Te ʼu Puani e Tolu Ke Lelei Age Takotou Faiako
1. He koʼē ʼe tonu ke tou faiga ke lelei age tatatou faiako?
1 Ko te kau fai fakamafola fuli ʼe natou faiako. ʼI tatatou ʼuluaki felāveʼi mo te hahaʼi, ʼo tou toe liliu ʼo ʼaʼahi ia nātou, peʼe fai he ako Tohi-Tapu, ʼe tou fakatuʼutuʼu ke tou vaevae ia te logo. Pea ko te logo ʼaē ʼe tou akoʼi ki te hahaʼi ʼe ko he meʼa makehe ia. ʼE tou fakamahino lelei ia ‘te Tohi-Tapu,’ ʼaē ʼe feala ai ki te hahaʼi, ke “poto, ʼo ʼuhiga mo te haofaki.” (2 Tim. 3:15) ʼE ko he gāue fakaofoofo ia! ʼE tou vakaʼi ia te ʼu puani ʼaenī e tolu ke lelei age tatatou faiako.
2. ʼE lava faigafua feafeaʼi tatatou fai ako?
2 Te Mahino Gafua: Kā tou mahino lelei ki he akonaki, pea ʼe faigafua pē ke galo kiā kita, ko te akonaki ʼaia ʼe faigataʼa tona mahino ki ʼihi. Koia, mokā ʼe tou fai he ako Tohi-Tapu, ʼaua naʼa tou hilifaki kiai he ʼu manatu ʼe mole ʼi ai hona ʼaoga. Kae, ʼe tou fakahā tāfito ia te ʼu puani ʼaē ʼe maʼuhiga. ʼE mole ko ia ʼaē ʼe lahi ʼana palalau ʼaē ʼe faiako lelei. (Taag. 10:19) ʼI te agamāhani, ʼe tonu ke tou lau pē ia te ʼu vaega ʼaē ʼe maʼuhiga. ʼI te kua ʼosi lau ia he vaega, kotou vakaʼi pē ia te manatu ʼaē neʼe kotou palalau kiai. Ko te Akonaki ʼi te Moʼuga, ʼaē ʼe tuʼu ʼi te ʼu kāpite 5 ki te 7 ʼo Mateo, ʼe maʼu ai ia te ʼu moʼoni ʼe loloto ʼaupitō. Kae neʼe fai akonaki ia Sesu ʼaki te mahino gafua pea ʼaki pē he ʼu palalau nounou neʼe ina filifili lelei.
3. He koʼē ʼe maʼuhiga ia te ʼu fakatā, pea ko te ʼu fakatā fea ʼaē ʼe fua lelei?
3 Te ʼu Fakatā: Ko te ʼu fakatā ʼe ina uga ia te fakakaukau, ʼe malave ki te loto, pea ʼe tokoni ke tou tāʼofi lelei ia te ʼu manatu. ʼE mole tonu ke kotou liliu ko he tahi ʼe fai fakamatala hisitolia ke feala ai hakotou foaki he ʼu fakatā ʼe lelei. Neʼe tau fakaʼaogaʼi e Sesu ia te ʼu fakatā ʼe nounou, pea mo mahino gafua. (Mat. 7:3-5; 18:2-4) ʼE toe feala ke kotou fakaʼaogaʼi he ʼu pāki ʼe mahino gafua neʼe fai ki he moʼi pepa. Kapau ʼe kotou teuteu lelei, ʼe faigafua anai hakotou foaki he ʼu fakatā ʼe fua lelei.
4. ʼE feafeaʼi hatatou fakaʼaogaʼi fakalelei ia te ʼu fehuʼi?
4 Te ʼu Fehuʼi: Ko te ʼu fehuʼi ʼaē ʼe ina uga ia takotou ako ke fakakaukau. Koia, kotou talitali muʼa mokā fai ia he fehuʼi. Kapau ʼe kotou tuku fakavilivili age ia te tali, ʼe mole kotou ʼiloʼi moʼoni anai pe koteā ʼaē neʼe mahino kiai ia takotou ako. Kapau ʼe hala tana ʼu tali, ʼaua naʼa kotou fakatonutonuʼi. ʼE lagi lelei age ke kotou fai he tahi atu ʼu fehuʼi ke ina maʼu tokotahi ia te ʼu tali ʼaē ʼe tonu. (Mat. 17:24-27) ʼE mahino papau ia, ʼe mole ʼi ai he tahi iā tātou ʼe faiako lelei ʼosi. Koia, ko te Tohi-Tapu ʼe ina fakalotomālohiʼi tātou ke tou tōkakaga tuʼumaʼu ki tatatou faiako. ʼAki tatatou faʼahiga fai ʼaia, ʼe tou maʼu ai anai he ʼu fua lelei ʼo heʼegata kiā tātou, pea mo nātou ʼaē ʼe fakalogo mai kiā tātou.—1 Tim. 4:16.