaukau ʼaia ʼe malave ʼaupito ki te hahaʼi. Moʼo fakahā te mole fakapotopoto ʼo te akonaki ʼo te ʼifeli, ʼe tou lava ʼui fēnei: ‘ ʼE mole fakatūʼa anai e he tāmai hana tamasiʼi ʼo ina tutu tona nima ʼi te afi. E feafeaʼi leva la ki te ʼifeli ʼaē ʼe ko he meʼa fakalialia ki tatatou Tāmai ʼofa ʼaē ʼi selo!’ (Selemia 7:31) Moʼo akoʼi ko Sehova ʼe tokaga ki tana ʼu kaugana takitokotahi, ʼe tou lava ʼui fēnei: ‘Kapau ʼe ʼiloʼi e Sehova te ʼu higoa takitokotahi ʼo te ʼu lauʼi miliale fetuʼu, pea e feafeaʼi leva la tana tokaga ki te hahaʼi ʼaē ʼe ʼoʼofa kia te ia pea mo ina totogi nātou ʼaki te taʼataʼa maʼuhiga ʼo tona ʼAlo!’ (Isaia 40:26; Gaue 20:28) Ko te taʼi palalau ʼaia ʼe lava malave ki te loto ʼo te hahaʼi.

Ko He ʼu Lea Fakatātā ʼe Tau Mo Feʼauga

16. He koʼe ʼe maʼuhiga te ʼu lea fakatātā ʼi te faiako?

¹⁶ Ko he ʼu lea fakatātā lelei ʼe feala ke tupu ai he fia logo ʼa te hahaʼi ki tatatou faiako. He koʼe ʼe maʼuhiga te ʼu lea fakatātā mokā tou faiako? Neʼe tohi fēnei e te tagata faiako: “ ʼE faigataʼa ki te hahaʼi hanatou fakakaukauʼi he meʼa ʼe mole nātou sio kiai.” ʼAki te ʼu lea fakatātā ʼe tou taupau ai he ʼu tuʼuga paki ʼi totatou fakakaukau, pea ʼe tokoni mai kia tatou ke katoa age tatatou mahino ki te ʼu manatu foʼou. Neʼe makehe ia Sesu ʼi tana fakaʼaogaʼi te ʼu lea fakatātā. (Maleko 4:33, 34) Tou vakaʼi peʼe tou lava fakaʼaogaʼi feafeaʼi te faʼahiga faiako ʼaia.

17. Koteā te ʼu faʼahi e fā ʼe feala ke fua lelei ai he lea fakatātā?

¹⁷ Koteā te ʼu faʼahi ʼe feala ke fua lelei ai he lea fakatātā? ʼUluaki, ʼe tonu ke faka ʼalutahi mo te hahaʼi ʼaē ʼe fakalogo mai, ke talanoa ki he ʼu ʼaluʼaga ʼe feala hanatou mahino kiai. ʼE tou manatuʼi neʼe fakaʼaogaʼi lahi e Sesu ʼi tana ʼu lea fakatātā te ʼu meʼa ʼaē neʼe māhani kiai te hahaʼi. Lua, ko he lea fakatātā ʼe tonu ke ʼalutahi mo te manatu ʼaē ʼe tou fia talanoa kiai. Kapau ʼe mole lelei te lea fakatātā, pea ʼe mole tokoni anai ki te hahaʼi ʼaē ʼe fakalogo mai. Tolu, ʼe mole tonu ke lahi fau te ʼu manatu ʼaē ʼe tou fakahā ʼi he lea fakatātā. Koutou manatuʼi neʼe talanoa Sesu ki te ʼu manatu ʼaē neʼe ʼaoga moʼoni kae neʼe mole ina hilifaki he ʼu manatu neʼe mole hona ʼaoga. Fā, ka tou fakaʼaogaʼi he lea fakatātā, pea ʼe tonu ke tou ʼiloʼi papau peʼe kua mahino lelei te hahaʼi ki te faʼahi ʼaē neʼe tou fia talanoa kiai, heʼe feala ki ʼihi ke mole nātou mahino kiai.

18. ʼE lava feafeaʼi hatatou fai he ʼu lea fakatātā ʼe tau mo feʼauga?

¹⁸ ʼE lava feafeaʼi hatatou fai he ʼu lea fakatātā ʼe tau mo feʼauga? ʼE mole ʼaoga ke tou fakakaukauʼi he ʼu hisitolia loaloaga pea mo faigataʼa fau. Ko te ʼu lea fakatātā nounou ʼe feala ke fua lelei. Koutou fakakaukau ki he ʼu lea fakatātā ʼo ʼuhiga mo te ʼu puani neʼe koutou fai palalau kiai. Ohage la ʼe koutou fai palalau ʼo ʼuhiga mo te fakamolemole ʼa te ʼAtua, pea ʼe koutou fia fai he lea fakatātā ʼo ʼuhiga mo te manatu ʼaē ʼe tuʼu ia Gaue 3:19, ʼaē ʼe ʼui ai ko Sehova ʼe ina ‘molehi’ tatatou ʼu agahala. Ko he palalau fakatātā ʼaia, kae ʼe feala ke tou fakatātā ki he eposi. ʼE feala ke tou ʼui fēnei: ‘Ka fakamolemole e Sehova tatatou ʼu agahala, pea ʼe ina molehi tatatou ʼu agahala ohage pe ʼe ina fakaʼaogaʼi he eposi.’ ʼAki te lea fakatātā ʼaia, ʼe faigafua anai hakita mahino ki te manatu.

19, 20. (a) ʼE tou lava maʼu ʼifea he ʼu lea fakatātā lelei? (b) Koteā ʼihi faʼifaʼitaki ʼo he ʼu lea fakatātā lelei neʼe tā ʼi tatatou ʼu tohi? (Vakaʼi mo te talanoa.)

¹⁹ ʼE koutou lava maʼu ʼifea he ʼu lea fakatātā ʼe tau mo feʼauga, pea mo talanoa ki he ʼu meʼa moʼoni? ʼI tokotou maʼuli peʼe ʼi te ʼu ʼaluʼaga kehekehe ʼo te maʼuli pea mo te ʼu meʼa ʼaē neʼe hoko ki te ʼu tēhina mo tuagaʼane. ʼE feala ke koutou maʼu he ʼu fakatātā mai te tahi atu faʼahi, ohage ko te ʼu manu pea mo he ʼu meʼa ʼi te loto fale, peʼe ko he meʼa neʼe hoko pea ʼe ʼiloʼi lelei e te hahaʼi. Ke feala hakotou maʼu he ʼu lea fakatātā ʼe lelei, ʼe tonu ke koutou “tokagaʼi lelei” te ʼu ʼaluʼaga fuli ʼaē ʼe hoko. (Gaue 17:22, 23, MN ) Ko te tohi ʼe palalau ki te faiakonaki ʼe ina fakamahino fēnei: “Ko te tagata faiakonaki ʼaē ʼe ina tokagaʼi te maʼuli ʼo te hahaʼi pea mo tanatou ʼu gāue kehekehe, mo fai palalau mo te tagata kehekehe fuli pe, mo ina vakavakaʼi lelei ia meʼa fuli pe, pea mo fai fehuʼi ʼo aʼu ki tana mahino kia nātou, ʼe ina tānaki anai he ʼu tuʼuga lea fakatātā ʼe ina fakaʼaogaʼi anai moʼo tokoni kia ia ʼi te temi ʼaē ʼe ʼaoga anai.”

²⁰ ʼE ʼi ai te tahi tokoni ke tou maʼu ai he ʼu lea fakatātā—ko Te Tule Leʼo, mo te Réveillez-vous ! pea mo te tahi ʼu tohi neʼe tā e te kau Fakamoʼoni ʼa Sehova. ʼE lahi te ʼu meʼa ʼe feala ke koutou ako mokā koutou vakaʼi peʼe fakaʼaogaʼi feafeaʼi e te ʼu tohi ʼaia te ʼu lea fakatātā.c Ohage la, koutou vakaʼi te lea fakatātā ʼaē neʼe fakaʼaogaʼi ʼi te palakalafe 11 ʼo te kapite 17 ʼo te tohi Te ʼAtamai Mālama. ʼE fakatātā ai te ʼu agaaga kehekehe ʼaē ʼe tou maʼu ʼi te kokelekasio ki te ʼu motokā kehekehe ʼe feʼoloʼaki ʼi ʼotatou ʼu tafa. He koʼe ʼe lelei te lea fakatātā ʼaia? Koutou tokagaʼi ʼe talanoa ki he ʼu meʼa ʼe tou māhani kiai, ʼe pipiki lelei ki te manatu ʼe tou fia talanoa kiai, pea ʼe hā lelei ai te ako ʼe feala ke tou tāʼofi mai ai. ʼE feala ke tou fakaʼaogaʼi te ʼu lea fakatātā ʼaē ʼe tuʼu ʼi tatatou ʼu tohi, mokā tou faiako, ʼo lagi tou faka ʼalutahi mo te ʼu meʼa ʼe ʼaoga kia ia ʼe ako peʼe ki he faiakonaki.

21. Koteā te ʼu lelei ʼe tou maʼu mo kapau ʼe tou akoʼi fakalelei te Folafola ʼa te ʼAtua ki te hahaʼi?

²¹ ʼE lahi te ʼu tapuakina ʼe tou maʼu mokā tou liliu ko he faiako lelei. Ka tou faiako, ʼe tou vaevae mo te hahaʼi, ʼe tou foaki totatou temi pea mo totatou mālohi moʼo tokoni kia nātou. ʼI tatatou foaki ʼaia, ʼe tou maʼu ai te fiafia, heʼe ʼui fēnei e te Tohi-Tapu: “ ʼE lahi age te fiafia ʼi takita foaki, ʼi takita tali.” (Gaue 20:35, MN ) Kia nātou ʼaē ʼe nātou akoʼi te Folafola ʼa te ʼAtua ki te hahaʼi, ʼe nātou fiafia ʼi tanatou ʼiloʼi ʼe nātou foaki he meʼa ʼe moʼoni pea mo maʼuhiga tuʼumaʼu—te moʼoni ʼo ʼuhiga mo Sehova. ʼE feala ke tou toe fiafia ʼi tatatou ʼiloʼi e tou faʼifaʼitakiʼi te Tagata Faiako Lahi—ia Sesu Kilisito.

[Kiʼi nota]

ʼE Kei Koutou Manatuʼi Koa?

• ʼE lava faigafua feafeaʼi tatatou fai te ʼu ako Tohi-Tapu ʼa te hahaʼi? mo tatatou faiakonaki ʼi te kokelekasio?

• ʼE tou lava fakaʼaogaʼi lelei feafeaʼi te ʼu fehuʼi mokā tou fai faka mafola ʼi te ʼu ʼapi?

• E feafeaʼi hatatou uga te hahaʼi ke nātou fakakaukauʼi te ʼu kalitate pea mo te aga ʼa Sehova?

• ʼE tou lava maʼu ʼifea he ʼu lea fakatātā ʼe tau mo feʼauga?

[Talanoa ʼo te pasina 23]

ʼE Kei Koutou Manatuʼi Koa Te ʼu Lea Fakatātā ʼAenī?

Ko he ʼu kiʼi lea fakatātā ʼe fakahā atu ʼi henī. ʼE feala ke koutou vakaʼi te ʼu tohi pea mo te ʼu nusipepa ʼaē ʼe maʼu ai, pea mo koutou tohi peʼe tokoni feafeaʼi te lea fakatātā ke koutou mahino ki te manatu ʼaē ʼe fia talanoa kiai.

• Ohage ko he tahi ʼe kālupe ʼi te maea ʼi ʼoluga pea hopo pea puke ia ia e te tahi ʼe kālupe, pea mo te toko lua ʼe feʼoloʼaki ʼo fakaheheke ʼi te fuga ʼo te ʼaisi, ʼo toe feiā pe mo ia ʼaē ʼe ina fia maʼu he maʼuli faka taumatuʼa ʼe lelei ʼe tonu ke ʼalutahi mo tona hoa.—Te Tule Leʼo ʼo te ʼaho 15 ʼo Maio 2001, pasina 16.

• Ko te fakahā ʼo takotou ʼu manatu ʼe hage pe ko takotou lī he foʼi fiti. ʼE feala ke koutou lī māmālie te foʼi fiti ʼo faigafua tona hapo, peʼe feala ke koutou lī fakamālohi kae fakatupu mamahi.—Te ʼAtamai Mālama ʼAē ʼe Ina Taki Ki Te Maʼuli Heʼegata, pasina 144.

• Ko te ako ke kita fakahā te ʼofa ʼe hage ko takita ako he lea foʼou.—Te Tule Leʼo ʼo te ʼaho 15 ʼo Fepualio 1999, pasina 18, 22-23.

• Ko te maʼu ʼo te agahala ʼe hage pe ko te meʼa ʼaē ʼe hoko mokā haga he tagata taʼo pane ʼo fakamoho he foʼi pane ʼi he pa ʼe koko. Ko te foʼi pane fuli pe ʼe taʼo ai ʼe ʼiloga aipe te koko ʼo te pa. ʼE feiā, ʼe feala pe ke fakatatau ia Atama ki te pa, pea mo tatou ki te foʼi pane.—E Feala Keke Mauli O Heegata Ite Palatiso Ite Kele, pasina 69, palakalafe 15.

• Ko te faifakalauʼakau ʼe mulimuli ki te ʼu meʼa ʼaē ʼe loto e te kau temonio ohage pe ko te ʼu hele ʼaē ʼe fakaʼaogaʼi e te tagata kapu manu moʼo puke te ʼu manu.—Te ʼAtamai Mālama ʼAē ʼe Ina Taki Ki Te Maʼuli Heʼegata, pasina 109.

• Ko te hāofaki e Sesu te hākoga ʼo Atama ʼe feala ke fakatatau ki he tagata koloaʼia ʼe ina totogi te ʼu maʼua ʼo he fale gāue (neʼe ko te ʼu maʼua ʼa te patolo aga kākā) pea ina toe avahi te fale gāue, ʼo fua lelei ai ki te hahaʼi gāue tokolahi.—Te Tule Leʼo ʼo te ʼaho 15 ʼo Fepualio 1999, pasina 16.

• Koutou fakakaukauʼi age muʼa te gāue ʼaē ʼe fai e te ʼu tagata hāofaki hahaʼi, ʼi he koga meʼa neʼe hoko ai he tuʼutāmaki. Tatau aipe peʼe gāue ʼihi ʼi te koga meʼa ʼe tokosiʼi ai te hahaʼi ʼaē neʼe hāo ʼi te tuʼutāmaki, kae ʼe mole nātou fakatuatuai anai peʼe nātou tuku anai tanatou gāue ʼuhi pe heʼe tokolahi age te hahaʼi ʼaē ʼe hāofaki e tonatou ʼu kaugā gāue ʼi he tahi koga meʼa. ʼE mole heʼeki ʼosi tatatou gāue ʼaē ko te hāofaki ʼo te hahaʼi. ʼI te taʼu fuli, ʼe maʼu te lauʼi teau afe hahaʼi ʼaē ʼe nātou fia hāo ʼi “te mamahi lahi.” (Apokalipesi 7:9, 14, MN )—Te Minisitelio ʼo Te Puleʼaga ʼo Tesepeli 1998, pasina 1.

[Paki ʼo te pasina 20]

Ko te kau Kilisitiano moʼoni ʼe nātou akoʼi te Folafola ʼa te ʼAtua ki te hahaʼi

[Paki ʼo te pasina 21]

ʼE feala ke fakaʼaogaʼi e te kau tagata ʼāfea he ʼu fehuʼi moʼo tokoni ki te ʼu tēhina ke nātou maʼu he fīmālie mai te Folafola ʼa te ʼAtua