“Kotou Mulimuli Lelei Ki Tona ʼu Tapugā Vaʼe”
1. ʼE feafeaʼi hatatou liliu ko he ʼu minisi ʼe faiva?
1 Neʼe mole ako ia Sesu ʼi he ʼu faleako ʼa te kau Lapi, kae neʼe ko te Minisi ʼa Sehova ʼaē neʼe lahi tokotahi ʼi te hisitolia. Meʼa lelei foki he neʼe tohi te ʼu fakamatala ʼo te minisitelio ʼo Sesu pea mo taupau ke ʼaoga kiā tātou. Ke feala hatatou liliu ko he kau Minisi ʼa Sehova ʼe fua lelei tatatou gāue, ʼe tonu ke tou ‘mulimuli lelei ki tona ʼu tapugā vaʼe.’—1 Pet. 2:21.
2. Koteā ʼaē kā tokoni mai anai ke tou maʼu ia te taʼi ʼofa ʼaē neʼe maʼu e Sesu ki te hahaʼi?
2 Tou Fakahā Totatou ʼOfa Ki Te Hahaʼi: Neʼe tokaga ia Sesu ki te hahaʼi he neʼe ʼofa kiā nātou. (Mko. 6:30-34) Tokolahi ʼi totatou telituale ʼe natou “mamahi” pea ʼe ʼaoga lahi kiā nātou ia te moʼoni. (Loma 8:22) Kapau ʼe tou fakakaukauʼi tonatou ʼaluʼaga faigataʼa pea mo te tokaga ʼofa ʼa Sehova ʼaē kiā nātou, pea ʼe ina uga ai anai tātou ke tou faʼafai ʼi te fai fakamafola. (2 Pet. 3:9) Tahi ʼaē meʼa, ʼe lahi anai ia te fia logo ʼa te hahaʼi mo kapau ʼe natou tokagaʼi ʼe tou tōkakaga moʼoni kiā nātou.
3. Ko te ʼu lakaga fea ʼaē neʼe fai fakamafola ai ia Sesu ki te hahaʼi?
3 Tou Fai Fakamafola ʼi Te ʼu Temi Faigamālie Fuli Pē: Neʼe fakaʼaogaʼi e Sesu ia te ʼu faigamālie fuli pē moʼo fakamafola ia te logo lelei ki te hahaʼi. (Mat. 4:23; 9:9; Soa. 4:7-10) ʼO toe fēia pē, ʼe tou fia nofo teuteu moʼo fakahā ia te moʼoni ʼi te temi fuli pē ʼo totatou maʼuli. Ko ʼihi ʼe feʼoloʼaki pē mo tanatou Tohi-Tapu peʼe ko he ʼu nusipepa, ke feala ai hanatou fai fakamafola ʼi te fale gāue, ʼi te faleako, kā natou fai folau pea mo faifakatau, pea ʼi te tahi age ʼu faʼahi.
4. Koteā ʼaē ʼe tonu ke tou fai ke liliu ia te Puleʼaga ko te kupu tāfito ʼo tatatou fai fakamafola?
4 Tou Palalau Tāfito Ki Te Puleʼaga: Ko te kupu tāfito ʼo te fai fakamafola ʼa Sesu neʼe ko te logo lelei ʼo te Puleʼaga. (Luka 4:43) Logopē lā ʼe mole lagi tou palalau ʼi tatatou ʼu ʼuluaki palalau ki te Puleʼaga, kae ʼaua naʼa galo kiā tātou ʼe tonu ke tou tokoni kiā ia ʼo te loto fale ke mahino ki te ʼaoga ʼo te Puleʼaga. Tatau aipē pe tou talanoa ki te ʼu ʼaluʼaga fakaʼofaʼofa ʼo te mālamanei ʼaē ko he fakamoʼoni ʼaia kua tou māʼuʼuli nei ʼi te ʼu ʼaho fakamuli, kae ʼe tou tokaga tāfito pē anai ʼo “tala te ʼu logo lelei ʼo te ʼu meʼa lelei.”—Loma 10:15.
5. Ke fua lelei ia tatatou minisitelio,ʼe tonu ke tou fakaʼaogaʼi feafeaʼi ia te Tohi-Tapu?
5 Tou Falala Ki Te Folafola ʼa Te ʼAtua: Lolotoga ia te minisitelio ʼa Sesu, neʼe ina fakaʼaogaʼi tuʼumaʼu ia te Tohi-Tapu ʼi tana faiakonaki. Neʼe mole ina akonakiʼi he ʼu meʼa ʼaki tana ʼu manatu ʼa ia totonu. (Soa. 7:16, 18) Neʼe ko tana meʼa kai ko te Folafola ʼa te ʼAtua pea mo ina maʼuliʼi moʼo puipui ʼo ia mai te ʼu fakahala ʼa Satana. (Mat. 4:1-4) Ke feala hatatou ako fakalelei niʼihi, ʼe tonu ke tou lau ia te Tohi-Tapu ʼi te ʼaho fuli pea mo tou maʼuliʼi takitokotahi. (Loma 2:21) Kā tou tali ki he ʼu fehuʼi ʼe lagaʼi mai ʼi te minisitelio, pea ʼe tonu ke tou fakahā ia he ʼu vaega Tohi-Tapu moʼo fakamoʼoni ʼaki te ʼu meʼa ʼaē ʼe tou palalau kiai pea mo tou lau fakahagatonu age ʼi te Tohi-Tapu ʼi te temi ʼaē ʼe fealagia ai. ʼE tou loto anai ke sio ia te tagata ʼo te loto fale ʼe mole tou fakahā age ia tatatou manatu ʼa tātou totonu kae ʼe fakatafito tatatou ʼu palalau ki te ʼu manatu ʼa te ʼAtua.
6. Koteā ʼaē neʼe fai e Sesu ke malave tana ʼu faiakonaki ki te loto ʼo nātou ʼaē ʼe fakalogo age?
6 Ke Malave Ki Te Loto Ia Takotou Faiakonaki: “ ʼE mole heʼeki ʼi ai he [tahi age] tagata kua palalau fēia.” (Soa. 7:46) Ko te ʼui ʼaia ʼa te kau ofisie ʼo ʼuhiga mo Sesu, ʼi te temi ʼaē neʼe fehuʼi ai te kau pelepitelō pea mo te kau Faliseo pe koʼē neʼe mole natou lava puke ia Sesu. Kā faiakonaki Sesu neʼe ina faigaʼi ke malave ki te loto ʼo nātou ʼaē neʼe ina akoʼi. (Luka 24:32) Neʼe fakaʼaogaʼi e Sesu ia te ʼu ʼaluʼaga ʼe māhani kiai te hahaʼi moʼo tokoni kiā nātou ke natou mahino ki te ʼu meʼa ʼaē ʼe palalau age kiai. (Mat. 13:34) Neʼe mole ina fakamāfasia ia nātou ʼaē neʼe fakalogo age ʼaki he ʼu tuʼuga fakamatala. (Soa. 16:12) Neʼe ina faigaʼi ke tokagaʼi ia Sehova kae mole ko ia totonu. Ohagē ko Sesu, hoki tou liliu ko he kau faiako lelei mo kapau ʼe tou ‘tōkakaga tuʼumaʼu ki tatatou faiakonaki.’—1 Tim. 4:16.
7. He koʼē neʼe faʼa kātaki ia Sesu ʼi te minisitelio?
7 Tou Faʼa Kātaki Logolā Te Lotonoa Pea Mo Te Fakafeagai: Logolā neʼe fai e Sehova ia te ʼu gāue fakaofoofo, kae tokolahi neʼe mole natou fakalogo ki ai. (Luka 10:13) Māʼiapē lā mo ʼihi ʼi te fāmili totonu ʼo Sesu, neʼe natou ʼui “kua ʼuluvale ia.” (Mko. 3:21) Kae neʼe faʼa kātaki aipē ia Sesu. Neʼe ina taupau ia he manatu ʼe lelei koteʼuhi neʼe tui papau ʼe nofo ia mo te moʼoni ʼaē ʼe feala ke ina fakaʼāteaina ia te hahaʼi. (Soa. 8:32) ʼAki te tokoni ʼa Sehova, ʼe tou toe lotomālohi foki ke ʼaua naʼa tou lotovaivai.—2 Ko. 4:1.
8, 9. ʼE feafeaʼi hatatou faʼifaʼitakiʼi ia Sesu ʼo tou fai he ʼu sākilifisio ʼuhi ko te logo lelei?
8 ʼE ʼAoga Ke Tou Fai He ʼu Sākilifisio Ke Lahi Tatatou Kau Ki Te Minisitelio: Neʼe sākilifisioʼi e Sesu tona maʼuli fīmālie ʼuhi ko te minisitelio. (Mat. 8:20) ʼI te temi fuli pē neʼe fai fakamafola ai, pea ʼi ʼihi temi neʼe moe tauhala ai. (Mko. 6:35, 36) Neʼe ʼiloʼi e Sesu ʼe fakatuʼakoi pē tona temi ʼaē ke fakahoko ai tana gāue. ʼI te “kua nounou te temi,” ʼe tonu foki mo tātou takitokotahi ke tou sākilifisioʼi ia totatou temi, totatou mālohi pea mo totatou ʼu fealagia, ʼo tou mulimuli ki te faʼifaʼitaki ʼa Sesu.—1 Ko. 7:29-31.
9 Ko te kau Kilisitiano ʼo te ʼuluaki sēkulō neʼe ko he kau minisi faiva koteʼuhi neʼe akoʼi nātou e Sesu. (Gāue 4:13) ʼE feala foki mo tātou ke tou fai ia tatatou minisitelio kātoa mo kapau ʼe tou faʼifaʼitakiʼi ia te hisitolia ʼo te Minisi lahi tokotahi.—2 Tim. 4:5.