Koutou Fakasiosio Poto Pea Mo Fakalotoʼi Te Hahaʼi Mokā Koutou Faiakonaki

“Ko te loto ʼo te tagata poto ʼe ina akoʼi tona gutu ke fakasiosio poto, pea ʼe ina hilifaki ki tona ʼu laugutu te mālohi ʼo te fakalotoʼi.”​—Tāʼaga Lea 16:23.

1. He koʼe ko te akoʼi ʼo te Folafola ʼa te ʼAtua, ʼe mole gata ʼaki pe te fakahā ʼo he ʼu manatu?

ʼI TOTATOU ʼuhiga faiako ʼo te Folafola ʼa te ʼAtua, ʼe tou fakatuʼutuʼu ke mole gata ʼaki pe tatatou akoʼi te ʼatamai ʼo tatatou kau ako, kae ke tou akoʼi foki mo tonatou loto. (Efeso 1:​18) Koia la ʼaē, ko te faiakonaki ʼe mole gata ʼaki pe te fakahā ʼo he ʼu manatu. ʼE ʼui fēnei ia Tāʼaga Lea 16⁠:23: “Ko te loto ʼo te tagata poto ʼe ina akoʼi tona gutu ke fakasiosio poto, pea ʼe ina hilifaki ki tona ʼu laugutu te mālohi ʼo te fakalotoʼi.”

2. (a) Koteā te faka ʼuhiga ʼo te ʼui ʼaē ke tou fakalotoʼi te hahaʼi? (b) ʼE lava feafeaʼi ki te kau Kilisitiano fuli ke nātou fakalotoʼi te hahaʼi ʼaki tanatou faiakonaki?

² ʼE mahino ia, neʼe fakaʼaogaʼi e Paulo te tokoni ʼaia ʼi tana faiakonaki. ʼI tana nofo ʼi Kolonito, “ko te sapato fulipe nee faiʼakonaki ia i te sinakoka o ina faigai ke tui te hahai sutea mo keleka.” (Gāue 18:4) ʼE ʼui e te tagata sivi lea ʼiloa, ko te kupu faka Keleka ʼaē ʼe fakaliliu ʼaki te ʼu kupu “faigai ke tui” ʼe faka ʼuhiga ki “hakita faiga ke kita fetogi te manatu ʼa he tahi ʼo kita tokoni age kia ia ke ina fakakaukauʼi he ʼu faʼahiga manatu.” ʼAki he ʼu palalau fakapotopoto, neʼe lava fetogi e Paulo te faʼahiga manatu ʼa te hahaʼi. Neʼe manavasiʼi kia ia tona ʼu fili ʼuhi ko tana faiva ʼi te fakalotoʼi. (Gāue 19:​24-​27) Kae ko te faiakonaki ʼa Paulo, neʼe mole ina fai moʼo fakahā he poto fakatagata. Neʼe ina ʼui fēnei ki te kau Kolonito: “Nee mole fakatafito taku lea mo taku akonaki ki te u lea fakaoloolo o te poto, kae nee fakatafito ki he fakaha o te Laumalie mo te malohi, koteuhi ke aua naa fakatafito tautou tui ki te poto o te tagata kae ki te Mafimafi o te Atua.” (1 Kolonito 2:​4, 5) Mai tona ʼuhiga ʼaē ʼe foaki ki te kau Kilisitiano fuli te tokoni ʼo te laumālie ʼa Sehova ʼAtua, koia ʼe feala kia nātou fuli ke nātou faiakonaki mo fakalotoʼi te hahaʼi. ʼO feafeaʼi? Tou vakaʼi nei he ʼu tokoni ʼe ʼaoga anai kia tatou ke tou faiva ʼi te faiakonaki.

Koutou Fakalogo Fakalelei

3. He koʼe ʼe maʼuhiga te fakasiosio poto mokā tou akoʼi te hahaʼi, pea ʼe lava feafeaʼi ke malave ki te loto ʼo te kau ako Tohi-Tapu?

³ Ko te ʼuluaki tokoni ʼo ʼuhiga mo te faiakonaki, ʼe mole faka ʼuhiga ki takita poto palalau, kae ki takita fakalogo. Ohage ko tona ʼui ia Tāʼaga Lea 16:23, ʼe hoki feala hakita fakalotoʼi te hahaʼi mo kapau ʼe kita ʼuluaki maʼu te fakasiosio poto. ʼE mahino ia, neʼe maʼu e Sesu he fakasiosio poto ʼo ʼuhiga mo te hahaʼi ʼaē neʼe ina akoʼi. ʼE ʼui fēnei ia Soane 2:​25: “E ina iloi te mea i te loto o te tagata.” Kae ʼe tou lava ʼiloʼi feafeaʼi te meʼa ʼaē ʼi te loto ʼo nātou ʼaē ʼe tou akoʼi? ʼE tou lavaʼi anai te faʼahi ʼaia mo kapau ʼe tou fakalogo fakalelei ki tanatou ʼu palalau. ʼE ʼui fēnei ia Sakopo 1:​19: “Ke vave te fagono a te tagata fuape, ke fakatokatoka ki te lea.” ʼE moʼoni, ʼe mole faigafua ki te hahaʼi fuli tanatou fakahā tanatou ʼu manatu. Kapau ʼe fakatokagaʼi e ia ʼaē ʼe ako mo kita ʼe kita tokaga moʼoni kia ia, pea ʼe lagi faigafua anai hana fakahā mai kia kita te ʼu meʼa ʼaē ʼi tona loto. ʼAki he ʼu fehuʼi fakapotopoto ʼe feala ke kita lave ki te loto ʼo te hahaʼi pea mo kita “ ʼohu” mai ai tanatou ʼu manatu.​—Tāʼaga Lea 20:5.

4. He koʼe ʼe maʼua ki te kau tagata ʼāfea ke nātou fakalogo fakalelei?

⁴ ʼE maʼuhiga tāfito ki te kau tagata ʼāfea ke nātou fakalogo fakalelei, pea hoki feala ai leva ke nātou “iloi te tali e tonu ke [natou] fai kia natou takitahi.” (Kolose 4:6) ʼE fai te fakatokaga ʼaenī ia Tāʼaga Lea 18:13: “Ka tali he tahi ki he meʼa neʼe mole heʼeki logo kiai, ʼe ko hana agavale pea mo fakaufiufi.” Neʼe ʼi ai te ʼu tēhina e toko lua, neʼe nā tokoniʼi te tuagaʼane ʼo ʼuhiga mo te holi ki te ʼu meʼa ʼo te mālama, he neʼe tau puli te tuagaʼane ʼi te ʼu fono. Neʼe lotomamahi ai te tuagaʼane, he neʼe mole nā kole age kia ia pe koʼe neʼe mole haʼu ki te ʼu fono ʼaia. Mole heʼeki faʼa fualoa ʼi muʼa atu, neʼe tafa te tuagaʼane, pea neʼe toe lelei māmālie pe. ʼE hā lelei ai te maʼuhiga ʼaē ke tou fakalogo ʼi muʼa ʼo hatatou fai he tokoni!

5. ʼE lava fakatokatoka feafeaʼi e te kau tagata ʼāfea te ʼu fihi ʼaē ʼe hoko ʼi te kokelekasio?

⁵ Ko te faiakonaki ʼa te kau tagata ʼāfea, ʼi te agamāhani ʼe kau kiai te fai ʼo he ʼu tokoni ki ʼihi. ʼE toe ʼaoga ai ke nātou fakalogo fakalelei. ʼE maʼuhiga tāfito te fakalogo mokā fefihiʼaki te ʼu Kilisitiano. ʼE tonu ke fakalogo muʼa te kau tagata ʼāfea, pea hoki feala ai leva ke nātou faʼifaʼitakiʼi “te Tamai, iaʼia ae e mole ina fakakehekehe [te hahaʼi] i tana fakamau.” (1 Petelo 1:​17) ʼE feala pe ke hoko ʼita te ʼu Kilisitiano ʼaia ʼe nātou fefihiʼaki, koia ʼe lelei ai ke manatuʼi e te kau tagata ʼāfea te tokoni ʼaē ia Tāʼaga Lea 18:17: “Ko ia ʼaē ʼe ʼuluaki palalau ʼi tona fakamāuʼi ʼe faitotonu ia; ʼe haʼu tona kāiga pea ʼe mahino papau ia ʼe ina sivisivi ia ia.” Ko he faiako ʼe faiva, ʼe fakalogo anai ki te ʼu manatu kehekehe ʼo ʼuhiga mo te fihi ʼaia. Kapau ʼe faikole, pea ʼe faiga anai ke tokalelei te fai palalau. (Sakopo 3:​18) Kapau ʼe fakahaʼuhaʼu ʼo kovi te ʼu palalau ʼa te ʼu Kilisitiano ʼaē ʼe fefihiʼaki, pea ʼe lagi kole age anai e te tagata ʼāfea ke nātou palalau ʼāteaina pe kia ia. ʼAki he ʼu fehuʼi fakapotopoto, ʼe lagi feala anai ke fakahā e te tagata ʼāfea pe koteā te ʼuhiga moʼoni ʼo te fihifihia. ʼI te agamāhani, ʼe tupu te ʼu fihi ʼaia he neʼe mole felogoi lelei te ʼu Kilisitiano ʼaia, ka mole ʼuhi he neʼe nātou aga fakakākā. Kae kapau neʼe maumauʼi he pelesepeto ʼo te Tohi-Tapu, pea ʼe feala ai ki he faiako agaʼofa ke ina fai he tonu fakapotopoto, ʼi te ʼosi fakamatala age ʼo te fihifihia ʼaē neʼe hoko.

Ke Faigafua Takotou Faiakonaki

6. Koteā te faʼifaʼitaki ʼaē neʼe tuku mai e Paulo pea mo Sesu ʼi tanā faiga ʼaē ke faigafua tanā faiakonaki?

⁶ Ko te tahi tokoni ʼo ʼuhiga mo tatatou faiakonaki, ʼe ko tatatou faiga ʼaē ke faigafua tuʼumaʼu. ʼE moʼoni, ʼe tou fia tokoni kia nātou ʼaē ʼe ako te Tohi-Tapu ke nātou “mahino fakatahi mo te kaigalotu katoa, pe kotea te laulahi, mo te loa, mo te maoluga pea mo te loloto” ʼo te moʼoni. (Efeso 3:​18) ʼE ʼi ai te ʼu akonaki faka Tohi-Tapu ʼe lelei kae ʼe faigataʼa. (Loma 11:33) Kae ʼi te temi ʼaē neʼe faka mafola ai ia Paulo ki te hahaʼi Keleka, neʼe talanoa tāfito ki te logo ʼo ʼuhiga mo ‘Kilisito ʼaē neʼe haʼi ki te pou.’ (1 Kolonito 2:​1, 2, NW) ʼO toe feiā aipe mo Sesu, neʼe mahino lelei tana fai faka mafola pea neʼe fia logo kiai te hahaʼi. Neʼe ina fakaʼaogaʼi te ʼu kupu faigafua ʼi tana Akonaki ʼi te Moʼuga. Kae ʼe maʼu ai te ʼu moʼoni maʼuhiga ʼaupito ʼe mole hona tatau.​—Mateo, kapite 5 ki te 7.

7. ʼE lava feafeaʼi hatatou fai he ʼu palalau faigafua mokā tou fai he ako Tohi-Tapu?

⁷ ʼO toe feiā pe mo tatou, ʼe feala ke tou faka faigafua tatatou ʼu palalau mokā tou fai te ʼu ako Tohi-Tapu. ʼO feafeaʼi? ʼO tou manatuʼi “te ʼu meʼa ʼaē ʼe maʼuhiga tāfito.” (Filipe 1:​10, NW) Ka tou fakamahino he ʼu akonaki faigataʼa, ʼe tonu ke tou fakaʼaogaʼi he ʼu kupu ʼe mahino gafua. ʼE tonu ke tou faka maʼuhigaʼi te ʼu vaega Tohi-Tapu tāfito, ka mole tou faiga ke tou lau pea mo fakamahino te ʼu vaega Tohi-Tapu fuli ʼaē ʼe mole tohi katoa ʼi te tohi ʼaē ʼe tou ako. Koia ʼe maʼua ai kia tatou ke tou teuteuʼi lelei. ʼE tonu ke tou tokaga naʼa lahi fau te ʼu meʼa ʼaē ʼe tou fakahā kia ia ʼaē ʼe ako, pea ʼe mole tou palalau fualoa anai ki he ʼu faʼahi ʼe mole faʼa maʼuhiga. Kapau ko ia ʼaē ʼe ako ʼe ina fai hana fehuʼi ʼe mole ʼalutahi mo te ako, pea ʼe feala ke tou ʼui fakalelei age ʼe tou vakaʼi anai ʼi te ʼosi fai ʼo te ako.

Koutou Fakaʼaogaʼi Te ʼu Fehuʼi

8. Neʼe lelei feafeaʼi te fakaʼaogaʼi e Sesu te ʼu fehuʼi?

⁸ Ko te tahi tokoni ʼo ʼuhiga mo te faiakonaki, ʼe ko te fakaʼaogaʼi ʼo he ʼu fehuʼi fakapotopoto. Neʼe lahi te fakaʼaogaʼi e Sesu te ʼu fehuʼi ʼi tana faiakonaki. Ohage la, neʼe fehuʼi age e Sesu kia Petelo: “ ‘Kotea tau manatu Simone, ko te u hau o te kelekele, e natou mau maia ai te tukuhau, pe ko te u fatogia mai anatou fanau, pe mai te hahai kehe?’ Pea nee ina taliʼage: ‘Mai te hahai kehe.’ Nee folafolaʼage Sesu kia te ia: ‘Pea e ateaina ai foki te u fanau.’ ” (Mateo 17:​24-​26) ʼI tona ʼuhiga ʼAlo ʼulu tokotahi ʼo te ʼAtua ʼaē neʼe tauhi ki ai te hahaʼi ʼi te fale lotu, neʼe mole maʼua kia Sesu ke ina totogi te tukuhau ʼo te fale lotu. Kae neʼe fakahā age e Sesu te faʼahi ʼaia ʼo ina fakaʼaogaʼi te ʼu fehuʼi fakapotopoto. Koia neʼe tokoni ai Sesu kia Petelo ke ina maʼu totonu te tali ki tana fehuʼi ʼo fakatafito ki te ʼu meʼa ʼaē neʼe kua ina ʼiloʼi.

9. ʼE tou lava fakaʼaogaʼi feafeaʼi te ʼu fehuʼi mokā tou fai he ako Tohi-Tapu?

⁹ ʼE feala ke fua lelei tatatou fakaʼaogaʼi te ʼu fehuʼi mokā tou fai te ʼu ako Tohi-Tapu. Kapau ʼe hala te tali ʼo ia ʼaē ʼe tou ako, pea ʼe lagi faigafua anai kia tatou hatatou foaki age te tali ʼaē ʼe totonu, kae ʼe ina tāʼofi anai koa te manatu ʼaia? ʼI te agamāhani, ʼe lelei age hatatou faigaʼi ke ina maʼu te tali, ʼo tou fai he ʼu fehuʼi fakapotopoto. Ohage la, kapau ʼe mole faʼa mahino, pe koʼe ʼe tonu ke tou fakaʼaogaʼi te huafa ʼo te ʼAtua, pea ʼe feala ke tou fehuʼi fēnei age, ‘Kia koe la, ʼe maʼuhiga koa tou higoa? . . . Koteā tona tupuʼaga? . . . Koteā la tau manatu mo kapau ʼe mole fia fakaʼaogaʼi e te hahaʼi tou higoa? . . . ʼE mole tonu koa la te fakamaʼua mai ʼaē e te ʼAtua ke tou fakaʼaogaʼi tona huafa?’

10. ʼE lava feafeaʼi ki te kau tagata ʼāfea, tanatou fakaʼaogaʼi he ʼu fehuʼi mokā nātou tokoni ki he tahi neʼe lotomamahi ʼaupito?

¹⁰ Ko te kau tagata ʼāfea, ʼe feala ke nātou fakaʼaogaʼi mo nātou te ʼu fehuʼi ʼi tanatou tauhi te faga ōvi. Ko te tokolahi ʼi te kokelekasio, neʼe nātou lotomamahi ʼaupito ʼi te mālama ʼa Satana pea neʼe gaohi koviʼi nātou, pea ʼe lagi nātou manatu ʼe nātou heʼemaʼa pea ʼe mole feala ke ʼofa age he tahi kia nātou. ʼE lagi feala anai ki he tagata ʼāfea ke palalau fēnei mo ia: ‘Logope la tau ʼui ʼaē ʼe mole tau mo koe te ʼofa ʼa te hahaʼi, kae e feafeaʼi te manatu ʼa Sehova ʼo ʼuhiga mo koe? Kapau neʼe tuku e tatatou Tāmai ʼi selo ke mate tona ʼAlo ʼo foaki he totogi maʼa tatou, neʼe mole koa la ko he fakahā ʼaia ʼo te ʼofa ʼa te ʼAtua kia koe?’​—Soane 3:​16.

11. Koteā te ʼaoga ʼo te ʼu fehuʼi ʼaē ʼe mole maʼua ke tali kiai, pea ʼe tou lava fakaʼaogaʼi feafeaʼi ʼi te ʼu akonaki ki te kaugamālie?

¹¹ Ko te tahi tokoni ʼo ʼuhiga mo te faiakonaki, ʼe ko te fakaʼaogaʼi ʼo te ʼu fehuʼi ʼaē ʼe mole ʼaoga ke tali kiai. Ko te fehuʼi ʼaia ʼe ina uga te fakakaukau. Neʼe tau fai e te kau polofeta ʼo te temi muʼa he ʼu fehuʼi feiā moʼo tokoni ki te hahaʼi ke nātou fakakaukauʼi. (Selemia 18:​14, 15) ʼO toe feiā mo Sesu, neʼe ina fakaʼaogaʼi fakapotopoto te taʼi fehuʼi ʼaia. (Mateo 11:​7-​11) ʼE lelei tāfito te ʼu fehuʼi ʼaia mokā kita faiakonaki ki te kaugamālie. ʼE lagi feala ke kita ʼui pe ki te hahaʼi, ʼe tonu ke tou tauhi ʼaki totatou loto katoa ke leleiʼia tatou e Sehova, kae ʼe lelei age anai mo kapau ʼe kita fai te fehuʼi ʼaenī, ‘Kapau ʼe mole tou fai tatatou tauhi ʼaki totatou loto katoa, ʼe fiafia anai koa ia Sehova?’

12. He koʼe ʼe maʼuhiga ke tou fehuʼi ki te kau ako pe koteā tanatou manatu?

¹² ʼE ʼaoga ke tou fehuʼi kia ia ʼaē ʼe ako pe koteā tana manatu, ke tou ʼiloʼi ai peʼe tui moʼoni ki te ʼu meʼa ʼaē ʼe ina ako. (Mateo 16:13-​16) ʼE lagi tonu anai ʼi tana ʼui ʼaē, ʼe kovi te folonikasio. Kae ʼe lelei ke tou fai age te tahi ʼu fehuʼi ohage la, Koteā tau manatu ʼo ʼuhiga mo te lekula ʼaia ʼa te ʼAtua ʼo ʼuhiga mo te aga ʼaē ʼe lelei ke tou fai? Kia koe la, ʼe fefeka fau koa te lao ʼaia? ʼE maʼuhiga koa ke ke mulimuli ki te ʼu pelesepeto ʼa te ʼAtua?

Ko He ʼu Lea Fakatātā ʼe Malave Ki Te Loto

13, 14. (a) Koteā te faka ʼuhiga ʼo te ʼui ʼaē ke tou fai he palalau fakatā? (b) He koʼe ʼe fua lelei te ʼu palalau fakatā ʼaē ʼe fakapotopoto?

¹³ Ko te tahi puleʼaki ke tou malave ki te loto ʼo te hahaʼi ʼaē ʼe fakalogo mai peʼe ko nātou ʼaē ʼe ako Tohi-Tapu, ʼe ko te fakaʼaogaʼi ʼo he ʼu lea fakatā. Ko te ʼu kupu faka Keleka ʼaē ʼe fakaliliu ʼaki te kupu “folafola fakatā” ʼe faka ʼuhiga ʼi tona ʼaluʼaga moʼoni ki “te fakatahiʼi ʼo meʼa e lua.” Ka koutou fakaʼaogaʼi he faʼifaʼitaki, ʼe koutou fakamahino he meʼa ʼo koutou “fakatahiʼi” mo te tahi manatu ʼe tatau. Ohage la, neʼe fehuʼi fēnei e Sesu: “Pe feafeai anai hatatou fakata te Puleaga o te Atua, pe tou fai anai aki te folafola fakatata fea?” Moʼo tali ki te fehuʼi ʼaia, neʼe talanoa ia Sesu ki te tegaʼi sinape ʼaē neʼe kua māhani kiai te hahaʼi.​—Maleko 4:​30-​32.

¹⁴ Neʼe lahi te ʼu lea fakatātā ʼaē neʼe fakaʼaogaʼi e te kau polofeta ʼa te ʼAtua. ʼI te temi ʼaē neʼe agamālohi ʼaupito ai te kau Asilia, ʼaē neʼe fakaʼaogaʼi e te ʼAtua moʼo tauteaʼi te kau Iselaelite, neʼe fakahā e Isaia tanatou agapauʼu ʼaki te lea fakatātā ʼaenī: “Ko te toki ʼe ina hikihiki anai koa ia ia ke māʼoluga age ia ia ʼaē ʼe ina taʼaga ʼaki te ʼakau, peʼe faiga anai koa e te tutuʼu ke lahi age ia ia ʼaē ʼe ina fakaʼaogaʼi?” (Isaia 10:15) ʼO toe feiā pe mo Sesu, neʼe lahi tana fakaʼaogaʼi te ʼu folafola fakatātā moʼo akoʼi te hahaʼi. Neʼe tohi ʼo ʼuhiga mo ia, “nee akonaki kia natou akipe te u folafola fakatata.” (Maleko 4:​34) ʼE fua lelei te fakaʼaogaʼi ʼo te ʼu palalau fakatātā, heʼe maʼua ai ke kita fakakaukauʼi ʼaki tokita ʼatamai pea mo tokita loto. ʼE feala ai kia nātou ʼaē ʼe fakalogo ke nātou tali he manatu ʼo nātou fakatatau mo he meʼa kua nātou ʼiloʼi.

15, 16. ʼE tou lava hikihiki feafeaʼi te lelei ʼo te ʼu palalau fakatā ʼaē ʼe tou fai? Koutou tuku mai he ʼu faʼifaʼitaki.

¹⁵ ʼE lava feafeaʼi hatatou fakaʼaogaʼi he ʼu lea fakatātā ʼe malave moʼoni anai ki te loto ʼo te hahaʼi? ʼUluaki, ko te lea fakatātā ʼe tonu ke ʼalutahi mo te puani ʼaē ʼe tou fakamahino. Kapau ʼe mole ʼalutahi te lea fakatātā mo te faʼahi ʼaē ʼe tou talanoa kiai, pea ʼe feala ke nenefu ai te fakakaukau ʼo nātou ʼaē ʼe fakalogo, ka mole tokoni anai kia nātou ke nātou mahino. Neʼe faiga e te faiako fakamalotoloto ke ina fakahā te talagafua ʼa te toe ʼa te kau fakanofo kia Sesu Kilisito, ʼo ina fakatatau nātou ki he kiʼi kuli ʼe nofo agatonu ki tona pule. Kae ʼe tau koa mo feʼauga te taʼi faʼahiga fakatātā ʼaia? ʼE fakahā mai e te Tohi-Tapu te manatu ʼaia ʼaki he ʼu palalau ʼe lelei age. ʼE ina fakatatau te toko 144 000 kau fakanofo ʼa Sesu ki “he finemui ohoana nee teuteu ki tona ohoana.”​—Apokalipesi 21:⁠2.

¹⁶ ʼE maʼu he ʼu fua lelei ʼo te ʼu lea fakatātā mokā talanoa ai ki te ʼu meʼa ʼaē ʼe pipiki ki te maʼuli ʼa te hahaʼi. Ko te folafola fakatātā ʼa Natane ʼo ʼuhiga mo te akeno ʼaē neʼe matehi, neʼe malave ki te loto ʼo te Hau ko Tavite, he neʼe tauhi ōvi ʼi tana kei tūpulaga. (1 Samuele 16:​11-​13; 2 Samuele 12:​1-7) Kanapaula neʼe talanoa ia Natane ki he vitulo ʼi tana folafola fakatātā, pea neʼe lagi mole maʼu anai hona fua. ʼE toe feiā aipe, ko te ʼu fakatā ʼaē ʼe fakatafito ki te ʼu meʼa fakapoto lalahi faigataʼa ʼaē ʼe hoko ʼi te natula, pe ki te ʼu meʼa ʼo te hisitolia ʼaē ʼe mole faʼa ʼiloa, ʼe mole lagi faʼa mahino anai kiai te hahaʼi. Neʼe fakatafito e Sesu tana ʼu lea fakatātā ki te ʼu meʼa māhani ʼo te maʼuli. Neʼe talanoa ki te mālama taki, mo te ʼu manulele, pea mo te ʼu fisiʼi teu ʼo te ʼu gāueʼaga. (Mateo 5:​15, 16; 6:​26, 28) Neʼe faigafua kia nātou ʼaē neʼe fakalogo kia Sesu, hanatou mahino ki te ʼu meʼa ʼaia.

17. (a) Koteā ʼaē ʼe feala ke tou fakatafito kiai tatatou ʼu fakatā? (b) ʼE lava feafeaʼi hatatou faka ʼalutahi te ʼu fakatā ʼaē ʼe tuʼu ʼi tatatou ʼu tohi, pea mo te ʼaluʼaga ʼo ia ʼaē ʼe tou akoʼi?

¹⁷ ʼI totatou minisitelio, ʼe lahi te ʼu faigamālie ke tou fakaʼaogaʼi ai he ʼu palalau fakatā faigafua kae fakapotopoto. Tou fakasiosio lelei ki te ʼu meʼa ʼaē ʼi ʼotatou tafaʼaki. (Gāue 17:22, 23) ʼE lagi feala ke fakatafito tatatou palalau fakatā ki te fānau ʼo ia ʼaē ʼe fagono mai kia tatou, pe ki tona loto fale, tana gāue, peʼe ki te ʼu meʼa ʼaē ʼe ina leleiʼia. Peʼe lagi feala ke tou fakaʼaogaʼi te ʼu meʼa ʼaē kua tou ʼiloʼi ʼo ʼuhiga mo ia ʼaē ʼe tou fai tana ako, moʼo faka maʼuhigaʼi te ʼu lea fakatātā ʼaē kua tuʼu ʼi te tohi ʼaē ʼe tou ako mo ia. Ohage la, ko te fakatā ʼaē ʼe tuʼu ʼi te palakalafe 14 ʼo te kapite 8 ʼo te tohi Te ʼAtamai Mālama ʼAē ʼe Ina Taki Ki Te Maʼuli Heʼegata. ʼE talanoa ai ki he tāmai ʼofa pe ko he faʼe ʼe valokiʼi e tona vāhaʼa fale. ʼE lagi lelei hatatou fakakaukauʼi te kiʼi fakatā ʼaia ke feala hatatou fakaʼaoga kia ia ʼaē ʼe ako, mo kapau ʼe maʼu fānau.

Tou Lau Fakalelei Te ʼu Vaega Faka Tohi-Tapu

18. He koʼe ʼe tonu ke tou poto lelei ʼi te lautohi?

¹⁸ Neʼe fai e Paulo te fakaloto mālohi ʼaenī kia Timoteo: “Ke ke agatonu ki te lau o te Tohi tapu, ki te fai’tokoni, mo te faiʼakonaki.” (1 Timoteo 4:​13) Mai tona ʼuhiga ʼaē ʼe fakatafito tatatou faiakonaki ki te Tohi-Tapu, koia ʼe lelei ke tou popoto ʼi te lau ʼo te Tohi-Tapu. Neʼe maʼu e te kau Levite te pilivilesio ʼaē ke nātou lau te Lao Faka Moisese ki te hahaʼi ʼa te ʼAtua. Neʼe nātou faihala tuʼumaʼu koa ʼi tanatou lautohi, pe neʼe kinakina koa tanatou lautohi? Kailoa, heʼe ʼui fēnei e te Tohi-Tapu ia Nehemia 8:8: “Neʼe nātou lau leʼolahi ʼi te tohi, ʼi te lao ʼa te ʼAtua moʼoni, mo nātou fakamatalatala, mo nātou fakahā tona ʼuhiga, pea mo nātou fakamahinohino te meʼa ʼaē neʼe nātou lau.”

19. ʼE tou lava hikihiki feafeaʼi te lelei ʼo tatatou lau ia te Tohi-Tapu?

¹⁹ Ko ʼihi tagata Kilisitiano ʼe nātou popoto ʼi te faiakonaki, ka ʼe nātou tōtō ʼi te faʼahi ʼo te lautohi. ʼE nātou lava tuputupu feafeaʼi ʼi te faʼahi ʼaia? ʼE tonu ke nātou akoako te lautohi. Ei, ʼe tonu ke nātou lau leʼolahi ʼo fai liuliuga, ke faigafua tanatou lautohi. Kapau ʼe maʼu te ʼu foʼi fime ʼo te Tohi-Tapu ʼi takotou lea, pea ʼe lelei ke koutou fakalogo ki te faka maʼuhigaʼi e te tēhina te ʼuhiga ʼo te ʼu kupu pea mo tana puʼaki te ʼu higoa pea mo te ʼu kupu faigataʼa. Kapau ʼe koutou akoako lelei, pea ʼe faigafua anai hakotou puʼaki te ʼu higoa faigataʼa ohage ko Maea-Salale-Hase-Pase.​—Isaia 8:⁠1.

20. ʼE lava feafeaʼi hatatou ‘tokaga ki tatatou faiʼakonaki’?

²⁰ ʼI totatou ʼuhiga hahaʼi ʼa Sehova, ʼe foaki mai kia tatou te pilivilesio ʼaē ke tou faiakonaki! Koia, tou fakahoko fakamalotoloto te maʼua ʼaia. ʼOfa pe ke tou ‘tokaga kia tatou pea mo tatatou faiʼakonaki, o tou kataki i ai.’ (1 Timoteo 4:​16) ʼE feala ke tou faiva ʼi te faiakonaki mo kapau ʼe tou fakalogo fakalelei, mo tou faiga ke faigafua tuʼumaʼu tatatou ʼu palalau, mo tou fai he ʼu fehuʼi fakapotopoto, mo tou fakaʼaogaʼi te ʼu folafola fakatā, pea mo tou poto lelei ʼi te lau ʼo te Tohi-Tapu. ʼOfa pe ke fua lelei kia tatou te ʼu tokoni ʼaē ʼe fai mai e Sehova ʼaki tana kautahi, heʼe feala ke tou maʼu ai “te lea ʼo nātou neʼe akoʼi.” (Isaia 50:4) Kapau ʼe tou fakaʼaogaʼi fuli te ʼu tokoni ʼaē ʼe foaki mai moʼo fakahoko totatou minisitelio, ʼo kau ai mo te ʼu kaupepa, te ʼu foʼi fime, pea mo te ʼu fime viteo, pea ʼe feala anai ke tou akoʼi ʼaki te fakasiosio poto pea ʼe tou fakalotoʼi anai te hahaʼi ke nātou tui.

ʼE Kei Koutou Manatuʼi Koa?

◻ Kapau ʼe tou fakalogo fakalelei, ʼe tokoni feafeaʼi anai te faʼahi ʼaia ki tatatou faiakonaki?

◻ ʼE tou lava faʼifaʼitakiʼi feafeaʼi ia Paulo pea mo Sesu ʼi tanā faiga ʼaē ke faigafua tanā faiakonaki?

◻ Koteā te ʼu fehuʼi ʼaē ʼe feala ke tou fai moʼo akoʼi te hahaʼi?

◻ Koteā te faʼahiga fakatā ʼaē ʼe fua lelei tāfito?

◻ ʼE tou lava hikihiki feafeaʼi te lelei ʼo tatatou lautohi ia muʼa ʼo te hahaʼi?

[Paki ʼo te pasina 16]

Ko he faiako faiva ʼe fakalogo muʼa ke ina maʼu te fakasiosio poto

[Paki ʼo te pasina 18]

Neʼe fakaʼaogaʼi e Sesu te ʼu meʼa māhani ʼo te maʼuli moʼo fai ʼaki tana ʼu lea fakatātā